ހޫނުގަދަ މޫސުމުގައި ބޭރަށް ނުކުމެ އުޅޭއިރު މީހާގެ ހަށިގަނޑަށް ވަރަށް ބޮޑަށް ސަމާލުކަންދޭންޖެހެއެވެ. އެއީ ކޮންމެ އުމުރެއްގެ މީހެއް ކަމަށް ވިޔަސް އެކަމަށް ސަމާލުކަން ދޭންޖެހޭ މިންވަރު ބޮޑެވެ. އިންސާނާގެ ހަށިގަނޑަށްވާ ހޫނުގެ ސަބަބުން ސިއްހީގޮތުން ނުރައްކާވެދާނެއެވެ. ހީޓް ސްޓްރޯކްގެ ވާހަކައަކީ ބައެއް މީހުންނަށް އާވާހަކައަކަށް ވެދާނެއެވެ. ނޫންނަމަ އެއީ އެހާ ސީރިއަސް ކަމެއްގެ ގޮތުގައި ނުދެކިދާނެއެވެ. ހޫނުގަދަ މޫސުމުގައި ހީޓް ސްޓްރޯކް ޖެހުމަށް ފުރުސަތު ހުޅުވިގެންދެއެވެ. ހީޓް ސްޓްރޯކަކީ ވަރަށް ނުރައްކާތެރި އެއްޗެކެވެ. ހީޓް ސްޓްރޯކެއްގައި ހަށިގަނޑުގެ ހޫނުމިން 40 ޑިގްރީ ސެލްސިއަސް އަށް ދެއެވެ. ހީޓް ސްޓްރޯކް ޖެހިއްޖެނަމަ އެމަޖެންސީ ހާލަތުގައި ހޮސްޕިޓަލަށްގޮސް ފަރުވާ ހޯދަންޖެހެއެވެ.
ހީޓް ސްޓްރޯކްގެ ސިގްނަލްތަކަށް ބަލާއިރު:
- މީހާ ގައިން ވަރުދޫވުން
- ބޯއަނބުރާ ހޮޑުލަވާގޮތްވުން
- އާދަޔާޚިލާފަށް ބޮޑަށް ކަރުހިއްކަންފެށުން
- ބޮލުގައި ރިއްސުން
- ހަށިގަނޑުގެ ހޫނުމިން 40 ޑިގްރީއަށްވުރެ މައްޗަށް ދިއުން
ހީޓް ސްޓްރޯކަކީ ފަރުވާ ކުޑަކޮށްލާވަރަށްވުރެ ސީރިއަސް ހާލަތަކަށް ހިގައިދާނެ ކަމެކެވެ. މިއީ ހުރިހާ އުމުރުފުރާއަކަށްވެސް ދިމާވެދާނެ ކަމެކެވެ. އެހެންނަމަވެސް މިކަން ދިމާވުމުގައި ވިސްނަންވީ ކުޑަކުދިން، އުމުރުން ދުވަސްވީ މީހުން، ބަލިމީހުން އަދި ދުވާލުގެ އަވީގައި އަބަދު މަސައްކަތް ކުރާމީހުންނެވެ. އަދި ޚާއްސަކޮށް އަވީގައި ކުޅިވަރު އެއްޗެހި ކުޅެން އުޅޭ ކުދިންނެވެ. 'އެންޑިރުސް އިންސިޓިޓިއުޝަންސް ފޯ އޮތޮޕިޓިކްސް އެންޑް ސްޕޯޓްސް މެޑިސިން'ގެ ޑޮކްޓަރ 'އެމްޑީ ޓްރޮއި ސްމްރަވާ' ވިދާޅުވަނީ ކޮންމެ އަހަރެއްގެވެސް އެޕްރީލް މަހުން ފެށިގެން ޖުލައިމަހާ ހަމައަށް ހޫނު އެހާ މައްޗަށް ދާއިރު ކުޑަކުދިންނަށް މިކަމުގެ ސަބަބުން ހީޓް ސްޓްރޯކް ޖެހުމުގެ ނުރައްކާ ބޮޑުވެފައި އެކުދިންގެ ހާލު ސީރިއަސްވެގެންދެއެވެ. ކުޑަކުދިންނަކީ ގިނަވަގުތު ބޭރުގައި ދުވެ ސަކަރާތްޖަހަން ބޭނުންވާ ކުދިންނަށްވާއިރު އެކުދިން އަމިއްލައަށް ފެންބޮއި އަދި ހޫނުގެ އިހްސާސް އަމިއްލައަށް ދެނެގަނެވޭނެ ކުދިންނެއް ނޫނެވެ. މިކަންކަމާއިމެދު ބެލެނިވެރިން ވަރަށް ބޮޑަށް ސަމާލުވާންޖެހެއެވެ. ހާއްސަކޮށް ހަށިގަނޑުން ތަންކޮޅެއް ފަލަކޮށް ތިބޭ ކުދިންނަށް މިކަންދިމާވުމުގެ ފުރުސަތު ބޮޑެވެ. ސިއްހީ މައްސަލަތަކުގައި ބޭސްކާ ކުދިންނާއި ހަމުގެ މައްސަލަ ހުންނަ ކުދިންނަށްވެސް ސަމާލުކަންދޭން ޖެހެއެވެ.
ހީޓް ސްޓްރޯކް ޖެހުމުން އަމަލުކުރަންވީގޮތް:
1- ވަގުތުން ހިޔަލަށް ގެނެސް ނުވަތަ ފިނިތަނަކަށް ގެނެސް ހަށިގަނޑުގައި ހުރި ހޫނު ފިނިކުރުން
2- ލައިގެން ހުރި އެއްޗެހި ބާލާފައި ހަށިގަނޑު ފިނިކުރަން ވަގުތުކޮޅެއް ދިނުން
3- ތަނެއްގައި ބާއްވާލުމަށްފަހު މަޑުމަޑުން ދެފައިމައްޗަށް ނެގުން
4- މިކަންކަމުން ބަދަލެއް ނައިސްފިނަމަ ތާފަނާފެނުން ފެންވަރުވާލުމަށްފަހު ފެނަށް ފައިލައިފައި ބޭންދުން
5- މަޑުމަޑުން ދިޔާއެއްޗެހި ދިނުން
މިކަންކަމަށް ސަމާލުކަންދީގެން ބަދަލެއް ނުފެނިއްޖެނަމަ ލަސްނުކޮށް ހޮސްޕިޓަލަކަށް ނުވަތަ ސިއްހީ މަރުކަޒަކަށް ގެންދަންވާނެއެވެ. އަދި ތިރީގައިވާ ކަންކަން ކުއްޖާއަށް ކިޔާދިނުން މުހިއްމެވެ.
1- ބޭރުގައި ގިނަވަގުތު އުޅޭނަމަ ފެން އަދި ދިޔާއެއްޗެހި ބޭނުންކުރުމުގެ މުހިއްމުކަން ކުދިންނަށް ކިޔާދިނުން. އަދި ކުޅެއުޅޭއިރު ދިޔާއެއްޗެހި ބޭނުން ނުކޮށްފިނަމަ ދިމާވެދާނެ ކަންކަން ކިޔާދިނުން
2- ހޫނު މޫސުމުގައި ބޭރަށްދާއިރު އަލިކުލަތައް އަދި ތަންކޮޅެއްތުނި ހެދުން ބޭނުންކުރަންޖެހޭނެކަން ކުޑަކުދިންނަށް ކިޔައިދީ މިކަމަށް ބޮޑެތި މީހުންވެސް ސަމާލުވުން
3- ބޭރުގައި ކުޅެން އުޅޭނަމަ އިރުކޮޅަކާ ހިޔަލަށްގޮސް އަރާމުކޮށްލަންޖެހޭނެކަން ކިޔާދިނުން ނުވަތަ އެކަންކަން ކުރުމަށް މައިންބަފައިން ސަމާލުކަން ދިނުން
4- ސަންސްކްރީން ބޭނުންކުރުން އަދި ކުޑަކުއްޖެއްނަމަ އެކުދިންގެ ގައިގައިވެސް ސަންސްކްރީން އާއި ސަން ލޯޝަން އުނގުޅުން
5- އުމުރުން 10 އަހަރުން ދަށުގެ ކުއްޖެއްނަމަ އެކަނި އަވީގައި ކުޅެން ނުބެހެއްޓުން
6- މާބޮޑަށް ހޫނުގަދަވެ ބޯއަނބުރާކަހަލަ ކަމެއް ދިމާވާނަމަ ވަގުތުން ހިޔަލަށް އައިސް މަޑުކޮށްލުން
މައުލޫމާތު: ޗިލްޑްރަންސް.ކޮމް، ކިޑްސް ހެލްތް.އޯއާރ
