މާތް ﷲ ގެ ޙަޟްރަތުގައި އެންމެ ލޮބވެތިވެގެންވާ މައްސަރުތަކަކީ ޙުރުމަތްތެރިވެގެންވާ މައްސަރުތަކެވެ. އެއީ ރަޖަބުމަހާއި، ޛުލްޤައިދާމަހާއި، ޛުލްޙިއްޖާމަހާއި އަދި މުޙައްރަމު މަހެވެ. އޭގެތެރެއިން ވެސް އެންމެ ލޮބުވެތިވެގެންވާ މައްސަރަކީ ޙައްޖު މަހެވެ. ޙައްޖުމަހުގެ ފުރަތަމަ ދިހަ ދުވަހަކީ އެމަހުގެ އެންމެ މާތް ދުވަސްތަކެވެ. ދުނިޔެއަށް އަންނަ އެންމެ މާތް ދުވަސްތަކަކީ ޙައްޖުމަހުގެ ފުރަތަމަ ދިހަ ދުވަހެވެ.
އަހަރެމެންގެ މި ކުރު ހަޔާތުގައި ހެޔޮކަމުގެ މާތް މޫސުންތައް، ގިނަގުނަ ދަރުމަޔާއި ޘަވާބު ލިބޭނޭ ގޮތުން، ތަކުރާރުވާގޮތެއްގައި މާތް ﷲ ލައްވާފައިވުމީ، އެކަލާނގެ އޯގާވަންތަ ކަމާއި ރަޙްމަތްވަންތަކަމުގެ ބޮޑުކަން ހާމަވެގެންދާ ކަމެކެވެ. ބަރަކާތްތެރި ރަމަޟާންމަހުގެ ހަނދާންތައް ފިލައިނުދަނީސް އަހަރެމެންނާއި ކުރިމަތިވަމުން މިއަންނަނީ ދުނިޔެއަށް އަންނާނޭ އެންމެ މާތް ދުވަސްތަކެވެ. ހެޔޮޢަމަލު ކުރުމަށް މާތް ﷲ އެންމެ ލޯބިވެވޮޑިގަންނަވާ ދުވަސްތަކެވެ.
މި ދުވަސްތަކަކީ ދުނިޔެއަށް އަންނަ އެންމެ ހެޔޮ ދުވަސްތަކަށް ވުމުގެ ސަބަބެއް ކަމުގައި ޢިލްމުވެރިން ބަޔާން ކުރައްވަނީ އެންމެ މަތިވެރި ހެޔޮ ޢަމަލުތައް މި ދުވަސްތަކުގައި ޖަމާވެގެންދާތީއެވެ. ނަމާދާއި ރޯދައާއި ސަދަޤާތާއި ޙައްޖުގެ މަތިވެރިއަޅުކަން ޖަމާވެގެން އަންނާތީއެވެ. އެހެންކަމުން މިދުވަސްތަކުގެ ބޭނުން ހެޔޮގޮތުގައި ހިފުމަށްޓަކައި ހެޔޮ ޢަމަލުކުރުމަށް އަވަސްވެގަންނާށެވެ.
އެންމެ ފުރަތަމަ ކަމަކަށް ތެދުވެރި އިޚްލާސްތެރި ތައުބާއަކުން މިދުވަސްތައް ފަށާށެވެ. ތަޢުބާވާ އަޅުންދެކެ މާތް ﷲ ލޯބިވެ ވޮޑިގަންނަވައެވެ. އަދި ތައުބާވުމަކީ އެންމެ ގިނައިން ކީރިތި ޤުރުއާނުގައި ގޮވާލައްވާފައިވާ އެއް ކަންތަކެވެ.
މިދުވަސްތަކުގައި ކުރެވެންއޮތް އެންމެ ހެޔޮ އަމަލުތަކުގެ ތެރޭގައި ރޯދަހިފުން ހިމެނެއެވެ. ޚާއްސަކޮށް ހައްޖުމަހުގެ ނުވަވަނަ ދުވަހުގެ ރޯދައިގެ ޘަވާބާއި ދަރުމަ މަތިވެރިވެގެންވެއެވެ. ރަސޫލާ ﷺ ގެ ޙަދީޡް ބަސްފުޅުގައި ވަނީ އެދުވަހުގެ ރޯދައަކީ ވޭތުވެދިޔަ އަހަރާއި އަންނާން އޮތް އަހަރުގެ ފާފަތައް ފުއްސަވާނެ ރޯދައެއް ކަމުގައެވެ. މި ދުވަސްތަކުގައި ކުރެވޭނޭ ހެޔޮ ޢަމަލުތަކުގެ ތެރޭގައި ތަކްބީރާއި ތަސްބީޙަ ކިޔައި މާތް ﷲ ގެ މަތިން ހަނދުމަކުރުން ހިމެނެއެވެ. އެހެނީ ކީރިތި ޤުރުއާނުގައި މިދުވަސްތައް ސިފަ ކުރައްވާފައިވަނީ ޛިކުރުކޮށް އުޅޭ ދުވަސްތަކެއްގެ ގޮތުގައެވެ. މި ދުވަސްތަކުގެ ބޭނުން ހެޔޮގޮތުގައި ހިފުމަށްޓަކައި މިދުވަސްތަކުގައި ގިނަގިނައިން ސަދަޤާތް ކުރުމަކީވެސް މަތިވެރިވެގެންވާ އަޅުކަމެކެވެ. އުޟުޙިޔާ ކަތިލުމަކީވެސް މި ދުވަސްވަރު ކުރުމަށް ޝަރުޢުގައި ކަނޑައަޅުއްވާފައިވާ ހެޔޮ ޢަމަލެކެވެ. ގަދަވެގެންވާ ސުންނަތެކެވެ. އުޟުހިޔާގެ ގޮތުގައި ކަތިލެވޭނީ ނަޢަމްސޫފީގެ ބާވަތްތަކުގެ ތެރެއިން ބާވަތެކެވެ. ޢީދު ނަމާދުގެ ފަހުން ފެށިގެން އައްޔާމުއްތަޝްރީޤުގެ ފަހު ދުވަހާއި ހަމައަށް މިކަމުގެ ވަގުތު ތަނަވަސް ވެގެން ވެއެވެ.
މިދުވަސްތަކުގައި ކުރެވޭނެ އެންމެ ހެޔޮ ޢަމަލަކީ ޙައްޖުގެ މަތިވެރި އަޅުކަން އަދާކުރުމެވެ. އިސްލާމްކަމުގެ ރުކުންތަކުގެ ތެރޭގައި ހިމެނޭ ފަސްވަނަ ރުކުން ފުރިހަމަކުރުމެވެ. މި މަތިވެރި ދުވަސްތަކުގެ ބޭނުން ފުރިހަމަގޮތުގައި ހިފުމަށްޓަކައި ފަރުޟު ނަމާދުތަކަށް ފަރުވާތެރިވުމާއި ރަވާތިބު ސުންނަތްތަކަށް ރައްކާތެރިވުމާއި، ކީރިތި ޤުރުއާން ކިޔެވުމާއި، ޤުރުއާނާއިމެދު ވިސްނައި ފިކުރު ކުރުމާއި ގިނަގިނައިން މާތް ﷲ ގެ ޙަޟްރަތުގައި ދުޢާ ދެންނެވުމާއި ރޭއަޅުކަން ކުރުންފަދަ ކަންކަމަށް ޚާއްސަ ސަމާލުކަމެއްދީ ހެޔޮކަންކަމުގައި ޝާމިލުވެ އެކަންކަމުގައި ދެމިހުރެވޭތޯ ބަލާށެވެ.
ހައްޖުމަހުގެ މަތިވެރި ދުވަސްތަކުގެ ބޭނުން ހެޔޮގޮތުގައި ހިފުމަށްޓަކައި މި ދުވަސްތަކުގައި ނުބައިކަންކަމާއި ދުރުހެލިވުމަކީ ވަރަށް މުހިންމު ކަމެކެވެ. ހެޔޮކަންކަމަކީ މީހާއަށް ﷲ ގެ ރަޙްމަތާއި ނިޢުމަތްތައް ލިބުމުގެ ސަބަބެއްކަމުގައި ދަންނަންޖެހެއެވެ. ހަމައެފަދައިން ފާފަތަކަށް އަރައިގަތުމަކީ ﷲ ގެ ރަޙްމަތުން ދުރުކުރެވި ނިޢުމަތްތަކުން މަޙްރޫމު ވެދާނޭ ސަބަބެއްކަމުގައި ހަނދާންކުރަން ޖެހެއެވެ. ފާފަތަކަށް އަރައިގަތުމާއި، ނެތިމޮށުމާއި، ދެބައޮޑުވުމާއި، ދޮގުހެދުމާއި، އަރާރުންވުމާއި، މަލާމާތްކުރުމާއި، ފުރައްސާރަކުރުމާއި، ބާޠިލު ވާހަކަ ދެއްކުމާއި އަދި ފިތުނަ އުފައްދައި ފަސާދަ ކުރުންފަދަ އެންމެހައި ނުބައިކަންކަމުން ދުރުހެލިވެތިބޭ ބަޔަކަށް ވާށެވެ!
މައުލޫމާތު: ހުކުރުޚުތުބާ
