ގިނަދުވަހު ފަރުވާ ދެމިގެންދާފަދަ ބައްޔަކަށް ފަރުވާކުރަމުންދާ މީހަކު ބަލަމުން ދިޔުން، މިއީ ލޯބިވާ އާއިލާގެ މީހަކަށް ވީނަމަވެސް، ގާތް ރަހުމަތްތެރިއެއްކަމުގައި ވިޔަސް، އެޒިންމާ ނަގަނީ ހެޔޮހިތުން އަމިއްލައަށް ހިލޭސާބަހަށް އެކަން ކޮށްދޭހިތުން ކޮށްދިނުމުގެ ގަސްތުގައެވެ. ތިބާތީ ކޮންމެސަބަބަކާހުރެ ނަމަވެސް މިފަދަ ޒިންމާއެއް ނަގައިގެން އަދާ ކުރާނަމަ މިފަދަ ކަމަކުން ލިބޭނޭ ހިތްހަމަޖެހުމާ ދަރުމަ އެނގޭނެއެވެ. ނަމަވެސް މިފަދަ ކަމަކާ ކުރިމަތިލަނީ ހިތްވަރާއެކު ހެޔޮނިޔަތުގައި ކަމުގައިވިޔަސް، ތަފާތު ޖިސްމާނީ އަދި ނަފްސާނީ ދަތިތަކާ (ތަކުރާރުކޮށް) ކުރިމަތި ކުރުވައެވެ. އަދި މިފަދަ މަސްއޫލިއްޔަތަކީ ގިނަފަހަރަށް ސައުވީސް ގަޑިއިރުގެ މަސްއޫލިއްޔަތެވެ.
މިފަދަ ވަޒީފާއެއް ތަކުރާރުކޮށް އަދާކުރަމުން ގޮސް ކުރިއަށްދާނެ ގޮތްހުސްވެ ވަރުބަލިވުމަށް "ކެއަރގިވަރ ސްޓްރެސް ސިންޑްރޯމް" ނޫނީ "ބާރން އައުޓް" ގެ ނަން ދެވިފައިވެއެވެ.
ތިރީގައި ބަޔާންކުރެވިފައިވާ ނުކުތާތަކަކީ މިފަދަ "ބާރން އައުޓް" އަކުން ސަލާމަތްވުމަށް ދުރާލާ ކުރެވިދާނެ ކަންކަމެވެ.
އެހީ ހޯދުން:
ގިނަފަހަރު އެހެންމީހުންގެ އެހީއަށް އެދުމަކީ ދަތިކަމަކަށް ވެދާނެއެވެ. މިފަދައިން ޖެހިލުންވަނީ ގިނަފަހަރު އަނެކާ މިކަމާ ދޭތެރޭ ވިސްނާނެގޮތަކާމެދު ޔަގީން ނުވާތީކަމަށް ވެދާނެއެވެ. އެހެންކަމުން އެހެން މީހުންގެ އެހީއަށް އެދުމުގެ ކުރިން، އެހީއަށް ބޭނުންވާ ކަންކަމުގެ ލިސްޓެއް ތަރުތީބުކުރުމަށްފަހު (އާއިލާ އަދި ގާތް ތިމާގެމީހުންނާ) ހިއްސާކުރާށެވެ. މިގޮތަށް ކަންކަން ތަރުތީބުކުރުމުން އަމިއްލައަށް އަދި އެހީއަށް އެދޭފަރާތަށް ވެސް މިކަންކަން ސާފުވެ، ދެމިހުންނަނިވި ގޮތެއްގައި އެހީތެރިވުމަށް ފަސޭހަވެދެއެވެ.
ގޭގައި ފަރުވާދެވިދާނެ ކަންކަން ދެނެ ގަންނާށެވެ!
ބައެއް ހާލަތްތަކުގައި، "ޕެލިއޭޓިވް" އަދި ފަރުވާކުރާ ޓީމުގެ ބެލުމުގެދަށުން ގޭގައި ދެވިދާނެ ފަރުވާތައް ދެނެގަންނާށެވެ. މިފަދައިން ކަން ކުރުމުން ކޮންމެފަހަރަކު ސިއްޙީ ފަރުވާ ހޯދުމަށް ހޮސްޕިޓަލަށް ދިއުމުގެ "ބުރަ" ލުއިވެގެންދާނެއެވެ. މިފަދަ ކަންކަމުގެ މައުލޫމާތު ހޯދުމަށް ފަރުވާދޭ ޓީމުގެ ލަފާ ހޯދާށެވެ. މިސާލަކަށް އަތޮޅުތެރޭގެ ރައްތަކުގައި ދިރިއުޅެނީނަމަ ކީމޯގެ ކުރިން ރަށުގައި ހެދިދާނެ ޓެސްޓުތައް ނޫނީ ދެވިދާނެ "ކީމޯ" ފަދަ ފަރުވާ އެނގުން މުހިއްމުވާނެއެވެ.
އަމިއްލައަށް ވަގުތު ކޮޅެއް ޚާއްސަކުރުން:
"ކެއަރ ގިވަރ" އެއްގެ "ވަޒީފާ" އަކީ ގިނަފަހަރު ސައުވީސް ގަޑިއިރުގެ ވަޒީފާ އެކެވެ. ނަމަވެސް އަމިއްލައަށް ވަގުތުކޮޅެއް ހޯދަން މަސައްކަތްކުރާށެވެ. މިފަދަ ވަގުތުކޮޅެއް ތާވަލުކޮށް "ބްރޭކް" ނެގުމަކީ މި މަސައްކަތުގެ ބައެއްކަމުގައި ހަދާށެވެ. އަދި މިފަދަ ވަގުތުކޮޅަކީ ތިބާ އަމިއްލައަށް ކުރާހިތްވާ ކަންކަމަށް ޚާއްސަކުރާ ވަގުތުކޮޅަކަށް ހަދާށެވެ. މިއީ "ތިބާގެ ވަގުތުކޮޅެއްކަން" ދަންނާށެވެ.
ނޫނެކޭ ބުނަން ދަސްކުރޭ:
ޖިސްމާނީ އަދި ނަފްސާނީ ގޮތުން ވަރުބަލިކަން އިހްސާސް ކުރެވުމުގެ އެންމެބޮޑު އަސްލަކީ މެދުކެނޑުމެއްނެތި ތަކުރާރުކޮށް މިޒިންމާ އަދާކުރަމުން ދިއުމެވެ. އެހެންކަމުން ހުރިހާކަމެއް ކުރަމުންދިއުމުގެ ބަދަލުގައި ކުރަން މުހިއްމު ކަންކަމަށް ސަމާލުކަންދީ ކުރިޔަށްދާން ދަސްކުރާށެވެ. އަދި އެހެނިހެން ކަންކަން ފަހަށް ޖައްސާލާށެވެ. މުހިއްމު ނޫން ކަންކަމަށް "ނޫނެކޭ" ބުނަން ދަސް ކުރާށެވެ.
އަމިއްލަ ނަފްސަށް އާއެކޭބުނުން:
އެހެންމީހެއްގެ ހުރިހާކަމެއްގެ ޒިންމާ އެންމެ ފުރިހަމައަށް ނަގަމުންދާއިރު ތިބާގެ އަމިއްލަ ނަފްސަށް އިހުމާލް ނުވާށެވެ. ތިބާގެ ނަފްސާ ޖިސްމުގެ ދުޅަހެޔޮކަން ލިސްޓުގެ އެންމެކުރިއަށް ލާން ފަސްނުޖެހޭށެވެ. އެއީ ކިތަންމެ ކުޑަކަމެއް ކަމުގައި ވީނަމަވެސް، މިސާލަކަށް ހިތްހަމަޖައްސާލުމުގެ ގޮތުން ފޮތެއްގެ ތަންކޮޅެއް ކިޔާލުން ފަދަ ނޫނީ ހުސްވަގުތު ހޮބީ އެއްގެ ގޮތުގައި ކުރާކަމެއް ކޮށްލުންކަމުގައި ވީނަމަވެސް މިފަދަ ކަންކަން ލިސްޓުގެ ކުރިއަށް ލާން އާދަކުރާށެވެ.
ނޯޓް: ތިމާގެ އަމިއްލަ އިހްސާސްތައް ދެނެގަތުމާ އެފަދަ އިހްސާސްތަކުގެ މައްޗަށް ކަންކަން ނިންމުމަށް "މައިންޑްފުލްނަސް ޕްރެކްޓިސް ކުރުން" ކިޔައެވެ. އަދި ތިމާ އެވަގުތެއްގައި ކުރަމުންދާ އިހްސާސް، ހިޔާލް، ފިކުރު އަދި ތިމާގެ ހިއްސުތަކުގެ މައްޗަށް ބުރަވެ ކަންކަން ނިންމުމަކީ ރަނގަޅުކަމެކެވެ. މިފަދައިން ކަންކުރުމުން ތިބާގެ ޖިސްމާނީ އަދި ނަފްސާނީ ދުޅަހެޔޮކަމަށް ހެޔޮ ބަދަލުތަކެއް އާދެއެވެ.
ސަޕޯޓް ގުރޫޕެއްގެ އެހީ ހޯދުން
އަމިއްލަ ތަޖުރިބާ ހިއްސާ ކުރުމާ އެހެނިހެން މީހުންގެ ތަޖުރިބާ ދެނެގަތުމަކީ މިފަދަ މަރުހަލާއެއްގައި މުހިއްމު ނުކުތާއެވެ.
އަމިއްލަ ތަޖުރިބާއިން އެހެން މީހުންނަށް ހިއްވަރު ލިބުމުގެ އިތުރުން ތިބާ އަށް މިފަދަ އެހެން ތަޖުރިބާ ތަކުން، ތިބާގެ މައުލޫމާތު މުއްސަނދިވެ ތިބާގެ މި ޒިންމާ ބޮޑު އެހެނަސް ދަރުމަވެރި ދަތުރުގެ އިތުރު ބައިވެރިން އުފެދެއެވެ. އުނދަގޫ ދަތުރެއްގެ މަންޒިލަށް ވާސިލްވުމަށް އިތުރު ހިއްވަރަކަށް ވެއެވެ.
ނޯޓް:
އަޅުގަނޑުގެ ތަޖުރިބާއިން ރާއްޖޭގައި މިފަދަގޮތަކަށް ހިލޭ ހިދުމަތްދޭ ޖަމްއިއްޔާއެއްގެ ވާހަކަ ހިއްސާކޮށްލާނަމެވެ. "ކެންސަރ ސޮސައިޓީ އޮފް މޯލްޑިވްސް" ގެ ކެންސަރ "ސަޕޯރޓް ގްރޫޕް" އެވެ. ސަޕޯރޓް ވައިބަރ ގްރޫޕްއަކާ އަދި އަމަލީ ގޮތުން، ކޮންމެ އަންގާރަ ދުވަހެއްގައި ބާއްވާ "ސަޕޯރޓް ގްރޫޕްގެ" ވާހަކައެވެ. މިގްރޫޕްގައި ތަޖުރިބާ ހިއްސާ ކުރައްވާނީ މައިގަނޑު ގޮތެއްގައި ބަލީގެ ފަރުވާ ހޯދަމުންދާ މީހުންނާއި އެހީތެރިން (ބެލެނިވެރިން) ނެވެ. މިގްރޫޕްގެ ކަންކަން ބަލަހައްޓަމުން ގެންދަވާނީ ކަނޑައެޅިފައިވާ އުސޫލްތަކެއްގެ މަތިން އެ ސޮސައިޓީގެ ސްޓާފުންނެވެ.
ކަސްރަތު:
ހެލިފެލިވެނޫޅޭނަމަ ޖިސްމާނީ އަދި ނަފްސާނީ މައްސަލަތައް ހަށިގަނޑަށް ދިމާވެއެވެ. އަދި މިއީ ގިނަ ބަލިތަކެއް ޖެހުމަށް މެދުވެރިވާ އެއްސަބަބުމެއެވެ. މިގޮތުން ކޮންމެދުވަހަކުވެސް 30 މިނެޓް- 60 މިނެޓުގެ ވަގުތުކޮޅެއް، ބާރަށް ހިނގުން ފަދަ މެދުމިނުގެ ކަސްރަތަކަށް ހާއްސަކޮށްލުމަކީ މުހިއްމުކަމެކެވެ. (ކަސްރަތު ޑެފް)
ކައުންސިލިން ހޯދުން:
"ޕްރޮފެޝަނަލް" އެހީ ހޯދުމަކީ މިފަދަ ރޯލެއް އަދާކުރަމުން ދާއިރު ތިބާގެ ނަފްސާނީ ދުޅަހެޔޮކަމަށް އަދި މުސްތަޤުބަލުގައި ކުރިމަތިވެދާނެ ނޭދެވޭ ކަންކަން ދުރާލާދެނެގަތުމަށް ލިބޭ ރަނގަޅު ފުރުސަތެކެވެ. ރާއްޖޭގައި މިފަދަ ޚިދުމަތް ހިލޭ ފޯރުކޮށްދޭ ފަރާތްތަކުގެ ނަމާއި ގުޅޭނެ ނަމްބަރު މައުލޫމާތަށްޓަކައި ތިރީގައި ހިއްސާކޮށްލާނަމެވެ.
ޝުކުރުވެރި ވާންވީ ކީއްވެ؟
ތިބާއަށް މީހަކަށް އަޅާލައި އެހީތެރިވެވި އުޅެވުނުނަމަ އެކަމުގެ އުފަލާ ޝަރަފް ޠަބީޢީ ގޮތުން އަމިއްލައަށް އިހްސާސްކުރެވުމަކީ ނުވެނުދާނެކަމެކެވެ. މިފަދަ ބުރަބޮޑު ޒިންމާއެއް މެދުވެރިވި ސަބަބު ތިމާއަށް ވިސްނައިގަންނަން ދަތިވެދާނެއެވެ. ނަމަވެސް މިފަދަ ކަމެއްގެ ސަބަބުން ތިބާގެ އަމިއްލަނަފްސަށް ލިބުނު އިތުބާރު އެތަށް ގުނައަކަށް އިތުރުވެދެއެވެ. އަނެކާއާ އޮތް ގުޅުން އިހުނަށްވުރެއިތުރުވެ ހެޔޮބަދަލުތަކެއް އަންނާނެކަމާމެދު ޝައްކެއްނެތެވެ.
ގިނަފަހަރު މިފަދަ ޒިންމާއެއް ތަޙައްމަލް ކުރަންޖެހުމަކީ، ދުނިޔޭގެ މާއްދިއްޔަތާއި ދުރުވެ، އުޚްރަވީ ހަޔާތާ ގާތްވާކަމެކެވެ. ހަޔާތުގެ އަސްލު މާނައާއި ދޭތެރޭ ވިސްނަން ލިބޭ ފުރުޞަތެކެވެ. ކުރިމަތިވާ މިފަދަ ބޮޑެތި އިމްތިހާން ތަކަކީ ކަލާނގެ ލޯބިވެވޮޑިގެންވާ އަޅުންނަށް ކެތްތެރިކަމާ އީމާންތެރިކަން، އަދި ތަޤްވާ އިތުރުވުމުގެ އަސްލުކަމުގައި ވެދެއެވެ.
ވީއިރު މިފަދަ ކަންކަން ތަޙައްމަލްކުރަން ޖެހުމަކީ ތިބާ ހެއްދެވިފަރާތާއި ގާތްވުމަށް ލިބޭ ރަނގަޅު ފުރުޞަތެކެވެ. ދުނިޔެއަށް ލޯހުޅުވި އަމިއްލަނަފްސަށް އިތުބާރުކޮށް އަމިއްލަ ނަފްސަށް އަޅާލުމުގެ މުހިއްމުކަން ދަސްވެދާ ހެޔޮފާލެކެވެ.
މުހިއްމު ނަންބަރުތައް:
ސެންޓަރ ފޮރ މެންޓަލް ހެލްތް (އައި.ޖީ.އެމް.އެޗް) :3335245, 3335335, 3335336
މެންޓަލް ހެލްތް ސެންޓަރ (ހުޅުމާލޭ ހޮސްޕިޓަލް): 33500169
ސޮސައިޓީ ފޯރ ހެލްތް އެޑިއުކޭޝަން: 3318804 މެސެޖް ކުރުމަށް: 7976325
ކެންސަރ ސަޕޯޓް ގުރޫޕް އާ ގުޅުމަށް: 7505500
ވިކްޓިމް ސަޕޯރޓް ޔުނިޓް (މޯލްޑިވްސް ޕޮލިސް ސަރވިސަސް) 24 ގަޑިއިރު: 119, ހޮޓްލައިން: 9770640
ނޯޓް: މިއީ އައިޖީއެމްއެޗްގެ އޮންކޮލޮޖީ ޑިޕާޓްމެންޓްގައި އިސްކޮށް މަސައްކަތްކުރައްވާ ޑރ.މުހައްމަދު ޝިފާން ލިޔުއްވައި 'ޒީޓައިމްސް' އަށް ހަދިޔާކޮށްދެއްވި ރިޕޯޓެކެވެ. ޑރ.ޝިފާންގެ މިލިޔުން 'ޒީޓައިމްސް' ގައި ހިއްސާ ކުރުމުގެ ބޭނުމަކީ ކިޔުންތެރިންނަށް މުހިންމު މައުލޫމާތުތަކެއް ގެނެސްދިނުމެވެ.
