މިއީ އަރާކުރި 22 ވަނަ ފޮތް: "ތިއްތި ވާހަކަތައް 1" މި ފޮތުގައި ހިމަނާފައިވާ ވާހަކައެކެވެ. މި ފޮތުގައި މިކަހަލަ ރީތި 5 ވާހަކަ ހިމަނާފައިވެއެވެ. ވިސްނައިގެން ވާހަކަ ކިޔާލުމަށްފަހު ސުވާލުތަކަށް ޖަވާބުދޭނެ ކަމަށް އުންމީދު ކުރަމެވެ.
ކައިލަކީ މަސް ބޭނުމަށް ވަރަށް ޚާއްޞަ ލޯތްބެއް ހުންނަ ކުއްޖެކެވެ. އާންމުކޮށް ބަންދު ދުވަހެއް ލިބިއްޖެނަމަ އެކުވެރިންނާއެކު ކައިލް މަސްބާނަން ދެއެވެ. އެހެންކަމުން އާދައިގެ މަތިން ބަންދު ދުވަހެއް ލިބުމުން ކައިލް މަސްބާނަން ދިއުމަށް ގަސްތު ކުރިއެވެ. ނަމަވެސް އެ ދުވަހު ކައިލާއެކު ދާނެ އިތުރު އެހެން ކުއްޖަކު ނުވިއެވެ. އެހެންކަމުން އެ ދުވަހު މަސްބާނަން އަތިރިމައްޗަށް ދިޔައީ ކައިލް އެކަންޏެވެ. ކައިލް ދިޔައީ ދޮށްޓާ މަސްބާނަން ބޭނުންކުރާ ތަކެތި އަޅާ ފޮށި ވެސް ހިފައިގެންނެވެ.
ކައިލް އަތިރިމައްޗަށް ގޮސް އިށީނދެ ހަމަޖެހިލިޔެވެ. އެއަށްފަހު މޫދަށް ދޮށިއެއްލިއެވެ. ކައިލް ފުރަތަމަ އެއްލި ދޮށީގައި ވެސް އެއްޗެއް ގަނެފިއެވެ. އެ ވަގުތު ކައިލް ވަރަށް ބޮޑަށް އުފާވިއެވެ. ދެން އޭނާގެ ގަޔަށް ލެވުނުހާ ބާރެއްލާފައި ވަރަށް ބާރަށް ދަމައި ނެގި އިރު އަސްތާ! މި އޮތީ ބޮޑު ރަތް މަހެއް ގަނެފައެވެ. ކައިލް އުފަލުންގޮސް ވަރަށް ބާރަށް ހަޅޭއްލަވައިގަނެވިއްޖެއެވެ. ކައިލް ވީ އުފަލުން އެ ތަނުގައި ދެން އެންމެ ހިނދުކޮޅަކު ވެސް މަޑުކުރަން ބޭނުމެއް ނުވިއެވެ.
އިތުރު އިންތިޒާރު ކުރުމެއް ނެތި ކައިލް ބޭނި މަސް ހިފައިގެން އެއްގަމަށް ގޮސް ތަންކޮޅެއް ދުރުގައި އެ މަސް ބާއްވާފައި، އެތާ ހިތްފަސޭހަ ހިސާބެއްގައި ދަރު ފުންޏެއް އެއްކުރިއެވެ. އަދި އެ ދަރުފުނި ކައިރީގައި އިނދެ މަސް ފިހަން ތައްޔާރުކުރިއެވެ. އެންމެ ފުރަތަމަ ކައިލް އެ ބޮޑު މަސް އުލަކަށް އަމުނާލިއެވެ. އެއަށް ފަހު އެއްކުރި ދަރުތަކުގައި އަލިފާން ރޯކުރިއެވެ. އެ އިރު ވެސް ކައިލް ހުރީ އުފަލުން ފޮޅިފައެވެ.
ކައިލް އެ މަސް ފިހެވެންދެން އެތާ އިންތިޒާރުގައި އިނެވެ. މަސް ރޯފިލުމުން ކައިލް މަސް ހިފައިގެން ދިޔައީ ގެއަށެވެ. ކައިލް މަސް ގެންގޮސް މަންމައަށް ދިނުމުން މަންމަ ހުރީ ވަރަށް ޙައިރާންވެފައެވެ. އަދި ވަރަށް އުފަލުން ހުރެ މަންމަ ބުންޏެވެ. ދަރިފުޅު މިހާރު މަސްހިފަން ވަރަށް މޮޅުވެއްޖެއެވެ. އެކަމަކު ދެން ދުވަހަކު ދަރިފުޅު އެކަނި މަސްބާނަން ނުދައްޗެވެ. މަންމަ މި ހުރީ މިއަދު ދަރިފުޅު ލަސްވެގެން ވަރަށް ކަންބޮޑުވެފައެވެ. އަދި ކައިލް ވެސް މަންމަގެ އެ އެދުން އުފަލާއެކު ގަބޫލުކުރިއެވެ. އަދި އެ ދުވަހު ކައިލްގެނައި މަސް ކެއީ ކައިލާއި މަންމައާއި ދެމައިންނެވެ.
ވިސްނައިގެން ވާހަކަ ކިޔުމަށްފަހު ސުވާލުތަކަށް ޖަވާބު ދޭށެވެ!
- ކައިލަކީ ކޮންކަމަކަށް ލޯބި ކުރާ ކުއްޖެއް ހެއްޔެވެ؟
- އާންމުކޮށް ކައިލާއެކު މަސްބާނަން ދަނީ ކޮންބައެއް ހެއްޔެވެ؟
- ކައިލް މޫދު ކައިރިއަށް ދިޔައީ ކޮން އެއްޗެއް ހިފައިގެން ހެއްޔެވެ؟
- ކައިލަށް އުފަލުން ގޮސް ހަޅޭއްލަވައިގަނެވުނީ ކީއްވެގެން ހެއްޔެވެ؟
- ކައިލް ދަރު އެއްކޮށްފައި އެ ދަރުތަކުގައި އަލިފާން ރޯކުރީ ކީއްކުރަން ހެއްޔެވެ؟
- ރޯކުރި އަލިފާންގަނޑު ކައިރީގައި ކައިލް އިނީ ކީއްވެ ހެއްޔެވެ؟
- މަސް ރޯފިލުމުން އެ ހިފައިގެން ކައިލް ދިޔައީ ކޮންތާކަށް ހެއްޔެވެ؟
- ކައިލް މަސް ގެންގޮސް ދިނީ ކާކަށް ހެއްޔެވެ؟
- މަންމަ ބުނީ ކީކޭ ހެއްޔެވެ؟
- ކައިލް ގެންދިޔަ މަސް ކެއީ ކޮން ބައެއް ހެއްޔެވެ؟
ނޯޓް: ޙުސްނާ ފަހްމީ (ހުސްނާ މިސް) އަކީ، ރާއްޖޭގެ ތަޢުލީމީ ދާއިރާގައި 42 އަހަރަށް ވުރެ ގިނަ ދުވަހު އިޚުލާޞްތެރި ޚިދުމަތްތަކެއް ކުރައްވާފައިވާ ކަނބަލެކެވެ. އަދި މެދުނުކެނޑި 37 އަހަރަށް ވުރެ ގިނަ ދުވަހު ދިވެހި ދައުލަތައް ޚިދުމަތްކުރައްވާފައި ވާތީ، ރައިސުލްޖުމްހޫރިއްޔާ ދެއްވާ ދައުލަތަށް ގިނަ ދުވަހު ޚިދުމަތް ކުރުމުގެ އިނާމު 2021 ވަނަ ލިބިވަޑައިގަތުމާއެކު 2023 ވަނަ އަހަރު ރެހެންދި އެވޯޑް ލިބިވަޑައިގެންފައިވެއެވެ. ޙުސްނާ ފަހްމީ "އަރާކުރި" ސީރީސް ގެ ނަމުގައި ދިވެހިބަހުގެ ހަތަރު ހުނަރަށް އަމާޒުކުރައްވައިގެން ނާސަރީ ކުދިންނަށް ޚާއްޞަ ދިވެހިބަހުގެ އަކުރުތަކާއި ފިލިތަކާއި ސުކުންތައް ދަސްކޮށްދޭ ފޮތްތަކުން ފެށިގެން ޕްރައިމަރީ އަދި މެދުމަދަރުސީ ގްރޭޑްތަކުގެ ކުދިންނަށް ޚާއްޞަކޮށްގެން ޢިބްރަތްތެރި އަދި މަޖާ ކުރު ވާހަކަތަކާއި، މަސައްކަތު ފޮތްތަކާއި، ވާހަކަ ދޭހައާއި ކިޔުމުގެ ދޭހައިގެ ފޮތްތަކުގެ އިތުރުން އުފެއްދުންތެރި ލިޔުމުގެ ފޮތްތައް ހިމެނޭނޭހެން 40 ފޮތެއް މިހާތަނަށް ނެރެ އާންމުކުރައްވާފައިވެއެވެ.
