ދުނިޔެއަށް އުފަންވާއިރު ތަފާތު ބަލިތަކާއި، ނުކުޅެދުންތެރިކަން ހުންނަ ކުދިން ގިނައެވެ. މިފަދަ ކުދިންގެ ޚިދުމަތުގައި ކެތްތެރިކަމާއި ލޯތްބާއެކު އެކުދިން ގޮވައިގެން އުޅޭ މައިންބަފައިން ފެނެއެވެ. ނުކުޅެދުންތެރިކަމެއް ހުއްޓަސް މީގެތެރެއިން ބައެއް ކުދިންނަކީ ކޮންމެވެސް މޮޅު ހުނަރެއް ހުންނަ ބައެކެވެ. މިގޮތުން މީހުން ހައިރާންވާފަދަ ހުނަރުތައް ދައްކަމުންދާ ކުދިން މަދެއްނޫނެވެ.
'ނިއު ހެވަން' އަށް އުފަން ސްޓީވް އަދި އެޑީއަކީ އެއްމާބަނޑު އުމުރުން 18 އަހަރުވެފައިވާ ވަރަށް ތަފާތު ބައްޔެއް ތަހައްމަލު ކުރަމުންދާ ދެކުދިންނެވެ. މި ދެކުދިންނަކީ 'އޯޓިޒަމް' އާއި 'ޕްރޭޑް ވިލީ ސިންޑްރޯމް' ތަހައްމަލު ކުރަމުންދާ ދެކުދިންނެވެ. މިދެކުދިންނަކީ މިބަލީގެ ސަބަބުން އަބަދު ކާން ބޭނުންވެފައި ތިބޭ ދެކުދިންނެވެ. މިކުދިންގެ މަންމަ ޑިއަނާ ބުނާގޮތުގައި އެކުދިންނަކީ ކިތަންމެވަރަށް ކެޔަސް ބަނޑު ނުފުރޭ އަދި އަބަދުވެސް ކާން ބޭނުންވެފައި ތިބޭ ކުދިންކަމަށެވެ.
ޑިއަނާ ބުނާގޮތުގައި އޭނަ ނިދަން ދިއުމުގެ ކުރިން ގެންގުޅޭ ހުރިހާ ބޭހަކާއި ހުރިހާ އެއްޗެއްވެސް ބަހައްޓަނީ ތަޅުލާފައެވެ. ނިދަން ދިއުމުގެ ކުރިން އެކުދިންގެ މަންމަ ކޮޓަރިއާއި ހުރިހާ ތަނެއް ތަޅުލެވުނުތޯ ޔަގީން ކުރެއެވެ. އެކުދިންނަކީ އަތުޖެހުނު ކޮންމެ އެއްޗަކުން ކާއެއްޗެހި ތައްޔާރުކުރާ ކުދިންނަށްވާތީ ފްރިޖުވެސް ހުންނަނީ ތަޅުލާފައެވެ. އަދި ސާފުކުރަން ގެންގުޅޭ ފިހިގަޑާއި މޮޕްވެސް ހުންނަނީ ތަޅުލާފައެވެ. އެއީ ސާފުކުރަން ގެންގުޅޭ އެއްޗެހިންވެސް ނާސްތާއެއް ތައްޔާރުކޮށްފާނެތީއެވެ. މިކުދިން ގޮވައިގެން އުޅޭއިރު ވަރަށް ބޮޑަށް ބަލަހައްޓަން ޖެހޭ ކަމަށާއި މިކުދިން ގެންގުޅުމަކީ އެހާ ފަސޭހަކަމެއް ނޫންކަމަށް އެކުދިންގެ މަންމަ ކިޔައިދިނެވެ.
ޑިއަނާ ބުނާގޮތުގައި މިކުދިން ގޮވައިގެން އުޅެނީ އެހެން ކުދިންނާއި ވަކިންނެވެ. އެހެން ކުދިންނާއި ވަކިން މިދެކުދިން ގޮވައިގެން އުޅުމަކީ އެހާ ފަސޭހަކަމަކަށް ނުވިޔަސް މިގޮތަށް ނޫންގޮތަކަށް މިކުދިން ގޮވައިގެން އުޅެވެން ނެތްކަމަކަށް ޑިއަނާ ބުނެއެވެ. މިބަލީގެ ސަބަބުން އެކުދިން ރުޅިގަދަވެގެންގޮސް ހިފަހައްޓާ ނުލެވޭ ފަހަރުވެސް އާދެއެވެ. އެޑީ ފަހަތުންގޮސް ސްޓީވް ތަޅާފޮޅައިގަންނާތީ އެޑީ ވަކިން އެހެން ރޫމެއްގައިވެސް ބައިންދަންޖެހޭ ކަމަށް މަންމަ ކިޔާދިނެވެ. "ބައެއްފަހަރު ބުނަން ތިހެން އުޅެންޏާ ހޮސްޕިޓަލަށް ގެންގޮސް ބައިތިއްބަފާނެޔޭވެސް" އެކަމަކުވެސް އެކުދިންނަށް ނުވިސްނެއެވެ. އެކުދިންގެ ބަލީގެ ސަބަބުން އެކުދިންނަށް އެއްވެސް އެއްޗެއް ނުވިސްނޭތީ އެކުދިންގެ މަންމަ ވަރަށް ދެރަވާ ކަމަށާއި އެކަމުގައި އެކުދިންގެ ކުށެއްވެސް ނެތްކަމަށް ހިތާމައާއެކު ފާހަގަކުރިއެވެ. އެއީ އެކުދިން ގަސްތުގައި ކުރާ ކަމެއް ނޫންކަންވެސް އެނގެއެވެ. އެކުދިންނަކީ ވަރަށް މައުސޫމު ވަރަށް ލޯބި ކުދިންކޮޅެއް ކަމަށާއި އެކުދިންގެ ހައްގުގައި ކޮށްދެވެން ހުރި ހުރިހާ ކަމެއްވެސް ކުރަން ތައްޔާރަށް ހުރި ކަމުގައި އެކުދިންގެ މަންމަ ކިޔައިދިނެވެ. "އެއީ އަހަރެންދެކެވެސް ވަރަށް ލޯބިވާ އަދި އަހަރެންވެސް ހަމަ އެހާމެ ލޯބިވާ ދެކުދިން" އެކުދިންނަށްޓަކައި ޚިދުމަތްކުރުމުގައި އުމުރު ހުސްކުރަން ތައްޔާރަށް މިހުރީ" މިއީ އެކުދިންގެ މަންމަގެ ފަރާތުން ލިބުނު ހިތްވަރުގަދަ ކަމާއި ލޯބިން ފުރިގެންވާ މެސެޖެކެވެ.
މައުލޫމާތު: ނިއުޔޯކް ޕޯސްޓް
