ކައު ރަސޫލާ ﷺ މީސްތަކުން ބައްސާވަފައި މިވަނީ، ދެ ބަޔަކަށެވެ. އެއް ބަޔަކީ ހެޔޮ ކަންކަމަށް ގޮވާލާ އަދި ނުބައި ކަންކަން މަނާކުރާ މީހުންނެވެ. އަނެއް ބަޔަކީ ނުބައި ކަންކަމަށް ގޮވާލާ ހެޔޮ ކަންކަން މަނާކުރާ މީހުންވެ. މި ބަސްފުޅު އަޑުއަހާފައި ކޮށްލަންވީ ސުވާލަކީ، ތިމަންނާއަކީ ކޮން ގިންތިއެއްގެ މީހެއްތޯއެވެ؟ މި ސުވާލަށް ކޮންމެ މީހަކަށްވެސް ޖަވާބު ދެވޭނީ، އޭނާގެ ސުލޫކަށާއި، އަޚްލާގަށް ބަލައިގެންނެވެ. އޭނާ މީސްތަކުންނާ މުޢާމަލާތު ކުރާ ގޮތަށް ބަލައިގެންނެވެ. އަދި އޭނާ ވަޒީފާ އަދާކުރާގޮތް ހިސާބުކޮށްލައިގެންނެވެ. ކީރިތި ރަސޫލާ ﷺ މި ޙަދީޘްފުޅަށް ނަޒަރު ހިންގާލާއިރު އަހަރެމެން އަމިއްލައަށް އަހަރެމެންގެ ޢަމަލުތަކުގެ ހިސާބު ބަލައިލަން އެބަ ޖެހެއެވެ.
ހެޔޮ ކަންކަމަށް ގޮވާލާ މީހަކަށް ވުމަށް ކޮންމެ މުސްލިމަކު ވެސް އެދޭނެއެވެ. އެފަދަ މީހަކަށް ވުމަށްޓަކައި، ކަންތައްތަކެއް ކުރަން ޖެހެއެވެ. ފުރަތަމަ ކަމަކީ ތިމާގެ ޢަމަލުތަކާއި ބަސްތަކުގައި ﷲ އަށް އިޚްލާސްތެރި ވުމެވެ. ތިމާ ކުރާ ކޮންމެ ޢަމަލެއް، ބުނާ ކޮންމެ ބަހެއް މާތް ﷲ އަށް ޚާލިޞް ކުރުމެވެ. މާތް ﷲ އަށް ޚާލިޞް ނުކުރާ އެއްވެސް ޢަމަލެއް ﷲ ސުބުހާނަހޫ ވަތަޢާލާ ޤަބޫލު ފުޅެއް ނުކުރައްވާނެތެވެ.
ހެޔޮކަންތަކުގެ ތަޅުދަނޑިއަކަށް ވެވޭނީ، މާތް ﷲ ފަރްޟު ކުރައްވާފައިވާ ނަމާދުތަކާއި ދީނުގެ އެހެނިހެން ފަރުޟު ތަކާއި ވާޖިބުތައް ބަރާބަރަށް އަދާކޮށް މުންކަރާތްތަކާއި، ފާޙިޝް ޢަމަލުތަކާ ދުރުހެލި ވެގެންނެވެ. ﷲ ގެ އަމުރުފުޅުތަކާއި އެއްގޮތަށް ޢަމަލުކޮށް އެކަލާނގެއަށް ވެފައިވާ ޢަހްދަށް ވަފާތެރިވާ މީހާ ހެޔޮކަމުގެ ތަޅުދަނޑިއެއް ކަމުގައި ލައްވައި، ނުބައިކަމުގެ ތަޅެއްކަމުގައި ލައްވާނެތެވެ. އެފަދަ މީހާއަށް މާތް ﷲ ދެއްވާނީ ހެޔޮކަމުގެ ހުރިހާ ދޮރުތަކެއް ހުޅުވައިލެވޭ މައި ތަޅުދަނޑިއެކެވެ.
ހެޔޮކަމުގެ ތަޅުދަނޑިއަކަށް ވާން އެދޭ މީހާ، މަތިވެރި އަޚްލާޤުގެ ވެރިއަކަށް ވާން ޖެހޭނެއެވެ. މަތިވެރި އަޚްލާޤުގެ ވެރިޔާ އޭނާގެ ފަސްބައި ހަޑިހުތުރު ޢަމަލުތަކުން ކިލާކުރާކަށް ބޭނުމެއް ނުވާނެއެވެ. ރިވެތި އަޚްލާޤުގެ ވެރިއަކަށް ވެވޭނީ ރަނގަޅު އެކުވެރީންނާއެކު އުޅެގެންނެވެ. ރަނގަޅު މަޖިލިސްތަކަށް ގޮސްގެންނެވެ.
ހެޔޮކަމުގެ ތަޅުދަނޑިއަކަށް ވާން އެދޭ މީހާ، އެހެން މީހުންނަށް ހެޔޮ ކަންކަމަށް ނަސޭހަތްދީ، ތެދު މަގު ދައްކައި އުޅޭ މީހަކަށް ވާން ޖެހޭނެއެވެ. މީހުންނަށް ހެޔޮ ނަސޭހަތްދޭ ބަޔަކަށް އަހަރެމެން ވެއްޖެނަމަ، އަހަރެމެންގެ ތެރޭގައި ހެޔޮ ޢަމަލުތައް އާންމު ވާނެއެވެ. އަހަރެމެންނަކީ ހެޔޮ ކަންތައްތަކަށް އަމުރުކޮށް މުންކަރާތްތައް ނަހީ ކުރާ ބަޔަކަށް ވާނެއެވެ.
މާތް ﷲ އަށް ތަޤްވާ ވެރިވުމަކީ އެކަލާނގެ އަޅުތަކުންނަށް ކުރައްވާފައިވާ ވަސިއްޔަތެކެވެ. ހެޔޮކަމުގެ އެންމެ މުހިއްމު ތަޅުދަނޑި އަކީ ފައިދާހުރި ޢިލްމުތައް އުނގަންނައި ދިނުމާއި، ތަފާތު ވަސީލަތްތަކުން ޢިލްމު ފެތުރުމެވެ. ހުރިހާ ހެޔޮ ކަމެއްގެ އަސާސަކީ ޝަރުޢީ ގިއުގަނޑުގެ ތެރޭގައި ދެވޭ ރަނގަޅު ތަޢުލީމެވެ. ޒަމާނީ ކުރުމުގެ ނަމުގައިވިޔަސް ތަޢުލީމު އެ ގިއުގަނޑުން ބޭރު ވެގެން ނުވާނެއެވެ.
އަހަރެމެންގެ ތެރެއަށް ފެތުރެމުންދާ ނުބައި އާދަތަކާއި، ބަދު އަޚްލާޤީ ޢަމަލުތަކާއި، އިސްލާމް ދީނާއި ޚިލާފު ފިކުރުތަކުގެ ސަބަބަކީ ނުބައި ކަންތަކުގެ ތަޅުދަނޑިތައް ގިނަ ވުމެވެ. ހެޔޮކަމުގެ ތަޅުދަނޑި ތައް މަދު ވުމެވެ.
މަޢުލޫމާތު: ހުކުރުޚުޠުބާ
