އިސްލާމް ދީނަކީ ޢިލްމުގެ ދީނެވެ. އިސްލާމީ ރިސާލަތު ފެށުނީ ކިޔެވުމަށް ކުރެއްވި އަމުރުފުޅުންނެވެ. މާތް ﷲ ވަޙީކުރައްވާފައިވާ އާޔަތެއްގެ މާނައިގައި ވެއެވެ. "ކަލޭގެފާނުގެ ވެރި ރަސްކަލާނގެ އިސްމު ފުޅުން ކަލޭގެފާނު ކިޔަވައި ވިދާޅުވާށެވެ. އެކަލާނގެއީ (ހުރިހާ ތަކެއްޗެއް) ހެއްދެވި ރަސްކަލާނގެއެވެ. ގަނޑު ލޭކޮޅަކުން އެކަލާނގެ އިންސާނާ ހެއްދެވިއެވެ. ކަލޭގެފާނު ކިޔަވައި ވިދާޅުވާށެވެ! އަދި ކަލޭގެފާނުގެ ވެރި ރަސްކަލާނގެއީ، އެންމެ ދީލަތި ވަންތަ ރަސްކަލާނގެއެވެ. އެކަލާނގެއީ ގަލަމުން (ލިޔަން) އުނގަންނައި ދެއްވި ރަސްކަލާނގެއެވެ. އިންސާނާއަށް އޭނާ ނުދަންނަ ކަންތައް، އެކަލާނގެ އުނގަންނައި ދެއްވިއެވެ".
މާތް ﷲ ގެ މި އަމުރުފުޅާ އެއްގޮތްވާ ގޮތުގެ މަތިން މާތް ނަބިއްޔާ ﷺ އިސްލާމީ މުޖްތަމައުގައި ތަޢުލީމު ފެތުރެއްވުމަށް ޚާއްސަ އަހަމިއްޔަތެއް ދެއްވިއެވެ. ޚުދު އެކަލޭގެފާނު އެކަމުގައި ބައިވެރިވެ ވަޑައިގަތެވެ. ނަތީޖާއަކަށް ވީ ހޭލުންތެރި، ޢިލްމުވެރި، އުފެއްދުންތެރި، އުއްމަތެއް ބިނާވުމެވެ. މުސްލިމުންގެ ހިތްތަކުގައި ކީރިތި ރަސޫލާ ﷺ އިންދަވައިދެއްވި ޢިލްމުގެ އޮށްތަކުން ފެޅި ގަސްތައް ބިޔަވެ، ޒަމާނާއި ހާލަތާ ފައިހަމަވާ ގޮތަށް މީހުން ބިނާކުރާ އުފެއްދުންތެރި އުއްމަތަކަށް އިސްލާމީ އުއްމަތް ވުމެވެ.
ލޮބުވެތި ދަރިވަރުންނޭވެ! ފެށިގެން މިދިޔަ ދިރާސީ އަހަރު، ތިޔަ ކުދީންނަށް އިސްލާމް ދީނާއި ދުނިޔަވީ ރޮނގުތަކުން އިތުރު ކުރިއެރުންތަކެއް ލިބޭތޯ މަސައްކަތް ކުރުމަށް އަޒުމް ކަނޑައަޅާށެވެ. ދެ ދުނިޔޭގެ ހަޔާތަށް ފައިދާ ހުރި ބޭނުންތެރި ހަރަކާތްތަކުން ތިޔަކުދީންގެ ހުސްވަގުތު ފަޅުފިލުވާލާށެވެ. ތިޔަ ކުދިންގެ ދުނިޔެ އާއި އާޚިރަތް ބާއްޖަވެރިކުރުމަށް ހިތްވަރާއެކު މަސައްކަތް ކުރާށެވެ.
" މި ފޮނި ނަތީޖާ ނެރެވޭނީ މަދްރަސާގެ ގަވާއިދުތަކަށް ބޯލަނބައިގެން. މުދައްރިސުންނަށް ހައްޤުވާ މަތިވެރި ޤަދަރާއި އިޙްތިރާމް އަދާކޮށްގެން. އެމީހުންނަކީ ދުނިޔެއާއި އާޚިރަތުގެ ހެޔޮ މަގަށް އަލިކޮށްދޭ ވޮށްތަކެއް. ތިޔަ ކުދިން އުނގެނޭ ޢިލްމުގެ ނޫރުން ﷲ ގެ ރުހިވޮޑިގަތުމާއި މައިންބަފައިންގެ ހިތްހަމަޖެހުމާއި ޤައުމަށް ކުރިއެރުން ހޯދައިދޭށެވެ! އިސްލާމް ދީނާއި ވަޠަނަށްޓަކައި ޤުރްބާން ވުމަށް ކެރޭ ބަޔަކަށް ވުމަށް، ތިޔަކުދިންގެ ހަށިތަކާއި ނަފްސުތައް ހާނުވައި ތައްޔާރު ކުރާށެވެ! އިސްލާމް ދީނާއި މި ދިވެހި ޤައުމުދެކެ ލޯބިވާ ދަރިންނަށް ވާށެވެ!".
ދަރިން ތަރުބިއްޔަތުކޮށް އިސްލާމް ދީނަށާއި ޤައުމަށް ވަފާތެރި ފައިދާހުރި ބަޔަކަށް ހެދުމަށްޓަކައި އެދުރުންގެ ދައުރު ވަރަށް ބޮޑެވެ. މިފަދަ ތަރުބިއްޔަތެއް އެކުދިންނަށް ދެވޭނީ ކެތްތެރިކަމާއި ހިކްމަތްތެރިކަމާއެކު އެ މަސްއޫލިއްޔަތު އަދާކުރައްވައިގެންނެވެ. ތިޔަ އިއްޒަތްތެރި އެދުރުން ކިޔަވައިދެއްވާ ކުދިން ނަމޫނާއަކަށް ބަލާނީ ތިޔަ އެދުރުންކަން ހަނދުމަފުޅު ބަހައްޓަވާށެވެ.
" އެކުދިންނަށް ރަނގަޅު ކަމުގައި ފެންނާނީ ތިޔަ އެދުރުން އެކުދިންނަށް ރަނގަޅު ކަމުގައި ދެއްކެވި ކަމެއް. އަދި އެކުދިން ހުތުރު ކަމުގައި ދެކޭނީ ތިޔަ އެދުރުން އެގޮތަށް ދެކެވަޑައިގަންނަވާ ކަމެއް. ވީމާ ތިޔަ އެދުރުން އެކުދިން އިސްލާމް ދީން ދެކެ ލޯބިވާ ބަޔަކަށް ހަދާށެވެ! ދިވެހިބަހާއި ޤައުމިއްޔަތަށް އަހުލުވެރި ބަޔަކަށް ހަދާށެވެ، އެ ކުދިންނަކީ ޤައުމު ދެކެ ލޯބިވާ ޤައުމުގެ އިސްތިޤްލާލާއި ސިޔާދަތު ދަމަހައްޓަން ލޯބިކުރާ ބަޔަކަށް ހަދާށެވެ! އެކުދިންނަކީ ދުނިޔެ ބަވަނަ ވަމުންދާއިރު ވެށްޓަށްކުރާ އަސަރުތަކާމެދު ސަމާލުވާ ބަޔަކަށް ހަދާށެވެ!
ދަރީންނަކީ މާތް ﷲ އަހަރެމެންނާ ހަވާލުކުރައްވާފައިވާ ބޮޑު އަމާނާތެކެވެ. އެކުދިން ރަނގަޅު ގޮތުގައި ބަލައި ބޮޑު ކުރެވިއްޖެނަމަ އެކުދިންގެ ހެޔޮ ދުޢާގެ މަންފާ އަހަރެމެންނަށް ކުރާނެތެވެ. ވީމާ ދަރީންނަށް އިސްލާމީ ރިވެތި އަދަބާއި އުޅުން ދަސްކޮށްދީ ކީރިތި ޤުރްއާނާއި މާތް ނަބިއްޔާ ﷺ ސުންނަތަށް އަމަލުކުރަން ދަސްކޮށްދޭށެވެ.
މައުލޫމާތު: ހުކުރު ޚުތުބާ
