ޤާނޫނު އަސާސީ އާއި ޤާނޫނުގައިވާ ގޮތުގެ މަތީން ވެރިކަން ހިންގުމުގެ ބާރުތައް ލިބިގެންވަނީ ރައީސުލްޖުމްހޫރިއްޔާ އަށެވެ. ދައުލަތުގެ އެންމެމަތީ ވެރިޔަކީ، އަދި ސަރުކާރުގެ އެންމެމަތީ ވެރިޔަކީ، އަދި ސިފައިންގެ އެންމެ މަތީ ވެރިޔަކީ ރައީސުލްޖުމްހޫރިއްޔާއެވެ. ރައީސުލްޖުމްހޫރިއްޔާގެ މަގާމަށް މީހަކު ހޮވުމަށް ބާއްވާ އިންތިޚާބަކީ ވަރަށް ވާދަވެރިކަން ބޮޑު ފޯރިގަދަ އިންތިޚާބަކަށް ވޭތުވެދިޔަ 15 އަހަރު ވަނީ ވެފައެވެ. އެއީ އާ ޤާނޫނު އަސާސީ އެކުލަވާލެވި ސިޔާސީ ވާދަވެރިކަން އުފެދުނު ހިސާބުންނެވެ.
ދިވެހި ރާއްޖޭގެ ޤާނޫނުއަސާސީގައި ބަޔާންކޮށްފައިވެއެވެ. އުމުރުން 18 އަހަރުން މަތީގެ ކޮންމެ ރައްޔިތަކަށްމެ ތިރީގައިވާ ޙައްޤު ލިބިގެންވެއެވެ.
(ހ) އިންތިޚާބުތަކުގައްޔާއި ރައްޔިތުންގެ ޚިޔާލު ހޯދުމުގެ އާންމު ވޯޓުތަކުގައި ވޯޓުދިނުމުގެ ޙައްޤު. މި ފަދަ ވޯޓުތަކަކީ ސިއްރު ވޯޓުތަކަކަށް ވާންވާނެއެވެ.
ސިއްރު ވޯޓަކަށް ވާންވާނެ ކަމަށް ބުނެފައިވިއަސް ވޯޓަށް ނުފޫޒު ފޯރުވުމަށް ޒަމާނުއްސުރެ ތަފާތު ކަންތައްތައް ކުރަމުންދާކަމަށް ބުނާ މީހުން ގިނައެވެ. މިގޮތުން ވޯޓާއި ދިމާކޮށް ބޮޑެތި އަދަދުތަކުން ރުފިޔާ ބެހުމާއި، ބޭނުން ޖެހިފައިވާ މީހުންނަށް އެމީހުން ބުނާހާ ކަންތައްތަކެއް ވޯޓު ދޭން ޝަރުތުކޮށް ކޮށްދޭކަމަށް ވެއެވެ.
ސޯޝަލް މީޑިއާގައި އަލްއުސްތާޛާ ސާމިޔާ ޒަކަރިއްޔާ ލިޔުއްވައިފައިވެއެވެ. " ވޯޓަކީ ގަނެވިއްކޭ މުދަލަކަށް ނަހަދާށެވެ. ވޯޓަކީ ތިބާގެ ޙައްޤެކެވެ. ކޮންމެ ޙައްޤަކާއި ގުޅިފައިވާ ވާޖިބެއްވެއެވެ. ވީމާ ވާޖިބުތައް އަދާކުރެވޭނެ ޤާބިލު މީހަކު ހޮވާށެވެ. ކަމަށް އެންމެ އެކަށޭނަ އިޚްލާސްތެރިކަމަށް ތިބާ އަށް ޤަބޫލުކުރެވޭ މީހަކަށް ދޭށެވެ. އެހެނީ އެއީ އަމާނާތެކެވެ. އަމާނާތާއި މެދު ސުވާލުވެވޭނެކަން ދަންނާށެވެ. ވޯޓުނުލުމަކުން އެކަމުން ބަރީއަ ނުވެވޭނެއެވެ. ވީމާ ވޯޓުލާށެވެ. ނަމަވެސް އަމާނާތްތެރިކަމާއި ތެދުވެރިކަމާއި އިޚްލާސްތެރިކަމާއި އެކުގައެވެ. މީހެއްގެ އަތުން ލިބޭ މުދާގަނޑަކަށް ނުވަތަ މަންފާއަކަށް ނޫނެވެ. އަމާނާތަކީ ގަނެވިއްކޭ އެއްޗަކަށް ނަހަދާށެވެ. މާތް ﷲ އަށް ބިރުވެތިވާށެވެ".
ސެޕްޓެމްބަރު 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ވާދަވެރިކަން ވަރަށް ބޮޑެވެ. ތިމާ ތާއީދުކުރާ ކެންޑިޑޭޓަށް ގިނަ ވޯޓު ހޯދުމަށް ވާދަވެރި ކެންޑިޑޭޓުންގެ އަގުވައްޓާލާ ދޮގު ޚަބަރު ފަތުރާ މީހުންވެސް އެބައުޅެއެވެ. ޚިޔާލު ފާޅުކުރުމުގެ މިނިވަންކަން ކޮންމެ މީހަކަށް ލިބިގެންވިއަސް އެ މިނިވަންކަމުގެ ބޭނުންވެސް ރަނގަޅު ގޮތުގައި ހިފާށެވެ. ކެމްޕެއިން ވެސް ކުރަންވީ ރަނގަޅު ގޮތުގައެވެ.
ރައީސުލްޖުމްހޫރިއްޔާ އިންތިޚާބުކުރާނީ ސީދާ ރައްޔިތުންގެ ސިއްރު ވޯޓަކުން ކަމަށްވާއިރު ތިމާ ވޯޓުދޭނީ ކާކަށްކަން ކޮންމެހެން އެހެން މީހުން ކައިރީގައި ބުނާކަށް ނުޖެހެއެވެ. ތިމާއަށް ފެންނަ އެންމެ ރަނގަޅު މީހަކަށް ވޯޓުދޭންވީއެވެ. އާއިލާއެއްގެ ތެރޭގައި ވެސް ތަފާތު ފިކުރުގެ މީހުން އުޅޭއިރު އެފިކުރުތަކަށް އިހްތިރާމްކޮށް އަމިއްލައަށް ގޮތް ނިންމުމަށް އިސްކަންދޭށެވެ.
ވޯޓަށް ނުފޫޒު ފޯރުވޭނެ އެއްވެސް މީހެއް ހުރެގެން ނުވާނެއެވެ. ވަގުތީ އުފަލަކަށް ވޯޓު ވިއްކާނުލާށެވެ. ވޯޓަކީ ތިމާގެ ބޮލުގައި އެޅިފައިވާ ޒިންމާއެއްކަން ހަނދާންކޮށް އެޒިންމާ ރަނގަޅުގޮތުގައި އަދާކުރުމަށް އިސްކަންދޭށެވެ. މިއަދު ނިންމާ ނިންމުމެއްގެ ސަބަބުން މާދަމާ ހިތާމަކުރަން ނުޖެހޭނެ ފަދަ ގޮތަކަށް ފަހަށް ވިސްނުމަށްފަހު ގޮތް ނިންމާށެވެ. ޤާނޫނު އަސާސީ އިން ލިބިފައިވާ ޙައްޤުގެ ބޭނުން ފުރިހަމައަށް ހިފާ ވޯޓު ދޭށެވެ.
