މުސްލިމް އަޚުންނޭވެ. މާތް ﷲ ކަމެއް ކަނޑައެޅުއްވުމުގެ މާނައަކީ، އެކަމަކާ ބެހޭ ގޮތުން ނިޔާ އިއްވެވުމެވެ. މި ނިޔާއަށް ޢަމަލުކުރުން ވާޖިބު ވާނެއެވެ. އެކަމެއް ނުކޮށްފިނަމަ ފާފަވެރި ވާނެއެވެ. މާތް ﷲ އަށް އަޅުކަންކުރުމާއި މައިންބަފައިންނަށް ހެޔޮކޮށް ހިތުން ބަނދެލައްވާފައި ވަނީ އެއް ވައުފަށަކުންނެވެ. މިކަމުން އެނގެނީ މައިންބަފައިންނަށް އަޅައިލުމާއި އެމީހުންނަށް ހެޔޮކޮށް ހިތުމުގެ މުހިންމުކަމެވެ. އަދި އެ ދެ މީހުންނަށް އުރެދުމަކީ މާތް ﷲ ޙަރާމް ކުރައްވާފައިވާ ކަމެއް ކަމެވެ.
މައިންބަފައިންނަށް ހެޔޮކޮށް ހިތުމަށް މާތް ﷲ ހުރިހާ ރަސޫލު ބޭކަލުންނަށާއި ނަބީބޭކަލުންނަށް ވެސް އަމުރުކުރެއްވިއެވެ. ކީރިތި ރަސޫލާ ﷺ ޙަދީޘް ކުރައްވާފައިވެއެވެ. މާނައީ: " މައިންބަފައިންނަކީ ސުވަރުގޭގެ އެންމެ މާތް ދޮރުކޮޅެވެ. ފަހެ ތިބާ އެދޭނަމަ އެ ދޮރުކޮޅު ނަގައިލާށެވެ! ނުވަތަ ރައްކައުތެރި ކުރާށެވެ!" މި ޙަދީޘް ބަސްފުޅުން ދޭހަވާގޮތުގައި މައިންބަފައިންގެ ޙައްޤުތަކަށް ރައްކާތެރިވުމަކީ، ތިބާ ސުވަރުގެ ވަނުމަށް ހުޅުވިފައިވާ ދޮރެކެވެ. އަދި މައިންބަފައިންގެ ޙައްޤުތަކަށް ރައްކާތެރި ނުވުމަކީ ސުވަރުގޭގެ މަތިވެރި އެ ނިޢުމަތުން ތިބާ މަޙްރޫމް ވެގެންދާނޭ ކަމެއްކަމެވެ.
މުސްކުޅިވެފައިވާ މައިންބަފައިންނަށް ޚިދުމަތްކުރާނެ ފުރުސަތު ލިބުނު މީހާ އެކަމަށްޓަކައި ﷲ އަށް ޝުކުރުވެރިވާށެވެ. އޭނާއަށް ސުވަރުގޭގެ ދޮރުކޮޅެއް ހުޅުއްވައި ދެއްވީތީއެވެ. މައިންބަފައިންނަށް އުރެދުމަކީ ތިމާގެ އަޅުކަންތަކުގައި ޖެހޭ ލައްތަކެކެވެ.
މައިންބަފައިންނަށް އަޅާއިލުމާއި ކަމޭހިތުމަކީ، އެކަމުގައި ޖަދަލުކޮށްގެން ނުވާނެ ކަމެކެވެ. މައިންބަފައިން ހިތުގައި ޖެހުނަ ދީގެން ނުވާނެއެވެ. ބައެއް މީހުން ހީކުރާ ގޮތުގައި މައިންބަފައިންނަށް ހެޔޮކޮށް ހިތަންވާނީ އެމީހުން ކަމަށް އެދުނީމައެވެ. މައިންބަފައިން އެއްވެސް ކަމަކަށް އެދޭނަމަ އެކަމެއް އަވަހަށް ކޮށްދޭން ވާނެއެވެ. ނަމަވެސް އެމީހުންނަށް ކަމެއް ބޭނުންވިޔަސް އަދި ނުވިޔަސް ދަރިން މައިންބަފައިންނަށް އަބަދުވެސް ހެޔޮކޮށް ހިތަންވާނެއެވެ.
މިއަދު ބައެއް ދަރިން ވަނީ އެކުދީންގެ މައިންބަފައިންނަށް ފުރަގަސްދީފައެވެ. ބައެއްގެ ފާސިދު ޘަޤާފަތުގައި ޖެހި އާޝޯޚުވެ އާވާރާވެފައެވެ. މުސްކުޅި މައިންބަފައިންނާއެކު އެއް ގެއެއްގައި އުޅުމަކީ އެމީހުންގެ ގާތުގައި ހުތުރު ކަމެކެވެ. ޒަމާނާ ގުޅޭ ކަމެއް ނޫނެވެ. އެމީހުން ދެކޭގޮތުގައި މުސްކުޅި މައިންބަފައިން އުޅެން ޖެހޭނީ ނުކުޅެދޭ މީހުންނަށް ޚާއްސަ ހިޔާވަހިތަކުގައެވެ. އެފަދަ މީހުން ދެކޭގޮތުގައި ޢީދު ދުވަހު އެމީހުންނަށް ގޮވައިލަން ދިޔުމުން ފުދޭނެއެވެ. އިސްލާމް ދީނުގެ ދުޝްމަނުން މަސައްކަތް ކުރަނީ އިސްލާމީ ވެށިތައް، އިސްލާމީ ސަޤާފަތާ ދުރުކުރެވޭތޯއެވެ. އެމީހުން ބޭނުންވަނީ އަހަރެމެންގެ ދަރިންނަކީ ދީނެއް އަޚްލާޤެއް ނެތް ބަޔަކަށް ހަދާށެވެ. އެމީހުންގެ މީޑިއާތަކުން ރެއާއި ދުވާލު މަސައްކަތްކުރަނީ އެމީހުންގެ ލާދީނީ އޮއިވަރުގައި އަހަރެމެންގެ ދަރިން ޖައްސާށެވެ. މިކަމަށް އޮތް ވެކްސިނަކީ އިސްލާމީ ތަރުބިއްޔަތެވެ. އިސްލާމީ އަޚްލާޤާއި އިސްލާމީ އަދަބާއި ސުލޫކެވެ.
މައުލޫމާތު: ހުކުރު ޚުތުބާ
