މިއީ އާއިލާއަކަށް އުފަންވި ހަމައެކަނި އަންހެން ދަރިފުޅެވެ. އުމުރުން 3 އަހަރުގެ މަރްޔަމް އައުޝާ އަހުމަދު (ކ. މާލެ ދަފްތަރު ނަންބަރު ދރ 3415) އަކީ އުފަންވިއިރު އެއްވެސް މައްސަލައެއް ހުރިކަމަށް ފާހަގަނުވާ ލޯބިލޯބި ކުއްޖެކެވެ. އައުޝާގެ ބައްޕަ އަހްމަދު ނަސީމް އާއި މަންމަ އައިމިނަތު އަފްރާ 'ޒީޓައިމްސް' އަށް މައުލޫމާތު ދިންގޮތުގައި ކޮވިޑުގެ ދުވަސްވަރު 2020 ވަނަ އަހަރު އައުޝާ އުފަންވީ ސިޒޭރިއަން ހަދައިގެންނެވެ.
" ވިހޭއިރު އެއްވެސް މައްސަލައެއް ފާހަގަނުވޭ. އެކަމަކު ދެތިން ދުވަސް ފަހުން މާބޮޑަށް ރީނދޫވީމަ އެޑްމިޓްކުރީ އައިޖީއެމްއެޗްގެ ވޯޑުގައި. ފަރުވާއަށްފަހު އައުޝާ ދޫކޮށްލީ 4 ދުވަސް ފަހުން. ދޫކޮށްލިއިރުވެސް ހުރީ ރީނދޫވެފަ. އިތުރަށް ގޯސްވަންޏާ އަންނަން ބުނެފަ ދޫކޮށްލީ".
ގެއަށް ގެނައި ފަހުންވެސް މާބޮޑަށް އައުޝާ ރީނދޫވާހެން ހީވުމުން އާއިލާއިން އަނެއްކާވެސް ދިޔައީ ހޮސްޕިޓަލަށެވެ.
" ލޭ ބަދަލުކުރަން ޑޯނަރ ވެސް ހޯދިން. ޑޮކްޓަރ ދިނީ އިތުރު ފުރުސަތެއް އެއްދުވަހަށް ލައިޓް ދަށުގައި ބާއްވަން. ރަނގަޅު ނުވެއްޖިއްޔާ ޓެސްޓް ހަދާފަ ލޭ ބަދަލުކުރާގޮތަށް. އެކަމަކު އެދުވަހު ލައިޓް ދަށުގައި ބޭއްވީމަ ރީނދޫވެފަ ހުރި މިންވަރު މަޑުމަޑުން ދަށްވީމަ ލޭ ބަދަލު ނުކޮށް ކުޑަކުދިންގެ އައިސީޔޫގައި ބޭއްވީ. ހަފްތާއެއް ވަންދެން ބާއްވާފަ ދޫކޮށްލިއިރު ބުއްފުޅިވެސް ބޮއެ".
އައުޝާގެ އުމުރުން 4 މަސްވަންދެން އުޅުނީ އާދައިގެ އެހެން ކުދިންނެކޭ އެއްގޮތަށް ހަރަކާތްތެރިކޮށެވެ. ސިއްޙީ ބޮޑު މައްސަލައެއް އުޅޭކަން އާއިލާ އަށް ފާހަގަވީ އައުޝާގެ އުމުރުން 5 މަހުގައި ވެކްސިން ޖެހި ފަހުންނެވެ.
" އައުޝާގެ މާމަ އަތުގައި އޮއްވާ ހީވީ ދަރިފުޅަށް ގޮތެއް ވާހެން. އެއިރު ނޭނގޭ ކިހިނެއްވާކަމެއްކަން. ދެން ވަގުތުން ދިޔައީ އީވް ކުލިނިކަށް. ފުރަތަމަ ފިޓް ޖެހުނުއިރު ދެއަތް މައްޗަށް ނަގާފަ ހަށިގަނޑު ހަރުވެ ލޮލުގެ ކަޅި މައްޗަށް އަރާ. ފިޓުޖެހިފަ ރަނގަޅުވާ ކޮންމެ ފަހަރަކު ވަރަށް ބޮޑަށް ތެޅިގަނެފަ ރޯން ފަށާނެ. ޑޮކްޓަރ ކުރިމަތީގައި ވެސް އެހެންވި. ޑޮކްޓަރ ބުނި އަވަހަށް އެޑްމިޓްކުރަން ދާން. ދެން ހޮސްޕިޓަލަށް ގޮސް އެޑްމިޓްކުރީ. އިންޖެކްޝަން ޖަހާފަ ބޭސްދީފަ 5 ދުވަސް ވީމަ ދޫކޮށްލީ. އެއްމަސް ފަހުން ދައްކަން ބުނެ ހޮސްޕިޓަލުން ދޫކޮށްލީ ވަކިގޮތަކަށް ބޭހުގެ ޑޯޒު ދަށްކުރަން ބުނެފަ. އެގޮތަށް ދަށްކުރާއިރަށް ފާހަގަވީ ތަފާތެއް އަންނަކަން. ދެން އެހެން ހުއްޓާ އަނެއްކާ ފިޓުޖެހުނީ ކުރިން ޖެހުނު ގޮތަށް.. ދެން އަނެއްކާވެސް އެޑްމިޓްކޮށްގެން ފިޓު ކޮންޓްރޯލް ނުވޭ.. އެއިރު 6 މަސް ނުވާތީ އީ.އީ.ޖީ ވެސް ނެހެދޭ.. ފަހުން އެނގުނީ ޑޯޒު މާބޮޑަށް ދަށްކުރީމަ ކަމަށް އެގޮތަށް ފިޓުޖެހުނީ. އެއިރު އައުޝާ އަކީ ހަމަ ނޯމަލް ކުއްޖެއް.. އެއްޗެހީގައި ހިފަންވެސް ހިފާނެ". އަސަރާއެކު އައުޝާގެ ބައްޕަ ކިޔައިދިނެވެ.
އުމުރުން 6 މަސް ނުވަނީސް އީ.އީ.ޖީ ނެހެދޭނެ ކަމަށް ޑޮކްޓަރުން ލަފާދިނަސް އާއިލާގެ އާދޭހާއި އައުޝާއަށް ފިޓުޖެހެމުން ދިޔަގޮތަށް ބެލުމަށްފަހު ޑޮކްޓަރު ނިންމީ އީ.އީ.ޖީ ހެދުމަށެވެ.
" އަޅުގަނޑުމެން ބުނިން 6 މަހުގައި އީ.އީ.ޖީ ނުހެދޭ ސަބަބު ބުނެދިނުމަށް ނާރުގެ ޑޮކްޓަރ އާއި ބައްދަލުކޮށްފަ. ފަރުވާ ނުދެވި އޮތުމަށްވުރެ އީ.އީ.ޖީ ހެދުންތޯ ރަނގަޅީ ސުވާލުކުރިން. ދެން ޑޮކްޓަރ އީ.އީ.ޖީ ހަދަން ނިންމީ.. އީ.އީ.ޖީ ހެދީމަ އެނގުނީ ފިޓުޖެހޭ މިންވަރު ބޮޑުކަން. ދެން އިތުރު ބޭހެއް ދޭން ފެށީ. އެއިރު 1 މަސް ވެއްޖެ ހޮސްޕިޓަލުގައި. ދެން ބޭރަށް ދާން އެދުނީމަ ލިޔުން ދިނީ އާސަންދައިގެ ދަށުން އިންޑިއާ އަށް ދާން.. އާދައިގެ ކުޑަކުދިންގެ ޑޮކްޓަރަކަށް ދެވޭނެ ފަރުވާއެއް ނޫން ނާރުގެ މިފަދަ ބަލިތަކަކީ". އައުޝާގެ ބައްޕަ ކިޔައިދިނެވެ.
ކޮވިޑުގެ ދުވަސްވަރު އިންޑިއާގެ ކޮޗިންގައި ހުންނަ އަމްރިތާ ހޮސްޕިޓަލަށް އައުޝާ ގޮވައިގެން ގޮސްގެން ވެސް އާއިލާ އަށް ކުރެވުނީ ހިތި ތަޖުރިބާއެކެވެ. އަމްރިތާ ހޮސްޕިޓަލަށް ދިޔައިރު ދުވާލަކު 8-10 ފަހަރު ފިޓުޖެހޭކަން ފާހަގަވިއިރު، އެ ހޮސްޕިޓަލުން ދިން ބޭހުން އައުޝާގެ ހަރަކާތްތައް މަދުވެ ނިދާފައި އޮންނައިރުވެސް ދުވާލަކު 15 އާއި 20 އާއި ދެމެދުގެ އަދަދަކަށް ފިޓުޖެހޭ ކަމަށް އައުޝާގެ ބައްޕަ ވަނީ ބުނެފައެވެ.
" އަމްރިތާގައި ފަރުވާދިންއިރު އަބަދު ނިދާފަކަހަލަ ގޮތަކަށް އޮންނާތީ ކާންވެސް ނުދެވޭ. ދެން އަޅުގަނޑުމެން ބަދަލުވީ ޓްރިވެންޑްރަމްގައި ހުންނަ ކިމްސް ހޮސްޕިޓަލަށް. ކިމްސް ގައި 2 މަސް ވަރު މަޑުކުރިން ފަރުވާއަށް. އެއިރު ކޮންޓްރޯލްވި އެއްކޮށް ކަހަލަ ގޮތަކަށް ފިޓުޖެހުން. އަޅުގަނޑުމެން ފުރަން އޮތް ދުވަހު އަނެއްކާ ފިޓުޖެހިގެން އައިސީޔޫގައި ފަރުވާދޭން ފެށީ. އެހެންވެ ޑޮކްޓަރު ފުރަން ހުއްދަ ނުދޭތީ ޓިކެޓް ބަދަލުކޮށް މަޑުކުރީ ފަރުވާއަށް އިތުރު 1 މަސް ދުވަހަށް. އެއަށްފަހު ރާއްޖެ އައީ ފަހުން ފަރުވާއަށް ދާގޮތަށް".
އިންޑިއާގެ ބޯޑަރު ބަންދުކުރުމާއި ގުޅިގެން އިންޑިއާ އަށް ނުދެވި އެތައް ދުވަހެއް ހޭދަވިއެވެ. އައުޝާގެ ބޭހަކީ ވެސް އެހާ އަގުބޮޑު ބޭހެކެވެ.
" ރާއްޖޭގައި ތިބެގެން އިންޑިއާ އިން އޮންލައިންކޮށް ދެއްކުމަށްފަހު އަޅުގަނޑުމެން އަމިއްލައަށް ބޭސް ނެގިން އެސްޓީއޯ މެދުވެރިކޮށް އެއްފަހަރު 170،000 ދިވެހި ރުފިޔާ އަށް އަދި އަނެއްފަހަރު 2 ލައްކަ އަށްވުރެ ގިނަ ރުފިޔާ ޚަރަދު ކޮށްގެން. ވަރަށް އުދަގޫ ކަމެއް އާސަންދަ ހޯދުން މިއީ ބޭސް ނެގުމަށް. ދުވާލަކު 2000 ރުފިޔާ ޚަރަދުވޭ އެންމެ ބޭހެއްގެ 2 ގުޅައަށް. އައުޝާ އަށް ދޭ ބޭހަށް ހޭނުނީމަ އަނެއްކާ ފިޓު ބޮޑަށް ޖެހެން ފަށަނީ".
އައުޝާގެ ފަރުވާއަށް އާސަންދައިގެ ދަށުންވެސް 4 ފަހަރު އިންޑިއާއިން ވަނީ ބޭސްކޮށްފައެވެ. އެހެންނަމަވެސް މިއަހަރުގެ ޖުލައި މަހުގައި 3 އަހަރު ފުރިފައިވާ އައުޝާގެ ބައްޔަށް ޝިފާއެއް އަދި ނުލިބެއެވެ.
ފިޓުޖެހެން ފެށި ހިސާބުން އައުޝާގެ ސިކުނޑިއަށް ގެއްލުން ލިބި ކަނދުރާ ހަރުނުލައި އުފެދުމުގައި ލަސްތަކެއް ދިމާވެ، ރަނގަޅުވާނެކަމަށް ޑޮކްޓަރ ދިނީ 50 އިންސައްތައެވެ.
" ޝިފާ ދެއްވާނީ މާތްﷲ. އަޅުގަނޑުމެންގެ އުންމީދަކީ އައުޝާ އަށް ރަނގަޅުވުން. ކުރެވެން ހުރި މަސައްކަތެއް ކުރާނަން ރަނގަޅުވޭތޯ.. ޑޮކްޓަރ ވިދާޅުވީ މިގޮތަށް ބަލިވާ ކުދިން ބައެއްފަހަރު ރަނގަޅުވޭ އަނެއްބައި ފަހަރު އެއްކޮށް ރަނގަޅުނުވެ އެބަހުއްޓޭ. ސިކުނޑިއަށް ލިބިފަހުރި ގެއްލުން ރަނގަޅުވުމުގެ ފުރުސަތުވެސް އޮވެދާނޭ އެހެން ގުނަވަންތަކުން ސަޕޯޓް ލިބިގެން.. ނޯމަލް ކުއްޖަކަށް ނުވެދާނޭ އެކަމަކު އަމިއްލައަށް ކައި އުޅެވޭ އަމިއްލައަށް ފާޚާނާއަށް ގޮސް އަމިއްލައަށް އުޅެވޭވަރު ކުއްޖަކަށް ވެދާނޭ ފަރުވާއިން".
އައުޝާ އަށް ރަނގަޅުވޭތޯ އާއިލާ އިން އެންމެ ފަހުން ދިޔައީ އިންޑިއާގެ ވެއްލޫރަށެވެ. އެއީ މިދިޔަ އަހަރުގެ އޮކްޓޯބަރު މަހުގައެވެ. ވެއްލޫރަށް 15 ގަޑިއިރު ދަތުރުކޮށްފަ ދިޔައީވެސް އުންމީދުތަކަކާއެކުގައެވެ.
" ރައްޓެއްސެއްގެ ދަރިއަކު ރަނގަޅުވެފަ ހުރިކަމަށް ބުނީމަ ދިޔައީ. އެކޮޅަށް ދިޔައިމަ އެނގުނީ އެއީ އެހާ ފަސޭހައިން ދެއްކޭ ޑޮކްޓަރެއް ނޫންކަން. 3 މަސް ކުރިން އެޕޮއިންޓްމެންޓް ހަދަން ޖެހޭކަން. އެހެންނޫނީ ޖެހޭނީ އެކޮޅުގަ އެޑްމިޓްވެގެން އެކޮޅުގެ ޑޮކްޓަރެއްގެ ލަފާގެ މަތިން މިބުނާ ޑޮކްޓަރަށް ދައްކަން. މާޔާ ތޯމަސް ކިޔާ ޑޮކްޓަރެއް އެއީ. އެޑްމިޓް ވެވެނީ 3 ލައްކައެއްހާ ރުޕީސް ހުރެގެން. އެއީ ވަރަށް މޮޅު ޑޮކްޓަރެއް ވަރަށް ރަނގަޅު ހޮސްޕިޓަލެއް.. އަދި އެޑްމިޓްވެގެން ހަދަންޖެހޭ ޓެސްޓްތައް ހެދުމަށްފަހު މިބުނާ ޑޮކްޓަރަށް ދެއްކޭނީ".
އާއިލާ އިން އެފަހަރު ރާއްޖެ އައީވެސް އެވަރަށް ފައިސާ އަމިއްލައަށް ޚަރަދު ކުރެވޭނެ ގޮތެއް ނެތުމުންނެވެ. އާއިލާއިން މަސައްކަތް ކުރަނީ އައުޝާ އަށް ބޭނުންވާ ފަރުވާ ހޯދުމަށް ވެއްލޫރަށް ނުވަތަ ބެންކޮކަށް ދިއުމަށެވެ. ޓްރިވެންޑްރަމް އަދި ކޮޗިން އަށް ތަކުރާރުކޮށް ގޮސްގެންވެސް އިތުރު ކުރިއެރުމެއް ނުލިބުމުން އާއިލާއިން އެދެނީ އާންމުންގެ ދީލަތި އެހީއަށެވެ.
'ޒީޓައިމްސް' އިން އައުޝާގެ ހާލު ބަލާލުމަށް ދިޔައިރު ވަރަށް ކައިރިން އައުޝާގެ ހާލަތު ވަނީ ފެނިފައެވެ.
އައުޝާ އަށް ފެންނަ ކަމެއް ޔަގީނެއް ނޫނެވެ. ކަނދުރާ ރަނގަޅަށް ހަރު ނުލާއިރު ނުހިނގެއެވެ. ކާން ދޭންޖެހެނީ އެންމެ ކުޑަކުދިންނަށް ކާންދޭގޮތަށް މިކްސަރުން ހިމުންކޮށްފަ ސަމުސަލުން އަނގައަށް އަޅައިގެންނެވެ. ކާންދޭ ކޮންމެ ފަހަރަކު ގަޑިއެއްހާއިރު ހޭދަވާ ކަމަށް އާއިލާއިން ވަނީ ބުނެފައެވެ. އަބަދުވެސް އައުޝާ ބޭނުންވަނީ ކޮންމެވެސް މީހެއްގެ އުނގުގައި އިށީންނާށެވެ. އެހެންނޫނީ ރޮވޭގޮތް ވެއެވެ. އައުޝާ އަށް ވާހަކައެއް ނުދެއްކެއެވެ. އަޑެއް އިވުނަސް ހަރަކާތެއް ނުކުރެއެވެ. އެހެންނަމަވެސް އަޅުގަނޑު އުރާލުމާއެކު ހީލިތަން ފެނުނެވެ. ބުނާ ކަހަލައެވެ. "މި ހަށިގަނޑުގައި އަޅާ ވޭނަށް ލުޔެއް ލިބޭތޯ އެހީތެރިވެދޭށެވެ!" އެއިރުވެސް އެހެން އޮވެފަ ފިޓުޖެހޭ ގޮތެއް އައުޝާއަށް ވަމުން ދިޔައެވެ. އާއިލާއިން ދިޔައީ ދުވާލަކަށް އެގޮތަށް ފިޓުޖެހޭ މިންވަރު ނޯޓް ކުރަމުންނެވެ. އައުޝާގެ މަންމަ އެފޮތް 'ޒީޓައިމްސް' އަށް ދައްކާލީ ކަރުނުން ފުރިގެންވާ ހާލަތުގައެވެ.
އައުޝާގެ ފިޓުޖެހުމަށް ކޮންމެވެސް ވަރެއްގެ ފަރުވާއެއް ލިބޭތޯ އެންމެފަހުން ޑޮކްޓަރަށް ދެއްކި ފަހަރު ވަނީ އެޑްމިޓް ކުރުމަށް ލަފާ ދީފައެވެ. އާއިލާއިން މަޑުކުރަމުން ދަނީ ރޯގާ ރަނގަޅުވާނެ ވަގުތަކަށެވެ. އެއީ އެވަރަށް ރޯގާޖެހިފައި ހުއްޓާ ފަރުވާދޭން އުދަގޫވާނެތީކަމަށް އާއިލާ އިން ވަނީ ބުނެފައެވެ.
ދުވާލަކަށް ގިނަ އަދަދެއްގެ ބޭސް ދެމުންދާ އައުޝާ ބެލުމަށް އަބަދުވެސް ކޮންމެވެސް އެކަކު ހުސްވެގެން ހުންނަންޖެހެއެވެ. އައުޝާގެ މަންމަ ވެސް މިއަހަރު ވަޒީފާއިން ވަކިވެފައިވާއިރު ހިޔާ ފުލެޓުން ލިބިފައިވާ އެޕާޓްމަންޓުގައި އިތުރު 2 ކުދިންނާއެކު އާއިލާ ދިރިއުޅެމުންދަނީ އައުޝާގެ ބައްޕައަށް ލިބޭ އާމްދަނީ އިންނެވެ. އައުޝާ ބެލުމަށްޓަކައި އައުޝާގެ ބައްޕަ ފަރާތު މާމަ އާއި ދެފަރާތުގެ އާއިލާއިން ވެދޭ އެހީތެރިކަން ޝުކުރުވެރިކަމާއެކު ވަނީ ފާހަގަކޮށްފައެވެ. އަދި މިހާތަނަށް އައުޝާގެ ފަރުވާ އަށް އެހީތެރިކަން ފޯރުކޮށްދިން އެންމެންނަށްވެސް ވަނީ ޝުކުރު އަދާކޮށްފައެވެ. މިއީ ނޫހެއްގައި އައުޝާގެ ރިޕޯޓް ޖަހާ ފުރަތަމަ ފަހަރު ކަމަށް ވަނީ ބުނެފައެވެ.
އާއިލާއެއްގެ މި ލޯބި ލޯބި ދަރިފުޅަށް ފަރުވާއެއް ލިބޭތޯ އެންމެން ގުޅިގެން އެހީތެރިވަމާ ހިނގާށެވެ.
އިތުރު މައުލޫމާތު ސާފުކުރުމަށް ގުޅުއްވާނީ އައުޝާގެ ބައްޕަ އަހުމަދު ނަސީމް 7626707 މި ނަންބަރަށެވެ.
ބީއެމްއެލް ދިވެހި ރުފިޔާގެ އެކައުންޓް ނަންބަރު: 7701141529101 ( އައިމިނަތު އަފްރާ ( އައުޝާގެ މަންމަ)
ޑޮލަރު އެކައުންޓް ނަންބަރު: 7730000132831 އަހްމަދު ނަސީމް ( އައުޝާގެ ބައްޕަ )
ކިޔުންތެރިންގެ ހިޔާލު
ވެކްސިން ވެކްސިން ވެކްސިން. މީހެއްގެ ޒިންދަގީ ތިއޮތީ ގޮސްފަ
ކޮމެންޓްސް ބަންދުކުރެވިފައި