ދުނިޔަވީ ހަޔާތަކީ ހެވާއި ނުބަޔާ ދެމެދުގައި ކުރެވޭ މެދުކެނޑުމެއް ނެތް ހަނގުރާމައެކެވެ. ޤިޔާމަތަށް ދާންދެން މި އަރާރުންތައް ކުރިއަށް ދާނެއެވެ. އެއީ މާތްﷲ ގެ ހިކްމަތްފުޅެވެ.
މުޖުތަމަޢު ފަސާދަކޮށް ރަނގަޅު މަގަށް ހުރަސްއެޅުމަށް މަސައްކަތްކުރާ މީހުން ބޭނުންކުރާ އެންމެ ނުރައްކާތެރި ވަސީލަތަކީ، ދޮގު ވާހަކަތަކާއި ދޮގު ޚަބަރުތައް ފެތުރުމެވެ. ރަސޫލު ބޭކަލުންގެ ސީރަތަށް ބަލާއިރު، އެބޭކަލުންނާ ދެކޮޅުވެރި ޢަމަލުތަކުން މިކަން ހާމަވާން އެބައޮތެވެ. އެބޭކަލުންނާ ދިމާލަށް ބައެއް ފަހަރަށް ދޮގުވެރީންނޭ އަނެއްބައި ފަހަރަށް މޮޔައިންނޭ، އަނެއްބައި ފަހަރަށް ބޮޑާ މީހުންނޭ، ކިބުރުވެރީންނޭ، ބިން ފަސާދަކުރާ މީހުންނޭ ބުނެފައިވެއެވެ. މިފަދަ ދޮގު ވާހަކަތަކުގެ ބޭނުމަކީ ހައްޤު މަގުން މީސްތަކުން އެއްކިބާ ކުރުމެވެ. މިބައިމީހުން ރަސޫލުންނާ ބެހޭގޮތުން ދޮގު ވާހަަކަތައް ދެއްކުމާއެކު އެބޭކަލުން ގެންނެވި އުސޫލުތަކާއި އަގުތަކާއި ރިވެތި އަޚްލާޤާ ދެކޮޅަށް ހަނގުރާމަވެސް ކުރިއެވެ.
މުޖުތަމަޢުގައި ފެތުރޭ ވާހަކަތަކުގެ ތެދު ދޮގު ނުބަލައި އެވާހަކަތައް ޤަބޫލު ކުރުމަކީ، ފަރުދުންނަށާއި، ޖަމާޢަތަށް ބޮޑެތި ގެއްލުންތައް ކުރިމަތިކުރުވާނެ ކަމެކެވެ. މިއަދު މުވާސަލާތީ ވަސީލަތްތައް ތަރައްޤީ ވެފައިވާ މިންވަރަށް ބަލާއިރު ކިތަންމެ ދުރުގައި ހިނގާކަމެއް ވެސް ކުޑަކުޑަ ހިނދުކޮޅެއްގެ ތެރޭގައި މީސްތަކުންނާ ހަމައަށް އާދެއެވެ.
ނަތީޖާއަކީ ދޮގު ޚަބަރުތަކާއި ދޮގު ވާހަކަތައް ފެތުރުމުގެ ނުރައްކާތެރިކަން އިހުނަށްވުރެ ބޮޑުވުމެވެ. ދޮގުވާހަކަތައް ފެތުރުމުގެ ނުބައިކަމާއި، އެފަދަ ވާހަކަތައް ޤަބޫލުކުރުމުގެ ސަބަބުން އިންސާނުން ކުރިމަތިލާން ޖެހުނު މުސީބާތްތަކުގެ ވާހަކަތައް ކީރިތި ޤުރުއާނުގައި އައިސްފައިވެއެވެ. އެއިން ޢިބްރަތް ހާސިލު ކުރަން ބޭނުންވާ ބަޔަކު ޢިބްރަތް ހާސިލު ކުރުމަށެވެ. އެކަންތައްތަކުގެ މަތިން ހަނދުމަކޮށް އެއިން ރައްކައުތެރިވުމުގެ މުހިއްމުކަން ދަސްކޮށް ދެއްވުމަށެވެ. އިބިލީހުގެ ވާހަކަ އާދަމުގެފާނަށް ޤަބޫލު ކުރެއްވުމުގެ ނަތީޖާއަކަށްވީ ސުވަރުގެއިން ނުކުމެވަޑައިގަންނަވަން ޖެހިވަޑައިގަތުމެވެ.
މާތް ﷲ ވަނީ ދޮގުހެދުން ޙަރާމް ކުރައްވާފައެވެ. މާތް ﷲ ވަނީ ދޫ ރައްކައުތެރިކުރުމަށް އަމުރު ކުރައްވާފައެވެ. ސާބިތު ނުހިފޭ ޔޯލަ ވާހަކަތައް ދެއްކުން ވަނީ ޙަރާމް ކުރައްވާފައެވެ. ދޮގު ހެދުމުގައި ދެމިހުރެއްޖެ މީހާ ﷲ ގެ ޙަޟްރަތުގައި ދޮގުވެރިޔެއް ކަމުގައި ލިޔެވޭ ހުއްޓެވެ.
ދޮގު ޚަބަރުތަކާއި، ދޮގު ވާހަކަތައް ފެތުރުމަކީ، މީސްތަކުންނަށް ޙައްޤު އޮޅުވާލާނެ ކަމެކެވެ. މީސްތަކުން ހަމަ މަގުން އެއްކިބާ ކުރުވާނެ ޢަމަލެކެވެ. އެ ކަމުގެ ނުބައިކަން މީހުން މެރުމަށްވުރެ ބޮޑެވެ. އެކަމުގެ ސަބަބުން މީސްތަކުންގެ މެދުގައި ފިތުނަވެރިކަން އުފެދޭތީއެވެ.
ދޮގު ޚަބަރު ފަތުރާ މީހަކީ، މުޖުތަމަޢުގައި ހިމެނޭ ވިހަ ގުނަވަނެކެވެ. އޭނާއަކީ އޭނާގެ ތަބީޢަތުގައި ދޭތެރެ ޖެއްސުމާއި، ދެބައޮޑުވުމުގެ ނުބައި ސިފަ އަށަގެންފައިވާ މީހެކެވެ. އެއީ މުޖުތަމަޢުގެ އަމަން އަމާންކަމުގެ ޙައްޤުގައި ބޮޑު ޖަރީމާއެކެވެ. އެއީ ދީނުގެ ޙައްޤުގައިވެސް ޖަރީމާއެކެވެ. އޭނާގެ އަމާޒަކީ މުޖުތަމަޢުގެ އަމާންކަން ނަގައިލުން ކަމަށް ވާތީއެވެ.
ޝާއިޠާނާގެ މަސައްކަތަކީ ނުބައި ކަންތައްތަކަށް މީސްތަކުން ހެއްލެނި ކުރުވުމެވެ. ދޮގުހަދައިގެންނާއި ހަޑިހުތުރު ޢަމަލުތަކުންނާއި ދޭތެރެ ޖައްސައިގެންނެވެ.
މައުލޫމާތު: ހުކުރުޚުތުބާ
