މިއީ އަރާކުރި ސީރީސްގެ ވާހަކަ ދޭހަ 1: މި ފޮތުގައި ހިމަނާފައިވާ 30 ދޭހައިގެ ތެރެއިން ދޭހައެކެވެ. މި ފޮތް އަމާޒު ކޮށްފައި ވަނީ ގްރޭޑް 2 ން މަތީ ކުދިންނަށެވެ. ތަސްވީރަށް ބަލައިގެން "އަސްދޫނި ފެންގަނޑު" މި ވާހަކަ ކިޔާށެވެ. ދެން ސުވާލުތަކަށް ޖަވާބުދޭށެވެ. އަދި ދީފައިވާ އެހީގެ ލަފުޒުތަކަށް ޖުމުލަ ހަދާށެވެ!
އަޖްނާ މިދިޔަ އަހަރުގެ ބޮޑު ބަންދުގައި ދިޔައީ އަޖްނާގެ ބޮޑު ދޮންބެގެ ފަޅުރަށްކަމަށް ވާ ކުޑަފުއްޓަށެވެ. އަޖްނާ އެ ރަށަށް ދިޔައީ އާއިލާއާ އެކުގައެވެ. އެ ފަޅުރަށުގައި ހަދާފައި ވަރަށް ރީތި އަސްދޫނި ފެންގަނޑެއް އޮވެއެވެ. އެ ފެންގަނޑުގައި އަސްދޫނިތައް އަބަދުވެސް އެރި އުޅެއެވެ. އެއީ ވަރަށް ރީތި މަންޒަރެކެވެ. އެހެންކަމުން އެ މަންޒަރު ފޮޓޯނަގަން އާއިލާގެ މީހުން ތައް އަބަދުވެސް އަވަދިނެތި އުޅެމުންދެއެވެ. އެ ފެންގަނޑުތެރޭގައި ލޮޓަސް މާތައް އަބަދުވެސް ފޮޅިފައި ހުރެއެވެ. އެއި ބަލައި ފޫހި ނުވާ ފަދަ ރީތި މަންޒަރެކެވެ.
އަޖްނާގެ މަންމައާއި ބައްޕަ ކޮއްކޮ އާލީއާއި އަޖްނާ ގޮވައިގެން އެ ރީތީ އަސްދޫނި ފެންގަނޑު ކައިރިއަށް ވަރަށް ގިނައިން ދެއެވެ. އަދި އެ ފެންގަނޑު ކައިރީގައި ތިބެގެން އެ ކުދިން ކައިބޮއެ ވެސް ހަދައެވެ. ކޮއްކޮ އާލީއަށް އެންމެ ރަނގަޅަށް ކެވެނީވެސް އެ ފެންގަނޑު ކައިރިއަށް އައިސް އިނދެގެންކަމަށް ވެއެވެ.
ފެންގަނޑުގެ ވަށައިގެން ވަރަށް ރީތި ވިނަގަނޑެއް ވެސް ހެދިފައި އޮވެއެވެ. އެ ވިނަގަނޑުމަތީ އެކުދިން އިށީންދެގެން ތިބެއެވެ. ފެންގަނޑުގެ ބިއްދަށުން ފެންނަނީ ބޯ ގަސްތަކެވެ. އަދި ދިގު ރުއްތަކެވެ. އެއީ ވަރަށް ހިތްފަސޭހަ ރީތި ބަލައިފޫހި ނުވާނެފަދަ މަންޒަރުތަކެކެވެ. މި އަސްދޫނި ފެންގަނޑަށް ފެން އެޅިފައި ހުންނަނީ މޫދުންނެވެ. އެހެނީ އެ ފެންގަނޑުގެ އެއް ފަރާތް ގުޅިފައިވަނީ ކުޑަފުށީ ވަށައިގެން އޮންނަ މޫދާއެވެ. މި ހުރިހާ ސަބަބަކަށްޓަކައި މި ފެންގަނޑަކީ ވަރަށް ހިތްގައިމު ތަނެކެވެ.
އަޖްނާމެން ބައެއް ދުވަސްދުވަހު ލޯންޗެއްގައި ކުޑަފުއްޓާ ކައިރީގައި އޮންނަ ކުނަހަންދޫ ކިޔާ ރަށަކަށް ވެސް ދެއެވެ. އެރަށުގެ މީހުންނަކީ ވަރަށް ހެޔޮބައެކެވެ. އެރަށުގައި އަޖްނާގެ މާމަ ފަރާތު ތިމާގެ މީހުން ވެސް އުޅެއެވެ. އެރަށުގެ މީހުން އަޖްނާމެނަށް ކުރުނބާ ދީ ހަދައެވެ. އަދި މީރު ކާނާ ތައްޔާރުކޮށްގެން ކާންދީ ވެސް ހަދައެވެ. އަޖްނާ ބުނާގޮތުގައި އެ ދެ ރަށަށް އަޖްނާ ވަރަށް ދާ ހިތްވެއެވެ.
1- ފަޅުރަށުގައި 2- އަސްދޫނިތައް 3- ފޮޓޯތައް 4- އަބަދުވެސް 5- ގިނައިން
6- ކެވެނީވެސް 7- ވަށައިގެން 8- އިށީންދެގެން 9- ފެންގަނޑަށް 10- ހުރިހާ
- ތަސްވީރު ދެނެގަތުން
ހ- ތަސްވީރުން ފެންނަ ތަކެތި ކިޔައިދީބަލަ!
ށ- އެތާ ތޮފިއަޅައިގެން އެ އުޅޭ މީހުން އެ ކުރަނީ ކޮންކަމެއްތަ؟
ނ- އިށީންދެގެން އެ ތިބި މީހުން އެ ކުރަނީ ކީއްތަ؟
2- ކިޔުމުގެ ދޭހަ "އަސްދޫނި ފެންގަނޑު"
ހ- އަސްދޫނި ފެންގަނޑު އޮންނަނީ ކޮން ރަށެއްގައިތަ؟
ށ- އާލީއަށް ކާންދޭން އެންމެ ފަސޭހަވަނީ ކޮންތަނެއްގައި އިނދެގެންތަ؟
ނ- އަސްދޫނި ފެންގަނޑަށް ފެން އެޅެނީ ކޮންތަނަކުންތަ؟
ރ- އަސްދޫނި ފެންގަނޑު ހިތްގައިމު ތަނަކަށް ވަނީ ކީއްވެގެންތަ؟
3- އުފެއްދުންތެރި ވިސްނުން
ހ- ތިޔަ ދަރިވަރު މި ވާހަކައަށް ނަމެއް ދޭން ޖެހިއްޖެނަމަ ދޭނީ ކޮންނަމެއް ހެއްޔެވެ؟ އަދި އެއީ ކީއްވެ ހެއްޔެވެ؟
ށ- އެ މަންޒަރު ބަލާ ފޫހި ނުވެޔޭ ބުނާ ސަބަބަކީ ކޮބައިބާ؟
ނ- ފޮޓޯއިން ފެންނަ މަންޒަރުތަކުގެ ތެރެއިން އެންމެ ރީތި މަންޒަރަކީ ކޮބާ!
ނޯޓް: ޙުސްނާ ފަހްމީ (ހުސްނާ މިސް) އަކީ، ރާއްޖޭގެ ތަޢުލީމީ ދާއިރާގައި 42 އަހަރަށް ވުރެ ގިނަ ދުވަހު އިޚުލާޞްތެރި ޚިދުމަތްތަކެއް ކުރައްވާފައިވާ ކަނބަލެކެވެ. އަދި މެދުނުކެނޑި 37 އަހަރަށް ވުރެ ގިނަ ދުވަހު ދިވެހި ދައުލަތައް ޚިދުމަތްކުރައްވާފައި ވާތީ، ރައިސުލްޖުމްހޫރިއްޔާ ދެއްވާ ދައުލަތަށް ގިނަ ދުވަހު ޚިދުމަތް ކުރުމުގެ އިނާމު 2021 ވަނަ ލިބިވަޑައިގަތުމާއެކު 2023 ވަނަ އަހަރު ރެހެންދި އެވޯޑް ލިބިވަޑައިގެންފައިވެއެވެ. ޙުސްނާ ފަހްމީ "އަރާކުރި" ސީރީސް ގެ ނަމުގައި ދިވެހިބަހުގެ ހަތަރު ހުނަރަށް އަމާޒުކުރައްވައިގެން ނާސަރީ ކުދިންނަށް ޚާއްޞަ ދިވެހިބަހުގެ އަކުރުތަކާއި ފިލިތަކާއި ސުކުންތައް ދަސްކޮށްދޭ ފޮތްތަކުން ފެށިގެން ޕްރައިމަރީ އަދި މެދުމަދަރުސީ ގްރޭޑްތަކުގެ ކުދިންނަށް ޚާއްޞަކޮށްގެން ޢިބްރަތްތެރި އަދި މަޖާ ކުރު ވާހަކަތަކާއި، މަސައްކަތު ފޮތްތަކާއި، ވާހަކަ ދޭހައާއި ކިޔުމުގެ ދޭހައިގެ ފޮތްތަކުގެ އިތުރުން އުފެއްދުންތެރި ލިޔުމުގެ ފޮތްތައް ހިމެނޭނޭހެން 40 ފޮތެއް މިހާތަނަށް ނެރެ އާންމުކުރައްވާފައިވެއެވެ.
