ފެން ރައްކާތެރި ކުރުމަކީ މުހިންމު ކަމެއްކަން އެންމެންނަށްވެސް އެނގެއެވެ. އެހެންނަމަވެސް މިކަމާމެދު ވިސްނާނުލާ މީހުންވެސް އުޅެއެވެ. ސާފު ބޯފެން ނުލިބޭ ބަޔަކުވެސް ދުނިޔޭގެ އެކި ކަންކޮޅުތަކުގައި ދިރިއުޅެއެވެ. އަހަރެމެންގެ މިގައުމުގައި ސާފު ބޯފެން ނުލިބޭ މީހަކު ނެތޭ ބުނުންވެސް ދޮގަކަށް ނުވާނެއެވެ. ފެނުގެ ދަތިކަން އައިސްފިނަމަ ދެން ދިމާވާނެ ކަންކަމަށް ވިސްނާލުންވެސް ރަނގަޅެވެ. ފެން ބޭނުންކުރަންޖެހޭ މިންވަރަށްވުރެ އިތުރަށް އިސްރާފުވާ މިންވަރަށް ބޭނުންނުކުރުމަށް ވިސްނާލަމާ ހިނގާށެވެ. މާގިނައިން ފެން ބޭނުންކުރާނަމަ ފެންބިލް ބޮޑުވެދާނެތީ ވިސްނާ ބަޔަކުވެސް އުޅެއެވެ. ފެން ރައްކާތެރިކޮށް ފެނުގެ ޚަރަދުތައް ކުޑަކޮށްފިނަމަ ލިބޭނެ ފައިދާ އެތައް ގުނައަކަށް ބޮޑުވެގެންދެއެވެ. ތިރީގައި މިވަނީ ފެން ރައްކާތެރި ކުރުމަށްޓަކައި ކުރެވިދާނެ ކަންތައްތަކެވެ.
ގަސްތަކަށް ފެން ދިނުމުގައި ފެން ރައްކާތެރި ކުރެވިދާނެ:
ގޭގައި ހައްދާ ގަސްތަކަށް ފެން ދިނުމުގައި ހޮޅިއަކުން ނުވަތަ ޝަވަރަކުން ފެންދޭނަމަ ވަރަށް ގިނަ ފެން އިސްރާފުވެގެންދެއެވެ. އޭގެ ބަދަލުގައި ބާލިދީއަކަށް ފެން އެޅުމަށްފަހު ކުޑަ ތައްޓެއް ކަހަލަ އެއްޗަކުން ނުވަތަ ކުޑަ ފުޅިއެއްގައި ވިދު ތޮރުފުމަށްފަހު އެއަށް ފެންއަޅައިގެން ފެން ދިނުމުން ފެން އިސްރާފު ނުވެ ސަލާމަތްވެގެންދެއެވެ. އަދި މީގެ އިތުރުން ކައްކާފައި ހުރި ފެން ބާކީ ހުރެއްޖެ ހާލަތެއްގައި އެފެން ހިހޫ ކުރުމަށްފަހު އެފެން ގަސްތަކަށް ދިނުމުންވެސް 'ނިއުޓްރިއަންސް' ލިބޭނެއެވެ.
ބޭކާރުގޮތުގައި އިސްކުރު ދޫކޮށްފައި ނުބެހެއްޓުން:
ފާޚާނާގައި ދަތް އުނގުޅަން ހުންނަ ގަޑީގައިވެސް ބައެއް މީހުން އިސްކުރު ދޫކޮށްފައި ހުރެއެވެ. މިގޮތަށް އިސްކުރު ދޫކޮށްފައި ހުރުމުން މިނިޓެއްގެ ތެރޭގައި 6 ލީޓަރުގެ ފެން އިސްރާފުވެގެން އެބަދެއެވެ. ބަދިގޭގައި ގެންގުޅޭ ތަރުކާރީ ނުވަތަ މޭވާއެއްޗެހި ދޮންނަންވެސް އިސްކުރު ދޫކޮށްގެން އެކަން ކުރުމުގެ ބަދަލުގައި އެއްޗަކަށް ފެންއަޅާފައި ބެހެއްޓުމަށްފަހު ދޮވެލުމުން ގިނަ އަދަދެއްގެ ފެން ރައްކާކުރެވެއެވެ. މިކަހަލަ އެތައްކަމެއް ކުރުމުގައި އިސްކުރު ދޫކޮށްގެން ގިނައިރު ބަހައްޓާނަމަ ބޭކާރުވެގެންދާ ފެނުގެ މިންވަރު އަންދާޒާވެސް ނުކުރެވޭނެއެވެ.
ތަށި ދޮންނައިރު ފެން ރައްކާކުރެވިދާނެ:
"ޑިޝްވޮޝާ"އެއް ބޭނުންކޮށްގެން ތަށި ދޮންނަނަމަ އިރުއިރުކޮޅާ ދޮވުމުގެ ބަދަލުގައި ހުރިހާ ތައްޓެއް އެއްފަހަރާ ދޮވުމުން ރަނގަޅުވާނެއެވެ. އޭރުންވެސް ސަލާމަތްކުރެވޭ ފެނުގެ މިންވަރު ވަރަށް ބޮޑުވެގެންދާނެއެވެ. އިސްކުރު ބޭނުންކޮށްގެން ތަށި ދޮންނަނަމަ އެއްޗަކަށް ފެންއެޅުމަށްފަހު ތަށިތައް ދޮވެލާށެވެ. އެއަށްފަހު ރީތިފެނުން ދޮންނަންވެސް ވަކިން އެއްޗަކަށް ފެން އަޅާލައިގެން އެކަންކޮށްލުމުން ފެން ރައްކާކުރެވެއެވެ.
މެޝިނުން އަންނައުނު ދޮވުމުގައި ފެން ރައްކާކުރެވޭނެ ގޮތް:
އިރުއިރުކޮޅާ ދޮންނަ މެޝިނަށް ހެދުމެއްލައިގެން އެއްޗެހި ދޮންނަނަމަ ދުވާލެއްގެ މައްޗަށް ވަރަށް ގިނަ ފެން އިސްރާފު ވެގެންދެއެވެ. އޭގެ ބަދަލުގައި އެއްފަހަރެއްގެ މަތިން މެޝިނަށް އެއްޗެހި އެޅޭ މިންވަރަށް އަންނައުނު ދާވުމުން އެއްޗެހި ދޮވެލުމުން ފެން ސަލާމަތްކުރެވެއެވެ. އަދި މީގެ އިތުރުން އެއްޗެހި ދޮވެ ހިއްކަންދާ ވަގުތުވެސް ވަރަށް ބޮޑަށް ސަލާމަތްވެގެންދެއެވެ.
ފެންކައްކާ ކުރާ ނުވަތަ ޖަގު ބޭނުންކުރާއިރު ފެން ރައްކާކުރެވޭނެ:
ސައިބޯން ނުވަތަ ކޮފީ ބޯން ފެން ކައްކާއިރު ބޭނުންކުރާ މިންވަރަށް ވުރެ އިތުރަށް ފެން ނޭޅުން ބުއްދިވެރިއެވެ. އެގޮތަށް ފެންއަޅައިގެން ފެން ކައްކާނަމަ ކެއްކިފެން ހޫނުކޮށް ބެހެއްޓޭނެ ތަރުމޯޒަކަށް އަޅާފައި ބެހެއްޓިދާނެއެވެ. އޭރުން ބޭކާރުވެގެންދާ ފެނުގެ އިތުރުން ކަރަންޓުވެސް ސަލާމަތްކުރެވޭނެއެވެ.
މައުލޫމާތު: ޑަބްލިއު ޑަބްލިއު އެފް ޑޮޓް އޯއަރޖީ ޑޮޓް ޔޫކޭ
