ކޮންމެ ކަމަކަށް ވެސް ފެށުމަކާއި ނިމުމެއް ވާނެއެވެ. އެއީ ދުނިޔޭގެ އާދައެވެ. ކޮންމެ ކަމެއްގެ ވެސް ރަނގަޅެއް ވާނެއެވެ. އެކަމުގައި ފޮރުވިފައިވާ ކަންތައްތަކެއް ވާނެއޭ ބުނާތީ އަޑުއަހަމެވެ. އަހަރެމެން އިންސާނުންނަށް އޮތީ އެކަން ގަބޫލު ކުރުމެވެ. އެކަންތައް ދިމާވާނީ ކޮންއިރަކު ކޮންތާކު ކަމެއް ނޭނގެއެވެ.

އެއީ އަހަރެންގެ އުމުރުން ހަތާވީސް ވަނަ އަހަރު ގުނަމުން ދިޔަ އަހަރެވެ. ޒުވާންކަމުގެ ލޭ މުޅި ހަށިގަނޑުގައި ދައުރުވަމުން ދިޔައީ އެއްވެސް ފިކުރެއް ޚިޔާލެއް ނެތިއެވެ. ނަމަވެސް އަހަރެންގެ ހަޔާތުން އަބަދުވެސް ކޮންމެވެސް އެއްޗެއް ބާކީވެފައިވާ ކަމުގެ އިހުސާސް ކުރެވެއެވެ. ސަބަބެއް ނެތިއެއް ނޫނެވެ. އަހަރެންނާއި އެއް އުމުރެއްގެ ހުރިހާ ކުދިން ވަނީ ޒަވާޖީ ހަޔާތެއް ފަށައި ދިރިއުޅުމުގެ ކަންތައް ފުރިހަމަ ކޮއްފައެވެ. ބައެއް ކުދިން ޒުވާން އުމުރުގައި ދަރިން ލިބި މައިންބަފައިންނަށް ވަނީ ވެފައެވެ. ނަމަވެސް އަހަރެން ހުންނަން މި ޖެހެނީ ހަޔާތުގެ ބައިވެރިއެއް ނެތިފައެވެ. ކުރާނެ ކަމެއް ނެތެވެ. ރައްޓެހިން މެދުވެރިކޮށްވެސް ރަނގަޅު ކުއްޖަކު ލިބޭތޯ ވަރަށް މަސައްކަތް ކޮއްފީމެވެ. ނަމަވެސް އެކަންވެސް ކާމިޔާބު ނުވެ އުމުރުން ދުވަހެއް ފާއިތުވަމުން ދަނީއެވެ. ގާތް ބައެއް ރައްޓެހިން އެކަމާއި މަޖަލަކަށް ހަދާފައިވެސް ދިމާކުރަން ދެއެވެ. ނަމަވެސް އަހަރެންގެ އަނގައިން ދެރައެއް ނުވަމެވެ. ނަމަވެސް އެމީހުން ބުނެލާ ބަސްތަކުން ހިތަށް ވަރަށް ތަދުވެއެވެ. އެމަންޒަރު ބޭރަށް ނުދައްކަން ވަރަށް މަސައްކަތް ކުރަމެވެ.

ހަވީރު ހިތްގައިމު ވަގުތެވެ. އޮފީހުގެ ބުރަ މަސައްކަތަށްފަހު އަހަރެންގެ ހަށިގަނޑަށް ލިބިފައިވާ ވަރުބަލިކަމަށް ލުޔެއް ލިބޭތޯ އެނދުގައި އޮށޯވެލީމެވެ. ފޯނުގެ ރިންގް އޮފް ކޮއްލާނަމޭ ހިތަށް އަރާފައި ކޮންމެވެސް މުހިއްމު ފޯނެއް އަތުވެދާނެކަމަށް ހިތައި ފޯނުގެ ރިންގް އޮފް ނުކުރަން ނިންމީމެވެ. އަދި ފޯނު ބާއްވާފައި އެނދުގައި އޮށޯވެ ދެލޯ މަރައިލީ ގަދަކަމުންނެވެ. ނިދި ނަޔަސް ގަދަކަމުން ނިދޭތޯއެވެ. އަހަރެންނަށް ނިދުނީ ކިހާއިރެއް ކަމެއްވެސް ނޭނގެއެވެ. ސިއްސައިގެން ދިޔައީ ފޯނު ރިންގުވާ އަޑަށެވެ. ނަމަވެސް ފޯނު ކަނޑާލާފައި އަނެއްކާވެސް އޮށޯތީމެވެ. ނަމަވެސް ނިދޭގޮތް ނުވުމުން ފާޑަކަށް ރުޅި އާދެވުނެވެ. އަހަރެންނަށް ގުޅި ކުއްޖާދެކެއެވެ. އެހެން ނަމަވެސް ދެވަނަ ފަހަރަށްވެސް ފޯނު ރިންގްވާން ފެށިއެވެ. ހިތާއި ދެކޮޅަށް ނަމަވެސް އެ ފޯނު ކޯލަށް ޖަވާބު ދިނީމެވެ. ފޫހި ފާޑަކަށެވެ.

Advertisement

"ނިދަނީތަ" އެކޮޅުން ވާހަކަ ދެއްކީ ވަރަށް ކުރިއްސުރެ ދަންނަ ހަމްނަތެވެ.

'ނޫން. މިދެން ކޮން ގަޑިއެއް ނިދަން" އަހަރެން ފޫހި ފާޑަކަށް ހަމްނަތާއި ވާހަކަ ދެއްކީމެވެ.

"މިގުޅީ ބިޓެއް ހުރި ވާހަކަ ބުނެލަން" ހަމްނަތު އެހެން ބުނެލުމުން އަހަރެންގެ ނިދިކޮޅުވެސް ގެއްލުނެވެ.

އަހަރެން ވަރަށް ޝަޢުގުވެރިކަމާއިއެކު ވާހަކަ ދެއްކީމެވެ. އެކުއްޖާގެ ހުރިހާ މައުލޫމާތެއް އަހަރެންނަށް ލިބުނެވެ. އަދި އެއީ ވަރަށް ރަނގަޅު ކުއްޖެއް ކަމަށާއި އަވަހަށް މީހަކާއި އިންނަން ބޭނުންވާ ކަމަށް ބުންޏެވެ. އަހަރެންވެސް ބޭނުންވެފައި ހުރީ ހަމަ އެގޮތަށެވެ. ވީހާވެސް އަވަހަކަށް މީހަކާއި އިނދެ ރަނގަޅު ދިރިއުޅުމެއް އުޅެން ބޭނުމެވެ. މާގިނަ ދުވަހަކު ހުންނަން ބޭނުން ނުވާތީވެ އަހަރެން ވަގުތުން އެ އަންހެން ކުއްޖާއަށް ގުޅީމެވެ. އަދި އަހަރެންގެ ތަޢާރަފެއް ދިނީމެވެ. އެކޮޅުން ވާހަކަ ދެއްކީ އޯގާތެރިކަމާއި ލޯބިން ފުރިފައިވާ އަޑަކުންނެވެ. އަހަރެންގެ ހިތް ފުރުނެވެ. އަހަރެން އޭނާއަށް ގުޅިއިރު އަހަރެންގެ ރައްޓެހި ކުއްޖާ ވަނީ އަހަރެންގެ ހުރިހާ ވާހަކައެއް އޭނަގެ ގާތުގައި ދައްކައިފައި ކަމުން ކުރިއަށް ދާން ވަރަށް ފަސޭހަވިއެވެ. ނަމަވެސް އޭނާގެ ނަން ބުނީ ފޯނު ބާއްވަން އުޅެނިކޮށެވެ. އެއީ ރިމްހާ އެވެ. ކިހާ ރީތި ނަމެއް ހެއްޔެވެ. އަހަރެން އުފަލުން ފޮޅުނެވެ. އަހަރެމެންނަކީ ރާއްޖޭގެ ދެރަށަކަށް ނިސްބަތްވާ ދެމީހުންނަށް ވިޔަސް ޚިޔާލު ވަރަށް އެއްގޮތް ވިއެވެ. އަދި ކައިވެންޏަށް ފަހު ދިރިއުޅޭނެ ރަށަކާއި ދިރިއުޅުން ކުރިއަށް ގެންދާނެ ގޮތެއް ހަމަޖެއްސީމެވެ. ހުރިހާ ކަމެއްވެސް ދިޔައީ ވަރަށް ބާރަށެވެ. ދެމީހުންވެސް ބޭނުންވީ އަވަހަށް ކައިވެނި ކުރާށެވެ. އަހަރެން ދިރިއުޅެމުން ދިޔައީ މާލޭގައެވެ. އޭނަ ދިރި އުޅެމުން ދިޔައީ އޭނަގެ ރަށުގައެވެ. ދެމީހުންވެސް އެދުވަހުގެ ފަހުން މަސައްކަތް ކުރަމުން ދިޔައީ ދިރިއުޅުމެއް ފަށާތީ ވަރަށް ބިޒީކޮށެވެ. ފައިސާ ހޯދުމުގައެވެ.

ހެނދުނު އިރު އަރައިގެން އައީ އަހަރެމެން ދެމީހުންނަށް މަރުހަބާ ކިޔަމުންނެވެ. މިއަދަކީ އަހަރުގެ ފަހު މަސް ކަމުގައިވާ ޑިސެމްބަރ މަހުގެ އެންމެ ފަހު ދުވަހެވެ. އަހަރެމެން ކައިވެނި ކުރަން ހަމަޖެހިފައިވާ ދުވަހެވެ. ދެފަރާތުގެ އާއިލާގެ އެންމެންވެސް މިހަފްލާ އަށް ތައްޔާރުވެގެން އައިސް ތިބީ ކައިވެނީގެ ކުލަ ކޯޑު ކަމުގައިވާ ނޫ ކުލައިންނެވެ. ކައިވެނި ކުރެވުނީ ރިމްހާގެ އުފަން ރަށުގައެވެ. އެގޮތަށް ހަމަޖެއްސީ ރިމްހާގެ އެދުމަށެވެ. އަހަރެންގެ އާއިލާގެ މެންބަރުންވެސް މިއަދަށް ވަރަށް ތައްޔާރުވެގެން އައިސް ތިބީ ވަރަށް އުފަލުންނެވެ. ކައިވެނީގެ ހަފްލާ އާއި އެހެނިހެން ކަންތައް ނިމުނީ ވަރަށް ފުރިހަމައަށެވެ. އަހަރެމެން އުއްމީދު ކުރިވަރަށް ވުރެވެސް ރަނގަޅެވެ. އަހަރެމެން ގަސްދުކުރީ ކުޑަ ދުވަސްކޮޅަކު އެރަށުގައި މަޑުކޮއްލުމަށްފަހު މާލެ އަންނާށެވެ. އެއީ ދެމީހުންވެސް ބޭނުންވި ގޮތެވެ. ރިމްހާ ބޭނުންވީ އޭނާގެ ވަޒީފާ ދޫކޮށް މާލެ ބަދަލުވާށެވެ. ފިރިމީހާގެ ޚިދުމަތް ކުރުމަށެވެ. އަދި ދަރިން ލިބި އަންހެން މީހާ ވަޒީފާއަށް ދާން ފަށައިފިއްޔާ އެދަރިންނަށް ވާނެ ގެއްލުން އިހުސާސް ކުރެވޭތީއެވެ.

އަހަރެމެން މާލެ ބަދަލުވެ ދިރިއުޅެމުން ދިޔައީ ވަރަށް އުފާވެރި ދުވަސްތަކެކެވެ. ދެމީހުންވެސް ދިރިއުޅެމުން ދިޔައީ ވަކި އެޕާރޓްމަންޓެއްގައެވެ. ދެމީހުން އެކަނި އުޅެން ފެށުމުން ދަރިއެއް ނެއްކަމުގެ އިހްސާސް ވާން ފެށިއެވެ. ނަމަވެސް އެއީ އިންސާނުންގެ ބާރު ފޯރުވޭ ކަމަކަށް ނުވާތީ އަދި ދަރިއެއް ނުލިބެއެވެ. ނަމަވެސް ދަރިއެއް ބޭނުން ނުވާ ކަހަލަ ވާހަކަ ތަކެއް ކޮންމެވެސް ވަރަކަށް ރިމްހާގެ ދުލުން އަޑުއިވެއެވެ. ސަބަބެއް ނުބުނެއެވެ. ރާއްޖެއިން ބޭރަށްވެސް ގޮސް ޑޮކްޓަރަށް ދައްކާ ޓެސްޓްތައް ވެސް ހެދީމެވެ. އެއްވެސް މައްސަލައެއް ނެތެވެ. ރިމްހާ އަށް އަދި ފަހުން ވިސްނޭނެކަމަށް ހިތައި އެވާހަކަ ދެއްކުން ހުއްޓައިލީމެވެ. ނަމަވެސް ރިމްހާ އަހަރެންނަށް ވަރަށް ހެވެއެވެ. ނަމަވެސް މާ ގިނަ ދުވަހަކު މިގުޅުންވެސް ރަނގަޅު ގޮތުގައި ދެމި ނުއޮތެވެ. ކުނިޖެހެން ފެށިއެވެ. ރަށަށް ބަދަލުވާން ބޭނުންވާ ވާހަކަ ބުނަން ފެށިއެވެ. އަހަރެން އެކަމަށް އެއްބަސްވީމެވެ. ވަރަށް ނަސޭހަތް ދިނުމަށްފަހު އެކަން ރިމްހާ ގަބޫލު ނުކުރީމައެވެ. ރިމްހާ ރަށަށް ބަދަލުވާން ދެތިން މަސް ވާން ކައިރިވިތަނާހެން އެހެން ވާހަކައެއް އަހަރެންގެ ކަންފަތަށް އެރިއެވެ. އެއީ ކުރިން ރިމްހާ ވަޒީފާ އަދާކުރި އޮފީހުގެ ބޮސް އާއި ރައްޓެހިވެގެން އުޅޭ ވާހަކައެވެ. އެއީ އެ އޮފީހުގެ މެނޭޖަރެވެ. ކައިވެނީގެ ކުރިންވެސް އަހަރެންނަށް މިވާހަކަ ވަނީ އަޑުއިވިފައެވެ. ނަމަވެސް އެއީ މާޒީ ކަމަށް ބަލައި އެކަމާއި އަޅައިނުލައި ދޫކޮއްލީމެވެ. އެވާހަކަ ރިމްހާ ގާތުގައި އެހުމުން އެވާހަކަ ދޮގު ކުރިއެވެ. ނަމަވެސް އެވާހަކަތައް އިތުރަށް ނުދެއްކީ އަހަރެން ރިމްހާ ދެކެ ވަރަށް ލޯބި ވާތީއެވެ. އެންމެ ފަހުން ރިމްހާ އަހަރެންނާއި އެއްކޮށް ގުޅުން ކަނޑައިލިއެވެ. ވާހަކަވެސް ނުދައްކައެވެ. ކާން އިންނަ އިރު ބައެއް ދުވަހު ކައިގެން އަހެރެންގެ ގައިން ރިމްހާ އަތް ފޮހެލައެވެ. އަދި ރަށަށް ދާން ބޭނުންވާ ވާހަކަ އަބަދު ދައްކަނީއެވެ. އެންމެ ފަހުން އަހަރެން ރިމްހާގެ އެދުމަށް އޭނަ މިނިވަން ކޮއްލަދިނީމެވެ. ރިމްހާ އުފަލުގައި ބެހެއްޓުމަށެވެ. އަހަރެން ރިމްހާ ވަރި ކުރުމުން ރިމްހާ އެއްވެސް ދެރައެއް ނުވެއެވެ. އަދި ރަށަށް ދާން ފުރަން ލޯންޗުގައި އިން އިރުވެސް އަހަރެންނާއި ދިމާލަށް ބަލާއިވެސް ނުލައެވެ. ލޯންޗު އަހަރެންގެ ލޮލުކޮޅުން ގެއްލެންދެން ރޮވިފައި ހުރީމެވެ. މުޅި އުމުރަށް އަހަރެންނަށް ރިމްހާ ގެއްލުނީމައެވެ.

އަހަރެން ހިތްވަރު ކުރަމުން ދިޔައީ ލިބިފައިވާ ވޭނުން އަރައިގަނެވޭތޯއެވެ. ބަރާބަރަށް ނަމާދުކޮށް ދުޢާ ކުރުން ގިނަ ކުރީމެވެ. އަހަރެންނަށް ރަނގަޅު ދިރިއުޅުމެއް ދެއްވާތޯއެވެ. މާގިނަ ދުވަހެއް ނުވަނީސް އަހަރެންގެ ނަސީބު އަހަރެންގެ އަތުގައި ހިފައިފިއެވެ. ރަނގަޅު ދީންވެރި އަންހެން ކުއްޖެއް ކައިވެނި ކުރަން ލިބުނީއެވެ. އެފުރުސަތު އަހަރެން ދޫކޮއްލާކަށް ބޭނުމެއް ނުވިއެވެ. ވީއެންމެ އަވަހަކަށް އަހަރެން ކައިވެނި ކުރީމެވެ. ކައިވެނި ކުރިތާ ތިންމަސް ވީއިރުވެސް އަހަރެންނަށް ދަރިއަކު ނުލިބެއެވެ. އެހިސާބުން އަހަރެންގެ ހިތުގައި ބިރުވެރިކަން އުފެދެން ފެށުނެވެ. ނަމަވެސް އަހަރެންގެ ލޯބިވާ އަނބިމީހާ އަކީ ދީނީ ރޮނގުން ކިޔަވައިގެން ހުރި މީހަކަށް ވާތީ އާއި އަދި ކައުންސިލިންގ ދޭ މީހަކަށް ވާތީ އަހަރެންނަށް ވަރަށް ހިތްވަރު ދެމުން ދިޔައެވެ. އުންމީދު ކަނޑާ ނުލުމަށެވެ. އަހަރެންގެ އަނބިމީހާގެ އެދުމުގެ މަތިން އަހަރެމެން ދަމު ނަމާދު ކުރަން ފެށީމެވެ. އެވަގުތަކީ ދުޢާ އިޖާބަ ކުރައްވާނެ ވަގުތެއް ކަމަށް ބުނެ އަހަރެންގެ އަނބިމީހާ އަހަރެންނަށް ހިތްވަރު ދިނެވެ. އެފަހުން އަހަރެމެން ދަމު ނަމާދު ނުކުރާ އެންމެ ރެއެއްވެސް ނުދެއެވެ. ﷲގެ ރަހުމަތުން އަހަރެމެން ދަމު ނަމާދު ކުރަން ފެށިތާ ދެމަސް ދުވަސް ނުވަނީސް އަހަރެންގެ އަންހެނުން ބަލިވެއިނެވެ. ނަމަވެސް ބަނޑު ބޮޑުވި ތަނާހެން ވަރަށް ބޮޑަށް ބަލިވެ ގިނަ ވަގުތު އޮށޯވެ އޮންނަން ޖެހުނެވެ. ޑޮކްޓަރުން ބުނަމުން ދިޔައީ އަހަރެންގެ ހިތް ހަލާކުވަމުންދާ ކަހަލަ ވާހަކައެވެ. ދަރިފުޅު ވަކި ހިސާބަކުން ބައިގެން ހިނގައިދާނެ ކަމެވެ. އަހަރެން އެއްވެސް އުއްމީދެއް ނެތި ކުރިއަށް ދިޔައީމެވެ. ނަމަވެސް ކޮންމެ ރެއަކު ދަމު ނަމާދު ކުރުން ކުރިއަށް ގެންދިޔައީމެވެ. ވިސްނަވާށެވެ. އަހަރެންގެ އަންހެނުން ވިހެއީ އެއްވެސް މައްސަލައެއް ނެތި ލޯބި ލޯބި ފިރިހެން ކުއްޖެކެވެ. އަހަރެންގެ ދުޢާ އިޖާބަ ކުރެއްވީއެވެ. އަދިވެސް އަހަރެންނަށް ދިމާވި ހުރިހާ ކަމެއްގައިވެސް ދަމު ނަމާދު ވަގުތުގައި ދުޢާ ކޮށް އެކަން ކާމިޔާބުވިއެވެ. އެއީ ވަރަށް ރަނގަޅު ވާހަކައެކެވެ. ދަމު ނަމާދު ވަގުތަކީ ވަރަށް ރަނގަޅު ވަގުތެއްކަން އަހަރެންނަށް ތަޖުރިބާ ކުރެވުނެވެ. މިހާރު އަހަރެން ދިއުޅެމުން މިދަނީ ވަރަށް އުފަލުންނެވެ. އަހަރެން ދޫކޮއްލާފައި މޮޅު ގޮތް ހޯދަން ދިޔަ ރިމްހާ އަދިވެސް އޭނަގެ ލޯބިވެރިޔާ އާއި ކައިވެނި ނުކުރެއެވެ. އެންމެފަހުން ރިމްހާގެ ލޯބިވެރިޔާ ކައިވެނިކުރީ ރިމްހާގެ ރަށުގެ ކުއްޖަކާއިއެވެ. އަދި އެވެސް ދެއަންބަށެވެ. އަދިވެސް ރިމްހާ ހުރީ އެނާގެ އިންތިޒާރުގައެވެ. ތިންވަނަ ނުވަތަ ހަތަރު ވަނަ އަންބަކަށް ނަމަވެސް ކައިވެނި ކުރޭތޯއެވެ. ބޮޑު މުސާރަ އާއި ބޮޑު މަގާމުގެ ދަހިވެތި ކަމުގެ ދަލުގައި ރިމްހާ ޖެހުނީއެވެ. މީހާގެ ކުރިއަށް މެނޭޖަރު އައީއެވެ. އޮފީހުގެ ވެރިމީހާއަށް ރިމްހާ ހިތް ކިޔުނީ މަގާމުގެ ނަމަށް މެނޭޖަރު ކިޔާތީއެވެ. އަދި އޮފީހުގެ ވެރިޔާ އާއި ކައިވެނި ކުރެވުމަކީ ބޮޑު ޝަރަފެއް ކަމުގައި ދެކެވުނީއެވެ. ނަމަވެސް އެޝަރަފް އަދިވެސް ރިމްހާއަށް ނުލިބެއެވެ. އަދި ލިބޭނެ ދުވަހެއްވެސް ނޭނގެއެވެ. ވިސްނަވާށެވެ. ވަކިވިޔަކަސް އުންމީދު އަހަރެން ކަނޑައި ނުލީމެވެ. ހެއްދެވި ފަރާތަށް ދުޢާ ކުރުމުގައި ދެމިހުރީމެވެ. ޚާއްސަކޮށް ދަމު ނަމާދު ވަގުތުގައެވެ. އެވަގުތު ދުޢާ އިޖާބަ ކުރައްވައި އަހަރެންނަށް ރަނގަޅު ދިރިއުޅުމެއް ދެއްވިއެވެ. އެއްވެސް މީހަކަށް ދެރަގޮތެއް މެދުވެރި ނުކުރައްވާނެއެވެ. އަދި އެއްވެސް މީހަކަށް އަނެކާއަށް ލަނޑެއްވެސް ނުދެވޭނެއެވެ. ނަމަވެސް މިހާރު އަހަރެންގެ ހިތުން ރިމްހާގެ ނަން ވެސް ފޮހެލައިފީމެވެ. މުޅި އުމުރަށެވެ. ރިމްހާ ވަކިވެގެން ދިޔައީއެވެ. ވަކިވިޔަކަސް އަހަރެންނަށް ލިބުނު ދެރައެއް ނެތެވެ. ވީ މޮޅެވެ.

= ނިމުނީ =