ދުނިޔޭގައި ފެތުރިފައިވާ ނުރައްކާތެރި ބޮޑެތި ވަބާތަކުގެ ތެރެއިން ނުރައްކާތެރިކަން ފިލުވައިލަން އެންމެ އުނދަގޫ އެއް ވަބާއަކީ ރިޝްވަތުގެ ވަބާއެވެ. އެހެނީ އެއީ ވަރަށް ސިއްރުގޮތުގައި ކުރެވެމުންދާ ކަމަކަށްވާތީއެވެ. ވަރަށް ގިނަ މުޖުތަމަޢުތަކުގައި ރިޝްވަތުގެ ޢަމަލުތައް ވަނީ އާންމުވެފައެވެ. އަދި ބައެއް މުޖުތަމަޢުތަކުގައި ކޮންމެވެސް ގޮތަކުން ކޮންމެވެސް މިންވަރެއްގެ ރިޝްވަތަކާނުލައި އެއްވެސް ކަމެއް ނުކުރެވެއެވެ. މިފަދަ މުޖުތަމަޢުތަކުގައި ޢަދުލު އިންސާފު ޤާއިމް ކުރުމަށް ހުންނަ އިދާރާތަކުގައިވެސް ރިޝްވަތާއި ރިޝްވަތުގެ ޢަމަލުތައް ވަނީ އިތުރުވެފައެވެ. މިފަދަ ކަންކަމަކީ ޤައުމާއި މުޖުތަމަޢު ހަލާކުގެ ތެރެއަށް ވެއްޓިގެން ދިއުމަށް މެދުވެރިވެގެންދާ ކަންކަމެވެ. ޤައުމުގެ ތަރައްގީގެ ދުވެލި މަޑުޖެހި ކުރިއެރުމަށް ހުރަސްއެޅޭ ކަންކަމެވެ. އަހަރެމެންގެ މި ކުޑަ މުޖުތަމަޢުވެސް މި ނުރައްކާތެރި ވަބާގައި ވަނީ ޖެހިފައެވެ.
ރިޝްވަތާއި ނާޖާއިޒު ފައިދާއާއި ޚިޔާނާތުގެ ޢަމަލުތައް މުޖުތަމަޢުގައި ގިނަވެ އެކަމަކީ ވަރަށް އާދައިގެ ކަމެއްކަމަށް މުޖުތަމަޢުގެ ބައެއްމީހުން ވަނީ ދެކެން ފަށާފައެވެ. ރިޝްވަތަކީ ތިމާއަށް ޙައްޤު ނޫން ކަމެއް ނުވަތަ ޙައްޤު ނޫން އެއްޗެއް ނުވަތަ ޙައްޤު ނޫން މަންފާއެއް ލިބިގަތުމަށް، ނުވަތަ ތިމާކަމަކުން ބަރީއަވެ ސަލާމަތްވުމަށް ފައިސާ ނުވަތަ އެނޫންވެސް އެއްޗެއް މީހަކަށް ނުވަތަ ބަޔަކަށް ހޯދައި ދިނުމެވެ.
ރިޝްވަތު ދޭ މީހާއާއި، ރިޝްވަތު އުފުލާ މީހާ އެބަހީ ރިޝްވަތު ދިނުމުގައި މެދުވެރިޔަކަށްވާ މީހާ އާއި، ރިޝްވަތުގައި ހިފާ މީހާ އަށް ﷲ ސުބުހާނަހޫ ވަތަޢާލާ ވަނީ ލަޢުނަތް ލައްވާފައެވެ.
ﷲ ސުބުހާނަހޫ ވަތަޢާލާ ރިޝްވަތު ޙަރާމް ކުރައްވާފައިވަނީ، ރިޝްވަތަކީ މުޖުތަމަޢުގައި ފަސާދަ އުފެދުމަށް މެދުވެރިވާ ވަސީލަތަކަށް ވާތީއެވެ. އަދި އެއީ ޙައްޤާ ދެކޮޅަށް ހަނގުރާމަކުރުމަށް ބޭނުންކުރެވޭ ހަތިޔާރަކަށް ވާތީއެވެ. ރިޝްވަތުގެ ކަންތައްތައް އާންމުވެއްޖެ މުޖުތަމައެއްގައި ހަމަޖެހުން ގެއްލި އަމާންކަން ގެއްލޭނެއެވެ. ރުޅިވެރިކަމާއި ޢަދާވާތްތެރިކަމުގެ ޝިކާރައަކަށް އެ މުޖުތަމަޢުގެ ފަރުދުން ވާނެއެވެ.
ރިޝްވަތަކީ ޙަރާމް އެއްޗަކަށް ވީހިނދު، އެފަދަ ފައިސާއެއްގައި ނުވަތަ މުދަލެއްގައި އަހަރެމެން މުސްލިމުން ހިފައިގެން ނުވާނެއެވެ. އެފަދަ އެއްޗެއް އަހަރެމެންގެ އަނބި ދަރީންނަށާއި، ގާތް ތިމާގެ މީހުންނަށް ކާން ދީގެންވެސް ނުވާނެއެވެ. އެހެނީ ކީރިތި ރަސޫލާ ﷺ ގެ ޙަދީޘްފުޅެއްގައި އައިސްފައިވާގޮތުން ޙަރާމް އެއްޗެއް ކައިގެން އެމީހެއްގެ ގައިގައި ޖަހާ މަސްގަނޑު ނަރަކައަށް މާޙައްޤުކަންބޮޑެވެ. މި ބަސްފުޅުން ދޭހަވަނީ މިފަދަ ކަންކަމުގެ ނުބައިކަމާއި ސުންޕާކަމެވެ.
ރިޝްވަތު ދިނުން ފަދަ ނޭދެވޭ ޢަމަލުތައް މުޖުތަމަޢުގައި ގިނަވެ، އެ ކަންތައްތައް ޢާންމުވެއްޖެނަމަ، އެއީ ނުބައި ކަމެއްކަމަށް މީސްތަކުންނަށް ހީނުވާ ދަރަޖައަށް އެކަން ފެތުރިދާނެއެވެ. އެއީ ހަދިޔާބަދިޔާ ބަދަލުކުރުން ފަދަ ކަމެއް ކަމުގައި ހީވެދާނެއެވެ. ހަމަކަށަވަރުން ރިޝްވަތަކީ ހަދިޔާއެއް ނޫނެވެ. އެއީ ޙައްޤާ ދެކޮޅަށް ހަނގުރާމަ ކުރުމަށްޓަކައި ބޭނުންކުރެވޭ ވަރުގަދަ ޒަހަރެކެވެ. މުޖުތަމައުގެ ސަފުތައް ރޫޅާލާ ފިތުނައެކެވެ.
ރިޝްވަތު ދޭ މީހުންނާއި، އުފުލާ މީހުންނާއި، ބަލައިގަންނަ މީހުން، ﷲ އަށް ބިރުވެތިވާށެވެ. ތިމާ ކަށްވަޅުގައި އޮންނަންޖެހޭނެ ވަގުތު ހަނދާން ކުރާށެވެ. ރިޝްވަތު ވާނީ ކަށްވަޅު އަނދިރިކުރާ އެއްޗަކަށެވެ. އީމާންކަމުގެ ނޫރު ނިއްވާލާ އެއްޗަކަށެވެ. ވީމާ މިފަދަ ކަންކަމުން ތިޔަބައިމީހުން ދުރުހެލިވާށެވެ.
މައުލޫމާތު: ހުކުރުޚުތުބާ
