ކުޑައިރު ކިޔެވި ދިވެހި ފޮތުގައިވެސް އޮންނަގޮތަށް ލިޔެލާ ޖެހުމަށް އެންމެ މަޝްހޫރު މީހުންތިބި ރަށަކީ ބ.ތުޅާދޫ އެވެ. ޒަމާނުއްސުރެ މިމަސައްކަތްކުރާ ގިނަ ޢަދަދެއްގެ ފަންނުވެރިން ތިބި ތުޅާދޫގެ ޒުވާނެއް ކަމުގައިވާ އުމުރުން 35 އަހަރުގެ ޢަބުދުލްމަތީން ޢަބުދުއްރަޙީމް ވަނީ ލިޔެލާ ޖެހުމުގެ މަސައްކަތް ފެށިގެން ކުރިއަށްދާ ގޮތާއި ގުޅޭގޮތުން ތަފްސީލީ މަޢުލޫމާތު 'ޒީޓައިމްސް' އާއި ހިއްސާ ކޮށްފައެވެ.
އުމުރުން 17 އަހަރުން ފެށިގެން މިމަސައްކަތް ކުރަންފެށި މަތީނު އާންމުކޮށް ތައްޔާރުކުރަނީ ގަލަމުގެ އިތުރަށް ކުދި މަލާފަތެވެ. މީގެ އިތުރުން އެކި ބާވަތްތަކުގެ ކުރެހުމުގެ މަސައްކަތް ކުރެއެވެ. އެންމެފަހުން ބޭއްވި ޤައުމީ އަތްތެރިކަމުގެ މައުރަޒުގައި މަތީނުގެ ބޭބެ ޢަބުދުލްޢަޒީޒުގެ ނަމުގައި ބައިވެރިކުރި މަޝްހޫރު އުދޯލީގައި ލިޔެލާ ޖެހުމުގެ މަސައްކަތް މަތީންގެ ބޭބެ ކުރިއަށްގެންދިޔައިރު އެއުދޯލީގައި ކުރަހާފައިވަނީ މަތީން އެވެ.
ތުޅާދޫއިން އެންމެފުރަތަމަ ލިޔެލާޖެހުމުގެ މަސައްކަތްކުރި ޢާއިލާގެ ގޮތުގައި މަތީންގެ އާއިލާ ވެގެންދާނެ ކަމަށާއި މިގޮތުން މަތީންގެ ކާފައިންފެށިގެން ޢާއިލާތެރޭގައި މިމަސައްކަތް ކުރަމުންދާ ކަމަށް ފާހަގަކުރިއެވެ. ފުޅާ ދާއިރާއެއްގައި ތައްޔާރުކުރާ އުފެއްދުންތައް ވިއްކުމަށާއި އިޝްތިހާރުކުރުމަށް ހަފްތާއަކު އެއްފަހަރު ވައްކަރު މޯލްޑިވްސް އަދި ފިނޮޅު މޯލްޑިވްސް ފަދަ ރިސޯޓުތަކަށް ގެންގޮސް ފަތުރުވެރިންނަށް ދައްކާލުމުގެ މަސައްކަތް ކުރާތާ މިހާރު މިވަނީ 5 އަހަރުވެފައެވެ.
ކޮވިޑްގެ ޙާލަތާއިގުޅިގެން ރިސޯޓުތަކަށް ނުދެވުމުގެ ސަބަބުން ލިޔެލާޖެހުމުގެ ވިޔަފާރިވަނީ ވަރަށް ދަށަށް ގޮސްފައެވެ. ކޮވިޑްގެ ޙާލަތު އައުމުގެ ކުރިން މަހެއްގެ މައްޗަށް 12 ހާހާއި 15 ހާސް ރުފިޔާ ދެމެދުގެ ޢަދަދެއް ލިބޭ ކަމަށް މަތީންވަނީ ފާހަގަކޮށްފައެވެ.
ލިޔެލާޖެހުމުގެ މަސައްކަތް ބެހިފައިވަނީ މައިގަނޑު 5 ބަޔަކަށެވެ. އެއީ ލާ ތެޅުމާއި، ލިޔުމާއި، ލާ ޖެހުމާއި، ކުރެހުމާއި ލާނެގުމެވެ. ލިޔެލާ ޖެހުމުގެ މަސައްކަތަށް ބޭނުންކުރާ 'ލާ' އަދި ކުލަ ގެންނަނީ ރާއްޖެއިން ބޭރުންނެވެ. "އާންމުކޮށް އޯޑަރ ލިބޭއިރު މަސައްކަތުގައި ދުވާލަކު 10ގަޑި އިރުވެސް ހޭދަވޭ. ގަލަމެއް އަޅުގަނޑުމެން ވިއްކަނީ 550 ރުފިޔާ އަށް. ފޮއްޓާއިއެކު 650 ރުފިޔާ އަށް"
މަތީން އާއި މަތީންގެ ބޭބެ ޢަބުދުލްޢަޒީޒު ވަނީ ލިޔެލާ ޖެހުމުގެ މަސައްކަތް ދައްކާލުމުގެ ގޮތުން ޗައިނާގައި ބޭއްވި 'ކުންވިން ފެއާ' ގައި ވެސް ބައިވެރިވެފައެވެ. އަދި ބާލިންގައި ބޭއްވި ފެއާއެއްގައި ބައިވެރިވެ ވަނީ ހުނަރު ދައްކާލާފައެވެ. "މިފެއާތަކުގައި ލައިވް އާޓްސްގެ އިތުރުން އަޅުގަނޑުމެންގެ ހުނަރު ދައްކާލެވުނު. އަދި ތައްޔާރުކުރި އެއްޗެހި ވިއްކިން" މަތީންގެ އުފެއްދުންތައް ދުނިޔެއަށް ދައްކާލުމަށް ލިބިގެންދިޔަ ރަނުގެ ފުރުސަތުގެ ތަފްސީލް ހާމަކުރަމުން ބުންޏެވެ.
ލިޔެލާ ޖެހުމުގެ މަސައްކަތް ކުރާތާ 18 އަހަރުވީއިރު މިމަސައްކަތުގައި އެންމެ ބޮޑަށް އެހީތެރިކަން ފޯރުކޮށްދޭ ޢާއިލާއާއި، ބޭބެ ޢަބުދުލްޢަޒީޒުގެ އިތުރުން، އިސްމާޢީލް ރަޝީދު، މުޙައްމަދު އަޙްމަދު، ޝިހާބް ޢަލީ، މަމްދޫހު މުޙައްމަދު، އަދި އަޙްމަދު މައުސޫމުގެ ނަން މަތީންވަނީ ޝުކުރުގެ ލިސްޓުގައި ފާހަގަކޮށްފައެވެ.
މިމަސައްކަތް ދަސްކުރަން ބޭނުންވާ ފަރާތްތަކަށް މަތީން ދިން އުފާވެރި ޚަބަރަކީ "ހިތްވަރާއި އެކު މަސައްކަތް ކޮށްފިއްޔާ ކާމިޔާބުވާނެ. އަޅުގަނޑަށް އެގޭ އެއްޗެހި ބުނެދޭނަން ދަސްކުރަން ބޭނުންވާ ފަރާތްތަކަށް" މިއެވެ.
އިހުގެ ގަދީމީ އާސާރުތަކުގައި ހިރިގަލުގައި ކަނޑާ ނަގާފައި ހުންނަ ކުރެހުންތަކާއި ލިޔެލާޖެހި މަލާފަތާއި ކުރަނޑިފަދަ އެއްޗެހީގައި އަޅާފައި ކުރެހުންތަކާއި އެއްގޮތްކަން ފާހަގަކުރެވެއެވެ. ލިޔެލާޖެހުމުގެ މަސައްކަތަކީ ދިވެހިންގެ އަމިއްލަވަންތަކަން ދައްކުވައިދޭ ވަރަށް ފުރިހަމަ އެހާމެ ރީތި އަގުހުރި މަސައްކަތެކެވެ.
