މިހާރަކަށް އައިސް ކިޑްނީގެ ބަލިތަކަށް ފަރުވާހޯދާ ދިވެހީން ވަރަށް ގިނައެވެ. މިއީ ވިސްނާލަންޖެހޭ މުހިންމު ކަމެކެވެ. އަދި މިކަމަށް އެޅިދާނެ ފިޔަވަޅުތަކާއި މިކަމުން ރައްކާތެރިވާން ކުރެވިދާނެ ކަންތައްތަކަކީ ކޮބައިތޯބަލާ އެކަންކަމަށް ހައްލު ހޯދުން މިއީ އިސްކަންދޭންވީ ކަމެކެވެ. ކިޑްނީގެ ބަލިތަކަށް ބަލާލާއިރު މިއީ ފަރުވާ ހޯދުމަށް އެހާފަސޭހަ ބައްޔެއް ނޫނެވެ. ކިޑްނީ ފެއިލްވެ އެމީހަކާއި ގުޅޭ ކިޑްނީއެއް ނުލިބި ގިނަ ދުވަސްތަކަށް ޑައިލިސިސް ހަދަންޖެހި އެކަމުގެ ވޭން ތަހައްމަލު ކުރަމުންދާ މީހުން ފެނުމުން ދެރަވާނެއެވެ. ކިޑްނީގެ ތަފާތު ބަލިތައް ދިމާވުމުގެ ކުރިން އެކަމަށް ވިސްނައި ރައްކާތެރިވުމުގެ ގޮތުން އެޅެންހުރި ފިޔަވަޅެއް އަޅަން އެބަޖެހެއެވެ.
ހަކުރުބަލިޖެހުމުން ދުރުހެލިވުން ނުވަތަ ހަކުރުބަލި ހުންނަނަމަ އެކަން ކޮންޓްރޯލް ކުރުން
ހަކުރުބަލީގެ ސަބަބުން ހަށިގަނޑުގެ ވަރަށް ގިނަ ގުނަވަންތަކަށް ނުރައްކާތެރިކަން ކުރިމަތިވެގެންދެއެވެ. ހަކުރުބަލި ޖެހުމުގެ ފުރުސަތު ކުޑަކުރުމަށް ވިސްނައި އެކަންކަމަށް އެޅެންހުރި ފިޔަވަޅުތައް އެޅުން މުހިންމެވެ. މިސާލަކަށް އާއިލާގައި ހަކުރުބަލި ހުންނަނަމަ އިތުރަށް އެކަމާމެދު ވިސްނައި ކެއުމުގެ އާދަތައް ބައްޓަން ކުރަންވީ ގޮތުގެ ތާވަލެއް ރާވާލާށެވެ. ހަކުރުބަލީގެ ސަބަބުން ކިޑްނީގެ ހަރަކާތްތަކަށް ބަދަލުއައިސް ކިޑްނީ އަށް ގެއްލުންތައް ދިމާވާން ފަށައެވެ. ހަކުރުބަލި ހުންނަ މީހެއްނަމަ ޑޮކްޓަރުގެ ލަފާގެމަތިން ގަވާއިދުން ބޭސްކެއުމާއި ހަކުރު ހުންނަ އެއްޗެހި ކެއުމުން ދުރުހެލިވާން ވާނެއެވެ.
ބްލަޑް ޕްރެޝަރ ދަށްކުރުން
ބްލަޑް ޕްރެޝަރ މައްޗަށްދާ މީހެއްނަމަ ކެއުމުގައި ވަރަށް ބަލަންޖެހެއެވެ. ކެއުން ބަހައްޓަންވާނީ ތިމާގެ ހަށިގަނޑަށް އެކަށޭނަ މިންވަރަކަށެވެ. ގަވާއިދުން ކާންޖެހޭ ބޭސް ހުއްޓާނުލާ ކުރިއަށް ގެންދިއުންވެސް ވަރަށް މުހިންމެވެ. ބްލަޑް ޕްރެޝަރ ނުވަތަ ލޭމައްޗަށް ދިއުމަކީ ސްޓްރޯކް ޖެހުމަށްވެސް މަގުފަހިވާ ކަމެއްކަމުގައިވެއެވެ.
މިންހެޔޮ ކެއުމެއް ކެއުމާއެކު ހަށިގަނޑުގެ ބަރުދަން އިތުރުވިޔަނުދީ ހިފެހެއްޓުން
ކިޑްނީ ބަލިތައް ކަހަލަ ނުރައްކާތެރި ބަލިތަކުން ސަލާމަތްވުމަށްޓަކައި ކެއުމުގައި މިންހެޔޮ ކެއުމެއް ޚިޔާރުކުރާށެވެ. ހަށިގަނޑަށް ގެއްލުންލިބޭ ކަހަލަ ކާނާތަކުން ދުރުހެލިވެ ފައިދާހުރި ރަނގަޅު ބާވަތްތައް ކެއުމުގައި ހިމަނާށެވެ. 'ޖަންކް ފުޑް'، ތެޔޮ އަދި ސަރުބީ ހިމެނޭ ކަހަލަ ކެއުންތަކުން މާބޮޑަށް ފަލަވެ އެހެނިހެން އިތުރު ބަލިތަކަށްވެސް ހުށަހެޅިގެންދެއެވެ. ކެއުމުގެ އިތުރަށް ކަސްރަތުކުމާއި ހަށިގަނޑަށް ލުއިލިބޭ ކަހަލަ ކުޅިވަރުތައް ކުޅުންވެސް މުހިންމެވެ.
މީގެ އިތުރުންވެސް ކެއުމުގައި ލޮނު ބޭނުންކުރުން މަދުކޮށް، ހަށިގަނޑަށް ބޭނުންވާ މިންވަރަށް ފެން ބޭނުންކުރުންވެސް އެއީ ވަރަށް މުހިންމު ކަމެކެވެ. ގަޑިންގަޑިއަށް ކެއުމުގެ އާދަ އަށަގަނެ ބޭކާރު ކަންކަމާމެދު 'ސްޓްރެސް' ނުވެ އުޅެވޭތޯވެސް މަސައްކަތް ކުރަންވާނެއެވެ.
އެންމެ މުހިންމު އެއްކަމަކަށް ބޭސްފިހާރަތަކުން ބޭނުން މިންވަރަކަށް ބޭސް ގަނެގެން ބޭނުންކުރުން ހުއްޓާލަންޖެހެއެވެ. ކަމެއް ހަމަ ދިމާވާއިރަށް ބޭސް ގަނެގެން ކެއުމުން އެކަމަށް ދެވިހިފައެވެ. މިކަން ކޮންޓްރޯލް ކުރެވޭނީ ޑޮކްޓަރެއްގެ ލަފާގެ މަތިން ކޮންމެހެން ކާންޖެހޭ ބޭސް އެކަނި ކައިގެންނެވެ.
މައުލޫމާތު: ހެލްތްލައިން
