އިސްރާއީލުގެ އަސްކަރިއްޔާއިން ފަލަސްޠީނުގެ ރައްޔިތުންނަށް އަމާޒުކޮށް ދެމުން އަންނަ ހަމަލާތަކުގައި 11000 އަށް ވުރެ ގިނަ މީހުން ވަނީ މިދިޔަ އޮކްޓޯބަރު މަހުގެ 7 ވަނަ ދުވަހުން ފެށިގެން މިހާތަނަށް ޝަހީދުވެފައެވެ. މީގެތެރޭގައި 4000 އަށްވުރެ ގިނަ ކުޑަކުދިން ހިމެނެއެވެ. އަދި 3000 މީހުން ވީނުވީއެއް ނޭނގި ގެއްލިފައިވާއިރު 27000 އަށް ވުރެ ގިނަ މީހުން ވަނީ ޒަޚަމްވެފައެވެ. ބޮމުގެ ހަމަލާތަކުގައި އިމާރާތްތައް ވެއްޓި އެތަންތަނުގެ ދަށުގައިވާ މީހުންގެ ހަށިގަނޑުތައް ހޯދުމުގެ މަސައްކަތް ދަނީ ކުރަމުންނެވެ.
ބޮމުގެ ހަމަލާތަކުގައި އަތާއި ފައި ބުރިކުރަންޖެހި ބޮޑެތި ޒަޚަމްތަކެއް ލިބުނު މީހުން ހިމެނެއެވެ. ޣައްޒާގެ އަލް ޝިފާ ހޮސްޕިޓަލުގައި ކަރަންޓް ނެތުމުގެ ސަބަބުން އަލަށް އުފަންވާ ކުދިން ބައިތިއްބާ އައިސީޔޫ ބަންދުކުރަންޖެހި ދުވަސް ނުފުރާ ވިހޭ ތުއްތު ދެކުދިން ވަނީ ނިޔާވެފައެވެ. އަދި އިތުރު 39 ތުއްތުކުދިން ނިޔާވެދާނެކަމުގެ ބިރު ވަނީ އުފެދިފައެވެ.
" ޣައްޒާގައި ހުރި އެންމެ ބޮޑު ހޮސްޕިޓަލުކަމުގައިވާ އަލް ޝިފާ ހޮސްޕިޓަލު ކައިރިއަށް ބޮމުގެ ހަމަލާތައް ދަނީ ދެމުން. ހޮސްޕިޓަލުގައި ތިބި ބަލިމީހުންގެ އިތުރުން އެސަރަހައްދުން ބޯހިޔާވަހިކަން ހޯދަމުން އަންނަ އެތައް ހާސް މީހުންގެ ފުރާނަވަނީ ނުރައްކަލަށް ހުށަހެޅިފައި" ފަލަސްޠީނުގެ ހެލްތް މިނިސްޓަރާއި ހަވާލާދީ ޚަބަރުތަކުގައިވެއެވެ. މައުލޫމާތު ލިބޭ ގޮތުގައި މިސަރަހައްދުން ހިމާޔަތް ހޯދައިގެން ޒަޚަމްވި މީހުން ހިމެނޭހެން 20،000 މީހުން އެބަތިއްބެވެ.
ހޮސްޕިޓަލުތަކަށް އަމާޒުކޮށް ހަމަލާ ނުދޭކަމަށް އިސްރާއީލުން ބުންޏަސް އިސްރާއީލުން ދެމުންދާ ހަމަލާތަކުގެ ސަބަބުން 21 ހޮސްޕިޓަލެއް ވަނީ ބަންދުކުރަންޖެހިފައެވެ. އަދި ފަރުވާދެމުންދާ މަދު ހޮސްޕިޓަލުތަކުގެ އެނދުތައް ފުރި ފަރުވާ ދެމުންދަނީ ޒަޚަމްވި މީހުން ބިންމަތީގައި ބައިތިއްބައިގެންނެވެ. ފަރުވާދޭންޖެހޭ މީހުންގެ އަދަދު ދުވަހެއް ދުވަހަކަށް އިތުރުވަމުންދާތީ ފަރުވާނުދެވިގެން ނިޔާވަމުންދާ މީހުންވެސް ދަނީ އިތުރުވަމުންނެވެ.
ޝަހީދުވަމުންދާ މީހުންގެ ހަށިތައް، މަގުތައް މަތީ އަތުރާލާފަވާއިރު ވަޅުލުމަށްވެސް ދަނީ ހުރަސްތަކެއް ކުރިމަތިވަމުންނެވެ. ސަހަރާތައް ފުރި އިތުރު ހުސްބިންތަކުގައިވެސް ވަޅުލުމުގެ މަސައްކަތް ކުރިއަށްދާކަމަށް ރިޕޯޓްތަކުގައިވެއެވެ. މިގޮތުން އިންޑޮނޭޝިއަން ހޮސްޕިޓަލު ކައިރީގައިވެސް ދަނީ މީހުންގެ ހަށިތައް ވަޅުލަމުންނެވެ. ޤުދުސް ނިވްސް ނެޓްވޯކުން މައުލޫމާތު ދޭގޮތުގައި މީގެތެރޭގައި ކާކުކަން ނޭނގޭ ވަރަށް ޒަޚަމްވެފައިވާ މީހުންގެ ހަށިތައް ހިމެނެއެވެ.
ފަލަސްޠީނުގެ ރައްޔިތުންނަށް އަމާޒުކޮށް އިސްރާއީލުން ދެމުންދާ އަނިޔާވެރި މަންޒަރުތައް ދަނީ ސޯޝަލް މީޑިއާގައި އާންމުވަމުންނެވެ. މީގެތެރޭގައި ބުލްޑޯޒަރުން މުސްލިމެއްގެ ހަށިގަނޑު ޗިސްކުރާ މަންޒަރާއި، ބޮމުގެ ހަމަލާތަކުގައި ބޯ ބުރިވެ ހަށިގަނޑުގެ ގުނަވަންތައް ވަކިވެފައިވާ އެކި އުމުރުގެ މީހުންގެ ހަށިތައް ވަނީ ފެނިފައެވެ. މިއީ މިފަހުގެ ތާރީޚުގައި ފެނުނު އެންމެ އަނިޔާވެރި މަންޒަރުތަކެވެ.
ފަލަސްޠީނުގެ ބިމުގެ ދިފާޢުގައި ހަމާސްއިން ދަނީ އިސްރާއީލަށް އަމާޒުކޮށްވެސް ހަމަލާތައް ބަދަލުކުރަމުންނެވެ. ފަލަސްޠީނުގެ ބިމުގައި އިސްރާއީލުގެ ނަމުގައި ޔަހޫދީ ދައުލަތެއް ޤާއިމްކުރީ 1948 ވަނަ އަހަރުގައެވެ. އޭގެ ފަހުން މިއަދާއި ހަމައަށް ޔަހޫދީންގެ އަނިޔާވެރިކަން ދަނީ ފަލަސްޠީނުގެ ރައްޔިތުންނަށް އަމާޒުވަމުންނެވެ. މިއަނިޔާތަކުގައި ބޯހިޔާވަހިކަން ގެއްލި މަގުމަތިވެ ހުސްބިންތަކުގައި ފޭލިގެތައް ޖަހައިގެން ދިރިއުޅޭ އެތައްހާސް ބަޔަކުވެސް އެބައުޅެއެވެ.
