ބ. ތުޅާދޫ އަށް އުފަން ހަމްނާ ރަޝީދަކީ މަސައްކަތްތެރި ކަނބަލެކެވެ. ހަމްނާ ފާހަގަކުރިގޮތުގައި ދެކުދިންނަށް ބޭނުންވާ ތަފާތު ތަކެތި އަމިއްލައަށް ތައްޔާރުކުރުމަކީ ލިބޭ ހިތްހަމަޖެހުމެކެވެ.
Fahucollection ނަމުގައި ފޭސްބުކް އަދި އިންސްޓަގްރާމްގައި ޕޭޖެއް ހިންގަމުން އަންނަ ހަމްނާގެ މަސައްކަތްތެރިކަން މި ޕޭޖުން ފެންނަން އެބަހުއްޓެވެ.
" ދަރިފުޅުގެ ޕާޓީއަށް ޖުވެލަރީސެޓެއް ހޯދަން އުދަގޫވި. އަތުގައަޅާ އެތިކޮޅު، ފަށް އަދި ހެޑްބޭންޑް އެއްވައްތަރަކުން ހޯދަން އުދަގޫވީމަ ހިތަށްއެރީ އަމިއްލައަށް ހެދޭތޯ މަސައްކަތްކުރަން. އޭގެ ކުރިން ހުރީ ޖުވެލަރީސެޓް ހަދަން މީހަކު ކައިރިން ދަސްކޮށްފަ އެކަމަކު އެމަސައްކަތް ނުކުރެވިހުރީ". ބީޑްސް ބޭނުންކޮށްގެން ޖުވެލަރީ ހަދަން ފެށުނުގޮތް ކިޔައިދެމުން ހަމްނާ ބުންޏެވެ.
ހަމްނާ ކުރަމުންދާ މަސައްކަތްތައް:
- ޖުވެލަރީ ސެޓް (ކަންފަތުލާއެތިކޮޅު، އަތުގައަޅާފަށް، ހެޑް ބޭންޑް، ފްލާވަރ ކްރައުން، ބީޑް ކްރައުން)
- ވެޑިން ބުކޭ
- މެޓާނިޓީ ސޭޝް
- ހެއަރ ކްލިޕްސް
- ސްކޫލް ހެއަރ ކްލިޕްސް
- ހިޖާބް ޕިން
- މާސްކް ބޭންޑް
- ސޮފްޓް ޕިލޯ
- ޓޯޓް ބޭގް، ފައިލް ބޭގް، ޕެންސިލް ކޭސް، ފެހުމަށްފަހު ނަންޖެހުން
- ތަސްބީހަ
- ކީޗެއިން (ލެޓަރ ބީޑްސް، ރެސިން)
- ބޭގް ޓެގް (ލެޓަރ ބީޑްސް، ރެސިން)
- ރެސިން ސްޓޭޝަނަރީ (ގަލަން، ބުކްމާރކް، ފޮތް)
- ރެސިން ހެއަރ ކްލިޕް
- ރެސިން ފޮތްގޮނޑި
- ފެންފުޅީގަ ނަންޖެހުން، ބޭބީ ހެދުމުގަ ނަންޖެހުން، ކުލަ ފަންސުރު، ގަލަން، ފޮތް، ޕެންސިލް ކޭސް، މަގް، ގްލާސް ޖާ، ފޯނު ކަވަރގައި ނަންޖެހުން
- ބޭބީ ހެދުންސެޓްގައި ނަންޖެހުން
- ފެލްޓް ފޮތް
- ރެސިން ފްރޭމް
ހަމްނާގެ އުފެއްދުންތައް ގަންނަން ބޭނުންވާ މީހުންނަށް ދިން އުފާވެރި ޚަބަރަކީ " އޯޑަރު ނަގާއިރު އަބަދުވެސް ބަލަން ކަސްޓަމަރ ބޭނުންވާ ދުވަހަށް މަސައްކަތް ނިންމަން. ބައެއްފަހަރު އެދުވަހުން ދުވަހަށްވެސް ނިންމާލަދެން. ރެސިން އިން ހަދާ އެއްޗެހި ހަދަން ގިނަވަގުތު ހޭދަވޭ. އެއީ އެއް ލޭޔަރ އަޅާފައި ހިކުނީމަ އަނެއް ލޭޔަރ އެޅޭނީ".
ރަށު ސްކޫލުގައި ޤުރުއާން މުދައްރިސެއްގެ ގޮތުގައި މަސައްކަތްކުރި ހަމްނާގެ އުފެއްދުންތެރި މަސައްކަތްތައް އިތުރަށް ފުޅާކުރީ ދިރިއުޅުން މާލެ ބަދަލުކުރުމަށްފަހު ވޭތުވެދިޔަ އެއްއަހަރު ދުވަހުގެ ތެރޭގައެވެ.
" މާލެ އަދި ހުޅުމާލެއަށް ޑެލިވަރީ ކޮށްދެން. އެކިދުވަސްވަރު އެކިއެއްޗިއްސަށް ޑިމާންޑް ބޮޑުވަނީ. ސްކޫލު ބަންދުވެފަ ހުޅުވޭއިރު ސްކޫލަށް ބޭނުންވާ ފެންފުޅި، ކުލަފަންސުރުގައި ނަންޖަހަން ވަރަށް ގިނަ އޯޑަރު ލިބޭ. ކައިވެނި ޕާޓީ ގިނައިން އޮންނަ ދުވަސްވަރު ޖުވެލަރީ ސެޓް، ބުކޭ އަށް އޯޑަރު ގިނައިން ލިބޭ. މުދައްރިސުންގެ ދުވަހު އެންމެގިނައިން އޯޑަރު ލިބެނީ ގަލަން، ފޮތް، ތަޅުދަނޑީގައި ނަމާއި ޚާއްސަ މެސެޖެއް ލިޔުމަށް. އަދި ރޯދަމަހު ތަސްބީހަ ތައްޔާރުކުރުމަށް". ހަމްނާ ކިޔައިދިނެވެ.
ސްކޫލު ކުދިންގެ މެދުގައި މަގުބޫލު ކުލަފަންސުރުގައި ނަމާއި ޚާއްސަ މެސެޖު ލިޔުމަކީ އުދަގޫ ކަވި މަސައްކަތަކަށް ވާތީ އެމަސައްކަތަށް ހަމްނާ ނަގަނީ 12 ފަންސުރަށް 190 ރުފިޔާ އާއި 250 ރުފިޔާ އާއި ދެމެދުގެ އަގެކެވެ. ލިޔާ ނަމާއި މެސެޖުގެ ދިގުމިނަށް ބެލުމަށްފަހު އަގު ކަޑައަޅަނީއެވެ. ބޭނުން އަދަދަކަށް ފަންސުރަށްވެސް އޯޑަރު ދެވިދާނެއެވެ.
ހަމްނާގެ ޕޭޖުން އެއްޗެއް ގަންނަން ބޭނުންނަމަ އެ ޕޭޖަށް މެސެޖް ކުރެވިދާނެއެވެ. ނުވަތަ ޕޭޖުގައި ލިޔެފައިވާ ނަންބަރަށް ގުޅާލެވިދާނެއެވެ.
