އެއީ 2004 ވަަނަ އަހަރު ޑިސެންބަރުގެ 26 ވަނަ ދުވަހުގެ ހެނދުނު 9:23 އެެވެ. އިރުއަރައިގެން އައީވެސް ތަފާތެއްނެތި އުފާވެރިކަމާއެކުގައެވެ. ނަމަވެސް މުޅި މަންޒަރު ބަދަލުކޮށްލީ އަރައިގެން އައި ބިޔަ ރާޅާއެކުގައެވެ.
ސުނާމީގެ ނަމުން މަޝްހޫރުވެފައިވާ އެ ބޮޑު ރާޅު އުފެދުނީ އިންޑޮނޭޝިއާގެ ސްމަޓްރާ އަށް އައި ބިންހެލުމަށްފަހުގަ އެވެ. ރިކްޓަރ މިންގަޑުން 9.3ގެ ބާރުމިނުގައި އައި މިބިންހެލުމާއެކު އުފެދުނު ރާޅުތަކުގެ ސަބަބުން ރާއްޖޭގެ ބައެއް ރަށްރަށަށް ބޮޑެތި ގެއްލުންތަކެއް ލިބި 13 ރަށަކުން މީހުން ހުސްކޮށް އެހެން ރަށްރަށަށް ބަދަލުކުރަން ޖެހުނެވެ. 190 ރަށަކަށް މި ރާޅުގެ އަސަރުކުރިއިރު 82 މީހަކު ވަނީ ދުނިޔެ ދޫކޮށްފައެވެ. އަދި 26 މީހުން ވަނީ ވީނުވީއެއް ނޭނގި ގެއްލިފައެވެ. ރިސޯޓުތަކަށް ބޮޑެތި ގެއްލުންތައްލިބި ފަތުރުވެރިކަމުގެ ސިނާއަތަށް ދިގުމުއްދަތަކަށް ގެއްލުމާއި ކުރިމަތިލާން ޖެހުނެވެ.
އެއީ ބިރުވެރިކަމުގެ އިންތިހާއެވެ. އެއްފަރާތުން އަރައިގެން އައި ރާޅު ރަށުގެ އަނެއްފަރާތާއި ހަމައަށް ދިޔައިރު ބިމާއިހަމަވި އެތައް ގެއެއް އެބަހުއްޓެވެ. ލޯބިވާ މީހުން އޮޔާދިޔަ މަންޒަރު ދުށް އެތައްބަޔަކު އެބަތިއްބެވެ. އަތުގައި އޮތް ޅަދަރިފުޅު ދޫކޮށް އެހެން މީހަކަށް އެހީތެރިވާން ދެެވޭނެގޮތެއް ނެތި ރާޅުގަނޑުގެ ތެރޭގައި ފުރާނައާއި ހަނގުރާމަކުރި މީހުން މިއަދުވެސް ދުނިޔޭގައި އެބަތިއްބެވެ. އެމީހުންގެ ލޮލުން އަންނަނީ އެހިތި ހަނދާނުގެ ކަރުނައެވެ. އެއީ ދުވަހަކުވެސް ހަނދާން ނުނެތޭނެ ބިރުވެރި ދުވަހެއްގެ ގޮތުގައި ސުނާމީގެ ތަޖުރިބާކުރި މީހުން ދަނީ ވޭތުވެދިޔަ 19 އަހަރުވެސް ބުނަމުންނެވެ.
މިދުވަސް އެއްބައިވަންތަކަމުގެ ދުވަހެއްގެ ގޮތުގައި ފާހަގަކުރަން ފެށީ ސަަބަބެއް ނެތިއެއް ނޫނެވެ. ސުނާމީ އެރި ދުވަހު ފެނުނީ އެއްބައިވަންތަކަމުގެ ލާމަސީލު ނަމޫނާއެކެވެ. ބިޔަ ރާޅުން ސަލާމަތްވި މީހުން އަވަސްވެގަތީ ހިކިފަސްތަނެއް ހޯދައިގެން ދިރިތިބީންނަށް އެހީތެރިވުމަށެވެ. ދައުލަތާއި ސަރުކާރުގެ މުއައްސަސާތަކުން ވެސް ކުރީ ހިތްވަރެވެ. މުއާސަލާތީ ޚިދުމަތް މެދުކެނޑުނު ކަމުގައިވިއަސް ރަށްރަށަށް ދަތުރުކޮށް ޒަރޫރީ ބޭނުންތައް ފުއްދުމަށް އެހީތެރިކަން ފޯރުކޮށްދިނެވެ.
ގެދޮރު ގެއްލި ވަގުތީހިޔާތަކުގައި އެތައް ދުވަހެއްވަންދެން ދިރިއުޅުނު ދިވެހީންގެ ހިތުން މިހަނދާންތައް ނުދާނެއެވެ. އަދި މަރުވެދިޔަ މީހުންގެ އާއިލާތަކުގެ ހިތުގައި ބިންވަޅު ނެގިފައިވަނީ ލޯބިވާ އާއިލާ މެންބަރުންގެ ހަނދާންތަކެވެ. ސުނާމީ އެރި ދުވަހު ދިވެހީން އެދެއްކި އެއްބައިވަންތަކަން ތާއަބަދަށް ފެންނަން ޖެހެއެވެ. ދިވެހީންނަކީ އެއްބައެކެވެ. އެހީތެރިކަމެއް ބޭނުންވެއްޖެނަމަ އަބަދުވެސް ތިބެންވާނީ އެހީތެރިވެދޭނެ ބައެއްގެ ގޮތުގައެވެ.
