ރާއްޖެއިން ބޭރުގައި ހިނގާ ހަނގުރާމަތަކަށް ދިވެހީން ވަނީ ގޮސްފައެވެ. މީގެތެރޭގައި އާއިލާ ގޮވައިގެން ދިޔަ މީހުންވެސް ހިމެނެއެވެ. މިފަދަ ހަނގުރާމަތަކަށް ދިއުމުގެ ވިސްނުން ގެންގުޅޭ މީހުން އަދިވެސް އެބަތިބިކަމަށް ސަރުކާރުން ވަނީ ބުނެފައެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ދާޚިލީ ވަޒީރު އަލީ އިހްސާން ވަނީ ރާއްޖެއިން ބޭރުގައި ކުރިއަށްގެންދާ ހަނގުރާމަތަކަށް ދިއުމުގެ ވިސްނުން ގެންގުޅޭ މީހުންގެ މައުލޫމާތު އެނގޭނަމަ އެކަން ހިއްސާކުރުމަށް އެދިފައެވެ.
" ވިސްނަންޖެހޭ މިފަދަ އާއިލާތަކަށް އެފަދަ ތަންތަނަށް ގޮސް ޖެހޭ ހާލު. ފިރިހެނުން ނިޔާވެ އޭނާއާއެކު ގެންދާ އަނބިދަރިން ޖެހޭ ހާލު. އެތަނަށް އުފަންވާ ކުޑަކުދިންނަށް ޖެހޭ ހާލު. ދިވެހި އެއްވެސް ރައްޔިތަކު ތުއްތު މައުސޫމް ކުދިންނާއި އަންހެނުންނަށް މިފަދަ ހާލު ނުޖެއްސުމަކީ ވަރަށް ބޮޑަށް އެދޭ ކަމެއް". މިނިސްޓަރ ވިދާޅުވިއެވެ.
ސީރިއާގައި ހިނގަމުން ދިޔަ ހަނގުރާމަ އަށް ދިއުމަށްފަހު ހާލުގައި ޖެހި އެނބުރި ރާއްޖެ އަންނަން ބޭނުންވި 21 މީހުން މިއަދު ވަނީ ރާއްޖެ ގެނެސްފައެވެ. ހަނގުރާމައަށް ދިޔަ ފަސް އާއިލާއެއްގައި ހިމެނޭ 6 މީހަކާއި 15 ކުޑަކުދިން ޗާޓަރު ފުލައިޓުގައި ގެނެސް މިމީހުން ރިހިބިލިޓޭޓް ކުރުމަށް ހިންމަފުށީގައި ހުންނަ އިންޓަގްރޭޝަން ސެންޓަރަށް ވަނީ ގެންގޮސްފައެވެ. މީގެ ކުރިން ވެސް ވަނީ މިގޮތަށް އެއް އާއިލާއެއް ގެނެސް މި ސެންޓަރުގައި ބައިތިއްބައިގެން ފަރުވާ ދީ މުޖުތަމައަށް ދޫކޮށްލާފައެވެ. އެއްއަހަރު ވަންދެން ރިހެބިލިޓޭޓް ކުރި އެއާއިލާގެ ފަރާތުން މިހާތަނަށް މުޖުތަމައަށް ނުރައްކާވާފަދަ އެއްވެސް ކަމެއް ނުވާކަމަށް މިނިސްޓަރ ފާހަގަކުރެއްވިއެވެ.
" އަޅުގަނޑުމެން އެދެނީ ދިވެހި ކޮންމެ ކުއްޖަކަށް ލިބެންވާ ހައްގު މި ކުދިންނަށް ހޯދައިދިނުމަށް. ދައުލަތުން ކުރާ މަސައްކަތަށް އިތުބާރުކޮށް އެއްބާރުލުން ދިނުމަށް. އަނބުރާ މިގޮތަށް ގެންނަ އެއްވެސް މީހެއްގެ ފަރާތުން މުޖުތަމައަށް އެއްވެސް ކަހަލަ ބިރުވެރިކަމެއް ނޯންނާނެކަން ކަށަވަރު ކުރާނަން". މިނިސްޓަރ ވިދާޅުވިއެވެ.
މި ގެނައި މީހުންގެ ސިއްހީ ބޮޑު ބައްޔެއް ނެތްކަން ވަނީ ކަށަވަރުކޮށްފައެވެ. އަދި މިމީހުންގެ ހާލަތު ދެނެގަތުމަށް ހާއްސަ އެސެސްމަންޓްތައް ދަނީ ހަދަމުންނެވެ. އެއަށްފަހު މިމީހުންނަށް ދޭންޖެހޭ ރިހިބިލިޓޭޝަން ފަރުވާ ދިނުމަށް ވަނީ ހަމަޖެހިފައެވެ.
ހަނގުރާމައަށް ދާ ދިވެހިން ގެނައުމަކީ ފަސޭހަކަމެއް ނޫން ކަމަށް ސަރުކާރުންވެސް ވަނީ ފާހަގަކޮށްފައެވެ. ދިމާވާ ގޮންޖެހުންތަކުގެ ތެރޭގައި މިފަދަ މީހުން ތިބޭ ސަރަހައްދުތަކަށް ފަސޭހައިން ނުދެވުމާއި، ފަސޭހައިން މުއާމަލާތު ނުކުރެވުން ހިމެނެއެވެ. މިއަދު މިގެނައި އާއިލާތަކުގެ ތެރޭގައި ހިމެނޭ ބައެއް މީހުންނަކީ އިންޑިއާ އަށް ބޭސް ފަރުވާއަށްކަމަށް ބުނެ ދިޔަ އާއިލާތަކެވެ. ބައެއްފަހަރަށް މިގޮތަށް ފިރިމީހާގެ ބަހަށް ހެއްލި ދާ އަންހެންމީހާއަށް އެދަނީ ކޮންތަނަކަށްކަން ނޭނގުން އެއީވެސް ވެދާނެކަމެކެވެ. އަދި ކުޑަކުދިންނާއި އަންހެނުން ހާލުގައި ޖެހި އެހީއަށް އެދުނަސް އެފަދަ މީހުން އަތުގައި ދިވެހިންކަން އެނގޭނެ ޑޮކިއުމެންޓް ނެތުން އެއީވެސް ބައެއްފަހަރު ދިމާވާކަމެކެވެ. ރާއްޖެ އަށް މިގޮތަށް ގެންނަނީ ދިވެހިންކަން ކަށަވަރުކޮށް ވަރަށް ގިނަ ކަންތައްތަކަށް ބެލުމަށްފަހުގައެވެ.
ހަނގުރާމައަށް ގޮސްފައިވާ 90 އެއްހާ މީހުން މިހާރުވެސް ރާއްޖެއަށް އެނބުރި އަންނަން ބޭނުންވާކަމުގެ މައުލޫމާތު ލިބިފައިވާކަމަށާއި އެއީ ދިވެހީންކަން ކަށަވަރުކުރުމުގެ މަސައްކަތް ކުރިއަށްދާ ކަމަށް މިނިސްޓަރ އިހުސާން ވަނީ ވިދާޅުވެފައެވެ.
އާއިލާގެ ކޮންމެވެސް އެކަކުގެ ނުފޫޒުން ހަނގުރާމައަށްދާ މީހުން އުޅޭއިރު މިފަދަ މީހުންނަށް ރައްކާތެރިކަން ހޯދައިދޭން އެބަޖެހެއެވެ. ހަނގުރާމައަށް ދާން އުޅޭކަމުގެ އިޝާރާތެއް ވާއިރަށް ފުލުހުންނަށް ރިޕޯޓް ކުރަން ޖެހެއެވެ. މިފަދަ މީހުން އެނބުރި ރާއްޖެ ގެނައުމަށް އެތައް ދުވަސް ހޭދަވާއިރު ބޮޑެތި ޚަރަދުތަކެއް ކުރަންޖެހެއެވެ. އަހަރެއްހާ ދުވަހުގެ މަސައްކަތުން މިފަހަރު ގެނައި 21 މީހުންގެ ތެރޭގައި 3 އަހަރުގެ ކުޑަކުއްޖެއްވެސް ހިމެނޭއިރު ވިސްނަންވީ މިގޮތަށް ގެންނަ މީހުންނަށް ސަރުކާރުން އެދޭ ފަރުވާއަށްފަހު މުޖުތަމައަށް ދޫކުރުމުން އެމީހުންނާއިމެދު ތަފާތު ނުކޮށް އާންމު ދިރިއުޅުމެއްގައި އުޅުމަށް އެހީތެރިވުމަށެވެ. އެއީވެސް އަޅުގަނޑުމެން ފަދަ ދިވެހީންނެވެ.
