ކުއްލި ފަރުވާއަށް ބަލިމީހުން މާލެ ސިޓީއަށް ގެންނަންޖެހޭ ފަހަރު މަދެއް ނޫނެވެ. އެކަމަކު މިއީ މިހާތަނަށް އެހާ ފަސޭހަކަމެއް ނޫނެވެ. ސަބަބަކީ އެއޮންނަ އުސޫލެވެ. ބަލިމީހާގެ ހާލަތު ގޯސްވެ ފުރާނައަށް ނުރައްކާވާފަހަރު އަންނައިރުވެސް އެއްކަލަ އުސޫލުގެ ތެރެއިން ކަންތައްތައް ނިންމުމުގައި ބައެއްފަހަރު ދަތިތައް ކުރިމަތިވާކަމުގެ ޝަކުވާ އަހަރުތަކެއް ކުރިން ފެށިގެން އަންނަނީ ލިބެމުންނެވެ.
ރައީސް ޑރ. މުޢިއްޒުގެ ނިންމެވުން
އައިޖީއެމް ހޮސްޕިޓަލުގައި ފަރުވާ ދެމުންދަނިކޮށް ނިޔާވި އުމުރުން 13 އަހަރުގެ މުހައްމަދު ޖާހު ޚާލިދު/ ގއ. ވިލިނގިލީ، ފެންޒީއާގެ ނިޔާވީ އިއްޔެގެ ވަގުތެއްގައެވެ. ޖާހުގެ ހާލު ސީރިއަސްވެ ކުއްލި ހާލަތުގައި މާލެ ގެނައުމަށް ލަސްވިކަމަށް ބުނެ ސޯޝަލް މީޑިއާގައި ބައެއް މީހުންވަނީ ވާހަކަ ދައްކާފައެވެ. މި ތުހުމަތާއެކު، ބަލިމީހުން ކުއްލި ފަރުވާއަށް ގެނެސްދިނުމުގައި އަމަލުކުރަމުން އަންނަ ނިޒާމު އިސްލާހުކުރުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަނީ ކަމާ ގުޅުންހުރި ސަރުކާރުގެ އިދާރާތަކަށް އަންގަވާފައެވެ.
" ބަލި ހާލަތެއް މެދުވެރިގެން އިތުރު ފަރުވާ ދިނުމަށް ވައިގެމަގުން ބަލިމީހަކު ގެނެސްދޭންޖެހޭ އެއްވެސް ހާލަތެއްގައި އާސަންދަ ފަދަ އިދާރާތަކުން ކަންކަން ހަމަޖެހެންދެން މަޑުނުކުރައްވައި ސިއްޙީ ފަރުވާދޭ ތަނަކުން އެފަދަކަމެއް އެދުމާއެކު ވީ އެންމެ އަވަހަކަށް ބަލިމީހާ ގެނެސްދިނުމަށް އިސްކަން ދިނުމުގެ އުސޫލެއް ކަނޑައަޅައި އެގޮތަށް އައިލެންޑް އޭވިއޭޝަނުން އަބަދުވެސް އަމަލުކުރަމުން ގެންދިއުމަށް ރައީސުލްޖުމްހޫރިއްޔާ ވަނީ އެދިވަޑައިގެންފަ". ރައީސް އޮފީހުން ފާހަގަކުރެއްވިއެވެ.
އާސަންދަ ކޮމްޕެނީ
މި ޖެނުއަރީ 18 ވަނަ ދުވަހު ފަތިހު 5:03 ގައި ގއ. ވިލިނގިލީ ހޮސްޕިޓަލުން އައިޖީއެމްއެޗް އަށް ބަލިމީހަކު ގެނައުމަށް އެމަޖެންސީ ހުށަހެޅުމެއް ލިބިފައިވާކަމަށް އާސަންދަ އިން ވަނީ ބުނެފައެވެ.
" އިމަޖެންސީ އިވެކުއޭޝަން ލިބުނުތާ 12 މިނިޓް ތެރޭ މި ހުށަހެޅުން އެޕްރޫވްކޮށް ކުރިއަށްގެންދިއުމަށް ނިންމި. 5:19 ގައި ވިލިނގިލީ ހޮސްޕިޓަލަށް އެކަން އަންގައި އަޅުގަނޑުމެންގެ މުވައްޒަފަކު ވަނީ ފްލައިޓް ލިބޭތޯ ބެލުމަށް އެދިފައި. އެންމެ އަވަހަށްވެސް ޝެޑިއުލް ފްލައިޓް އޮތީ ޖެހިގެން އައި ހުކުރު ދުވަހު ހެނދުނު 5:55 ގައި. އެހެންވެ ޗާޓަރޑް ފްލައިޓެއްގެ އިންތިޒާމްތައް ފަށައި ބުރާސްފަތި ދުވަހުގެ ހެނދުނު 8:57 ގައި މޯލްޑިވިއަނުން ޗާޓަރޑް ފްލައިޓުގެ ވަގުތު ލިބުނު. ޗާޓަޑް ފްލައިޓް ކޫއްޑޫއަށް ޖެއްސުމަށް ރާވަފައި އޮތީ ބުރާސްފަތި ދުވަހު 14:55 ގައި އަދި މާލެ އައުމަށް އޮތީ 16:20 ގައި. ވިލިނގިލިން ކޫއްޑޫއަށް މިކުއްޖާ ގެންދިއުމަށް އެމްއެންޑީއެފްގެ ސީ އެމްބިއުލާންސެއް 14:45 ގައި ހަމަޖެއްސި. މިއިންތިޒާމް މިގޮތަށް ހަމަޖެހުނުފަހުން މާލެއިން ކައްދޫއަށް ދާން އޮތް ފްލައިޓެއްގައި ޖާގަ ހުރުމުން ބުރާސްފަތި ދުވަހުގެ 11:40 ގައި ކޫއްޑޫ އެއަރޕޯޓުން އެކަން ވަނީ އަންގާފައި" އާސަންދައިގެ ބަޔާނުގައި ވެއެވެ.
މި ޗާޓަރޑް ފްލައިޓުން އެދުވަހުގެ 13:50 ގައި ކުއްޖާ މާލެ ގެނެވޭނެކަން އެންގުމުން އެކުއްޖާ އެ ފްލައިޓުން ފޮނުވާލުމުގެ މަސައްކަތް ފެށުނު. އެހެންނަމަވެސް ރޭވިގޮތަށް ކަންކަން ނުދިޔައީ ފަހުވަގުތު ފްލައިޓަށް ދިމާވި ޓެކްނިކަލް މައްސަލައެއްގެ ސަބަބުން ޑައިވަރޓް ނުކުރެވުމުން ކަމަށް އާސަންދައިގެ ބަޔާނުގައި ވަނީ ފާހަގަކޮށްފައެވެ. އާސަންދައިން މައުލޫމާތު ދިންގޮތުގައި އަލުން ޗާޓަރޑް ފްލައިޓެއް އިންތިޒާމުކޮށް ކޫއްޑޫ އެއަރޕޯޓުން ބުރާސްފަތި ދުވަހު ހަވީރު 16:35 ގައި ފުރައިގެން ކުއްޖާ މާލެ ގެނެވުނީ އެ ދުވަހުގެ ހަވީރު 17:15 ގައެވެ.
ކުއްލި ހާލަތުގައި ބަލިމީހުން މާލެ ގެނައުމާއި ގުޅޭގޮތުން ދިފާއީ ވަޒީރު 'އެކްސްގައި' ވިދާޅުވީ ފެންނަންހުރި ތަފާސް ހިސާބުތަކަށް ބަލާއިރު 2021 ވަނަ އަހަރުން ފެށިގެން 93 އިންސައްތަ ބަލިމީހުން އެހެނިހެން ރަށްރަށުން މާލެ ގެނައީ ޤައުމީ އެއަރލައިން މޯލްޑިވިއަންގެ ފްލައިޓުގައި ކަމަށެވެ. މިގޮތަށް ބައެއްފަހަރު ގެންނަނީ ފުލައިޓު ޗާޓަރު ކޮށްގެންނެވެ.
މޯލްޑިވިއަންގެ އުސޫލަށް ބަދަލުގެނައުން
ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން އެކްސްގައި ކުރެއްވި ޕޯސްޓެއްގައި ވިދާޅުވީ ސަރުކާރުން އެންމެ އިސްކަމެއް ދީގެން ކުރިއަށްދާ އެއް ކަމަކީ، އެއަރ އެމްބިއުލާންސްގެ ޚިދުމަތް ތަޢާރަފް ކުރުން ކަމަށެވެ. މި ޚިދުމަތް ﷲ ގެ ވާގިފުޅާއެކު 1 މާރިޗް 2024 ގައި ފެށިގެންދާނެ ކަމަށެވެ.
" މިއަދުން ފެށިގެން މޯލްޑިވިއަންގެ އުސޫލަށް ބަދަލުގެނެވި އިމަޖެންސީ ކޭސްއެއް އަތުވެއްޖެނަމަ ފްލައިޓް ޝެޑިއުލުން އެންމެ އިސްކަމެއް ދީގެން އިމަރޖެންސީކޮށް އުފުލަންޖެހޭ ފަރާތް އުފުލާގޮތަށް މިހާރުވަނީ ހަމަޖައްސާފައި. އަދި ހޮސްޕިޓަލަކުން އެމަރޖެންސީ ކޭސްއެއްގެ މައުލޫމާތު ލިބުމާއެކު މޯލްޑިވިއަންގެ އެންމެ އިސްކަމަކަށް ވާނީ އިމަރޖެންސީ ގައި އުފުލަންޖެހޭ ފަރާތް އުފުލުން". މިނިސްޓަރ އަމީން ފާހަގަކުރެއްވިއެވެ.
ބަލިމީހާގެ ހާލަތު ގޯސްވާއިރު ބަލަން ނުތިބެވޭނެއެވެ. ބޭނުންވާނީ ވީ އެންމެ އަވަހަކަށް ފަރުވާ ލިބޭ ތަނަކަށް ގެންދާށެވެ. އާންމުން ކުރިން ކަންބޮޑުވުން ފާޅުކުރަމުން ދިޔައީ ކުއްލި ހާލަތުގައި ބަލިމީހުން ރާއްޖޭގެ އެކި ރަށްރަށުން މާލެ ގެންނަންޖެހޭއިރު އެކަމަށް ހޭދަވާ ވަގުތު ގިނަވުމުންނެވެ. އައު ސަރުކާރުން މިގެންނަ ބަދަލުތަކުގެ ސަބަބުން އާންމުންގެ މިކަންބޮޑުވުންތަކަށް ހައްލު އަންނާނެކަމަށް ބެލެވެއެވެ.
