ދިވެހިންނަކީ ޒަމާނުއްސުރެ އަމިއްލަ ފައިމައްޗަށް ތެދުވެ އެހެން ގައުމަކަށް ބަރޯސާނުވެ އުޅެން ބޭނުންވާ ބައެކެވެ. މިނިވަންކަންމަތީ ތާއަބަދަށް މި ޤައުމު ދެމިއޮތުމަށް ކުރަންޖެހޭ ކަންތައްތައް އެބަހުއްޓެވެ. ރާއްޖެ އޮތް ސަރަހައްދުގެ ގޮތުން ވަށައިގެންވާ ކަނޑުތައް ގުޅިފައިވަނީ އެހެން ޤައުމުތަކަށް ނިސްބަތްވާ ކަނޑުތަކާއެވެ. މި ކަނޑުގެ ސަރަހައްދު ބެލެހެއްޓުމަކީ މިހާތަނަށް ރާއްޖެއަށް ދިމާވެފައިވާ ގޮންޖެހުމެކެވެ. އަވަށްޓެރި ޤައުމުތަކަށް ބަރޯސާވެގެން ރާއްޖޭގެ ކަނޑުގެ ސަރަހައްދުތައް ބަލަހައްޓަމުން އައިއިރު ދޭތެރެ ދޭތެރެއިން ރާއްޖޭގެ ކަނޑުގެ ސަރަހައްދުން މަސްބާނާ ބޭރުގެ ބޯޓުފަހަރުތައް ފެނެއެވެ. އަދި ހުއްދަނެތި ރާއްޖެ އަށް ވަންނަ ބޯޓުތަކުގެ މައްސަލަ ދިވެހި މަސްވެރިން އެތައް ފަހަރަކު ސަމާލުކަމަށް ގެނެސްފައި އެބަހުއްޓެވެ. އައު ސަރުކާރު އައުމަށްފަހު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެންމެ އިސްކަމެއް ދެއްވާ އެއްކަމަކީ ރާއްޖޭގެ މިނިވަންކަން ޔަގީން ކުރުމެވެ.
" ދިވެހި ރައްޔިތުންގެ މިނިވަންކަމާއި ސިޔާދަތީ ރަތްރޮނގު ފިސާރި ފަލަކޮށް ދަމާނަން. އެއީ ކޮންމެ ގައުމެއްގައިވެސް އޮންނާނެ ރަތް ރޮނގެއް. އޮންނަންވާނެވެސް ރަތް ރޮނގެއް. އެހެން ގައުމުތަކުގެ މިނިވަންކަމާއި ސިޔާދަތީ ރަތް ރޮނގަށް ދިވެހި ދައުލަތުން ފުރިހަމައަށް އިހުތިރާމް ކުރާނެ. ދިވެހި ދައުލަތުގެ ރަތް ރޮނގަށްވެސް އެހައްގު އޮންނަންވާނެ". ރައީސުލްޖުމްހޫރިއްޔާގެ މަގާމާއި ހަވާލުވެވަޑައިގެން ފުރަތަމަ ދެއްވި ތަގުރީރުގައި ޑރ. މުހައްމަދު މުޢިއްޒު ވިދާޅުވިއެވެ.
ދިވެހި ރާއްޖެއަކީ ބޭރު ގައުމެއްގެ އަސްކަރިއްޔާގެ އަޅުވެތިކަމުން ސަލާމަތްވެފައިވާ ގައުމަކަށް ހެއްދެވުމަށް އައު ސަރުކާރުން ގެންދަވަނީ ގިނަ ގުނަ މަސައްކަތްތަކެއް ކުރައްވަމުންނެވެ. މިގޮތުން ރާއްޖޭގައި އެހެން ގައުމެއްގެ ސިފައިން ތިބުމާއި ފާޅުގައި ދެކޮޅު ހައްދަވައި ރާއްޖޭގެ ކަނޑުގެ ސަރަހައްދު ދިވެހި ސިފައިންގެ ބެލުމުގެ ދަށުން ބެލެހެއްޓުމަށް ބޭނުންވާ ޑްރޯންތައް މިހާރު ވަނީ ރާއްޖެ ގެނެސްފައެވެ.
އިންޑިއާއާއެކު ވެފައިވާ ހައިޑްރޯގްރަފީ އެއްބަސްވުން ނިމުކަމަށް ގެނެސް ދިވެހި ސިފައިން އެމަސައްކަތް ކުރާގޮތަށް ހަމަޖައްސައި އެކަމުގެ ތައްޔާރީތައް ވަނީ ވެފައެވެ. މިގޮތުން ތުރުކީން ގަތް 2 ޑްރޯންގެ އެހީގައި ރާއްޖޭގެ އިގްތިސާދީ ކަނޑުގެ ސަރަހައްދު ބެލެހެއްޓުމުގެ މަސައްކަތް މިރޭ ރަސްމީކޮށް އިފްތިތާހް ކުރުމަށް ވަނީ ހަމަޖެހިފައެވެ. ނ. މާފަރު އެއާޕޯޓުގައި ބާއްވާ މި ޚާއްސަ ރަސްމިއްޔާތުގައި ބޭނުންކުރާ 2 ޑްރޯން އަކީ ރާއްޖޭގެ ކަނޑުގެ ސަރަހައްދު ބެލުމަށް އައު ސަރުކާރުން ތުރުކީ އާއެކު ހެދި އެއްބަސްވުމެއްގެ ދަށުން ގަތް ޑްރޯންތަކެކެވެ.
ޒަމާނީ ވަސީލަތްތަކާއެކު އުފައްދާފައިވާ މި ޑްރޯން އަކީ 25000 ފޫޓު މަތިން އުދުއްސޭ، 300 ކިލޯމީޓަރު ދުރުން މުއާސަލާތު ކުރެވޭވަރުގެ ގާބިލުކަން ހުރި ޑްރޯންކަމަށް ވަނީ މައުލޫމާތު ލިބިފައެވެ. އަދި ހުއްޓުމެއްނެތި 27 ގަޑިއިރު އުދުހެވޭ ފުލީ އޮޓޮމޭޓެޑް، ރޭގަނޑުވެސް ފޮޓޯއާއި ވީޑިއޯ ވަގުތުން ފޮނުވޭވަރުގެ ފަހުގެ ޓެކްނޮލޮޖީ އާއި އެއްގޮތަށް އުފައްދާފައިވާ ޑްރޯންތަކެވެ.
ރާއްޖޭގެ ކަނޑުގެ ސަރަހައްދު 24 ގަޑިއިރު ދިވެހި ސިފައިން އަމިއްލައަށް ބެލެހެއްޓުމަށް މަސައްކަތް ކުރަމުންދާއިރު، ދިވެހި ސިފައިންގެ ތެރޭގައި ތަފާތު ތަމްރީންތައް ފުރިހަމަކުރައްވާފައިވާ ގާބިލް ސިފައިން އެބަތިއްބެވެ. ބޭނުންވަނީ ޒަމާނީ ވަސީލަތްތަކެވެ. ރައީސުލްޖުމްހޫރިއްޔާ ވިދާޅުވި ގޮތަށް ކަނޑާއި، އެއްގަމާއި ހުރިހާތަނެއްވެސް އަމިއްލައަށް ބެލެހެއްޓިދާނެއެވެ. އަމިއްލަވަންތަ މިނިވަން ގައުމަކަށް ދިވެހިރާއްޖެ ހެދުމަށް މިއީ ކޮންމެހެން ކުރަން މުހިންމު ކަމެކެވެ.
ކިޔުންތެރިންގެ ހިޔާލު
ދިވެހިރާއްޖެއަކީ، 2000 އަހަރު ވަންދެން އޯޝަން ކިންގްޑަމް އެއްގެ ގޮތުގައި އޮތް ދަޢުލަތެކެވެ. މިހާރު އިންޑިއާ މާކަނޑޭ މިކިޔާ ކަނޑުގައި އުފެދުނު ފުރަތަމަ ކަނޑުގެ ދަޢުލަތެވެ. ދިވެހިރާއްޖޭގައި ރަސްކަން ކުރެއްވި އެތައް ރަސްރަސްކަލުންގެ ރަސްމީ ލަޤަބަކީ، ސުލްޠާން އޮފް ލޭންޑު އެންޑް ދަ ސީ ( ملك البر والبحر) އެވެ. އާދެ، އެއްގަމާއި ކަނޑުގެ ވެރި ރަސްގެފާންއެވެ. މިކަމުން ވެސް އެނގެނީ ދިވެހިރާއްޖެ ވަށައިގެން އޮތް ކަނޑުގެ މައްޗަށް ދިވެހީންގެ ބާރު އޮތް މިންވަރެވެ.
ދުނިޔޭގެ ފުރަތަމަ މެރިޓައިމް ސިވިލައިޒޭޝަން (ކަނޑުގެ ހަޟާރަތެއް) އުފެދުނީ މިހާރު އިންޑިއާ މާކަނޑޭ މިކިޔާ ކަނޑުގެ މެދުތެރެއިންނެވެ. އެ ހަޟާރަތުގެ އެންމެ އިސް ވެރިންނަކީ ދިވެހީންނެވެ. އިންޑިއާ މާކަނޑުގެ ވައިކިން އެމްޕަޔަރ އަކީ ދިވެހީންނެވެ. އެހެންވީމާ ދިވެހީންނަށް ދިވެހި ދަޢުލަތުގެ ކަނޑުގެ ސަރަހައްދު މިއަދު ނުބެލެހެއްޓެންވީ ކީއްވެހެއްޔެވެ. ބެލެހެއްޓޭނެ ކެޕޭސިޓީ ދަޢުލަތުގައި ބިލްޑްކޮށްފައި ނެތިއްޔާ އެއީ ދިވެހި ވޭރީން ދިވެހި ގައުމަށް ވެފައިވާ ވަރަށް ބޮޑު އިހްމާލެކެވެ. އެ ފަދަ ބޮޑު އިހުމާލެއްވީ ވެރިންނަށް ފިޔަވަޅު އަޅަން ވެސް ޖެހެއެވެ.
ކޮމެންޓްސް ބަންދުކުރެވިފައި