މާލޭ ހުޅަނގު ފަރާތުގައި ހަދާފައިވާ "ރަސްފަންނު" ގޮނޑުދޮށަށް އަޅާނުލާ ދޫކޮށްލައިފިނަމަ އެތަން ބޭނުން ކުރާ މީހުންނަށް އެ ދެވެނީ ވަރަށް ބޮޑު ދެރައެކެވެ. އެކި ދުވަސްވަރު އެތަނުގެ ތަފާތު މައްސަލަތައް ކުރިމަތިވެ އާންމުންގެ ކަންބޮޑުވުންތައް އިތުރުވެއެވެ.
މިހާރު އާންމުން ކަންބޮޑުވާ އެއް ކަމަކީ މާލެ ސިޓީ ކައުންސިލުން ރަސްފަނުގައި ހުރި ބައެއް މައްސަލަތައް ހައްލުނުކޮށްދީ ހުރުމުގެ ކަންބޮޑުވުންތަކެވެ. އެގޮތުން މޫދަށް އެރި އުޅުނު ބައެއް މީހުންނާއި 'ޒީޓައިމްސް' އިން ސުވާލުކޮށްލުމުން، ދޮށީ އުމުރުގެ އަންހެނަކު ބުނީ އޭނާ ފުރޮޅުލީ ގޮނޑީގައި ކޮންމެ ދުވަހަކުވެސް އަންނަނީ މޫދުން ގުދުރަތީ ފަރުވާއެއް ހޯދުމަށް ކަމަށެވެ. އެއްފަޅި ވާގިގޮސްފައިވާ އެ އަންހެންމީހާ ބުނީ އެތަނުގައި ރޭމްޕެއް ނެތުމުގެ ސަބަބުން އޭނާއަށް ގޮނޑުދޮށަށް ފޭބުން ވަރަށް ދަތި ކަމަށެވެ. އަދި ބައެއް ދުވަސްވަރު ފެންވަރާ މާ ގަނޑުތަކުން ފެންނަ ނާންނަ ކަމަށާއި، އެހެންނަމަވެސް މި ހަފްތާގައި އެކަން ހައްލުވެއްޖެ ކަމަށް އޭނާ ބުންޏެވެ.
އެހެން މީހަކާއި ވާހަކަ ދައްކާލުމުން ބުނީ، އެންމެ ބޮޑު މައްސަލައަކީ ރަސްފަންނުގެ އައިޖީއެމްއެޗާއި ވީ ފަޅިން ވެލިގަނޑު ގިރައިގެން ގޮސް ގުންޑޮޅިތައް ހެދިފައި އޮތުމެވެ. ދުވަސްވީ މީހުން މޫދަށް އެރިލާށާއި ގޮނޑުދޮށުގައި ހިނގާލަށް އަންނަނީ ޑޮކްޓަރުން އެކަމަށް އިރުޝާދު ދޭތީ ކަމަށާއި، އެހެންނަމަވެސް ބައެއް މީހުންނަށް ފައިބަން އުނދަގޫވުމުގެ ސަބަބުން ދަތިވާ ކަމަށް އެމީހާ ފާހަގަ ކުރިއެވެ.
ބައެއް މީހުންގެ ޝަކުވާތަކާއި ގުޅިގެން މި ރިޕޯޓް ލިޔުމުގެ ކުރިން އެތަން ބަލާލީމެވެ. ބައެއް ހިސާބުތަކުން މީހުންނަށް ފައިބަން ފަސޭހަ ނުވާނެ މިންވަރަށް ވަނީ ވެލިގަނޑު ކަނޑައިގެން ގޮސް ޕޭމަންޓާއި ހަމައަށް ވެލިގަނޑު ގިރާލާފައެވެ. އިރުމަތީ ފަރާތުގައި އޮންނަ އާޓިފިޝަލް ބީޗެކޭ އެއްގޮތަށް ރަސްފަންނުގައިވެސް ހިލަ ނުވަތަ ވެލި ބަސްތާ ޖަހައިގެން ނަމަވެސް މިކަން ހައްލުކޮށްދިނުމަށާއި ވީ އެންމެ އަވަހަކަށް ފުރޮޅުލީ ގޮނޑީގައި އަންނަ މީހުންނަށް ފަސޭހައިން ދެވޭނެހެން ރޭމްޕެއް ހަދައި ދިނުމަކީ އެތަނަށްދާ މީހުންގެ އާދޭހެކެވެ.
މާލެ ސިޓީ ކައުންސިލުގެ ބެލުމުގެ ދަށުގައި އޮންނަ ރަސްފަންނަށް އަޅާލާ، މިހާރަށްވުރެ ބޮޑަށް އެތަން ތަރައްޤީކޮށްދޭން އެބަޖެހެއެވެ. ކޮންމެ ވޯޓަކަށް ރައްޔިތުންގެ ފޯނުތަކަށް ގުޅާ، އެ ރައްޔިތުންގެ ގޭ ދޮރުގައި ޓަކި ޖަހާ އުސޫލުން ރައްޔިތުންގެ މި އާދޭސްތައްވެސް ވެރިން އަޑުއެހުން މުހިންމެވެ. ސަރުކާރުގެ އެއްބާރުލުމާއި އެކު މާލޭގައި ހުރި މިފަދަ ތަންތަނަށް ސިޓީ ކައުންސިލުން މިހާރަށްވުރެ ބޮޑަށް އަހަންމިއްޔަތުކަން ދޭނެ ކަމަށް ރަސްފަންނަށް މޫދަށް އެރޭ މީހުން އުންމީދު ކުރެއެވެ.
ރަސްފަންނަށް 6 އަހަރު ފުރޭއިރު މިއަދު އެތަނަކީ އާންމުންނަށް ގިނަ ބޭނުންތަކެއް ހިފޭ، ހިތްފަސޭހަ މާހައުލެއްގެ ގޮތުގައި ދެމެހެއްޓުން މުހިންމެވެ. އަދުގެ ރައީސުލްޖުމްހޫރިއްޔާ ޑރ. މުއިއްޒު، ހައުސިން އެންޑް އިންފްރާސްޓްރަކްޗަރ ގެ މިނިސްޓަރުގެ މަގާމުގައި ހުންނެވިއިރު އެމަނިކުފާނުގެ ސީދާ ބެއްލެވުމުގެ ދަށުން ތަރައްޤީ ކުރި މި ރަސްފަންނަކީ މާފަންނުގެ ރައްޔިތުންނާއި، ޖުމްލަކޮށް މުޅި މާލޭގެ ރައްޔިތުންނަށް އަދި މާލޭގައި ދިރިއުޅޭ ބިދޭސީންނަށްވެސް މޫދަށް އެރުމާއި، ފަންޑްރެއިސިން އިވެންޓްތައް ބޭއްވުމާއި، ޕްލެޓްފޯމު މަތީގައި ތިބެގެން މަސް ބޭނުމާއި، ބާބެކިއު ހެދުމާއި، އެކި ކަހަލަ ކުޅިވަރުތައް ކުޅުމަށްވެސް ފައްކާކޮށްފައި އޮތް ނުހަނު ރީތި ގޮނޑުދޮށެކެވެ. އޭރު އެކަމަށް ފާޑުކީ އެތައް ބަޔަކުވެސް މިއަދު އެ ހިތްގައިމު މާހައުލު ބޭނުން ކުރެއެވެ. އެހެންކަމުން އޭރު ރަސްފަންނު ތަރައްޤީ ކުރި ގޮތަށް، އަބަދުވެސް އެތަން ދެމެހެއްޓުމަށް ސިޓީ ކައުންސިލުން މިހާރަށްވުރެ ބޮޑު އިސްކަމެއްދޭން ވާނެ ކަމަށް ރަސްފަންނަށް ގަވާއިދުން މޫދަށް އެރޭ "މޫދު ކަސްރަތު ކުލާހެއްގެ އިސްވެރިން ދެކެއެވެ.
މާލެ ސިޓީ ކައުންސިލްގެ މޭޔަރު އާދަމް އާޒިމް 'ޒީޓައިމްސް' އަށް ވިދާޅުވީ ރަސްފަންނު އޮތީ ވަރަށްބޮޑަށް ހަލާކުވެފައި ކަމަށާއި އެހެންނަމަވެސް ރޯދަމަސް ނިމުމުން އެތަން ތަރައްގީކުރުމުގެ މަސައްކަތް ފައްޓަވާނެ ކަމަށެވެ.
" 6 އެއްކަ މަސްވެއްޖެ ރަސްފަންނު ވަރަށްބޮޑަށް ހަލާކުވެފައި އޮންނަތާ. ފެށުނީއްސުރެވެސް ރޭމްޕެއް ނެތް. ރޭމްޕެއް ހެދުމާއި މޫދުގައި ހެދިފައި ހުންނަ ޗަކަސްތައް ނެގުމާއި ގޮނޑުދޮށަށް ދޮންވެލި އަޅާ އަލުން މަރާމާތު ކުރުމަށް ނިންމާފަ އޮތީ. އެތަން ހަދާފަ އޮތް ގޮތުން އެއީ ވަރަށް މެއިންޓެނެންސް ކޯސްޓް ބޮޑުތަނެއް". އާޒިމް ވިދާޅުވިއެވެ.
