ކުރިއަރަމުން އަންނަ ޤައުމެއްގައި އާބާދީ ވަކިވަރަކަށް އިތުރުވުން މުހިންމެވެ. އެހެންނަމަވެސް ރާއްޖޭގެ އާބާދީ އިތުރުވަމުން އަންނަ އަދަދާއިމެދު ކަމާއި ގުޅުންހުރި މުއައްސަސާތަކުންވެސް ދަނީ ކަންބޮޑުވުން ފާޅުކުރަމުންނެވެ.
ދިވެހިރާއްޖޭގެ އާބާދީގެ ބޮޑުބައެއް މާލެ ސަރަހައްދުގައި ދިރިއުޅޭއިރު އާބާދީ އިތުރު ކުރުމަށް އޮތް އެންމެ ބޮޑު ގޮންޖެހުމަކީ ދިރިއުޅޭނެ ރަނގަޅު ބޯހިޔާވަހިކަމެއް ނެތުމެވެ. ބޯހިޔާވަހިކަމުގެ މައްސަލަ މިވަނީ މާލެ ސަރަހައްދުގެ އިތުރުން ބައެއް ރަށްރަށުގައި ދިރިއުޅޭ މީހުންނަށް ވެސް ކުރިމަތިވެފައެވެ.
ލިބޭ އާމްދަނީއިން ކުލި ދެއްކުމަށްފަހު އިތުރަށް ހަމަޖެހިގެން ދިރިއުޅެވޭ މިންވަރަށް ފައިސާނެތި އަތްމަތި ދަތިވުމަކީވެސް އާބާދީ އިތުރުކުރުމަށް އެޅޭ ހުރަހެއްކަމަށް ސޯޝަލް މީޑިއާގައި މިމައުޟޫއަށް ވާހަކަދެއްކި ބައެއް މީހުން ބުނެފައިވެއެވެ. އަދި އެކަށީގެންވާ އަގެއްގައި ޑޭކެއަރ ސެންޓަރުތައް ނެތުމާއި، ވަޒީފާއަށް ދަމުން ކުދިން ބަލަން ދަތިވުމަކީވެސް ދިމާވާ ގޮންޖެހުމެއްކަމަށް ބައެއް މީހުން ބުނެފައިވެއެވެ. އަދި މަސައްކަތުގެ މާހައުލުގައި ގިނަ ވަގުތު ހޭދަކުރަންޖެހި އާއިލާއަށް އެކަށީގެންވާ ވަގުތު ނުދެވުމަކީވެސް ކަންބޮޑުވުމެކެވެ.
މޯލްޑިވްސް ބިއުރޯ އޮފް ސްޓެޓިސްޓިކްސްއިން އާންމުކޮށްފައިވާ ތަފާސްހިސާބަށް ބަލާއިރު ރާއްޖޭގައި ދިރިއުޅޭ މީހުންގެ ޖުމްލަ އާބާދީއަކީ 515،132 މީހުންނެވެ. މީގެތެރެއިން 382،639 މީހުންނަކީ ދިވެހީންނެވެ.
ރާއްޖޭގެ އާބާދީގެ ބޮޑުބައަކީ 18 އަހަރުން މަތީގެ މީހުން ކަމަށްވާއިރު، އުމުރުން 15 އަހަރުން ދަށުގެ އާބާދީއަކީ އެންމެ 20 އިންސައްތައެވެ. މިދާގޮތުން ދާނަމަ ކުރިއަށްއޮތްތާގައި އުމުރުން ދުވަސްވީމީހުންގެ އަދަދު ބޮޑުތަނުން ގިނަވެ އުފަންވާ ކުދިންގެ އަދަދު މަދުވުމަކީ އެކަށީގެންވާކަމެކެވެ.
ކޮންމެއަކަސް އާބާދީ އިތުރު ކުރުމަށް ވިސްނާއިރު މިކަމަށް ހުރި ހުރަސްތަކަށް ސަރުކާރުންވެސް ހައްލު ހޯދައިދޭންޖެހެއެވެ. މި 5 އަހަރު ތެރޭގައި ބޯހިޔާވަހިކަން އެންމެ ބޭނުންވާ ފަރާތްތަކަށް ހަމަޖައްސައިދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވަޢުދެކެވެ. މި ވަޢުދާއި އެއްގޮތަށް ބޯހިޔާވަހިކަމަށް ލުޔެއް ލިބިއްޖެނަމަ ހަމަޖެހިގެން ދިރިއުޅެވޭނެ މަގު އާއިލާތަކަށް ފަހިވެގެންދާނެއެވެ. ޤައުމީ ފެންވަރެއްގައި ހައްލު ހޯދަންޖެހިފައިވާ މިމައްސަލައަށް ފުންކޮށް ވިސްނާލުން ބުއްދިވެރިއެވެ.
