ރާއްޖޭގައި ދިރިއުޅޭ ލޭ އަޅާ ކުދިންނާއި މީހުންނަށް ފަސޭހައިން ލޭ ލިބޭނެ މަގު ފަހިކުރުމުގެ ގޮތުން ލޭ ހަދިޔާ ކުރާ ފަރާތްތަކާއި ލޭ ބޭނުންވާ ފަރާތްތައް ފަސޭހަކަމާއި ރައްކާތެރިކަމާއެކު ޒަމާނީ ޓެކްނޮލޮޖީގެ އެހީގައި ގުޅުވައިދިނުމަށް މުހިންމު މަސައްކަތެއް ވަނީ ފަށާފައެވެ. މިއީ ލޭ އެޕް އަދި މޯލްޑިވިއަން ތެލަސީމިއާ ސޮސައިޓީ އާއި ދެމެދު ސޮއިކޮށްފައިވާ ފަހުމުނާމާއެއްގެ ދަށުން ކުރެވޭ މުހިންމު މަސައްކަތެކެވެ.
ލޭ އެޕް އަދި މޯލްޑިވިއަން ތެލަސީމިއާ ސޮސައިޓީން ބުނީ މީގެ މަގްސަދަކީ ލޭ ހަދިޔާ ކުރުމާއި ބެހޭގޮތުން އާންމުންގެ ހޭލުންތެރިކަން އިތުރުކޮށް ލޭ ހަދިޔާ ކުރާ މީހުންގެ އަދަދު އިތުރުކުރުން ކަމަށެވެ. މިދިޔަ ހަފްތާގައި ލޭ އެޕާއި އެކު ތެލަސީމިއާ ސޮސައިޓީން އެއްބަސްވެފައިވަނީ ރާއްޖޭގައި ގަވާއިދުން ލޭ އަޅާ ފަރާތްތަކާއި ކުއްލި ހާލަތްތަކުގައި ލޭ ބޭނުންވާ ފަރާތްތަކަށް ދެމެހެއްޓެނިވި ނިޒާމެއްގެ ތެރެއިން ރައްކާތެރި ގޮތުގައި ލޭ ހޯދޭނެ މަގު ފަހިކުރުމަށެވެ.
އަދި ރާއްޖޭގައި އިމަޖެންސީ ހާލަތްތަކުގައި ބޭނުންވާ ލޭ އަދި ގަވާއިދުން ލޭ އަޅަންޖެހޭ ފަރާތްތަކަށް ބޭނުންވާ ލޭ، ރައްކާތެރި އަދި ދެމެހެއްޓެނިވި ނިޒާމެއްގެ ދަށުން ހޯދޭނެ މަގު ފަހިކޮށްދިނުމެވެ.
ތެލަސީމިއާ ސޮސައިޓީ އާއި ލޭ އެޕް އާއި ދެމެދު ސޮއި ކުރެވިފައިވާ ފަހުމުނާމާގެ ދަށުން ދެފަރާތުން ގުޅިގެން ރާއްޖޭގައި ލޭ ހަދިޔާ ކުރުމާއި ބެހޭގޮތުން އާންމުންގެ ހޭލުންތެރިކަން އިތުރުމަށް މަސައްކަތް ކުރާނެއެވެ.
އަދި ސޯޝަލް މީޑިއާއާއި އެކިއެކި އިވެންޓްތައް މެދުވެރިކޮށް ލޭ އެޕާއި ގުޅޭ މައުލޫމާތުތައް ފޯރުކޮށްދިނުމުގެ މަސައްކަތްތަކުގެ އިތުރުން ލޭ އެޕުގައި ޑޯނަރުންގެ ގޮތުގައި ގިނަ ފަރާތްތަކުން ރަޖިސްޓްރީވުމަށް ބާރުއެޅުމުގެ މަސައްކަތް ކުރިޔަށް ގެންދިއުމަށް ހަމަޖެހިފައިވެއެވެ. އަދި ތެލަސީމިއާ ސޮސައިޓީގެ ފަރާތުން، ލޭ އެޕަށް އަލަށް ވަންނަ ފަރާތްތަކަށް ލޭ އެޕް ބޭނުންކުރުމަށް އެހީތެރިވެދިނުންވެސް ހިމެނެއެވެ.
މޯލްޑިވިއަން ތެލަސީމިއާ ސޮސައިޓީ އާއި ލޭ އެޕް އާއެކު ވެފައިވާ ފަހުމުނާމާގެ ދަށުން ލޭ އެޕަކީ ފަސޭހަ ހިދުމަތް ލިބިގަނެވޭނެ ރައްކާތެރި އެޕެއްގެ ގޮތުގައި ދެމެހެއްޓުމަށް މަސައްކަތްކުރުމާއި، ތެލަސީމިއާ ސޮސައިޓީއަށް ލޭ އެޕާއި ގުޅިގެން ބޭނުންވާ ޓެކްނިކަލް ޓްރެއިނިންގ އާއި ލަފާ ފޯރުކޮށްދެމުންދާނެ އެވެ.
އަދި އެކި އިވެންޓްތަކުގައި، ލޭ އެޕުން ފޯރުކޮށްދޭ ހިދުމަތްތައް ޕްރޮމޯޓް ކުރުމަށް ދެފަރާތުން ގުޅިގެން މަސައްކަތް ކުރުމާއި ލޭ އެޕް ބޭނުންކުރާ ފަރާތްތަކުން ފޯރުކޮށްދޭ ފީޑްބެކާއި އެއްގޮތަށް ޕްލެޓްފޯމުުގެ ކަންކަން ރަނގަޅުކުރުމުުގެ މަސައްކަތް ލޭ އެޕުން ކުރިޔަށް ގެންދިއުމަށްވެސް ވަނީ ނިންމާފައެވެ.
ލޭ އެޕުން ވަނީ ސިއްހީ ދުޅަހެޔޮކަން އިތުރުކޮށް ލޭ ހަދިޔާކުރުމާއި ގުޅޭ މަސައްކަތްތައް އިތުރަށް ފުޅާކުރުމަށާއި ހަރުދަނާކުރުމަށް ތެލަސީމިއާ ސޮސައިޓީގެ އިތުރުން ސިއްހީ ވުޒާރާ އާއި އެކު ޖުލައި 11، 2024 ގައި ވަނީ މޯލްޑިވްސް ބްލަޑް ސާވިސަސް އާއިއެކު ލޭ އެޕް ތައާރަފްކޮށް ސިއްހީ ވުޒާރާއާއި އެކު މި ހިދުމަތް ފޯރުކޮށްދިނުމުގެ އެއްބަސްވުމެއްގައިވެސް ސޮއި ކޮށްފައެވެ.
ރާއްޖޭގައި ތެލަސީމިއާ ކުދިންނަށް ބޭނުންވާ ލޭ ގަވާއިދުން ނުލިބުމުގެ ކަންބޮޑުވުން ބައެއް ފަރާތްތަކުން ކުރެއެވެ. ބައެއް ކުދިންނަށް ލޭ އަޅަން ޖެހޭ ދުވަސް އައިސް ޖެހޭއިރުވެސް ޑޯނާއެއް ނުލިބި ހިތްދަތި ހާލަތްތަކާއި ކުރިމަތިލާން ޖެހެއެވެ. ލޭ ހަދިޔާކުރުމަކީ ދީނީގޮތުންނާއި އިޖްތިމާއީ ގޮތުންވެސް ރީތި މިސާލެކެވެ. ވީމާ ލޭ އެޕާއި ތެލަސީމިއާ ސޮސައިޓީން އިސްނަގައިގެން މި ކުރާ މަސައްކަތަށް އާންމުންގެ ތަރުހީބާއި އެހީތެރިކަން އެ ސޮސައިޓީއަށް މިއަދު ނުހަނު މުހިންމެވެ.
800 އަށްވުރެ ގިނަ ތެލަސީމިއާ ޕޭޝަންޓުން ރާއްޖޭގައި އުޅޭއިރު އެމީހުންނަށް އެހީތެރިކަން ފޯރުކޮށްދީ ލޭ ހަދިޔާ ކުރުމަކީ އުފަލަކަށް ހަދަމާތޯއެވެ.
