"މަންމާ، ރޭގަ ރަނގަޅަށް ނިދުނުތަ" މަންމަގެ މޫނުން ވަރުބަލިކަމާއި ހިތްދަތިކަމުގެ ނިޝާންތައް ފެނުމުން އެންމެފަހުން ޝީމާ ސުވާލުކޮށްލިއެވެ.
މަންމަ ޝަރީފާ އެއްވެސް ޖަވާބެއް ނުދިނެވެ. ހަމައެކަނި ބުނި އެއްޗަކީ ރޭގައި މަންމައަށް ނުނިދުނީ ކަމަށެވެ.
ޝީމާ އޭނަގެ މަންމަގެ ވާހަކަ އަޑުއަހަން އިނީ ވަރަށް މަޑުމަޑުންނެވެ. މި ވެގެން އުޅޭގޮތް ޝީމާއަށް ކޮންމެވެސް ވަރަކަށް ހީވިއެވެ. އޭނާގެ ހިތުގައި ވަރަށް ގިނަ ސުވާލުތައް އުފެދުނެވެ. ނަމަވެސް މަންމަގެ ހާލަތު ދެކެ އެ ސުވާލުތައް ކުރާކަށް ނުކެރުނެވެ.
"މިއަދު ފިހާރައަށް ނުދަނީތަ" ޝީމާ ފިހާރައަށް ނުގޮސް މާލަސްވާތީ މަންމަ ސުވާލުކޮށްލިއެވެ.
"މަންމާ، މިއަދު އަހަރެން ލަހުން ފިހާރައަށް ދާނީ. މިއަދު މާބޮޑު މަސައްކަތެއް ނެތީމަ ނުދާނަން. މަންމައަށް އެހީތެރިވާން ގޭގަ ހުންނާނީ" ޝީމާ ބުނެލިއެވެ.
"ޝުކުރިއްޔާ ދަރިފުޅާ. ތިހާ ހެޔޮ ދަރިއަކު ލިބުނީތީ" ޝަރީފާގެ ލޮލުގައި ކުޑަކޮށް ކަރުނަ ޖަމާވި ނަމަވެސް ޝަރީފާ ޝީމާގެ އަތުގައި ހިފާލަމުން ބުންޏެވެ.
ޝީމާ އާއި ޝަރީފާ ދެމީހުން ވާހަކަ ދައްކަން ތިއްބާ ބޭރުން މީހަކު ސަލާމް ގޮވައިލި އަޑަށް ދެމީހުންގެ ވާހަކަ ހުއްޓުނެވެ. ޝީމާ ކުޑަކޮށް ހައިރާންވެފައި ބޭރަށް ނިކުމެ ކާކުތޯ ބަލައިލިއެވެ.
ބޭރުގައި ހުރީ ދޮންބެދައްތައެވެ. ކައިރީގައި އޭނަގެ ދެކުދިން ތިއްބެވެ. ޝީމާއަށް ދޮންބެދައްތަ ފެނުމާއި އެކު އުފަލުން ހިނިތުންވެލަމުން ވަރަށް ލޯބިން ގޮވައިލިއެވެ. "ދޮންބެދައްތަ! އާދޭ އާދޭ އެތެރެއަށް" ޝީމާ އެމީހުން ގޮވައިގެން އެތެރެއަށް ވަންނަން ހިނގައިގަތެވެ.
ޝީމާ އެމީހުން ގޮވައިގެން ގޭތެރެއަށް ވަންއިރު ޝަރީފާ މޭޒުދޮށުގައި އިނެވެ. ދޮންބެދައްތަ ފެނުމުން ޝަރީފާ ހިނިތުންވެލަމުން ތެދުވެ، ސަލާމް ގޮވައިލުމަށްފަހު ސައިބޯން އައުމަށް އެދުނެވެ.
"ވަރަށް ބޮޑަށް ޝުކުރިއްޔާ ޝަރީފާ. އަހަރެމެން މިހާރު ސައިބޮއެފިން. ނަމަވެސް ކުދިން ސައިބޯން ބޭނުންވާ ކަމަށް ބުނޭ" ނަމަވެސް ދޮންބެދައްތަ މަޑުމައިތިރިކަމާއެކު ޖަވާބުދިނެވެ.
"އޯކޭ، ދެން ތިޔަ ކުދިންނަށް ސައި ހަދައިދޭނަން" ޝަރީފާ ހިނިތުންވެލަމުން ތެދުވެގެން ގޮސް ކުދިންނަށް ސައި ހަދައިދިނެވެ.
ދޮންބެދައްތަގެ ޒިޔާރަތާއެކު، ގޭތެރެ ހިތްގައިމު މާޙައުލަކަށް ބަދަލުވެގެން ދިޔައެވެ. ކުދިންގެ ހިނިތުންވުމާއި އުފާވެރި އަޑުތަކުން ގެ ފުރިގެން ދިޔައެވެ. ޝީމާ އާއި ޝަރީފާ ދޮންބެދައްތައާ އެކު ވާހަކަދައްކަމުން، ކުދިންނާ ކުޅެމުން، އާއިލީ ލޯތްބާއި އެކުވެރިކަމުގެ ބަހުން ފުރިގެންވާ ވަގުތުކޮޅެއް ހޭދަކުރިއެވެ. މިއީ ޙަޤީޤީ ލޯބީގެ މާނައެވެ. ގާތްތިމާގެ މީހުންނާއެކު ހިތްހަމަޖެހުމާއި އުފާވެރިކަން ހިއްސާކުރުމެވެ.
އަސްލު އަހަރެން ވަރަށް ދެރަވެ ލަދުގަނޭ ކުރިން ކަންތައް ވެފައިވާ ގޮތުން" ދޮންބެދައްތަ ވާހަކަ ދައްކަން ފެށިއިރު ދޮންބެދައްތަ އިނީ ވަރަށް ދެރަވެ ލަދުގެންފައެވެ.
"އެ ވާހަކަ ނުދައްކާ. އެއީ މާޒީ" ޝަރީފާ އެ ވާހަކަ ހުއްޓުވިއެވެ. ޝަރީފާގެ ހިތުގައި އަދިވެސް ވޭނުގެ އަސަރު ހުރި ނަމަވެސް، މާފުކުރުމުގެ މަތިވެރިކަން ވިސްނުނެވެ. އަދި ދޮންބެދައްތަ އެގެއަށް އައީ ކޮން ބޭނުމެއްގައިތޯ ޝަރީފާ ސުވާލު ކޮށްލިއެވެ.
"އެއްވެސް ކަމެއް ބޭނުން ނުވޭ. ހަމަ ހާލު ބަލަން އައިސްލީ" ދޮންބެދައްތަ ޖަވާބު ދިނެވެ.
ޝަރީފާގެ ހިތުގައި އުފާވެރިކަމުގެ އިހުސާސްތަކެއް އުފެދުނެވެ. ކުރިމަގު އުޖާލާވާނެކަމުގެ އުންމީދު ލިބުނެވެ. ގާތްތިމާގެ މީހުންނާ ދޭތެރޭ ހެޔޮކޮށް ހިތުމުގެ މުހިންމުކަން އިހުސާސްވިއެވެ. އިސްލާމްދީނުގައި ދަސްކޮށްދީފައިވާ ފަދައިން، މާފުކުރުމާއި ގުޅުން ބަދަހިކުރުމުގެ މަތިވެރިކަން ވިސްނުނެވެ. ޝަރީފާގެ ހިތުގައި އާ ލޯތްބެއް އުފެދި، އުފާވެރި ދުވަސްތަކެއް އަންނާނެކަމުގެ އުންމީދު ލިބުނެވެ.
ކުދިންގެ އުފާވެރި އަޑުތަކާއި، ދޮންބެދައްތަގެ މަޖާ ޖޯކުތައް ގޭތެރެ ގުގުމާލައިގެން ދިޔައެވެ. ކުޅިވަރުތަކުގައި ބައިވެރިވެ، ކުދިންނާއެކު ކުޑަކުއްޖަކަށްވެ، ދޮންބެދައްތަ އުޅުނު ގޮތް ދެކެ ޝަރީފާމެން ތިބީ ހައިރާންވެފައެވެ. އެ މަންޒަރު ދެކެ ޝަރީފާމެންގެ ހިތްތައް އުފަލުން ފުރިގެން ދިޔައެވެ. އެމަޖަލުގައި އުޅެނިކޮށް މެންދުރު ނަމާދަށް ގޮވި އަޑަށް ދޮންބެދައްތަ ގެއަށް ދާން އެކުދިންނަށް ގޮވިއެވެ. ނަމަވެސް އެކުދިން ބޭނުންވީ އަދިވެސް ކުޅެން އެގޭގައި މަޑުކޮއްލާށެވެ. އެންމެފަހުން އެހެން ދުވަހަކުން އަންނާނީއޭ ބުނުމުން އެކަމަށް އެކުދިން އެއްބަސްވެ ގެއަށް ދާން ހިނގައިގަތެވެ.
ދޮންބެދައްތަމެން ގެއިން ނުކުތުމާއެކު ޝަރީފާ އަވަސްވެލީ ވުޟޫކޮށްލައިގެން ނަމާދު ކުރުމަށްފަހު، އިބްރާހިމްފުޅު ގެއަށް އަންނަން ވާއިރަށް ކެއުން ތައްޔާރުކޮށް ނިންމާލުމަށެވެ.
މެންދުރުގެ ވަގުތު ޖެހުމާއެކު، އިބްރާހިމްފުޅު ގެއަށް އައެވެ. އޭނާ އައިސް ނަމާދަށް ދާން ތައްޔާރުވާން ފެށިއެވެ.
"ކާން ތައްޔާރުވެއްޖެ. ނަމާދުން އައިސްފަ ދޯ ކާނީ" ޝަރީފާ އޭނާއަށް ހިނިތުންވެލަމުން ބުންޏެވެ.
"އަހަރެން މިހާރު މިދަނީ މިސްކިތަށް. ދެން އަންނާނީ ކާން" އިބްރާހިމްފުޅު ހިނިތުންވެލަމުން ބުންޏެވެ. އޭނާ ނުކުމެގެން ދިޔުމުން، ޝަރީފާ މޭޒުމައްޗަށް ކާން ތައްޔާރުކުރަން ފެށިއެވެ.
އިބްރާހިމްފުޅު ނަމާދުން އައުމުން، ދެމަފިރިން އެކުގައި ކެއުމުގައި ބައިވެރިވިއެވެ. ކައި ނިމުމުން، އިބްރާހިމްފުޅު ޝަރީފާއަށް ޝުކުރު އަދާކުރިއެވެ. "ﷲ ބަރަކާތް ލައްވާށި. ވަރަށް މީރު" އޭނާ ބުންޏެވެ.
އިބްރާހިމްފުޅު ތެދުވެ، މަސައްކަތަށް ދިއުމުގެ ކުރިން ޝަރީފާގެ ނިތްކުރީގައި ބޮސްދިނެވެ. އިބްރާހިމްފުޅު ދާން ހިނގައިގަތުމުން ޝަރީފާ އޭނާއަށް ބައި ބުނެ، ދޮރާ ހަމައަށް ގޮސް ހުއްޓުނެވެ. އިބްރާހިމްފުޅު ދޮރުން ނިކުމެގެން ދިޔަތަން ބަލަހައްޓައިގެން ހުރެ ޝަރީފާ ވިސްނައިލިއެވެ. އޭނާގެ ހިތުގައި އުފެދުނު ސުވާލުތަކަށް ޖަވާބު ހޯދަން މަސައްކަތް ކުރިއެވެ. ވަރިވާން އުޅޭއިރުވެސް އިބްރާހިމްފުޅު އޭނާ ދެކެ ކިހާ ލޯބިވޭ ހެއްޔެވެ؟ މި ސުވާލު ޝަރީފާގެ ހިތުގައި ތަކުރާރުކޮށް އުފެދެއެވެ. އިބްރާހިމްފުޅުގެ މޫނުމަތިން ރުޅިވެރިކަމުގެ އެއްވެސް ކުލަވަރެއް ނުދައްކައެވެ. އެހެންނަމަވެސް، އޭނާގެ އަމަލުތަކުން ދޭހަވަނީ މުޅިން އެހެން ވާހަކައެކެވެ. ވަރިވުމުގެ ވާހަކަ ދައްކާނެ ފުރުސަތެއް އިބްރާހިމްފުޅު ޝަރީފާއަކަށް ނުދެއެވެ. ދެން އިތުރަށް ކެތެއް ނުވާނެއެވެ. މި ހާލުގައި އިތުރަށް ހުރެވޭކަށް ނެތެވެ. އިބްރާހިމްފުޅާއެކު ހޭދަކުރި އަހަރުތަކުގެ ހަނދާންތައް އޭނާގެ ހިތުގައި އަނެއްކާވެސް އާވިއެވެ. ނަމަވެސް، މިހާރު އެ ހަނދާންތަކަކީ މާޒީއަށް ދޫކޮއްލަން ބޭނުންވިއެވެ. ޝަރީފާ ފުން ނޭވާއަކާއެކު، ކޮޓަރިއަށް ވަންނަން ހިނގައިގަތެވެ. ކޮޓަރިއަށް ވަދެވެސް ޝަރީފާއަށް ވިސްނެނީ ކުރިމަތިވާން އުޅޭ ކަންތަކާއެވެ. ޝަރީފާ ބޭނުންވަނީ ކޮންމެފަދަ ކަނޑެއްގައި ފަތަން ޖެހުނަސް އެކަން ކުރާށެވެ. މިހެން ހުރެއްޖެނަމަ، އިބްރާހިމްފުޅަށް ހިތްހަމަޖެހުން ލިބިދާނެއެވެ. އެކަމަކު އޭނާގެ ހިތުގައި އޮތީ ފާއިޒެވެ. ފާއިޒާއެކު އަވަހަށް ކައިވެނިކޮށް، އާ ދިރިއުޅުމެއް ފެށުމަށް ޝަރީފާ ބޭނުންވެއެވެ. ގިނަ ވަގުތު ވިސްނުމަށްފަހު، ޝަރީފާ ނިންމީ އިބްރާހިމްފުޅާ ވާހަކަދައްކާ، މި ކަންކަން އަވަސްކުރުމަށް އެދުމަށެވެ. އަދި އިބްރާހިމްފުޅު ވަރިކޮށްނުދީފިނަމަ، އަމިއްލައަށް ކޯޓަށް ގޮސްގެންވެސް ވަރިވާން ޝަރީފާ ނިންމިއެވެ. ޝަރީފާގެ ޚިޔާލުތައް އޭނާ ވަށައިލިއެވެ. ދަރިފުޅު ޝީމާ އެއްބަހެވެ. ދެން ޝަރީފާ އެއްބަސް ކުރުވަންޖެހޭ މީހެއް ނުހުންނާނެއެވެ.
ޝަރީފާ އެވިސްނުންތަކާއި ދުރަށް ދާން މަސައްކަތްކުރަމުން ދިޔައެވެ. އިބްރާހިމްފުޅު ގެއަށް އައުމުން ނޫނީ އެވާހަކައެއް ނުދެއްކޭނެއެވެ. އިބްރާހިމްފުޅާ، ޝަރީފާ މިވާހަކަ އެތައް ފަހަރަކު ދައްކައިފިއެވެ. އެކަމަކު އެއްވެސް ކުރިއެރުމެއް ނުލިބުނެވެ. ޝަރީފާ ލޮލުގައި އަޅައިގަތީ ކޮޓަރީގައި ހުރި މޭޒު މަތީގައި އޮތް ފޮތެކެވެ. އެއީ އިބްރާހިމްފުޅު ހުސްވަގުތުގައި ކިޔަން ގެންގުޅޭ ފޮތްތަކުގެ ތެރެއިން ފޮތެކެވެ.
ޝަރީފާ ތެދުވެގެން ގޮސް އެފޮތް ނަގައި ހުޅުވައިލިއެވެ. އެއީ ދިވެހި ވާހަކަ ފޮތެކެވެ. ފުރަތަމަވެސް ޝަރީފާގެ ލޮލުގައި އަޅައިގަތީ އެފޮތުގެ ނަމެވެ. އެފޮތުގެ ނަމަކީ "ކަލާޔާނުލާ" އެވެ. ޝަރީފާ އެ ނަން ކިޔާލުމާއެކު، އޭނާގެ ހިތުގައި އަޖައިބުވުމެއް އުފެދުނެވެ.
ޝަރީފާ ފޮތް ހުޅުވާލައި، ފުރަތަމަ ޞަފްޙާ ކިޔަން ފެށިއެވެ. އޭނާގެ ހިތުގައި އުފެދުނު ސުވާލުތަކާއި ވިސްނުންތައް މަޑުމަޑުން ފިލަމުންދިޔައެވެ. އެ ވާހަކައިގެ ޖާދޫވެރި ބަސްތަކުގެ ތެރެއަށް ޝަރީފާ ވަދެގަންނަމުން ދިޔައެވެ. ޝަރީފާ އިތުރަށް އެވާހަކަ ކިޔަން ބޭނުންނުވެ ފޮތް ލެއްޕިއެވެ. އެވާހަކަ އަކީ ޝަރީފާގެ ހަޔާތާއި ވަރަށް ގުޅޭ ވާހަކައެކެވެ. އިތުރަށް އެވާހަކަ ކިޔައިގެން އިބްރާހިމްފުޅަށް ހަމްދަރުދީ ވެވޭކަށް ޝަރީފާ ބޭނުމެއް ނޫނެވެ. ފޮތް ލައްޕާލުމަށްފަހު ކޮޓަރީގައި ދެކޮޅަށް ހިނގާލަ ހިނގާލާ ހުއްޓެވެ. ޝަރީފާ ސިއްސައިގެން ދިޔައީ ކޮޓަރީގައި މީހަކު ޓަކި ޖެހިއަޑަށެވެ. އަވަސް އަވަހަށް ގޮސް ދޮރު ހުޅުވީ އިބްރާހިމްފުޅުކަމަށެވެ. ނަމަވެސް ކުރިމަތީގައި ހުރީ ޝީމާއެވެ. ޝީމާ ފެނުމުން ޝަރީފާގެ މޫނުމަތިން ކުލަބަދަލުވެގެން ދިޔައެވެ.
"ހާދަ އަވަހަކަށް މިއަދު ގެއަށް ތިއައީ" ޝީމާ ފެނުމުން ޝަރީފާ ސުވާލު ކޮއްލިއެވެ.
"އާނ. މީހާރު އަހަރެންނަކީ ބޮސް. އެހެންވީމާ ބޭނުން އިރަކު ގެއަށް އާދެވޭނެއެއްނު" ޝީމާ ސަމާސާ ރާގަކަށް ބުނެލިއެވެ.
ޝީމާ އޭނާގެ މަންމަގެ އަތުގައި ހިފައިގެން ކޮޓަރިން ބޭރަށް ނިކުތެވެ. ޝީމާގެ މޫނުމަތީގައި އުފަލުގެ ހިނިތުންވުމެއް ވާއިރު، އޭނާގެ ލޮލުން އުއްމީދުގެ އަލިކަމެއް ފެނެއެވެ.
= ނުނިމޭ =
