ހުކުރު ދުވަހުގެ އިރުއަރައިގެން އައީ ހިތާމަވެރި ޚަބަރަކުންނެވެ. އުމުރުން އެންމެ 23 އަހަރުގެ ހަސަން ސަމާހު ބީޗްހައުސް، ލ. އިސްދޫ އެ ނިޔާވީ، ބާރު ސްޕީޑުގައި ދުއްވި ކާރެއްގައި ޖެހިގެންނެވެ. ސަމާހު އަކީ މާފުށީ ޖަލުގައި ލާންސްކޯޕްރަލްގެ ވަޒީފާ އަދާކުރަމުން އައި ޒުވާނެކެވެ. ހުޅުމާލެ އައީ ރޭ ދަންވަރު ކުރިއަށްގެންދިޔަ މެރަތަންގައި ބައިވެރިވުމަށެވެ. ސަމާހުގެ ބޮލަށް އަދި މޫނަށް ލިބުނު އަނިޔާތަކުގައި ނިޔާވިއިރު ސަމާހު އަކީ ދުވުމަށް ޝައުގު ހުންނަ ޒުވާނެކެވެ.
ފުލުހުންގެ މީޑިއާ އޮފިޝަލު ވިދާޅުވީ ހުޅުމާލެ ސެންޓްރަލް ޕާކު ކައިރިން ބާރު ސްޕީޑުގައި ދުއްވާފައި ދިޔަ ކާރެއްގައި ސައިކަލެއް ޖެހި ރޭ ދަންވަރު 2:48 ގައި ހިގި އެކްސިޑެންޓްގައި ސައިކަލު ދުއްވި ސަމާހު ނިޔާވީ ހުޅުމާލެ ހޮސްޕިޓަލުގައި ފަރުވާދެމުން ދަނިކޮށް ކަމަށެވެ. އެކްސިޑެންޓް ހިގިއިރު ކާރު ދުއްވި 26 އަހަރުގެ ދިވެހި ފިރިހެންމީހާ ހައްޔަރުކޮށްފައިވާ ކަމަށްވެސް ފުލުހުންގެ އޮފިޝަލު ވަނީ ވިދާޅުވެފައެވެ. އަދި މިމައްސަލަ ތަހުގީގު ކުރަމުންދާއިރު ފުލުހުންގެ މުއައްސަސާއަށް ހުށަހެޅިފައި ވަނީ މިފަދަ ކިތައް މައްސަލަތޯއެވެ؟
އެކްސިޑެންޓްތައް ހިގުމަކީ މިމުޖުތަމައަށް މިހާރު އާންމުކަމަކަށް ވެއްޖެއެވެ. ކޮންމެ ދުވަހަކުވެސް މިފަދަ ތަފާތު އެކްސިޑެންޓްތައް ހިގާ ކުށެއް ނެތް މީހުންނަށް ގެއްލުންތައް ލިބެމުންދާއިރުވެސް ބާރު ސްޕީޑުގައި ދުއްވާ މީހުންގެ ދުވެލި މަޑެއް ނުވެއެވެ. ރޭސްކާރަކަށް ނުވަތަ ސްޕޯޓްސްކާރަކަށް އަދި ސައިކަލަކަށް އެރުމުން ހިތަށްއެރި ބާރުމިނުގައި ދުއްވާ މީހުން ގިނަވެއްޖެއެވެ.
ރާއްޖޭގައި މަގުމަތީގައި ހިގާ އެކްސިޑެންޓްތަކުގެ އަދަދު ދުވަހެއް ދުވަހަކަށް އިތުރުވަމުން އަންނައިރު 2017 އިން 2022 އަށް 40 ވަރަކަށް މީހުން މިފަދަ އެކްސިޑެންޓްތަކުގައި މަރުވެފައިވާކަން މީޑިއާ ރިޕޯޓްތަކުން އެނގެއެވެ. އެކްސިޑެންޓްތަކުގެ މައިގަނޑު ސަބަބަކީ ކަނޑައަޅައިފައިވާ ދުވެއްޔަށްވުރެ ބާރަށް ދުއްވުމެވެ. ދެއުޅަނދު ދެމެދުގައި އެކަށީގެންވާ ދުރުމިނެއް ނުބެހެއްޓުމާއި ގޯޅިތަކުން ނުކުންނައިރު ވިސްނާނުލައި މައިމަގަށް ނުކުތުމާއި ޓްރެފިކް ލައިޓަށް ނުބަލައި ދުއްވުން ހިމެނެއެވެ.
ސޯޝަލް މީޑިއާގައި ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. ސްޕޯޓްސްކާރު ނުވަތަ ރޭސްކާރު ވަކި ސަރަހައްދެއްގައި ނޫނީ ނުދުއްވޭ ގޮތް ހަދަން އެބަޖެހޭ ކަމަށް އެފަދަ ފަރާތްތަކުން ދަނީ ބުނަމުންނެވެ. އަދި އާންމުކޮށް މީހުން އުޅޭ ސަރަހައްދުތަކުގައި ވަކި މިންވަރަކަވުރެ ބާރަށް ދުއްވާ އުޅަނދުތައް ހިފަހައްޓައި ފިޔަވަޅު އަޅަންޖެހޭ ކަމަށް ދަނީ ބުނަމުންނެވެ.
ހުޅުމާލޭގެ މަގުތައް ވެފައިވަނީ އިންތިހާއަށް ބާރަށް އުޅަނދުތައް ދުއްވާ ތަނަކަށެވެ. ބައެއްފަހަރަށް ގައިން ހީބިހިނަގައި ސިއްސައިގެން ގޮސް ބަލާލެވެނީ ކައިރިން ރޫސްލާފައި ބާރަށް ދުއްވާ ސައިކަލު ނުވަތަ ކާރެއްގެ ސަބަބުންނެވެ. މިފަދަ ވެހިކަލްތަކުގައި ޖެހި އެކްސިޑެންޓްވެ މުޅި އުމުރަށް ނުކުޅެދޭ މީހުންނަށްވެ އެކަމުގެ ހިތާމައިގައި އުޅޭ އެތައް އާއިލާއެއް އެބައުޅެއެވެ. އެކަމަކު އެދެވޭ ހައްލެއް މިއަދާއި ހަމައަށް ނުލިބުމަކީ ދެރަކަމެކެވެ. ބާރު ސްޕީޑުގައި ދުއްވާ ވެހިކަލްތައް ހުއްޓުވާ އަވަސް ފިޔަވަޅެއް އަޅަންޖެހެއެވެ. މަގުމައްޗަކީ އެންމެންނަށް ރައްކާތެރި ތަނަކަށް ހަދަންޖެހެއެވެ.
މިފަދަ އެކްސިޑެންޓްތަކުގައި ނިޔާވި މީހުންނަށް ސުވަރުގޭގެ މަތިވެރި ނިޢުމަތް މިންވަރު ކުރައްވާށި! އަދި އަނިޔާލިބި ފަރުވާ ހޯދަމުންދާ މީހުންނަށް އަވަސް ޝިފާއެއް މިންވަރު ކުރައްވާށި! އާމީން
