ދިވެހިރާއްޖެއަކީ ފަތުރުވެރިކަމުގައި ނަމޫނާ މަންޒިލެކެވެ. ރާއްޖޭގެ ފަތުރުވެރިކަން އެހެން މާކެޓްތަކާއި ތަފާތުވާ އެންމެ ބޮޑު އެއް ސަބަބަކީ ރާއްޖޭގައި އޮންނަ ވަން އައިލެންޑް ވަން ރިސޯޓް ކޮންސެޕްޓެވެ.
ހަމަހިމޭން މާހައުލެއްގައި ގުދުރަތީ އަޖައިބުން ފުރިގެންވާ ފަރުތަކާއި މޫދާއި ހުދުހުދު ހިމުން ދޮންވެލިން އަޖައިބެއްފަދަ ރީތިކަން ގެނެސްދޭ ގޮނޑުދޮށްތަކުން އުފާ ހޯދަށް ދުނިޔޭގެ އެތަންމިތަނުން މީހުން ރާއްޖެ އަންނަނީ އެތައް ބައިވަރު ފައިސާއެއް ހޭދަކުރުމަށްފަހުއެވެ. ރާއްޖެއަކީ ފަތުރުވެރިކަމުގެ އެންމެ މަގްބޫލު މަންޒިލަށްވާ ސަބަބަކީ މިއީ ކަމަށް ވެދާނެއެވެ.
ދުނިޔެމަތީގެ ސުވަރުގެ ފަދައިން ބޭރު މީހުން ދެކޭ ރާއްޖޭގެ ގުދުރަތީ ރީތިކަން ދެކިލާ ހިތްއުފާކޮށްލާ އުދުހިފައި ދުރު ކަރަކަރައިންނާއި އަވަށްޓެރި ގައުމުތަކުން ފަތުރުވެރިން އަންނަ އަނެއް ސަބަބަކީ ރާއްޖޭގެ މެހެންމާދާރީއެވެ. ފަތުރުވެރިންނަށްދޭ ދެވަނައެއް ނެތްފަދަ ހިތްހެޔޮ މެހެންމާންދާރީ އާއި ރަށްފުށުގެ ސާފު ސާދާ އިސްލާމީ ދިރިއުޅުމުން އެވެރިން ތިބެނީ ހައިރާންވެފައެވެ.
ދިވެހިންގެ މުރާލި މަސައްކަތްތެރި އުފެއްދުންތެރިކަމާއި، ރަށްފުށުގެ ދިރިއުޅުން ދެކިލުމަށްވެސް ފަތުރުވެރިން ރާއްޖެއަށް ޒިޔާރަތް ކުރެއެވެ. ގުދުރަތީ ރީތި ކުޅިތަކާއި ތުނޑިތައް ދެކިލުމަށްވެސް ރަށްރަށުގެ ގެސްޓުހައުސްތަކުގެ ހިދުމަތް ހޯދާ ފަތުރުވެރިންވެސް މަދެއް ނޫނެވެ.
މީގެ އިތުރުން ރާއްޖޭގެ މޫދު ކުޅިވަރުތަކަކީވެސް ފަތުރުވެރިންގެ މެދުގައި މަގްބޫލު ކަމެކެވެ. ސްޕޯޓްސް ޓޫރިޒަމް ކުރިއެރުވުމަށް ސަރުކާރުންވެސް ހާއްސަ ސަމާލުކަމެއް ދޭ އިރު ރާއްޖޭގައި ވޯޓަރ ސްޕޯޓްސްއަކީ ފަތުރުވެރިންނާއި ރަހުމަތްތެރި ރައްކާތެރި ސްޕޯޓަކަށް ހެދުމަށް ހުރިހާ ރިސޯޓެއްގައިވެސް ވަރަށް ބޮޑަށް މަސައްކަތް ކުރެއެވެ.
ޕޯޗުގަލްގައި 24 ނޮވެމްބަރު 2024 ގައި ބޭއްވި ވޯލްޑް ޓްރެވެލް އެވޯޑްސް ގްރޭންޑް ފައިނަލް ގާލާ ސެރެމަނީގައި، ވޯލްޑްސް ލީޑިން ޑެސްޓިނޭޝަން އެވޯޑް ޖެހިޖެހިގެން 5 ވަނަ ފަހަރަށް ދިފާއުކޮށް މި އެވޯޑް މިއަހަރުވެސް ދިވެހިރާއްޖޭން އުފުލާލީ ފަހުރުވެރިކަމާއެކުގައެވެ. މީގެ އިތުރުން ރާއްޖޭން ވަނީ ފުރަތަމަ ފަހަރަށް ވޯލްޑްސް ލީޑިން ގްރީން ޑެސްޓިނޭޝަންގެ އެވޯޑްވެސް ހޯދާފައެވެ.
އަދި މިއަހަރުގެ ކުރީކޮޅު ދުބާއީގައި ބޭއްވި އަރަބިއަން ޓްރެވެލް މާކެޓް، އޭޓީއެމް 2024 ގައި ރާއްޖެއިން ވަނީ އިންޑިއާ ކަނޑުގެ އެންމެ މަގްބޫލު މަންޒިލުގެ އެވޯޑްވެސް މިއަހަރު ހޯދާފައިވެއެވެ. އަދި އިންޑިއާ ކަނޑުގެ އެންމެ މަގްބޫލު ހަނީމޫން ޑެސްޓިނޭޝަން އެވޯޑާއި، އިންޑިއާ ކަނޑުގެ ލީޑިން ގްރީން ޑެސްޓިނޭޝަން އެވޯޑާއި، އިންޑިއާކަނޑުގެ ލިޑީން ޑައިވް ޑެސްޓިނޭޝަންގެ އެވޯޑްވެސް މިއަހަރު ރާއްޖެއިން ހޯދިއެވެ.
ރާއްޖެއަށް ޖެހިޖެހިގެން ފަސް ވަނަ އަހަރު ވޯލްޑްސް ލީޑިން ޑެސްޓިނޭޝަންގެ އެވޯޑް ލިބުމާއި ގުޅިގެން ފަތުރުވެރިކަމާއި ބެހޭ ވަޒީރު އިބްރާހިމް ފައިސަލް ވިދާޅުވީ، މިއީ ފަތުރުވެރިކަމުގެ ސިނާއަތުގައި މަސައްކަތްކުރައްވާ ހުރިހާ ސްޓޭކްހޯލްޑަރުންގެ މަސައްކަތުގެ ނަތީޖާ ކަމަށެވެ. ހެލިކޮޕްޓަރުން ފެށިގެން ޑައިވް އޮޕަރޭޓަރުންނާއި، އެއާލައިންތަކާއި، ޓްރެވެލް އެޖެންސީތަކާއި، ހޮސްޕިޓަލިޓީ ސްޓާފުންނާއި، ޓުއާ ގައިޑުންނާއި ލޯކަލް ކޮމިއުނިޓީގެ ދައުރު، މި އެވޯޑް ރާއްޖެއަށް ހޯދައިދިނުމުގައި އެބައޮތް ކަމަށް ވަޒީރު ފައިސަލް ވިދާޅުވިއެވެ.
ރާއްޖޭގެ އިގްތިސާދުގެ މައިބަދަކަމުގައިވާ ފަތުރުވެރިކަން ކުރިއެރުވުމަށް ރައީސް ޑރ. މުހައްމަދު މުއިއްޒު އިސްކަންދޭ މިންވަރަށް ރާއްޖެ އަށް ޒިޔާރަތް ކުރާ ފަތުރުވެރިންގެ އަދަދު އިތުރު ކުރުމަށް ދާއިރާގައި މަސައްކަތް ކުރާ ހުރިހާ ފަރާތްތަކުން އަންނަނީ ބުރަ މަސައްކަތްތަކެއް ކުރަމުންނެވެ. އޭގެ ތެރޭގައި ރާއްޖޭގެ ޕީއާރް ކުންފުނި، މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރްސީ) އާއި މަޓާޓޯ ފަދަ ތަންތަނުންވެސް ބުރަ މަސައްކަތްތަކެއް ކުރެއެވެ.
ބައިނަލްއަގްވާމީ މާކެޓްގައި ރާއްޖެ އިޝްތިހާރު ކުރާނެ އާ ގޮތްތައް ހޯދާ، ސްޕޯޓްސް ޓޫރިޒަމާއި، އެޑިއުކޭޝަން އަދި ހެލްތް ޓޫރިޒަމް ފަދަ ކަންކަން ރާއްޖޭގައި އިތުރުކުމަށްވެސް ކަމާގުޅޭ އިދާރާތަކާއި ސަރުކާރުން ވަނީ އަމާޒު ހިފާފައެވެ.
