ޅ. ހިންނަވަރަށް އުފަން އުމުރުން 43 އަހަރުގެ ސިމާނާ މުހައްމަދަކީ 6 ކުދިންގެ މަންމައެކެވެ. ފިރިމީހާއާއެކު ރަށުގައި ދިރިއުޅޭ ސިމާނާގެ ވައަތު ލޮލަށް އެންމެ ފުރަތަމަ ނުފެންނަން ފެށީ 2015 ވަނަ އަހަރުގައެވެ. ސިމާނާ ވަނީ އޭނާގެ ބަލިހާލަތު ވަރަށް ތަފްސީލްކޮށް 'ޒީޓައިމްސް' އާއި ހިއްސާކޮށްފައެވެ.
" ކުޑަކުޑަކޮށް ފެނުން ދަމުންދަމުން ގޮއްސަ ވަރަށް ކުޑަކޮށް އެލޮލަށް ފެންނަނީ. ޑޮކްޓަރަށް ދެއްކިއިރު ލޮލުގެ މައްސަލައެއް ނެތް. ދެން ޑޮކްޓަރުގެ ލަފާގެ މަތިން ބޮލުގަ މައްސަލައެއް އުޅޭތޯ ބަލަން ސީޓީސްކޭން ހެދީ. ސިކުނޑީގައި ޓިއުމަރެއް ހުރިކަން އެނގިގެން އެމްއާރުއައި ހެއްދީ. ރާއްޖެއިން ބުނީ ފަޅައިގެން އޮޕަރޭޝަން ކުރަން. ދެން ނުފަޅާ ކުރެވޭތީ ދިޔައީ އިންޑިއާއަށް. ފުރަތަމަފަހަރު ނުފަޅާ އޮޕަރޭޝަން ކޮށްފަ ޓިއުމަރު ނެގީ".
ސިމާނާގެ ވައަތުލޮލުގެ ފެނުން އެކީގައި ދިޔައީ 2021 ވަނަ އަހަރުގައެވެ. އޭގެ ފަހުން މިއަދާއި ހަމައަށްވެސް އެ ލޮލަކަށް ނުފެނެއެވެ. މިހާލަތުގައި ދިރިއުޅެމުން ދަނިކޮށް 2023 ވަނަ އަހަރު ދެވަނަ ލޮލުގެ ފެނުމަށްވެސް އަސަރު ކުރަން ފެށިއެވެ.
" ކަނައަތު ލޮލުގެ ފެނުން ދާން ފެށީމަ ޓެސްޓްތައް ހެދުމަށްފަހު ބުނީ އަނެއްކާވެސް ބޮލުގައި ޓިއުމަރެއް އިންކަމަށް. އެމަޖެންސީކޮށް ބޭރަށް ފޮނުވީވެސް ރާއްޖޭގެ ހޮސްޕިޓަލުން. އިންޑިއާގައި އެފަހަރުވެސް ދޮޅުމަސްދުވަހު މަޑުކުރަންޖެހުނު ފަރުވާއަށް. ފަޅައިގެން ބޮޑު އޮޕަރޭޝަނެއްކޮށް ޓިއުމަރު ނެގުމަށްފަހު 6 މަސްފަހުން ދައްކަން ދާން ބުނެފައޮތީ. އެއިރުވެސް ވައަތު ލޮލަށް ނުފެނޭ. ކަނައަތު ލޮލަށް ފެންނަނީ ވަރަށް ކުޑަ ތަންކޮޅަކުން. އެކަމަކު ކަނައަތު ލޮލުން އެއިރު ލިޔެފަ ހުންނަ އެއްޗެހި ކިޔަން އެނގޭ. އެކަމަކު ސައިޑަކުން ފެންނާތީ ވަރަށް އުދަގޫވި. މިދިޔަ އަހަރު އޮގަސްޓްގައި ބުނި 1 އަހަރު ކޮށްފަ އަލުން ފަރުވާއަށް ދާން. ބޭސްވެސް ހުއްޓަން ޖެހޭނީ އެކޮޅުގައި ހުރެގެންކަމަށް ބުނީ. އެކަމަކު އަޅުގަނޑުމެންގެ ހާލަތު ހުރިގޮތުން އިންޑިއާއަށް ދެވޭގޮތް ނުވީ".
ސިމާނާއަށް ބުނި ދުވަހަށް އިތުރު ފަރުވާއަށް އިންޑިއާއަށް ނުދެވި އުޅެނިކޮށް ކަނާއަތު ލޮލުގެ ތަންތަންކޮޅު ހުދުވާންފެށިއެވެ. ކިރިޔާވެސް ފެންނަނީ އަވިއަރައިގެން އަންނައިރު އެހުންނަ އަލިކަމުގެ ތެރެއިންނެވެ.
" އެކަނި އުޅެން އުދަގޫވަރަށް ކަނާއަތު ލޮލުގެ ފެނުންވެސް ގޯސްވި. އެކަމަކު މާލެއައިސްގެން އުޅޭ އިންޑިއާގެ ލޮލުގެ ޑޮކްޓަރުންގެ ޓީމަކަށް ދައްކައިގެން ދިން ބޭހުން ގޭތެރޭގައި އަމިއްލައަށް އުޅެލެވޭވަރުވޭ. އެކަމަކު ބޭރުތެރޭގައި އުޅެން އުދަގޫ ރަނގަޅަށް ނުފެންނާތީ. ކިޔަންވެސް ނޭނގޭ ވަރަށް ފެނުން ގެއްލިއްޖެ". ހިތްދަތިކަމާއެކު ސިމާނާ ކިޔައިދިނެވެ.
ސިމާނާގެ މިވަނީ 3 ވަނަ ފަހަރަށް ޓިއުމަރު އުފެދިފައެވެ. ޑޮކްޓަރުން ލަފާ ދީފައިވަނީ ވީއެންމެ އަވަހަކަށް އޮޕަރޭޝަން ކުރުމަށެވެ.
" ސިކުނޑީގައި ޓިއުމަރު ކޮންމެ ފަހަރަކު އުފެދެނީ ލޮލުގެ ނާރާއި ގުޅިފައި ހުންނަ ހިސާބުގައި. ވައަތު ލޮލަށް ފެންނާނެ ދުވަހެއްވެސް ނޭނގޭ. އަދި ކަނާއަތު ލޯ ވެސް އެކީގައި ރަނގަޅު ވާނެ ދުވަހެއް ނޭނގޭ. ޑޮކްޓަރުން ބުނަނީ ނާރުތައް ރަނގަޅުވާން ދުވަސް ހޭދަވާނެކަމަށް. މި ހަފްތާގެ ބުދަދުވަހު އިންޑިއާގެ ޓްރިވެންޑްރަމް އަށް ދާން މިމަސައްކަތްކުރަނީ އާސަންދައިގެ އެހީގައި އިތުރު ފަރުވާއަށް. އިންޑިއާގައި ގިނަދުވަހު މަޑުކުރަންޖެހޭތީ ހުރުމާއި އިތުރު ޚަރަދުތަކަށް ބޮޑު ހޭދައެއް ދާނެތީ އަޅުގަނޑުގެ ވަރަށް ބޮޑު އެދުމެއް ބޭސްފަރުވާ ފުރިހަމަކުރުމަށް އެހީތެރިކަން ފޯރުކޮށްދިނުން".
4 އަހަރާއި 17 އަހަރާއި ދެމެދުގެ 6 ކުދިން ސިމާނާގެ ދެމަފިރިންގެ ތިބިއިރު މި ދެމަފިރިންނަށް އެންމެ ފުރަތަމަ ލިބުނު އެއްމާބަނޑު ދެކުދިން ވަނީ ވިހޭތާ 3 ދުވަސްތެރޭ ނިޔާވެފައެވެ. އޭޑީއެޗްޑީ ހުންނަ ދެކުދިން ތިބިއިރު މީގެތެރެއިން އެއްކުއްޖަކީ ވާހަކަދައްކަން އުދަގޫ ކުއްޖެކެވެ.
ސިމާނާގެ ފިރިމީހާ އަށް ވެސް ވަނީ 2021 ވަނަ އަހަރު ސްޓްރޯކެއް ޖެހިފައެވެ. އާއިލާގައި އާމްދަނީ ލިބޭ ހަމައެކަނި މީހަކީ އެއީއެވެ. އެކަމަކު ބަލިހާލަތު ހުރި ގޮތުން ބައެއްފަހަރު މަސައްކަތް ނުކުރެވޭއިރު ހާލުރަނގަޅަށް ހުންނަ ދުވަސްތަކުގައި މަސްވެރިކަންކޮށް އާމްދަނީ ހޯދައެވެ.
ސިމާނާގެ ބޭސްފަރުވާ ފުރިހަމަ ކުރުމަށް އެހީތެރިކަން ފޯރުކޮށްދިނުމަށް އިތުރު މައުލޫމާތު ސާފުކުރުމަށް ގުޅާނީ 7614759 އަށެވެ.
ސިމާނާ މުހައްމަދުގެ ދިވެހި ރުފިޔާ އެކައުންޓް ނަންބަރު: 7730000583370
ޒީޓައިމްސް އިން އެދެނީ ސިމާނާ އަށް އަވަސް ޝިފާއެއް މިންވަރު ކުރެއްވުމެވެ. އާމީން!
ނޯޓް: މިއީ ޒީޓައިމްސް އިން ގެނެސްދޭ މިފަދަ އެހީގެ 43 ވަނަ ރިޕޯޓެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވާނީ ބަލިމީހާގެ އެކައުންޓަށެވެ. ބަލިމީހާއަށް އެހީތެރިކަން ލިބި ފަރުވާ ފުރިހަމަވުމަކީ ޒީޓައިމްސްގެ ޓީމަށް އަދި އެ އާއިލާތަކަށްވެސް ލިބޭ އެންމެ ބޮޑު ހިތްހަމަޖެހުމެވެ. ޝުކުރިއްޔާ!