ދިވެހިރާއްޖޭގައި ވިސާ ނެތި މީގެ 12 އަހަރު ކުރިން ފެށިގެން ދިރިއުޅެމުން އަންނަ ފްރާންސްގެ އާއިލާ ރާއްޖެއިން ފުރުވާލުމަށް ނިންމާފައިވާ ކަމަށް މޯލްޑިވްސް އިމިގްރޭޝަނުން އާންމުކުރުމާއި ގުޅިގެން އެކަމުގައި އާންމުންގެ މެދުގައި ޚިޔާލު ތަފާތުވެ ސޯޝަލް މީޑިއާގައި ދަނީ ޝުޢޫރު ފާޅުކުރަމުންނެވެ.

އިމިގްރޭޝަނުން ބުނީ ކީކޭ؟

ޓޫރިސްޓް ވިސާގައި ރާއްޖެއައިސް ވިސާގެ މުއްދަތު ހަމަވުމަށްފަހު މިއަދާއި ހަމައަށް އެމީހުން ރާއްޖޭގައި އެއުޅެމުން ދަނީ ޤާނޫނާއި ޚިލާފަށެވެ. "ދިވެހިރާއްޖޭގެ އިމިގްރޭޝަންގެ ޤާނޫނާއި ޚިލާފަށް ފްރާންސަށް ނިސްބަތްވާ 6 މީހުންގެ ޢާއިލާއެއް ރާއްޖޭގައި ދިރިއުޅެމުންދާ ކަމުގެ މައުލޫމާތު 'އިމިގްރޭޝަން ވޮޗް' އަށް 18 ޖުލައި 2024 ވަނަ ދުވަހު ލިބުމާއި ގުޅިގެން، އެ މައްސަލަ މި އިދާރާއިން ބެލުމަށްފަހު 2024 އޮކްޓޫބަރު 23 ވަނަ ދުވަހު އެ މައްސަލާގައި ހިމެނޭ އިސްފަރާތް މި އިދާރާއަށް ވަނީ ހާޒިރު ކުރެވިފަ. އަދި އެ ފަރާތްތަކުގެ ޕާސްޕޯޓުގެ މުއްދަތު ހަމަވެފައިވާތީ، މި ޢާއިލާ ރާއްޖެއިން ފުރުވާލުމަށް ބޭނުންވާ ޓްރެވަލް ޑޮކިއުމަންޓު ހޯދުމުގެ މަސައްކަތް މިނިސްޓްރީ އޮފް ފޮރިން އެފެއަރޒާއި ގުޅިގެން މި އިދާރާއިން ކުރަމުންދާ ކަމުގައި ދަންނަވަން. މި ފަރާތްތަކުގެ ޓްރެވަލް ޑޮކިއުމަންޓް ލިބުނުހާ އަވަހަކަށް ފުރުވާލުމަށް ވަނީ ހަމަޖެހިފަ. އިމިގްރޭޝަން ޤާނޫނާއި ޚިލާފަށް ދިވެހިރާއްޖޭގައި އުޅުމަށް އެއްވެސް ފަރާތަކަށް ފުރުސަތެއް ނުދެވޭނެ". އިމިގްރޭޝަން ކޮންޓްރޯލަރ މުހައްމަދު ޝަމްއާން ވަހީދު އިއްޔެ ވިދާޅުވެފައިވެއެވެ.

Advertisement

ތ. ވޭމަންޑޫގައި މިވަގުތު ދިރިއުޅެމުން އަންނަ ފްރާންސްގެ މި އާއިލާގައި ހިމެނެނީ ދެމަފިރިންނާއި އެމީހުންގެ 5 ދަރިންނެވެ. މީގެތެރެއިން 2 ކުދިން ވިހާފައިވަނީ ރާއްޖެއަށް ދިރިއުޅުން ބަދަލުކުރި ފަހުންނެވެ.

ފްރާންސްގެ މި އާއިލާ އިސްލާމްވުމަށްފަހު އަމިއްލަ ޤައުމުގައި އުޅެން ދަތިތަކެއް ހުރިކަމަށް ބުނެ ފުރަތަމަ ދިޔައީ އިނގިރޭސިވިލާތަށް ކަމަށް ވަނީ މައުލޫމާތު ލިބިފައެވެ. އެއަށްފަހު ރާއްޖެ އައިސް ގދ. އަތޮޅާއި ލާމު އަތޮޅުގެ ރަށެއްގައި ދިރިއުޅުމަށްފަހު ތ. އަތޮޅު ތިމަރަފުށީގައި އުޅުމަށްފަހު އެއަތޮޅު ވޭމަންޑޫއަށް ދިރިއުޅުން ބަދަލުކުރީކަމަށް ވެއެވެ. ވިސާ ނެތުމުން ކުދިން ސްކޫލަށްވެސް ނުފޮނުވައި ކިޔަވައިދެނީ ގޭގައެވެ. އަސާސީ ހައްޤުތަކުން ވަނީ މަހްރޫމްވެފައެވެ.

ތ. ވޭމަންޑޫ ކައުންސިލް ރައީސް ރަޝްވާން އާދަމް 'ޒީޓައިމްސް' އަށް މައުލޫމާތު ދެމުން މިއަދު ވިދާޅުވީ އެ ރަށުގައި މި އާއިލާ އުޅޭތާ 6 އަހަރު ވެއްޖެކަމަށެވެ. 18 އަހަރު ނުފުރޭ 3 ފިރިހެން ކުދިންނާއި 2 އަންހެން ކުދިން ގޮވައިގެން އުޅެމުންދަނީ މަސްވެރިކަން ކޮށްގެންނެވެ. ދިވެހިންގެ ސަގާފަތާއި ބީރައްޓެހި އެއްވެސް ކަމެއް މިހާތަނަށް ފާހަގަ ނުކުރެވޭކަމަށް ރަޝްވާން ވަނީ ވިދާޅުވެފައެވެ.

" އަސާސީ ޚިދުމަތްތަކުން މިކުދިން މަހްރޫމުވެފައިވުން މިއީ އެންމެ ބޮޑު ކަންބޮޑުވުން. ސައްހަ ލިޔެކިޔުމެއް ނެތުމުން ސިއްހީ ޚިދުމަތް އަދި ތަޢުލީމް ލިބުމަށް ދަތިތައް އެބަހުރި. މުޅި އާއިލާވެސް ވާހަކަދައްކަނީވެސް ދިވެހިބަހުން. މޫނުބުރުގާ އަޅައިގެން ހުންނަ އެކުދިންގެ މަންމަ އާމްދަނީ ހޯދުމަށް ރަށުތެރޭގައި މަސައްކަތެއް ކުރާކަމެއް ނޭނގޭ. ފިރިހެންމީހާ ކަނޑުމަހުގެ މަސްވެރިކަމާއި ފާނަމަސްވެރިކަން ފަދަ މަސައްކަތްތައް ކުރޭ އާމްދަނީ ހޯދަން". ވޭމަންޑޫ ކައުންސިލްގެ ރައީސް ވިދާޅުވިއެވެ.

ރަށުތެރޭގަ ކުދިން އުޅޭއިރު ފެންނަ ކަމަށާއި، މިސްކިތަށް ނަމާދަށް ދާތަންވެސް ފެންނަކަމަށް ރަޝްވާން ވިދާޅުވިއެވެ. ކަމާގުޅުންހުރި މުއައްސަސާތަކުގެ ސަމާލުކަމަށް މި އާއިލާގެ ވާހަކަ ގެންދިއުމަށް ކުރެވުނު މަސައްކަތެއް މިހާތަނަށް ކުރިކަމަށާއި އެކަމަކު ސައްޚަ ލިޔެކިޔުން ހޯދުމަށް އެދެވޭ ހައްލެއް ނުލިބި ދުވަސްތައް ހޭދަވީކަމަށް ކައުންސިލް ރައީސް ވަނީ ވިދާޅުވެފައެވެ.

ފްރާންސްގެ އާއިލާ ފޮނުވާލުމަށް ބައެއް އާންމުން ދެކޮޅު

ފްރާންސްގެ މިއާއިލާ ރާއްޖޭގައި ދިރިއުޅެމުންދާތާ 12 އަހަރުވެފައިވާއިރު އަދި މިއީ މުސްލިމް އާއިލާއަކަށްވާއިރު އެއްވެސް ކުށެއްގެ ތުހުމަތު ނުކުރެވެނީސް ނުގަބޫލުގައި ފުރުވާލުމަކީ އެހާ ރަނގަޅު ކަމެއް ނޫންކަމަށް ބުނެ ސޯޝަލް މީޑިއާގައި ބައެއް ފަރާތްތަކުން ދަނީ އަޑު އުފުލަމުންނެވެ.

އައްޝައިޚް އާދަމް ނިޝާން ބިން އަލީ އާދަމް ފޭސްބުކްގައި ހާމަކުރައްވައިފައިވެއެވެ. އިސްލާމްދީން ޤަބޫލުކޮށްގެން އަންނަ މުސްލިމުން ކާފަރުންނާއި ހަވާލުކުރުމަކީ ކަނޑައެޅިގެން ނަހީ ކުރައްވާފައިވާ "ޚަރާމް ކަމެއްކަން" އެއްވެސް ޝައްކެއްނެތި ކީރިތި ޤުރުއާނުގެ ނައްޞުންނާއި ސައްހަ ހަދީޘުން އެނގި ކަށަވަރުވެއެވެ. ﷲ ގެ ވަހީ ބަސްފުޅާއި ކީރިތި ނަބިއްޔާގެ ސައްހަ ހަދީޘް ބަސްފުޅުގެ މައްޗަށް އިސްކުރެވޭނެ އެއްވެސް ޤާނޫނެއް ނޯންނާނެއެވެ.

ފްރާންސްގެ އާއިލާ ރާއްޖޭގައި ދިރިއުޅެން ބޭނުންވާނަމަ އެމީހުންގެ ނުގަބޫލުގައި ނުފޮނުވުމަށް އެދި ގޮވާލާ މީހުން ދަނީ ގިނަވަމުންނެވެ. މިގޮތުން އެނބުރި އެމީހުންގެ ޤައުމަށް ދިއުމުން ނުރައްކަލެއް ކުރިމަތިވެއްޖެނަމަ އެއީ އެއާއިލާއަށް ލިބޭނެ ވަރަށް ބޮޑު ދެރައެއްކަމަށް އެފަރާތްތަކުން ދަނީ ބުނަމުންނެވެ. އަދި ޤާނޫނާއި ޚިލާފަށް އެމީހުން ދިރިއުޅެމުންދަނީ ސައްހަ ލިޔެކިޔުން ނެތުމުން ކަމަށްވާއިރު ސައްހަ ލިޔެކިޔުން ހޯދުމަށްފަހު ޤާނޫނީ އިމުގެ ތެރެއިން ރާއްޖޭގައި ދިރިއުޅުމުގެ ފުރުސަތު ދިނުމަށް މިފަދަ ފަރާތްތަކުން ސޯޝަލް މީޑިއާގައި ދަނީ ގޮވާލަމުންނެވެ.

އިމިގްރޭޝަންގެ ޤާނޫނުގައި ބުނަނީ ކީކޭ؟

ބިދޭސީން ރާއްޖޭގައި ހުރުމުގެ ހުއްދަ އިމިގްރޭޝަން ޤާނޫނުގެ ދަށުން ދެވޭނެ ގޮތްތަކެއް ވެއެވެ. މިގޮތުން މީޓިންގ ވިސާ، ކޯޕަރޭޓް ވިސާ، ވާރކް ވިސާ އަދި ރެސިޑެންޓް ވިސާގައި ރާއްޖޭގައި ހުރެވިދާނެއެވެ. އަދި މިފަދަ ހާލަތްތަކުގައިވެސް ވަކި މުއްދަތަކުން ވިސާ އައުކުރަމުން ގެންދަންޖެހޭނެއެވެ.

ބިޒްނަސް ވިސާ:

ބިޒްނަސް ވިސާއަކީ ރަޖިސްޓްރަރ އޮފް ބިޒްނަސް ކަނޑައަޅާ ގޮތެއްގެމަތިން ރަޖިސްޓްރަރ އޮފް ބިޒްނަސް ޤަބޫލުކުރާ ވިޔަފާރިއެއް ނުވަތަ މަސައްކަތެއް ކުރުމަށްޓަކައި އަދި ރާއްޖޭގައި ވަޒީފާ އަދާކުރާ މީހެއްގެ ގޮތުގައި ނޫން ގޮތަކަށް އަންނަ ބިދޭސީއަކަށް ވަކި މުއްދަތަކަށް ރާއްޖޭގައި ހުރުމަށް ދެވޭ ހުއްދައެކެވެ.

ވާރކް ވިސާ:

ވާރކް ވިސާއަކީ ވަޒީފާއާއި ބެހޭ ޤާނޫނުގެ ދަށުން ރާއްޖޭގައި ވަޒީފާ އަދާކުރުމަށް އަންނަ ބިދޭސީއަކަށް އޭނާ ރާއްޖޭގައި މަސައްކަތްކުރުމަށް ދޫކޮށްފައިވާ ހުއްދަ ކަމުގައިވާ ވާރކް ޕާމިޓަށް ބިނާކޮށް ވާރކް ޕާމިޓްގެ މުއްދަތުގައި ރާއްޖޭގައި ހުރުމަށް ދެވޭ ހުއްދައެކެވެ.

ރެސިޑެންޓް ވިސާ:

• ޤާނޫނާ އެއްގޮތްވާ ގޮތުގެ މަތިން ދިވެއްސަކާ ކައިވެނިކޮށްގެން އުޅޭ ބިދޭސީންގެ ތެރެއިން ކައިވެނީގެ މުއްދަތުގައި ރާއްޖޭގައި ހުރުމަށް އެދޭ ބިދޭސީންނަށް ދެވޭ ހުއްދަ
• ދިވެއްސަކާއި ކައިވެނިކޮށްގެން ދަރިއެއް ލިބިފައިވާ ބިދޭސީންގެ ތެރެއިން ވަރިވެފައިވާ ހާލަތުގައި ނުވަތަ އޭނާ ކައިވެނިކޮށްގެން އުޅުނު މީހާ މަރުވެފައިވާ ހާލަތުގައި އޭނާގެ ދަރިންނާއެކު ރާއްޖޭގައި ހުރުމަށް އެދޭ ބިދޭސީންނަށް ދެވޭ ހުއްދަ

ފްރާންސްގެ އާއިލާ ތަފާތު ހާލަތެއް:

ސައްޚަ ލިޔެކިޔުންނެތި ރާއްޖޭގައި 12 އަހަރު އުޅުނުއިރު އެއްވެސް ސަރުކާރަކުން އެކަމަށް ފިޔަވަޅެއް އަޅާފައި ނުވުން މިއީ ގުޅުންހުރި މުއައްސަސާތަކުގެވެސް އިހުމާލެކެވެ. ރާއްޖޭގެ ފަސްގަނޑުގައި ލިޔެކިޔުން ނެތި ޤާނޫނާއިޚިލާފަށް އެތައް އަހަރެއް އުޅެވުން މިއީ ކުޑަކަމެއް ނޫނެވެ. މިއީ ވަރަށް ވިސްނަންޖެހޭ ކަމެކެވެ. ބިދޭސީ އެއް އާއިލާއަށް މިގޮތަށް ރާއްޖޭގައި ދިރިއުޅެން ހުއްދަ ދީފިނަމަ ކުރިއަށްއޮތްތާގައި އިތުރު ބިދޭސީ އާއިލާތައްވެސް ދިވެހި ފަސްގަނޑުގައި އުޅެން ބޭނުންވެދާނެއެވެ. ފްރާންސްގެ އާއިލާ އަށް ޤާނޫނީ އިމުގެތެރެއިން އިންސާފުވެރި ނިންމުމެއް ނިންމުމަކީ ގިނަބައެއްގެ އެދުމެކެވެ.