ދިވެހިރާއްޖެއަކީ ނިސްބަތުން އާބާދީ މަދު ކުޑަ ޤައުމެކެވެ. އެކަމަކު ކޮރަޕްޝަނާއި ވައްކަން އިންތިހާއަށް އޮތް ޤައުމެކޭ ބުނެވިދާނެއެވެ. ވަކި ސަރުކާރެއް ނެތެވެ. ކޮންމެ ސަރުކާރެއްގައިވެސް މިފަދަ ތަފާތު ތުހުމަތުތައް ކުރެވިފައިވާ އާރާއި ބާރުގައި ބޮޑެތި މަޤާމުތަކުގައި އުޅުނު އެތައްބަޔަކު އެބަތިއްބެވެ. މަދުން ނޫނީ ފިޔަވަޅު އެޅިފައެއް ނެތެވެ. ވާނީވެސް އެހެންތާއެވެ. ގިނަފަހަރަށް މިފަދަ ބޮޑެތި ކޮރަޕްޝަންތައް ހިންގުމުގެ އަޑީގައި ތިބެނީ ބޮޑެތި މަޤާމުގައި 'ޝާނާއި ޝައުކަތުގައި' ދިރިއުޅެމުން އަންނަ މުއްސަނދިންނެވެ. އެމީހުންގެ މުއްސަނދިކަން ވެރިކަން ނިމޭއިރު ހުންނަނީ ބިމުން ފެށިގެން އެތައް ގުނައަކަށް އުފުލިފައޭ ބުންޏަސް ރަނގަޅުވާނެއެވެ. ޤާނޫނުގެ ދިގު އަތް ކޮންމެވެސް ގޮތަކަށް އެމީހުންނާއި އަރާހަމަކުރަން އޮންނަނީ ދަތިވެފައެވެ. ގިނަފަހަރަށް މިފަދަ މީހުން ވެގެންދަނީ ކޮންމެވެސް ސިފައެއްގައި އެވަގުތަކު އޮންނަ ސަރުކާރަކަށް އިންތިޚާބުތަކުގައި އެހީތެރިކަން ފޯރުކޮށްދޭ ބަޔަކަށެވެ.
ވައްކަން ހުއްޓުވަން އެބަޖެހެއެވެ. ކޮރަޕްޝަން ހުއްޓުވެން ޖެހެއެވެ. ވަކިމީހެއްގެ މޫނަށް ނުބަލައި ފިޔަވަޅު އަޅަން ކެރެންޖެހެއެވެ. އެންމެފަހުން މިފަޅާއެރީވެސް މަކަރާއި ހީލަތުން ބަޔަކަށް ގޯތި ދީފައިވާ މައްސަލައެކެވެ. ބިންވެރިޔާ ސްކީމުން ގޯތި ނުލިބޭ ބަޔަކަށް އެޗްޑީސީއިން ގޯތިތަކެއް ދީފައިވާ ކަމަށް ބެލެވޭ މައްސަލައެއް ބަލަމުންދާކަން ފުލުހުން ވަނީ ރޭގެ ވަގުތެއްގައި ވިދާޅުވެފައެވެ. މި ތަހުގީގުގައި ފުލުހުން ބަލަނީ ލިޔެކިޔުން ފޯޖުކޮށްފައިވާ މައްސަލައެއް ކަމަށް ވަނީ ފާހަގަކޮށްފައެވެ. މި މައްސަލައިގައި އެބުނާ ބިންތަކުގެ ތެރެއިން ބިމެއްގައި ވަށާފާރުވެސް އެވަނީ ރާނާފައެވެ. އެއީ އެޗްޑީސީގެ މެނޭޖިންގ ޑައިރެކްޓަރ ފަޒުލް ރަޝީދުގެ ބޭބެ ފަޒީލް ރަޝީދުއަށް އުސޫލާއި ޚިލާފަށް ދޫކޮށްފައިވާ ބިމެއްގައެވެ. މިމައްސަލައިގައި އާންމުން އެންމެ ކަންބޮޑުވާކަމަކީ އުސޫލުން ބޭރުން ގޯތި ދޫކޮށްފައިވާ 2 ބިމެއްގައި އިންފާރު ރޭނުމުގެ ހުއްދައަށް އެޗްޑީސީއިން ހައުސިންގ މިނިސްޓްރީގައި އެދުމުން އެއީ މިނިސްޓްރީން އެއްވެސް ފަރާތަކާއި ހަވާލުކޮށްފައިވާ ގޯތިތަކެއް ނޫންކަމަށް އަންގައި މިއަހަރުގެ އޯގަސްޓް 15 ވަނަ ދުވަހު އެޗްޑީސީއަށް ސިޓީއެއް ފޮނުވިއަސް އިއްޔެއާއި ހަމައަށް މިމައްސަލަ ބަލައި ފިޔަވަޅު އަޅައިފައި ނުވާތީއެވެ.
އާންމުންގެ ހިތްހަމަނުޖެހުން ބޮޑުވެ ރޭގެވަގުތެއްގައި މުޒާހަރާ ކޮށްފައިވާއިރު މިއަދު މިވަނީ ގިނައަދަދެއްގެ ބަޔަކު މަގާމުގެ މަސްއޫލިއްޔަތުން އެކަހެރިކޮށްފައެވެ. އޭގެތެރޭގައި އެޗްޑީސީގެ ޗެއާމަން ފިޔަވައި ބޯޑުގައި ހިމެނޭ 10 މެންބަރުންނާއި މެނޭޖިންގ ޑައިރެކްޓަރ ފަޒުލް ހިމެނެއެވެ. އަދި ނުހައްގު ގޯތީގެ މައްސަލައިގައި އެމްޑަބްލިއުއެސްސީގެ ޑެޕިއުޓީ މެނޭޖިންގ ޑައިރެކްޓަރުގެ މަގާމުގައި ހުރި ފަޒީލް ރަޝީދު ވެސް މިއަދު ވަނީ ސަސްޕެންޑްކޮށްފައެވެ. އަދި އެޗްޑީސީގެ އައިޓީ ކޮންސަލްޓެންޓް އަބްދުﷲ ޝުހޫދާއި، ޗީފް ފައިނޭންޝަލް އޮފިސަރ އަބްދުﷲ ފާއިދާއި ޗީފް ބިޒްނަސް އޮފިސަރ އަދި މީޑިއާ ހެޑް އަހުމަދު ޔާމީން ވެސް ވަނީ ސަސްޕެންޑް ކޮށްފައެވެ.
ނުހައްގުން ގޯތި ދޫކުރި މައްސަލަ ހޫނުވުމުން އެޗްޑީސީއިން ރޭގަ ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ އެކުންފުންޏަށް މިކަން ފާހަގަވީ ގޯތިތަކުގެ ވަށާފާރު ރޭނުމުގެ ހުއްދައަށް އެކުންފުންޏަށް ހުށަހެޅުމުން އެ ގޯތިތަކުގެ ރަޖިސްޓްރީ ވެރިފައި ކުރުމަށް ހައުސިންގ މިނިސްޓްރީ އަށް ފޮނުވުމުން ކަމަށެވެ. އެކަމަކު މިމައްސަލަ ފެންމަތިވުމުންވެސް ފުލުހުންނަށް މައްސަލަ ހުށަނާޅާކަމަށް ފަޒުލް ވަނީ އެއްބަސްވެފައެވެ. އަދި އެ ނުހައްގުން ލިބިފައިވާ ގޯތީގައި ފާރުރާނާފައި ނުހުންނާނެ ކަމަށްވެސް ވަނީ ވިދާޅުވެފައެވެ. އެކަމަކު އެގޯތީގައި ހުރީ ވަށާފާރު ރާނާފައެވެ.
މައްސަލަ ހޫނުވުމުން ގުޅުންހުރި ހުރިހާ މުއައްސަސާއަކުން މިވަނީ މައްސަލަބެލުމުގައި އަވަސްއަރުވާލާފައެވެ. މިމައްސަލަ ފެންމަތިވިތާ 5 މަސްވީއިރު އަޅާނުލައި ތިބި ކަމުގައިވިޔަސް ވޭތުވެދިޔަ 24 ގަޑިއިރު ހާލަތު ވަނީ ބަދަލުވެފައެވެ. ބިންވެރިޔާ އަދި ގެދޮރުވެރިޔާ ސްކީމާ ގުޅޭ ޖިނާއީ ތަހުގީގެއް ހިންގުމަށް ޕްރޮސެކިއުޓަރ ޖެނެރަލް އައްބާސް ޝަރީފް ވެސް ވަނީ ފުލުހުންނަށާއި އޭސީސީއަށް އަމުރު ކުރައްވައިފައެވެ.
ކޮރަޕްޝަން އާންމުވެފައިވާއިރު އެންޓި ކޮރަޕްޝަން ކޮމިޝަނަށް އެންމެ އެދެވޭގޮތެއްގައި ޒިންމާ އަދާކުރެވޭބާއެވެ؟ ޤާނޫނީ ހައިސިއްޔަތަކީ އަމިއްލަ ނަމުގައި ދަޢުވާ ކުރުމާއި ދަޢުވާ ލިބިގަތުމުގެ ބާރު ލިބިފައިވާ އަމިއްލަ ނަމުގައި މުއާމަލާތުކުރުމުގެ ހައިސިއްޔަތު ލިބިފައިވާ އަދި ވަކި ސިއްކައެއް އޮންނަ މިނިވަން ޤާނޫނީ ޝަހުސެއްކަމަށް އެންޓި ކޮރަޕްޝަން ކޮމިޝަނުގެ ޤާނޫނުގައި ބަޔާންކޮށްފައިވެއެވެ. އެކަމަކު ރައީސުލްޖުމްހޫރިއްޔާ ނަން ފޮނުއްވައިގެން މަޖިލިސް މެޖޯރިޓީއިން ހޮވާ މި މެންބަރުން ގިނަ ފަހަރަށް ތިބެނީ އެވަގުތަކު އޮންނަ ސަރުކާރަކާއި އެއްކޮޅަށް ކަމަށް އާންމުން އަބަދުވެސް ތުހުމަތުކުރެއެވެ. ކަމެއް ގޯސްވެ އާންމުންގެ ލޭ ކެކިގަތުމުން ނޫނީ ގިނަފަހަރަށް އާރާއި ބާރުގައި އުޅޭ މީހުންގެ މައްސަލަ ބެލޭތަނެއް ނުފެނެއެވެ. އާންމުންގެ އެތައް ހައްގުތަކެއް ގެއްލިއްޖެއެވެ. ރައްޔިތުންގެ ގިނަ އަދަދެއްގެ ފައިސާއަށް ހިޔާނާތްތެރިވި މީހުންނަށް ފިޔަވަޅުނެއެޅި އޭގެ ދަތިކަން އިހުސާސް ކުރަން މިޖެހެނީ ނިކަމެތި ރައްޔިތުމީހާއެވެ. ދައުލަތުގެ ކުންފުނިތައް އެތައް މިލިއަނުން ދަރާ ހެދޭ ގޯސްތަކުން އަރައި ނުގަނެވިގެން އުޅޭއިރު ކޮރަޕްޝަން ހުއްޓުވަން ބޭނުންނަމަ މި ޤައުމުގައި ފަސްބައިގައި ކިލަބުކަމެއް ނެތް ތެދުވެރިންނަށް ކުންފުނިތަކުންވެސް ވަޒީފާތަކުންވެސް ފުރުސަތު ހޯދައިދޭން ޖެހެއެވެ. ސިޔާސީ ކުލަވަރު އެއްކިބައިކޮށް ޤައުމާއިމެދު ވިސްނަން ޖެހެއެވެ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވަޢުދުވިގޮތަށް ކޮރަޕްޝަން ހުއްޓުވާނެ ކަމަށް އުންމީދު ކުރަމެވެ. ސަރުކާރުގެ ތެރެއިން ހިންގަމުން އަންނަ ޖަރީމާތައް ހުއްޓުވައި ފިޔަވަޅު އަޅަން ޖެހޭ މީހުންނަށް ފިޔަވަޅުއަޅާނެ ކަމަށް އުންމީދު ކުރަމެވެ. އެހެންނޫނީ ކުރީގެ ސަރުކާރުތަކެކޭ އެއްގޮތަށް މި ސަރުކާރަށްވެސް ރައްޔިތުން ބުނާނީ ނޫނެކޭ އެވެ.
