އިންޓެލިޖެންސް ރިޕޯޓަކަށް ބިނާކޮށް ކޯޓު އަމުރު ހޯދައިގެން ދަންވަރު ގޭގެއަށް ވަދެ ބަލާ ފާސްކުރުމަކީ ދިވެހި ފުލުހުން ކުރަމުން އަންނަ ކަމެކެވެ. މިގޮތަށް އޮޕަރޭޝަންތައް ކުރިއަށް ގެންދިއުމުން އެގެތަކުގައި ދިރިއުޅޭ ކުޑަކުދިންނާއި އުމުރުން ދުވަސްވީ މީހުންގެ ހައްޤަށް އުނިކަން އަންނަކަމަށް ބުނެ ބައެއް ފަރާތްތަކުން ވަނީ ކަންބޮޑުވުން ސޯޝަލް މީޑިއާގައި ފާޅުކޮށްފައެވެ. އެފަދަ ފަރާތްތަކުން ބުނާގޮތުގައި ދަންވަރު އޮޕަރޭޝަންތައް ކުރިއަށްގެންދަން ޖެހޭނީ ކޮންމެހެން މަޖުބޫރީ ހާލަތުގައެވެ. މިސާލަކަށް އެތަނެއްގައި އެވަގުތު ކުށަށް އަރައިގަންނަކަމަށް ޝައްކު ކުރެވޭ ހާލަތެއްގައި އެކަމެއް ހުއްޓުވުމަށެވެ. ނުވަތަ އެތާގައި ތިބި ބަޔަކު އެވަގުތު ހައްޔަރުކުރަން ޖެހިއްޖެ ހާލަތެއްގައެވެ.
ދާދިފަހުން ދަންވަރު ވަދެ ފުލުހުން ބަލާ ފާސްކުރީ އާރުޑީސީގެ ހިޔާނާތުގެ މައްސަލައިގެ ތުހުމަތުކުރެވޭ އެކުންފުނީގެ ކުރީގެ މެނޭޖިންގ ޑިރެކްޓަރ މޫސާ އަލިމަނިކު (މޫކޭ) ދިރިއުޅުއްވާ އެޕާޓްމަންޓެވެ. އާރުޑީސީގެ ހިޔާނާތުގެ މައްސަލަ ފުލުހުން ބަލަން ފެށިތާ އަހަރަކަށްވުރެ ގިނަ ދުވަސްވެފައިވާއިރު ކުއްލިއަކަށް ދަންވަރު އެގެއަށް ވަދެ އޮޕަރޭޝަން ހިންގި ސަބަބެއް ނުވިސްނެއެވެ.
ޤާނޫނު އަސާސީގެ 245 އަދި 246 ވަނަ މާއްދާގައި ބަޔާންކޮށްފައިވެއެވެ.
ފުލުހުންގެ ޚިދުމަތުގެ މައިގަނޑު މަޤްސަދުތަކަކީ:
ހ. މުޖުތަމަޢުގެ އަމަންއަމާންކަމާއި ރައްކާތެރިކަން ދެމެހެއްޓުން
ށ. ދިވެހިރާއްޖޭގައި އުޅޭ އެންމެހައި މީހުން ހިމާޔަތްކޮށްދީ އެބައިމީހުންގެ މުދަލާއި ގެދޮރު ރައްކާތެރިކޮށްދިނުން
ހަމަހަމަކަމާއެކު އަމަލުކުރުން:
ހ. ސަލާމަތީ ޚިދުމަތްތަކުގައި ހިމެނޭ މީހުން އަމަލުކުރަންވާނީ ފަރުދުންގެ މެދުގައްޔާއި ޖަމާޢަތްތަކުގެ މެދުގައި ތަފާތުކުރުމެއްނެތި ހަމަހަމަކަމާއެކު އިސްލާމީ ރިވެތި އަޚްލާޤާއި އިންސާނީ ޝަރަފާއި މީހުންގެ ޤަދަރަށް ހުރުމަތްތެރިކޮށް ހިތައިގެންނެވެ.
ޤާނޫނު އަސާސީއިން ދިވެހި ރައްޔިތުންނަށް ލިބިދީފައިވާ މިނިވަންކަމަށް ހުރަސް އެޅޭގޮތަށް އަމަލު ކުރުމަކީ އެއްވެސް މުއައްސަސާއަކުން ކޮށްގެންވާނެ ކަމެއް ނޫނެވެ.
މާލެސިޓީގެ މޭޔަރ އާދަމް އާޒިމް މިމައްސަލައިގައި ކަންބޮޑުވުން ފާޅުކޮށް ލިޔުއްވައިފައިވެއެވެ. " މައިންނާއި ޅަދަރީން ރޭގަނޑު އަރާމުކުރާ ވަގުތުގައި ގޭގެއަށް ވަދެ އާއިލާގެ ނިދި ގެއްލުވާލައި ފުލުހުން ރޭޑްތައް ހިންގުމުން އާއިލާތައް މިވައްޓާލެވެނީ ވަރަށް ބޮޑު ބިރުވެރިކަމެއްގެ ތެރެއަށް. މީގެ ކުރިންވެސް ވަނީ މިފަދަ ހާދިސާ ތަޖުރިބާ ކުރެވިފައި. އަމިއްލައަށް އުފަންކުރުވާ އިންޓެލިޖެންސް ރިޕޯޓާއި އަދި ފްރޭމް ކުރުމަށް ހެކި ބަހައްޓައިގެން ހިންގި ރޭޑުތަކުން އެތައް އާއިލާތަކަކަށް ވަނީ އަނިޔާއާއި ހިތާމަ ބޭއިންސާފުން ލިބިފައި. އަދި މިއަދާއި ހަމައަށްވެސް މިފަދަ ބޮޑެތި ޖަރީމާތައް ހިންގި ފަރާތްތައް އިންސާފުގެ ކުރިމައްޗަށް ގެނެވިފައެއް ނެތް. މިފަދަ ހިތާމަވެރި ކަންކަން އަމިއްލައަށް ތަހައްމަލު ކޮށްފައިވާ މީހެއްގެ ހައިސިއްޔަތުން ދަންނަވަންއޮތީ ޤާނޫނު ތަންފީޒު ކުރައްވާ ފަރާތްތަކުގެ އަމަލުތަކުގައި ޕްރޮފެޝަނަލިޒަމް ދަމަހައްޓަވައި ދެއްވާށޭ. މިއަދު ލިބިފައިވާ ބާރު ބަދަލުހިފުމުގެ ވަސީލަތެއްގެ ގޮތުގައި ބޭނުންކުރެއްވުމުން ދުރުހެލިވެތިބުމަށް ފުލުހުންގެ މުއައްސަސާއަށް ހަނދާންކޮށްދެން" އާޒިމް ވިދާޅުވެފައިވެއެވެ.
އާޒިމް އެވިދާޅުވި އަމިއްލައަށް މިފަދަ ހާދިސާއެއް ތަޖުރިބާކުރެއްވި ވާހަކައަކީ ރައީސް އަބްދުﷲ ޔާމީންގެ ސަރުކާރުގައި އެއިރުގެ ޑިފެންސް މިނިސްޓަރަކަށް ހުންނެވި އާޒިމްގެ އެއްބަނޑު އެއްބަފާ ބޭބެ މުހައްމަދު ނާޒިމް ދިރިއުޅުއްވާ ގެއަށް މެންދަމުގެ ވަގުތެއްގައި ވަދެ ފުލުހުން ހިންގި އޮޕަރޭޝަނެވެ.
ދަންވަރު މިގޮތަށް ގޭގެއަށް ވަދެ ފުލުހުން ޚާއްސަ އޮޕަރޭޝަންތައް ތަކުރާރުކޮށް ހިންގަމުން އަންނައިރު މިއީ ފުލުހުންގެ މުއައްސަސާއިން މިހާރަށްވުރެ ބޮޑަށް ވިސްނަން ޖެހިފައިވާ ކަމެކެވެ. މިގޮތަށް ދަންވަރު ގޭގެއަށް ވަދެ ބަލާ ފާސްކުރުމުން އެގެތަކުގައި ދިރިއުޅޭ ކުޑަކުދިން ނިދިން ހޭލެވި ކުއްލިއަކަށް ގިނައަދަދެއްގެ ފުލުހުން ފެނުމުން އެލިބޭ ނަފްސާނީ ގެއްލުމަށް ޒިންމާ ނަގާނީ ވަކި ކާކު ހެއްޔެވެ؟ ކޮރަޕްޝަންގެ އަމަލުތައް ނުވަތަ އެހެނިހެން ކުށަކަށް އަރައިގަނެފައިވާނަމަވެސް އެ ތަހުގީގެއް ފުލުހުން ހިންގަންވީއެވެ. އެކަމަކު އިރުގެ އަލިކަން ހުއްޓާ ކުރެވެންހުރި ކަންތައް ދަންވަރަށް ފަސްކުރުމަކީ ދެރަކަމެކެވެ.
