2025 ވަނަ އަހަރު ފެށުނީއެވެ. އެކި ޤައުމުތަކުން ފެންނަމުން ދަނީ އައުއަހަރު ފާހަގަކުރުމަށް ހަވާއެރުވުމާއި ޝޯތަކާއި އުފާފާޅުކުރުމުގެ ތަފާތު މަންޒަރުތަކެވެ. އެކަމަކު ވޭތުވެދިޔަ އަހަރެކޭ އެއްގޮތަށް ފަލަސްޠީނުގެ މުސްލިމް އަހުންނާއި އުޚުތުން އެވަނީ ލޭގެ ކަރުނުން ފޯވެފައެވެ. އުފާވެރިކަމެއް ނެތެވެ. ފުރާނަ ސަލާމަތްކުރުމަށް ކުރެވޭނެ މާބޮޑު ކަމެއް ނެތެވެ. ތަޢުލީމާއި ބޭސްފަރުވާއާއި ކާބޯތަކެތިފަދަ އަސާސީ ޚިދުމަތްތަކުން މަހުރޫމްވެ ފޭލިގެތަކުގައާއި މަގުމަތީގައި އެހޭދަ ކުރަނީ ހިތްދަތިކަމުގެ އިންތިހާ ވަގުތުތަކެކެވެ.
ފަލަސްޠީނުގެ ޣާޒާގެ ލޮބުވެތި ރައްޔިތުން އެހާލުގައި އުޅޭތާ އެތައް ދުވަހެއްވީއިރުވެސް އިސްރާއީލުން ހިންގަމުން އަންނަ ލާއިންސާނީ އަމަލު ހުއްޓުވަން ދުނިޔެ މިވަނީ ނުކުޅެދިފައެވެ. ވޭތުވެދިޔަ 24 ގަޑިއިރަށް ބަލާއިރުވެސް އިސްރާއީލުން އެވަނީ ޚާން ޔޫނިސް އަށް ވެސް ވައިގެ ހަމަލާތަކެއް ދީފައެވެ. މިހަމަލާގައިވެސް އެތައްބަޔަކު ވަނީ ޒަޚަމްވެފައެވެ. ޣާޒާގެ އުތުރުގައި އޮންނަ ޖަބަލިއާއަށް އިސްރާއީލުން ދިން ޑްރޯން ހަމަލާގައިވެސް ވަނީ އެކަކު މަރުވެ އިތުރު ބަޔަކު ޒަޚަމްވެފައެވެ. އަދި އިތުރު ސަރަަހައްދުތަކަށް ދިން ހަމަލާތަކުގައިވެސް ވަނީ މީހުން މަރުވެފައެވެ.
ޚާން ޔޫނިސްގައި ގެދޮރު ގެއްލިފައިވާ ފަލަސްޠީނުގެ ރައްޔިތުން ދިރިއުޅޭ 100 އަށްވުރެ ގިނަ ޓެންޓްގައި ފެންބޮޑުވެފައިވާ ކަމަށް އަލްޖަޒީރާއިން ވަނީ ރިޕޯޓްކޮށްފައެވެ.
ބައިނަލްއަގްވާމީ ޤާނޫނުތަކާއި ޤަވާއިދުތަކަށް ތަބާނުވެ އިސްރާއީލުން ދެމުން އަންނަ މި ލާއިންސާނީ ހަމަލާތަކުގައި ޣާޒާގެ ހޮސްޕިޓަލްތައްވެސް އެމީހުންގެ ބެލުމުގެ ދަށަށް ގެންނަމުންނެވެ. މީގެ ސަބަބުން ޒަޚަމްވާ މީހުންނަށް ފަރުވާދޭން ހުރަސްއެޅިފައިވެއެވެ. މިދިޔަ ހަފްތާގައިވެސް އިސްރާއީލު ސިފައިން ވަނީ ޣާޒާގެ އުތުރުގައި އޮންނަ ކަމާލް އަދުވާން ހޮސްޕިޓަލަށް ވަދެ ގަދަކަމުން އެތަން ހުސްކޮށްފައެވެ.
ކުށެއް ނެތް އެތައް ކުދިންނަށް ލިބުނު ޒަޚަމްތަކުގައި ނުކުޅެދޭކުދިންނަށް ވެފައިވާއިރު މައިންބަފައިން މަރުވެ ހާލުގައި ޖެހިފައިވާ އެތައް ކުދިންނެއްވެސް އެބަތިއްބެވެ. އަދި ތުއްތު ކުދިންތައް މަރުވެ ބިކަވެފައިވާ މައިންބަފައިންނާއި ބޯހިޔާވަހިކަމެއް ނެތި މަގުމަތީގައި ހާލުގައިއުޅޭ އެތައް ބަޔަކު ރޮއެ އާދޭސް ކުރަމުން އެދަނީ މިނޫން ދުވަހެއް އެމީހުންނަށް ފެނޭތޯއެވެ. އެކަމަކު އެރައްޔިތުންގެ އީމާންތެރިކަން ވަރުގަދައެވެ.
ޣާޒާ އަކީ 2.3 މިލިއަން މީހުންގެ އަމިއްލަ ވަޒަނަށް ވާއިރު މިއަދު އެތަން ފެންނަނީ އިމާރާތްތައް ބިމާއި ހަމަވެ ވީރާނާވެފައިވާ ތަނެއްގެ ގޮތުގައެވެ. ފަލަސްޠީނުގެ ބިމަކީ މުސްލިމުންގެ ހިތްތަކުގައި ޚާއްސަ ޤަދަރެއް ދެވިފައިވާ ބިމެކެވެ. މިބިމުގެ ދަހިވެތިކަމުގައި އިސްރާއީލުން އެހިންގާ ޖަރީމާތައް ނުހުއްޓި އެތައް އަހަރެއް ހޭދަވިއިރު އެމީހުންގެ މައިގަނޑު އަމާޒަކީ ފަލަސްޠީނުގެ ރައްޔިތުންގެ ހައްޤުތައް ނިގުޅައިގަނެ އެބިމުގައި ހުރި މުޤައްދަސް ތަންތަން ނައްތާލާ އެބިމަށް ވެރިވެގަތުމެވެ.
ފަލަސްޠީނުގެ ޣާޒާ އަށް އިސްރާއީލުން ދެމުން އަންނަ ހަމަލާތަކުގައި 51،000 މީހުން ޒަޚަމްވެފައިވާއިރު 46000 މީހުން މަރުވެފައިވާކަމަށް ޣާޒާގެ ހެލްތް މިނިސްޓްރީން އާންމުކޮށްފައިވެއެވެ.
މުސްލިމުންގެ މިސާލަކީ އެއްހަށިގަނޑެއްގެ މިސާލެއް ކަމަށްވާއިރު ފަލަސްޠީނުގެ އަޚުންނާއި އުޚުތުންނަކީ އަހަރެމެންގެ ހަށިގަނޑުގެ އެއްބައެވެ. ހާލުގައި ދިރިއުޅޭ އަޚުންނާއި އުޚުތުންނަށް ނަސްރުދެއްވުން އެދި މި އާ އަހަރުގައި ދުޢާކުރުން ގިނަކުރަންހިގާށެވެ.
