އެލައިޑް އިންޝުއަރެންސަށް 40 އަހަރު ފުރުމުގެ ގޮތުން 'ޑައިވް 40' ނަމުގައި ވަނީ އިވެންޓެއް ކުރިއަށް ގެންގޮސްފައެވެ. އިއްޔެ ކުރިއަށް ގެންދިޔަ މިއިވެންޓްގައި މޯލްޑިވްސް އެކަޑެމީ އޮފް ޑައިވިންގ އާއި އެކު އެވެއަރނެސް ސެޝަން އާއި "ޑައިވް އަގެއިންސްޓް ޑެބްރީ"ގެ އިތުރުން ހިންމަފުށީ ކައުންސިލާއި ސްކޫލް އަދި ގެސްޓްހައުސްތައް ގުޅިގެން ކުރިޔަށްގެންދިޔަ ހިންމަފުށީ މަލަމަތި ސާފުކުރުމުގެ ހަރަކާތް ފާހަގަކޮށްލެވެއެވެ. މި ތިން ހަރަކާތުގައިވެސް އެލައިޑުގެ މެނޭޖްމަންޓާއި މުވައްޒަފުން ވަނީ އަމަލީގޮތުން ބައިވެރިވެ، ޕްލާސްޓިކް މަދުކޮށް ކަނޑުތައް ރައްކާތެރިކުރުމުގެ އަމާޒަށް ގިނަ މަސައްކަތްތަކެއް ކޮށްފައެވެ.
ޑައިވް40 އާއި ބެހޭގޮތުން މައުލޫމާތު ހިއްސާކުރަމުން އެލައިޑުން ބުނި ގޮތުގައި އެލައިޑްގެ 40ވަނަ އަހަރީ ދުވަސް ފެށުން ވަރަށްވެސް ކާމިޔާބެވެ. އެގޮތުން ޑައިވް40 އަކީ ރަނގަޅު ނަތީޖާއެއް ނެރެވޭނެ އިވެންޓަކަށް ހެދުމަށްޓަކައި މަސައްކަތްކޮށްދެއްވި ހިންމަފުށީގައި ބޭސްވެފައި ތިއްބެވި އެންމެހާ ފަރާތްތަކާއި އެލައިޑް ޓީމުގެ އިތުރުން މިހަރަކާތުގައި ބައިވެރިވުމަށް މާލެއިން ދިޔަ ކުޅަދާނަ ޑައިވަރުންގެ ޓީމަށްވެސް ވަނީ ޝުކުރު އަދާކޮށްފައެވެ.
"ތިމާވެއްޓަށް ނޭދެވޭ ކުނި އެއްކުރުމުގެ މަސައްކަތުގެ ތެރެއިން ޑައިވް40ގައި 790.06 ކިލޯގެ ކުނި ކަނޑުންނާއި އެއްގަމުން އެއްކުރެވުނު. ތިމާވެއްޓަށް ގެއްއްލުން ލިބޭ ފަދަ ގިނަ ކުނި އެއްކުރުމަކީ ހިތްހަމަޖެހޭ ކަމެއް ކަމުގައިވީ ނަމަވެސް، މިކަމަކީ ކުރިއަށް ކުރަން އޮތް މަސައްކަތް ސިފަކޮށްދޭ ކަމެއް. ސަބަބަކީ ޕްލާސްޓިކާއި ދުރުހެލިވުމަށް އިޖާބަ ދޭ، ހޭލުންތެރި މުޖުތަމައުއެއް އުފެއްދުމުގެ މުހިންމުކަން މިކަމުން ސާފުވެގެންދިޔުން". އެލައިޑުންވަނީ ފާހަގަކޮށްފައެވެ.
ހޭލުންތެރިކަން އިތުރުކުރުމުގެ މަގުސަދުގައި ޑައިވް40 އިން އެއްކުރެވުނު ޕްލާސްޓިކް ކުނި ބޭނުންކޮށްގެން ދިވެހި ފަންނުވެރިއަކު ތައްޔާރުކުރާ ހާއްސަ އުފެއްދުމެއް، އަންނަ ފެބްރުއަރީގައި ބާއްވާ މޯލްޑިވްސް މެރިން އެކްސްޕޯ 2025 ގައި ފީޗަރކުރުމަށް އެލައިޑުންވަނީ ނިންމާފައެވެ. މިއީ އެއް މަޤްޞަދެއްގައި އެއްބަޔަކު އަނެއްބަޔަކާއި ގުޅިގެން މަސައްކަތްކޮށްފިނަމަ ޙާޞިލުކުރެވޭނެ ކަންތައްތަކުގެ ލާމަސީލު ރަމްޒެއްކަމުގައި ވާނެކަން އެލައިޑުން ފާހަގަކުރެއެވެ.
އެލައިޑް އިންޝުއަރަންސްގެ އަހަރީ ދުވަހަކީ ޖަނަވަރީ 30ވަނަ ދުވަހެވެ. މިދުވަހާއި ގުޅުވައިގެން ކޮންމެ އަހަރަކުވެސް އެކުންފުނިން ދަނީ ތަފާތު ގިނަގުނަ ހަރަކާތްތަކެއް ކުރިޔަށްގެންދަމުންއެވެ. އެހެންނަމަވެސް، އެހެން އަހަރުތަކާއި ހިލާފަށް، 40 އަހަރު ފުރޭ މުނާސަބަތާއި ގުޅުވައިގެން އަހަރުތެރެއަށް ބަހާލައިގެން، ރާއްޖޭގެ އެކި ކަންކޮޅުތަކުގައި މިއަހަރުގެ ހަރަކާތްތައް ކުރިޔަށްގެންދިޔުމަކީ އަމާޒެއްކަމުގައި އެލައިޑުން ފާހަގަކުރެއެވެ. ސަބަބެއްގެ ގޮތުގައި އެލައިޑުން ވިދާޅުވީ ކުންފުނީގެ ތަރައްގީއަށް ރާއްޖޭގެ އެންމެހާ ރައްޔިތުން ދެމުންގެންދަވާ އިތުބާރާއި ޔަގީންކަމާއި އެކު، ކުންފުނިން ހޯދާފައިވާ 40 އަހަރުގެ ކުރިއެރުން ވީހާވެސް ގިނަ ރައްޔިތުންނާއި ހިއްސާކުރުމެވެ.
