ރާއްޖޭގެ އިރުން ހުޅަނގުދެކުނު ބޭ އޮފް ބެންގާލް ގައި އުފެދިފައިވާ ކޮޅިގަނޑު ހުޅަނގަށް ޖެހި ރާއްޖޭގެ ސަރަހައްދުގައި ބޯވިއްސާރަވިލާ އުފެދުމުގެ ފުރުސަތު ބޮޑުވާނެކަމަށް ލަފާކުރެވޭތީ މޫސުމަށް ޚާއްސަ ސަމާލުކަމެއް ދިނުމަށް މޫސުމާއިބެހޭ އިދާރާއިން އިލްތިމާސް ކުރީ އިއްޔެގެ ވަގުތެއްގައެވެ. މިއަދުން ފެށިގެން މިމަހުގެ 18 އާއި ދެމެދު ރާއްޖޭގެ ބޮޑުބަޔަކަށް ވިއްސާރަ ކުރާނެކަމަށް ލަފާކުރެވޭތީ ގުޅުންހުރި މުއައްސަސާތަކުން ދަނީ ވިއްސާރައިން ލިބޭ ގެއްލުން ކުޑަކުރުމަށް ޚާއްސަ މަސައްކަތްތަކެއް ކުރަމުންނެވެ.
މޫސުމީ ގެއްލުންތަކުން އަރައިގަތުމަށް މަސައްކަތް ކުރުމަށް ރައީސުލްޖުމްހޫރިއްޔާ ވަނީ ޚާއްސަ ޓާސްކް ފޯސްއެއްވެސް އެކުލަވާލައްވާފައެވެ. މި ޓާސްކްފޯސްގައި ހިމެނެނީ މޯލްޑިވްސް ނެޝަނަލް ޑިފެންސް ފޯސްއާއި، މޯލްޑިވްސް ޕޮލިސް ސަރވިސް އާއި ނޭޝަނަލް ޑިޒާސްޓަރ މެނޭޖްމަންޓް ސެންޓަރެވެ.
މިއަދު މި ޓާސްކް ފޯސްއިން ކުރިއަށްގެންދިޔަ ނޫސްވެރިންގެ ބައްދަލުވުމުގައި ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީ ވިދާޅުވީ ވިއްސާރައިގައި ގެއްލުންވާ ފަރާތްތަކަށް އެހީވުމަށް ކުރަންޖެހޭ މަސައްކަތްތައް ކުރަމުން ގެންދާކަމަށެވެ.
" ރައްޔިތުންނަށް އެހީތެރިކަން ފޯރުކޮށްދިނުމަށް ޖޮއިންޓް އޮޕަރޭޝަން ސެންޓަރެއް ސިފައިންގެ މައިމަރުކަޒު ބަންޑާރަ ކޮށީގައި ވަނީ ޤާއިމްކުރެވިފައި. ސިފައިންގެ ސެންޓަރުތައް ގާއިމްކުރެވިފައިވާ 4 ސަރަހައްދުން އެހީތެރިކަން ފޯރުކޮށްދެމުންދާނެ" ހިލްމީ ވިދާޅުވިއެވެ.
މިބައްދަލުވުމުގައި ކޮމިޝަނަރ އޮފް ޕޮލިސް އަލީ ޝުޖާޢު ވިދާޅުވީ ޕޮލިސް ޕޯސްޓްތައް ޤާއިމުކުރެވިފައި ނުވާ ރަށްރަށަށްވެސް އެހީތެރިކަން ފޯރުކޮށްދިނުމުގެ މަސައްކަތް ކުރިއަށްގެންދާ ކަމަށެވެ.
" މިފަދަ ކާރިސާތަކުން ލިބޭ ގެއްލުން ކުޑަކުރެވޭނީ އެންމެން ގުޅިގެން ކުރެވޭ މަސައްކަތަކުން. ބައެއް ފަހަރަށް ރައްޔިތުންނަށް ދަތިތަކާއި ދިމާވެދާނެ. ފެންބޮޑުވާ ސަރަހައްދުގައި ވެހިކަލް ދުއްވުމަކީ ރައްކާތެރިކަމަކަށް ނުވާތީ އެގޮތަށް އެންމެ ބޮޑަށް ފެންބޮޑުވާ މަގުތައް މާލޭގައި ބަންދުކުރަން. އެގޮތަށް ދޭ އިރުޝާދުތަކަށް ބޯލެބުމަށް އިލްތިމާސްކުރަން". ޝުޖާޢު ވިދާޅުވިއެވެ.
ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ، އެންޑީއެމްއޭގެ ޗީފް އެގްޒެކެޓިވް ޙިސާން ޙަސަން ވިދާޅުވީ، މާލެސިޓީ ކައުންސިލުން ރެއިން ފެށިގެން މިއަދާއި ހަމައަށް އާންމުކޮށް ފެންބޮޑުވެ ގެއްލުންވާކަމުގެ ރިޕޯޓްކުރާ 57 ތަނެއްގައި ވަނީ ވެލިބަސްތާ ޖަހައިފައި ކަމަށެވެ. އަދި މީގެ އިތުރުންވެސް ވެލިބަސްތާ ޖަހަންޖެހޭ ތަންތަން ފާހަގަކުރެވި ވެލިބަސްތާ ޖެހުމުގެ މަސައްކަތް ކުރިއަށްދާކަމަށް ފާހަގަކުރެއްވިއެވެ.
" އަޅުގަނޑުމެން އާންމުކޮށްފައިވާ މޫސުމާއިބެހޭ އެޑްވައިޒަރީގައި ފާހަގަކޮށްފައިވާ ކަންކަމަށް ސަމާލުވެ ފަރުދީ ލެވެލްގައި އަދި އަތޮޅު ފެންވަރުގައާއި ކައުންސިލް ފެންވަރުގައި އަޅަންޖެހޭ ފިޔަވަޅު އެޅުން އެދެން. މޫސުމާއިބެހޭ އިދާރާއިން ނެރޭ ނިވްސްބްލެޓިންގައި ވާގޮތުގެ މަތިން އަމަލުތައް ބެހެއްޓުމަށާއި އަދި ސަލާމަތީ ބާރުތަކުން އެކިއެކި ފަރާތްތަކަށްދޭ އިރުޝާދުތަކަށް ތަބާވެ އެއްބާރުލުން ދިނުމަށް އެދެން. ވެލިބަސްތާތައް ޖަހައިގެން ގެއަށް ފެން ނުވަންނާނެ ގޮތަށް ރައްކާތެރިކަމުގެ ފިޔަވަޅު އެޅުމަކީ އަޅުގަނޑުމެން އެދޭކަމެއް. ފެންބޮޑުވެފައިވާ ވަގުތުގައި ބަރުއުޅަނދު ނުދުއްވުމަށާއި މިމަހު 18 އާއި ހަމައަށް ބޯކޮށް ވާރޭވެހި ފެންބޮޑުވެދާނެ ހާލަތްތަކުގައި ފެންބޮޑުނުވާ ސަރަހައްދު ފާހަގަކޮށް ރައްކާތެރިކަމާއެކު ސައިކަލު ޕާކުކުރުމަކީ އަޅުގަނޑުމެން އެދޭކަމެއް. ފެންބޮޑުވާ ސަރަހައްދުތަކުގައި ހުންނަ ކުދިވިޔަފާރި ރެސްޓޯރެންޓް ފިހާރަ އަދި އަގުބޮޑެތި މުދާތައް ރައްކާކޮށްފައި ހުންނަ ގުދަން އަދި މިނޫންވެސް ތަންތަނުގައި ހުންނަ އަގުބޮޑެތި މުދަލުގައި ފެންޖެހި ގެއްލުންވެދާނެ ކަމަށް މިތަންތަނުގެ ވެރިފަރާތްތަކުން ސަމާލުކަން ދިނުމަކީވެސް ވަރަށް މުހިންމު ކަމެއް" ހިސާން ވިދާޅުވިއެވެ.
