އަޝްރަފްގެ ފުރުމުގެ ދުވަސް ޖެހުނު ނަމަވެސް، އޭނާގެ ހިތުގައި ވަނީ ނުތަނަވަސްކަމެވެ. މި މައްސަލަ މުޅި ރަށަށް ފެތުރުމުގެ ކުރިން ހައްލެއް ހޯދުމަށް އަޝްރަފް ގަދައަޅައި މަސައްކަތް ކުރިއެވެ. އެހެންނަމަވެސް، އިތުރު ފިޔަވަޅެއް އެޅޭނެ މަގެއް ނުފެނުނެވެ. ޗުއްޓީ ނިންމައި އެހެން ފަތުރުވެރިންވެސް ރަށުން ފުރައިގެން ދިޔައެވެ. މި ރަށަކީ އަޝްރަފްގެ އަމިއްލަ ރަށެއް ނޫން ކަމުން، އޭނާވެސް ކޮންމެވެސް ދުވަހަކުން ފުރަން ޖެހޭނެކަން އެނގެއެވެ. މި ޙާލަތުގައި، އަޝްރަފް ނިންމީ ސަލީމްގެ ލަފައަކަށް އެދި، އޭނާގެ މަޝްވަރާއާ އެއްގޮތަށް ޢަމަލުކުރުމަށެވެ. އެހެންކަމުން، އަޝްރަފް ސަލީމްގެ ގެއާ ދިމާއަށް މިސްރާބު ޖެހިއެވެ. އަވަސް ހިނގުމެއްގައި ސަލީމްގެ ގޭގެ ގޯތިތެރެއަށް ވަދެވުނު އިރު، އެތަން ހުސްކޮށް އޮތްކަން ފާހަގަކުރެވުނެވެ. އެއްވެސް މީހެއްގެ ހަރަކާތެއް ނުފެނުމުން، އަޝްރަފް ވަރަށް މަޑުމައިތިރިކޮށް ކުރިއަށް ދިޔައެވެ. ކޮންމެ ފިޔަވަޅެއް އަޅާލާ ވަގުތު، އޭނާގެ އަޑު އުފުލައިގެން "އައްސަލާމް ޢަލައިކުމް" ގޮވަމުން ދިޔައެވެ. މިގޮތަށް ސަލާމްގޮވަމުން ދިޔައީ ގޭގައި ތިބެދާނެ މީހުންގެ ސަމާލުކަން ހޯދުމަށާއި، އަދަބާއެކު ގެއަށް ވަނުމުގެ ގޮތުންނެވެ. ފިޔަވަޅުތަކެއް އަޅަމުން ގޮސް ސަލީމްގެ ގޭ ގޯތިތެރެއަށް ވަންއިރު އެއްވެސް މީހަކު ފެންނާކަށް ނެތެވެ.
އަޝްރަފް ސަލާމްގޮވަމުން ކުރިއަށް ދަނިކޮށް، ކުއްލިއަކަށް ގޭތެރެއިން އަޑެއް އިވުނެވެ. "ވަޢަލައިކުމުއްސަލާމް ސަލީމްގެ އަޑު އިވުނެވެ.
ކުޑަ ހިނދުކޮޅެއްގެ ތެރޭގައި ސަލީމް ގޭތެރެއިން ނިކުތެވެ. ސަލީމްގެ މޫނުމަތިން ހިނިތުންވުމެއް ފެންނަން ހުއްޓެވެ.
"އަޝްރަފް! ތިއައީ ރަނގަޅު ވަގުތެއްގައި. އަހަރެން ދެންމެ ހަމަ ކޮފީ ތައްޔާރުކޮށްލީ. އާދޭ އެތެރެއަށް" ސަލީމް ބުންޏެވެ.
އަޝްރަފް ސަލީމްގެ ފަހަތުން ގޭތެރެއަށް ވަދެ، ސޯފާގައި އިށީނދެލިއެވެ. ސަލީމް ދެ ތަށި ކޮފީ ހިފައިގެން އައިސް، އެއް ތަށި އަޝްރަފަށް ދިއްކޮށްލިއެވެ. "ދެން ކިހިނެއްވީ އަޝްރަފް؟ ކަމެއް ޖެހިގެންތަ މިހާ ކުއްލިއަކަށް އައީ؟" ސަލީމް އަހާލިއެވެ.
"އާ ސަލީމް. ވަރަށް މުހިންމު ކަމެއް ދިމާވެގެން އައީ. ލަފައެއް ބޭނުންވެގެން" އަޝްރަފް ފުން ނޭވައެއް ލިއެވެ.
އަޝްރަފްގެ ބަސްތައް އަޑުއަހަމުން ސަލީމް އިށީނދެލިއެވެ. އޭނާގެ މޫނުމަތިން ކަންބޮޑުވުމުގެ ނިޝާންތައް ފެންނަން ފެށިއެވެ. "ކޮން ކަމެއް އަޝްރަފް؟ ކިޔައިދީބަލަ" ސަލީމް އެދުނެވެ.
އަޝްރަފް ކުޑަ ހިނދުކޮޅަކަށް ވިސްނާލުމަށްފަހު، ރަށުގައި ދިމާވެފައިވާ މައްސަލައިގެ ތަފްޞީލު ބަޔާންކުރަން ފެށިއެވެ. އަދި އޭނާގެ ދަތުރުގެ މަޢުލޫމާތާއެކު، މި ކަންބޮޑުވުމަށް އަވަސް ހައްލެއް ހޯދުމުގެ މުހިންމުކަން ފާހަގަކުރިއެވެ.
ސަލީމް ވަރަށް އަހައްމިއްޔަތުކަމާއެކު އަޝްރަފްގެ ވާހަކަތަކަށް ކަންފަތް ދިނެވެ. އަޝްރަފް ވާހަކަ ނިންމުމުން، ސަލީމް ވިސްނުންތެރިކަމާއެކު ހިނދުކޮޅަކަށް ވިސްނާލިއެވެ. އޭގެ ފަހުން އޭނާ ބުނެލިއެވެ. "އަޝްރަފް، މިއީ ޙަޤީޤަތުގައިވެސް ވަރަށް ނާޒުކު މައްސަލައެއް. އަޅުގަނޑުމެން މިކަމާ ގުޅޭގޮތުން ލަސްނުކޮށް ފިޔަވަޅު އަޅަންޖެހޭ".
ސަލީމް އޭނާގެ ޚިޔާލުތައް ހާމަކުރަން ފެށުމުން، އަޝްރަފް ވަރަށް ސަމާލުކަމާއެކު އެ ވާހަކަތަކަށް އަޑުއަހަން ފެށިއެވެ. އޭނާގެ ހިތުގައި އުއްމީދުގެ އައު ރޫޙެއް އުފެދެމުން ދިޔައެވެ. އަޝްރަފާއި ސަލީމް ގިނަ ވަގުތުތަކެއް ހޭދަކޮށްގެން މައްސަލައިގެ އެކި ދިމާތަކާމެދު ފުންކޮށް މަޝްވަރާކުރިއެވެ. އެ ދެމީހުން ވިސްނުންތެރިކަމާއެކު އެކި ބާވަތުގެ ހައްލުތަކެއް ހުށަހަޅަމުން ދިޔައެވެ. މި ޚިޔާލީ މަޝްވަރާގެ ތެރެއިން، އެންމެ އެކަށީގެންވާ އަދި ޢަމަލީގޮތުން ތަންފީޒުކުރެވޭނެ ހައްލުތަކެއް ފާހަގަކުރެވުނެވެ.
އެހެންނަމަވެސް، އަޝްރަފްގެ އެންމެ ބޮޑު ކަންބޮޑުވުމަކަށްވީ އެރަށުން ފުރާ ދުވަސް ގާތްވަމުން ދިއުމެވެ. މި ކަންބޮޑުވުން އޭނާ ހާމަކުރުމުން، ސަލީމް އެދުނީ އަދިވެސް އިތުރު ދުވަސްތަކަކަށް އެރަށުގައި މަޑުކޮށްލަ ދިނުމަށެވެ. މައްސަލައިގެ ނާޒުކުކަމާއި މުހިންމުކަން ވިސްނި، އެންމެފަހުން ސަލީމް އެއްބަސްވީ އަޝްރަފްގެ ހުރިހާ ޚަރަދެއްވެސް އޭނާ އަމިއްލައަށް ބަލަހައްޓާ ގޮތަށެވެ. މިކަމުން އަޝްރަފްގެ ހިތަށް ވަރަށް ބޮޑު ހިތްހަމަޖެހުމެއް ލިބުނެވެ.
މި ދެ މީހުންގެ މެދުގައި އުފެދުނު އެއްބާރުލުމާއި އެކުވެރިކަމުގެ ސަބަބުން، މައްސަލަ ޙައްލުކުރުމަށް އިތުރު ހިތްވަރަކާއި ޢަޒުމެއް ލިބިގެން ދިޔައެވެ. އެމީހުން ގަބޫލުކުރި ގޮތުގައި، މިފަދަ ބޮޑު މައްސަލައެއް ޙައްލުކުރުމަށް ވަގުތާއި ކެތްތެރިކަން ބޭނުންވާނެއެވެ. އެހެންކަމުން، އެމީހުން ނިންމީ ކުރިއަށް އޮތް ދުވަސްތަކުގައި މައްސަލައިގެ އެކި ދިމާތަކަށް އަމާޒުކޮށްގެން މަސައްކަތްކުރާ ގޮތަށެވެ.
ކުއްލިއަކަށް، ސަލީމްގެ އަންހެނުން އައިސް ވަނުމާއެކު ދެމީހުންގެ ވާހަކަ މެދުކެނޑުނެވެ.
ސަލީމް އަވަސް އަވަހަށް މައުޟޫ ބަދަލުކޮށްލަން އުޅުނެވެ.
"އަހަރެމެން މިދައްކަނީ ރަށުގެ ތަރައްޤީގެ ވާހަކަ. އަޝްރަފްގެ ޚިޔާލުތައް ވަރަށް ރަނގަޅު" ސަލީމް އަވަސް އަވަހަށް ބުންޏެވެ.
"އެބަހުރި ވަރަށް ރަނގަޅު ކުއްޖަކު. އަޝްރަފް އާއި ވަރަށް ގުޅޭނެހެން ހީވަނީ. ދެން މިރަށުން ދާނެކަމެއް ނެތް" ނަމަވެސް ޒުހުރާ އެހެން ވާހަކައެއް ދައްކަން ފަށައިފިއެވެ.
އަޝްރަފްގެ މޫނުމަތިން ކުލަ ބަދަލުވެއްޖެއެވެ. ސަލީމް ވެސް ހައިރާންވެފައި ހުރި ގޮތް ފާޅުވިއެވެ.
"ކާކު؟ ކޮން ކުއްޖެއް؟" އަޝްރަފް އަހާލިއެވެ.
"އަމީނާ. ވަރަށް ރީތި، ރަނގަޅު އަޚްލާޤު ހުރި ކުއްޖެއް. އަޝްރަފް އާއި ވަރަށް ގުޅޭނެ" ޒުހުރާ ޖަވާބު ދިނެވެ.
ސަލީމް ހަމަޖެހިލައިފިއެވެ. އޭނާ ހިތަށް އެރީ މިއީ ރަނގަޅު ފުރުސަތެއް ކަމަށެވެ. އަޝްރަފްގެ ސަމާލުކަން އެހެން ދިމާލަކަށް ބަދަލުކުރެވިދާނެ ކަމަށް ހީވިއެވެ.
"ވަރަށް ރަނގަޅު! މާދަމާ ރޭ ކޮފީ ބުއިމަށް ދަޢުވަތު އަރުވަން. އަމީނާ ވެސް ގެންނާނަން" ސަލީމްގެ އަންހެނުން އުފަލުން ހެވުނެވެ. އަޝްރަފްވެސް އެއްބަސްވެލުމުގެ ގޮތުން ބޯޖަހައިލިއެވެ.
ރޭގަނޑު އަށެއް ޖަހާއިރު، އަޝްރަފް ޒީނަތްތެރިވެ، ހެދުން އަޅައިގެން، އަތިރިމަތީގައި ހުރި ރެސްޓޯރަންޓަށް ވަދެ، ސަލީމާއި އޭނާގެ އަންހެނުން އަންނާނެ ވަގުތަކަށް އިންތިޒާރުކުރަން ފެށިއެވެ. މި ސަރަޙައްދަކީ އާންމުކޮށް މީހުން ދަތުރުކޮށް އުޅޭ ތަނެކެވެ. ރޭގަނޑުގެ ފިނިކަމުގައި، ކުޑަކުދިން ގޮވައިގެން އެކުދިންގެ މައިންބަފައިން އެތަނުގައި ހިނގާބިނގާވެ އުޅެމުންދިޔައެވެ.
އަޝްރަފް އިން މޭޒުގެ ކައިރީގައި ހުރި ފެން ތަށި ނަގައި، ބޯލާފައި އަނބުރާ ބެހެއްޓިއެވެ. އޭނާގެ ހިތުގައި ކަންބޮޑުވުން އުފެދެމުންދިޔައެވެ. ސަލީމާއި އޭނާގެ އަންހެނުން ލަސްވަމުންދާތީއެވެ. އެހެންނަމަވެސް، އެވަގުތު އަޝްރަފަށް ބަލާލެވުނީ ރެސްޓޯރަންޓްގެ ދޮރާ ދިމާލަށެވެ. އެތަނުން ވަންނަމުން އައީ ސަލީމާއި އޭނާގެ އަންހެނުންނެވެ. އަޝްރަފްގެ މޫނުމަތިން ހިނިތުންވުމެއް ފެނިގެން ދިޔައެވެ. އަޝްރަފް ތެދުވެ، އެ ދެމަފިރިންނާ ދިމާލަށް އަތް ހޫރާލިއެވެ. ސަލީމާއި އޭނާގެ އަންހެނުން އަޝްރަފް އިން މޭޒާ ހަމައަށް އައިސް، ސަލާމްކުރުމަށްފަހު އިށީނދެލިއެވެ. އަޝްރަފް އެ ދެމަފިރިންނާ ވާހަކަދައްކަން ފެށިއެވެ.
"ހާދަ އަވަހަކަށް އައިސްތިއިނީ" ސަލީމް ހޭންފެށިއެވެ.
"އާނ. ގަޑިއެއް ކިޔައިފިއްޔާ ވާނެ ގަޑިއަށް އަންނަން" އަޝްރަފްވެސް ހޭންފެށިއެވެ.
"އެބަ އަންނަމޯ އަމީނާ ބުނީ" ސަލީމް ވާހަކަ ދައްކަން ފެށިއެވެ.
އެހެންބުނިތަނާހެން އަމީނާ އައިސް ދޮރުމައްޗަށް ހުއްޓުނެވެ. އަޝްރަފް ކޮޅަށް ތެދުވެވުނެވެ. އަމީނާ ފަރި ހިނގުމެއްގައި އައިސް އަޝްރަފްމެން ތިބި މޭޒުގައި އިށީނެވެ.
"މިއީ އަމީނާ. ވަރަށް ރަނގަޅު ކުއްޖެއް. ވަރަށް ބަސްއަހާނެ" އަމީނާ އިށީނުމާއި އެކު ސަލީމް އަމީނާ އަޝްރަފަށް ތަޢާރަފް ކޮއްލަދިނެވެ.
"މަރުޙަބާ އަމީނާ، ބައްދަލުވީތީ ވަރަށް އުފާވެއްޖެ" އަޝްރަފް އަމީނާއާ ދިމާލަށް ހިނިތުންވެލަމުން ބުންޏެވެ.
"ޝުކުރިއްޔާ އަޝްރަފް. އަޅުގަނޑުވެސް ވަރަށް އުފާވެއްޖެ" އަމީނާ އަދަބުވެރިކަމާއެކު ޖަވާބުދިނެވެ.
"ދެން އަހަރެމެން ކެއުމުގެ ކަންތައް ފަށަމާތޯ؟ އެންމެން ބަނޑުހައިވެފައި ތިބޭނީ" ސަލީމް މޭޒުމަތީގައި އޮތް މެނޫކާޑު ނަގައި ބަލާލަމުން ބުންޏެވެ.
"އަހަރެންވެސް މިހާރު ވަރަށް ބަނޑުހައިވެއްޖެ" އަޝްރަފް އެއްބަސްވެ ބުންޏެވެ.
"މިތާ ވަރަށް ރަނގަޅު ކާނާ ހުރިކަމަށް އަޑުއިވިފައިވޭ. ޚާއްޞަކޮށް މަހުގެ ބާވަތްތައް" އަމީނާ މެނޫކާޑު ބަލާލަމުން ބުންޏެވެ.
"މިތަނުގެ ދިވެހި ކާނާ ވަރަށް މޮޅު. އަހަރެމެން ކުރިންވެސް މިތަނަށް އައިން" ސަލީމްގެ އަންހެނުން ވާހަކައަށް ގުޅެމުން ބުނެލިއެވެ.
"އެހެންވިއްޔާ، އަހަރެމެން އެންމެން ވަކިވަކިން ކާން ބޭނުންވާ އެއްޗެހި އޯޑަރުކުރުމުގެ ބަދަލުގައި، ބޭނުންވާ ހުރިހާ ކާނާއެއް އެއްފަހަރާ އޯޑަރުކޮށްލަން ކިހިނެއްވާނެ؟ އޭރުން އެންމެންނަށްވެސް ހުރިހާ ވައްތަރެއްގެ ކާނާ ރަހަ ބަލާލެވޭނެ" އަޝްރަފް ހުށަހެޅިއެވެ.
"ސާބަހޭ! އެއީ ވަރަށް ރަނގަޅު ޚިޔާލެއް. އަހަރެމެން އެގޮތަށް ހަދަމާދޯ؟" ސަލީމް އުފާވެރިކަމާއެކު ބުންޏެވެ.
އެންމެން އެއްބަސްވުމާއެކު، އެމީހުން ވޭޓަރަށް ގޮވާލައި، ކާން ބޭނުންވާ ތަފާތު ބާވަތްތަކުގެ ކާނާ އޯޑަރުކުރަން ފެށިއެވެ. މާޙައުލުގައި އުފާވެރި ޖައްވެއް ވެރިވެ، ކެއުމުގެ ވަގުތު ފެށިގެން ދިޔައެވެ.
ކާން ފެށުމާއެކު، އެންމެން ދެމެދުގައި އުފާވެރި މާޙައުލެއް އުފެދިގެން ދިޔައެވެ. އަޝްރަފް، ވާހަކަ ފެށުމުގެ ގޮތުން އަމީނާއާ ދިމާލަށް ބަލާލަމުން ބުންޏެވެ. "އަމީނާ، ކިޔަވަމުންދަނީ ކޮން ދާއިރާއަކުން؟"
"އަޅުގަނޑު ކިޔަވަމުންދަނީ ތިމާވެށީގެ ދާއިރާއިން. ޚާއްޞަކޮށް، ކަނޑުގެ ދިރުންތަކާއި ފަރުތަކުގެ ދިރާސާތަކަށް އަހަންމިއްޔަތުކަން ދެމުން" އަމީނާ ހިނިތުންވެލަމުން ޖަވާބުދިނެވެ.
"އަމީނާއަކީ އޭނާގެ ދާއިރާގައި ވަރަށް ހުނަރުވެރި ޒުވާނެއް. މިދިޔަ އަހަރު ބައިނަލްއަޤްވާމީ ޖަމްޢިއްޔާއެއްގެ ފަރާތުން ހިންގި ދިރާސާއެއްގައިވެސް ބައިވެރިވެފައިވޭ" ސަލީމް ފަޚުރުވެރިކަމާއެކު އިތުރުކޮށްލިއެވެ.
"އޯހް! އެއީ ވަރަށް ފަޚުރުވެރިވާންޖެހޭ ކަމެއް. ދިވެހިރާއްޖެއަށް ތިމާވެށީގެ ދާއިރާއިން ކުރިއެރުން ހޯދުމަކީ ވަރަށް މުހިންމު ކަމެއް" އަޝްރަފްގެ މޫނުމަތިން ޝައުޤުވެރިކަން ފާޅުވެގެން ދިޔައެވެ.
"ޝުކުރިއްޔާ ތި ހިތްވަރުދެއްވީތީ. އަޅުގަނޑުގެ އުންމީދަކީ މި ދާއިރާއިން ރާއްޖެއަށް ފައިދާހުރި ޚިދުމަތްތަކެއް ކުރެވުން" އަމީނާ ޝުކުރުވެރިކަމާއެކު ބުންޏެވެ.
"ވަރަށް ރަނގަޅު. ތިޔަ ދާއިރާއިން ކުރިއަށްދިއުމަށް ބޭނުންވާ އެހީތެރިކަމެއް ވާނަމަ، އަހަރެންނަށް ވެދެވޭނެ އެހީތެރިކަމެއް ދެވޭތޯ ބަލާނަން" އަޝްރަފް ހިތްވަރުދިނުމުގެ ގޮތުން ބުންޏެވެ.
ޝުކުރިއްޔާ އަޝްރަފް. ތިޔައީ ވަރަށް މާތް ވިސްނުމެއް" ސަލީމް އުފާވެރިކަމާއެކު ބުންޏެވެ.
މިހާހިސާބުން، ވޭޓަރު އެމީހުން އޯޑަރުކުރި އެހެން ކާނާ ގެނެސް މޭޒުމަތީގައި ބަހައްޓަން ފެށިއެވެ. އެންމެންގެ މޫނުމަތިން އުފާވެރިކަމާއި ޝައުޤުވެރިކަން ފެންނަން ހުއްޓެވެ.
= ނުނިމޭ =
