އެމީހުންގެ މަޝްވަރާ ނިމުމަކަށް އައީ، ވީއެންމެ އަވަސް ފުރުޞަތެއްގައި ސިއްތިއާ ބައްދަލުކޮށް، މި މައްސަލައަށް ޙައްލެއް ހޯދުމަށް ނިންމާލަމުންނެވެ. މި މަސައްކަތް ކުރިއަށް ގެންދަންވާނީ ވަރަށް ވިސްނުންތެރިކަމާއި ޙިކުމަތްތެރިކަމާއެކުގައެވެ. އެހެންނޫނީ، ސިއްތިއަށް ކަންތައް ވިސްނައިދިނުމަކީ ފަސޭހަ މަސައްކަތަކަށް ނުވެދާނެއެވެ.
ހެނދުނުގެ ވަގުތުކޮޅު، އަމީނާ އާއި އޭނާގެ މަންމަ ސިއްތިއާ ބައްދަލުކުރުމަށް އަވަސްވެގަތެވެ. ހެނދުނު ލުއި ސައެއް ނިންމުމަށްފަހު، އެ ދެމީހުން ސިއްތިގެ ގެއާ ދިމާއަށް ދަތުރު ފެށިއެވެ. ސިއްތިމެންގެ ގެ ހުރީ ރަށުގެ އުތުރު ސަރަޙައްދުގައި، ގޮނޑުދޮށާ ކައިރީގައެވެ. މި ދަތުރަކީ ގާތްގަނޑަކަށް ދިހަ މިނެޓުގެ ހިނގާފަ ދެވޭ ހިސާބެވެ.
ސިއްތިގެ ގޭގެ ދޮރުމަތީގައި ހުއްޓި އަމީނާގެ މަންމަ ދޮރުގައި ޓަކި ޖެހިއެވެ. ސިއްތި ދޮރު ހުޅުވައި، އެ ދެ މެހުމާނުންނަށް އެތެރެއަށް ވަނުމަށް މަރުޙަބާ ކިޔައި، އިޝާރާތްކޮށްލިއެވެ. ސިއްތިގެ މޫނުމަތިން ފެންނަމުން ދިޔައީ ރީތި ހިނިތުންވުމެކެވެ. ނަމަވެސް، އެ ހިނިތުންވުމުގެ ފަހަތުގައި ފޮރުވިފައިވާ ކަންބޮޑުވުމެއް ވާކަން އަމީނާއަށް އިހުސާސް ކުރެވުނެވެ.
ސިއްތި ސޯފާގައި އިށީނދެ، އަމީނާއާއި އޭނާގެ މަންމައަށްވެސް އިށީނުމަށް އަދަބުވެރިކަމާއެކު އިޝާރާތްކޮށްލިއެވެ. އަމީނާގެ މަންމަ ވާހަކަ ފެށިއެވެ. "ސިއްތި، އަޅުގަނޑުމެން މި އައީ ވަރަށް މުހިންމު މައްސަލައަކާ ގުޅިގެން" އަމީނާގެ މަންމަ ވާހަކަ ދައްކަން ފެށިއެވެ.
"އަހަރެންނަށް އެނގޭ ތި އައީ ކޮން ކަމަކާ ގުޅިގެންކަން" އަމީނާގެ މަންމަގެ ވާހަކަ ނުނިމެނީސް ސިއްތި މަޑުމައިތިރިކަމާއެކު ބުނެލިއެވެ.
އަމީނާގެ ހިތުގައި އިންތިހާއަށް ބިރުވެރިކަން އިތުރުވެގެން ދިޔައެވެ. އޭނާގެ މަންމަ އައީ ކޮންވާހަކައެއް ދައްކަންކަން ސިއްތިއަށް އެނގިފައިވާކަން އަމީނާއަށް ޔަޤީންވިއެވެ. އަމީނާ އޭނާގެ މަންމައަށް ނަޒަރު ހިންގާލިއެވެ. އަމީނާގެ މަންމަގެ މޫނުމަތިން ފާޅުވަމުން ދިޔައީ ކަންބޮޑުވުމުގެ އަސަރުތަކެވެ.
ސިއްތިގެ މޫނުމަތިން ފެންނަމުން ދިޔަ ހިނިތުންވުން ކުއްލިއަކަށް ފިލައިގެން ދިޔައެވެ. ސިއްތި ހިތްހަމަނުޖެހުނެވެ. އަދި ކޮޅަށް ތެދުވެ ބާރަކަށް ވާހަކަ ދައްކަންފެށިއެވެ.
"އަމީނާއަކީ އަހަރެމެންގެ ގޭގެ ހަމަޖެހުމާއި އުފާވެރިކަން ނަގާލި މީހެއް. އޭނާގެ ނުބައި ޢަމަލުތަކުގެ ސަބަބުން އަހަރެންގެ ލޯބިވާ ދަރިފުޅު ދުނިޔެ ދޫކޮށް ދިޔައީ. މިހާރު އޭނާ އަމާޒުކޮށްފައި މިވަނީ އަޝްރަފްއަށް. މިފަދަ ނުރައްކާތެރި ޢަމަލުތަކަށް ހުއްޓުމެއް ގެންނަން ޖެހޭ" ސިއްތި ހަރުކަށި ރާގެއްގައި ބުންޏެވެ.
ސިއްތިގެ ވާހަކައިން އެތަނުގައި ތިބި އަމީނާ އާއި އޭނަގެ މަންމަގެ މޫނުމަތިން ހައިރާންކަން ފެނުނެވެ. ވަށައިގެން އޮތް ހަމަހިމޭންކަން ފަޅައިގެން ދިޔައެވެ. އަމީނާގެ މަންމަ ކުރިއަށް ޖެހިލައި، ސިއްތިގެ ކައިރިއަށް ދިޔައެވެ.
"ސިއްތި، އަހަރެންނަށް އެނގޭ ތިހެން ތިބުނަނީ ހިތްދަތިކަމުންކަން. އެހެނަސް މިކަހަލަ ބޮޑެތި ތުހުމަތުތައް ކުރުމުގެ ކުރިން، އެބަޖެހޭ ހެކި ހޯދަން. އަމީނާގެ މައްޗަށް މިފަދަ ދަޢުވާއެއް ކުރުމުގެ ކުރިން، އެބަޖެހޭ ފުންކޮށް ވިސްނަން" އަމީނާގެ މަންމަ ވަރަށް މަޑުމައިތިރި ރާގެއްގައި ބުންޏެވެ.
"ހެކި؟ އަދިވެސް ހެއްކެއް ބޭނުންވަނީތަ؟ އަހަރެންގެ ލޯބިވާ ދަރިފުޅު ގެއްލުނީ ހެކި ނެތިގެންތަ؟ އަޝްރަފްގެ ފުރާނައަށްވެސް ގެއްލުމެއް ވުމުގެ ކުރިން އަހަރެން އޭނާ ސަލާމަތްކުރަން އެބަޖެހޭ!" ސިއްތި އަމީނާގެ މަންމައަށް ނުރުހުމުގެ ގޮތުން ބަލާލިއެވެ. އޭނާގެ މޫނުމަތިން ރުޅިވެރިކަން ފާޅުވަމުން ދިޔައެވެ.
"ސިއްތި، އަހަރެންނަކީ ތިޔަ ބުނާ ކަންތައްތަކާ އެއްވެސް ގުޅުމެއް ނެތް މީހެއް. އަހަރެން ދުވަހަކުވެސް އެހެން މީހުންނަށް ގެއްލުމެއް ދޭކަށް ނޭދެން. އަހަރެންނަށް އެނގޭ ތިޔަ ކަމުގައި ހުރި ވޭން. އެހެނަސް އަހަރެންނަކީ އެކަމުގެ ޒިންމާ ނަގަންޖެހޭ ފަރާތެއް ނޫން" އަމީނާ، މިހާތަނަށް ހަނުހުރުމަށްފަހު، ކުރިއަށް ޖެހިލައި ވާހަކަދައްކަން ފެށިއެވެ.
"އަހަރެމެން އެންމެން މިތިބީ ވަރަށް ނާޒުކު ހާލަތެއްގަ. އަހަރެމެން އެބަޖެހޭ އެކަކު އަނެކަކަށް އިޙްތިރާމްކޮށް، ހަމަހިމޭންކަމާއެކު މައްސަލަ ޙައްލުކުރުމަށް މަސައްކަތްކުރަން. ހަމަނުޖެހުމާއި ތުހުމަތުތަކުން އިތުރު ގެއްލުންތަކެއް ލިބިދާނެ" އަމީނާގެ މަންމަ އޭނާގެ ދަރިފުޅުގެ ކޮނޑުގައި އަތްލާ ހިތްވަރު ދިނެވެ.
ސިއްތި ހުރީ އެއްވެސް ގޮތަކަށް ފަހަތަށް ޖެހޭ ކަހަލަ ހާލަތެއްގައެއް ނޫނެވެ. އެންމެ ފަހުން އެތަނުން ނިކުމެގެން ދާން މަޖުބޫރުވީ އަމީނާއާއި އޭނާގެ މަންމައަށެވެ. ސިއްތިމެންގެ ގެއިން ނުކުމެ، ގެއާ ދިމާއަށް ހިނގަމުންދިޔައިރު، އެ ދެމީހުންގެ ހިތުގައި އޮތީ ކުރިމަގުގައި ދިމާވެދާނެ ކަންތައްތަކާ މެދު ކަންބޮޑުވުމެވެ. މި ރަށުގައި ސިއްތި މި ވާހަކަ ފަތުރަން ފަށައިފިނަމަ، މުޅި މުޖުތަމަޢުން އަމީނާއާއި އޭނާގެ ޢާއިލާއާ މެދު ނަފްރަތު އުފެދޭނެކަން ޔަޤީނެވެ.
އަމީނާއާއި އޭނާގެ މަންމަ ގެއާ ހަމައަށް ދެވުނު އިރު، އެ ދެމީހުންގެ ހިތުގައި އޮތީ ބޮޑު ބިރެކެވެ. ގޭގެ ދޮރުމަތީގައި ހުއްޓި، އެކަކު އަނެކަކަށް ބަލާލިއެވެ. އެ ދެމީހުންގެ ލޮލުގައި އޮތީ ކުރިމަތިވެދާނެ ނޭދެވޭ ނަތީޖާތަކުގެ ކަންބޮޑުވުމެވެ. އަމީނާގެ މަންމަ، އޭނާގެ ދަރިފުޅުގެ އަތުގައި ހިފައި، ހިތްވަރު ދިނުމުގެ ގޮތުން ބާރުކޮށްލިއެވެ.
"ދަރިފުޅާ، ކަންބޮޑު ނުވާތި. އަހަރެމެން މިކަން ހައްލުކުރާނަން. ސިއްތި އެހާ ނުބައި މީހެއް ނޫން. އޭނަ ވެސް ވިސްނާނެ މިކަމުގެ ނުރައްކާތެރިކަން" އަމީނާގެ މަންމަ ވަރަށް މަޑުމައިތިރިކޮށް ބުންޏެވެ.
އަމީނާ އޭނާގެ މަންމައަށް ބަލާލުމަށްފަހު، ބޯ ޖަހާލިއެވެ. ނަމަވެސް، އޭނާގެ ހިތުގައި އޮތީ އަދިވެސް ބިރެކެވެ. ސިއްތިގެ ކުރިމަތީގައި އެ ދެމީހުން ދެރަވެފައިވާ މިންވަރު ހަނދާންވުމުން، އަމީނާގެ ލޮލުން ކަރުނަ ހިލިގަތެވެ. އެހެންނަމަވެސް، އޭނާގެ މަންމަގެ ބަސްތަކުން ކޮންމެވެސް ވަރެއްގެ ހިތްހަމަޖެހުމެއް ލިބުނެވެ.
އަމީނާއާއި އޭނާގެ މަންމަ ގެއަށް ވަދެ، ސިއްތިގެ ފަރާތުން ދިމާވެދާނެ ކަންތައްތަކާ މެދު މަޝްވަރާކުރަން ފެށިއެވެ. އެ ދެމީހުން އެއްބަސްވީ މި މައްސަލަ ވީހާވެސް އަވަހަކަށް ހައްލުކުރަން މަސައްކަތްކުރުމަށެވެ.
"މަންމަ، އަހަރެމެން މިހާރުން މިހާރަށް ސިއްތި ގާތަށް ގޮސް، އޭނައާ ވާހަކަދައްކަން ޖެހޭ. އެހެންނޫނީ، މުޅި ރަށަށް މި ވާހަކަ ފެތުރިދާނެ" އަމީނާ ކަންބޮޑުވުމާއެކު ބުންޏެވެ.
"ރަނގަޅު ވާހަކައެއް ދަރިފުޅާ. އެކަމަކު އަހަރެމެން މިކަމާ މެދު ރަނގަޅަށް ވިސްނަންޖެހޭ. ސިއްތިއަކީ ރުޅިގަދަ މީހެއް. އަހަރެމެން އޭނަ ގާތަށް ދާއިރު، އަހަރެމެންގެ ވާހަކަތައް ރަނގަޅަށް ތަރުތީބުކޮށްގެން ދާންވާނީ. އަދި އެހާ އަވަސް އަވަހަށް ދިއުންވެސް ރަނގަޅެއް ނުވާނެ" އަމީނާގެ މަންމަ ވިސްނުންތެރިކަމާއެކު ބޯޖަހާލަމުން ބުންޏެވެ.
"މަންމަ ރަނގަޅު. އެކަމަކު އަހަރެމެން ލަސްވެއްޖެއްޔާ، ކަންތައް އިތުރަށް ގޯސްވެދާނެ ނޫންތަ؟" އަމީނާ އޭނާގެ މަންމައަށް އިޙްތިރާމާއެކު ބަލާލަމުން ބުންޏެވެ.
"އާނ، އެކަމަކު އަވަސްއަވަހަށް ގޮސް ކަންތައް އިތުރަށް ގޯސްކޮށްލުމަށްވުރެ، ކުޑަކޮށް ވިސްނާލުން މުހިންމު. އަހަރެމެން މިރޭ ރަނގަޅަށް ވިސްނާފައި، މާދަމާ ހެނދުނު ސިއްތި ގާތަށް ދާނީ. އޭރުން އަހަރެމެންނަށް ރަނގަޅަށް ވާހަކަދެއްކޭނެ" އަމީނާގެ މަންމަ ކެތްތެރިކަމާއެކު ޖަވާބުދިނެވެ.
އަމީނާ އޭނާގެ މަންމަގެ ބަސް ޤަބޫލުކުރިއެވެ. އެ ދެމީހުން އެ ރޭ ހޭދަކުރީ ސިއްތިއާ ދައްކާނެ ވާހަކަތައް ރޭވުމުގައެވެ. އެ ދެމީހުންގެ އުއްމީދަކީ ސިއްތިގެ ހިތް މަޑުކޮށް، މި މައްސަލަ ސުލްޙަވެރިކަމާއެކު ނިންމާލެވޭނެ ކަމަށެވެ. ނަމަވެސް، އަދިވެސް އެ ދެމީހުންގެ ހިތުގައި ވަނީ ބިރާއި ކަންބޮޑުވުމެވެ.
ހެނދުނު ހޭލުމާއެކު އަމީނާގެ އެންމެ ފުރަތަމަ މަސައްކަތަކަށްވީ ސައި ތައްޔާރުކުރުމެވެ. އަވަސްއަވަހަށް ބަދިގެއަށް ވަދެ ސައި ތައްޔާރުކޮށްލުމަށްފަހު މަންމައަށް ގޮވާލުމަށް ބޭރަށް ނުކުތް ވަގުތު، އަޝްރަފާއި ސަލީމް ގޯތިތެރެއަށް ވަދެގެން އަންނަ މަންޒަރު ފެނި ހުއްޓުނެވެ. އަދި އެ ދެމީހުންނަށް އެންމެ ފުރަތަމަ ސަލާމްގޮވާލީ އަމީނާއެވެ.
އަޝްރަފާއި ސަލީމް ގޯތިތެރެއަށް ވަނުމާއެކު، އަމީނާ އެ ދެމީހުންނާ ދިމާއަށް ހިނގައިގަތެވެ. އޭނާގެ މޫނުމަތީގައި ހިނިތުންވުމެއް ވިޔަސް، ހިތުގައި ވަނީ ކަންބޮޑުވުމެވެ. އެހެންނަމަވެސް، މެހުމާންދާރީ އަދާކުރުމަކީ އަމީނާގެ ޒިންމާއެއް ކަމުގައި ދެކި، އެ ދެމީހުންނަށް މަރުޙަބާ ކިޔައި، ގެއަށް ވަނުމަށް ދަޢުވަތު ދިނެވެ.
އަޝްރަފާއި ސަލީމް ވެސް އަމީނާގެ ސަލާމަށް ރައްދު ދިނުމަށްފަހު، ގެއަށް ވަނެވެ. އެ ދެމީހުންގެ މޫނުމަތީގައި ވެސް ފެންނަން ހުރީ ކަންބޮޑުވުމުގެ ނިޝާންތަކެވެ. އަމީނާ އެ ދެމީހުންނަށް އިށީނުމަށް ބުނެ، ސައި ގެނައުމަށް ބަދިގެއަށް ދިޔައެވެ.
މި ވަގުތު އަމީނާގެ މަންމަ ވެސް ކޮޓަރިން ނުކުމެ، މެހުމާނުންނާ ބައްދަލުކުރިއެވެ. އެންމެން އެއްތަނަކަށް އެއްވުމާއެކު، އަމީނާ ސައި ގެނެސް، އެމީހުންގެ ކުރިމަތީގައި ހުރި މޭޒުމަތީގައި ބެހެއްޓިއެވެ.
"ކޮބާ ކިހިނެއް ހާލު" އަމީނާގެ މަންމަ ސުވާލުކޮއްލިއެވެ.
"ރަނގަޅު" ސަލީމް އާއި އަޝްރަފްއަށް ޖަވާބު ދެވުނީ އެއްފަހަރާއެވެ.
" ސިއްތިމެންގެ ގެއަށް ގޮސް މައްސަލަ ހައްލުކުރަން އުޅެއުޅެ އެކަމެއް ނުވި. އެހެންތާ ވާނީ އެއީ ސިކުނޑި ހަމަނުޖެހޭ މީހަކަށް ވީމަ. އެންމެފަހުން އަހަރެމެން އައީ" އަމީނާ އައިސް އެތިން މީހުންނާއި ބައިވެރިވިއެވެ.
"ސިއްތި ބުނަނީ އޭނަގެ ދަރިފުޅުގެ މަރާއި އަމީނާ އާއި ގުޅުމެއް ވެޔޯ. ސިހުރު ހެދީޔޯ. އެކަމަކު އެއީ ހުސްދޮގު" އަމީނާގެ މަންމަ ވާހަކަ ދައްކަން ފެށިއެވެ.
"ފަހުން ސިއްތި ހަމައަކަށް އެޅިދާނެ. އަޅާނުލާ" އަޝްރަފް ޖަވާބު ދިނެވެ.
"ނުވާނެ ރަނގަޅެއް. ވާނަމަ މިހާރު ހުންނާނީ ރަނގަޅުވެފައި" އަމީނާ ބުނެލިއެވެ.
ސަލީމް ބޭނުންވީ އަޝްރަފް އާއި އަމީނާގެ ވާހަކަ ކުރިއަށް ގެންދާށެވެ. އެކި ގޮތްގޮތަށް އަނބުރައިގެންވެސް އެވާހަކަ ދެއްކޭނެ ގޮތެއް ނުވިއެވެ. ނަމަވެސް އެންމެފަހުން އެކަހަލަ ވާހަކައެއް ފެށީވެސް އަމީނާގެ މަންމައެވެ. އޭނަގެ ދުލުން ބޭއިޚްތިޔާރުގައި ބުނެވުނު ބަހަކުން ސަލީމް ކުރިއަށް ގެންދިޔައެވެ.
"އެހެންތާ ވާނީ އަދިވެސް އެ ހުންނަނީ މީހަކާއި އިންނަން ނުކެރިފަ. އަހަރެން ބުނެފިން އަވަހަށް މީހަކާއި އިނދެބަލާށޭ. އެކަމަކު ވަރަށް ފަހުން އަމީނާ ބުނި އަޝްރަފް އެއީ ވަރަށް ރަނގަޅު ކުއްޖެކޭ" އަމީނާގެ މަންމަ ހޭންފެށުމުން އަޝްރަފް ލަދުން އިސްދަށަށް ޖަހާލައިގެން އިނެވެ.
"އަޝްރަފް އޯކޭ" ސަލީމް ފުރުސަތުގެ ބޭނުން ހިފިއެވެ.
"އާނ، ސަލީމް ރަނގަޅު ވާހަކައެއް ތި ދެއްކީ. އަޝްރަފް، އަމީނާއާ ވާހަކަ ދައްކާލަބަލަ. ގަބޫލުކުރަން، ކައިވެނި ކުރުމަކީ ބޮޑު ނިންމުމެއް. އެކަމަކު ދެ މީހުން އެއްބަސްވެއްޖެނަމަ، އަހަރެމެން ތިޔަ ދެ ކުދިންނަށް ފުރިހަމަ އެއްބާރުލުން ދޭނަން" އަމީނާގެ މަންމަ މި ވާހަކަ އަޑުއަހަމުން، ހިނިތުންވެލަމުން ބުނެލިއެވެ.
މި ވަގުތު އެތަނުގައި ކުޑަ ހިނދުކޮޅަކަށް ހަމަހިމޭންކަމެއް އައެވެ. އަޝްރަފް އަދިވެސް އިނީ ލަދުވެތިކަމާއެކު އިސްދަށަށް ޖަހާލައިގެންނެވެ. އަމީނާ ވެސް ހުރީ އެހާމެ ހަމަހިމޭންކޮށެވެ. ސަލީމް މި ވަގުތުގެ ބޭނުން ހިފައި، އިތުރަށް ވާހަކަ ކުރިއަށް ގެންދިޔައެވެ.
"އަޝްރަފް، މިއީ ރަނގަޅު ފުރުޞަތެއް. އަމީނާއަކީ ވަރަށް ރަނގަޅު އަޚްލާޤެއްގެ އަދި ތަޢުލީމީ ޒުވާނެއް. އަޝްރަފްއަށް ވެސް އެނގޭނެ ފަދައިން، އޭނާއަކީ އަބަދުވެސް އާއިލާއަށް އިސްކަންދޭ މީހެއް" ސަލީމް ސިއްރު ސިއްރުން އަޝްރަފްގެ ކަންފަތް ދޮށުގައި ބުނެލިއެވެ.
އަޝްރަފް މަޑުމަޑުން އިސްއުފުލާ، އަމީނާއަށް ބަލާލިއެވެ. އަމީނާ ވެސް ލަދުވެތި ހިނިތުންވުމަކާއެކު އަޝްރަފަށް ބަލާލިއެވެ. އަމީނާގެ މަންމަ މި މަންޒަރު ބަލަން ހިނިއައިސްފައި ހުއްޓެވެ.
އަޝްރަފާއި އަމީނާ ގޭގެ ގޯތިތެރެއަށް ނުކުތެވެ. ދެމީހުން ހިނގަމުން ދިޔައީ ހަމަހިމޭންކަމާއެކުގައެވެ. ގޯތިތެރޭގައި ހުރި ބޮޑު ގަހެއްގެ ދަށަށް ދިޔުމަށްފަހު، ދެމީހުން މަޑުކޮށްލިއެވެ. އެތަނުގައި ބެހެއްޓިފައި ހުރި ގޮނޑިއެއްގައި އިށީނދެލުމަށް އަޝްރަފް އަމީނާއަށް އިޝާރާތްކޮށްލިއެވެ.
"އަމީނާ... އަޅުގަނޑު ބުނާނީ ކީކޭ ބާއޭ..." އަޝްރަފް ވާހަކަ ފެށިއެވެ. އޭނާގެ އަޑުގައި ކުޑަ ހާސްކަމެއް ވެއެވެ.
އަޝްރަފް، ކަންބޮޑުނުވޭ. އަހަރެމެން ދެމީހުން ވެސް މި ވަގުތު ކޮންމެވެސް ވަރަކަށް ނާމާންކަން އިހުސާސް ކުރަމުންދާނެ ކަމަށް އަހަރެންނަށް ހީވަނީ" އަމީނާ ބުންޏެވެ. އޭނާގެ އަޑުގައި ވެސް ކުޑަ ހާސްކަމެއް އެކުލެވިގެންވިއެވެ.
"އަމީނާ، ކައިވެނިކުރުމަކީ ވަރަށް މުހިންމު ނިންމުމެއް. އަހަރެން ބޭނުންވަނީ އަމީނާއާއެކު އުފާވެރި ދިރިއުޅުމެއް އުޅެން" އަޝްރަފް ފުން ނޭވާއެއް ލުމަށްފަހު ވާހަކަ ކުރިއަށް ގެންދިޔައެވެ.
"އަޝްރަފް، އަހަރެން ވެސް ހަމަ އެފަދަ އިހުސާސްތަކެއް ކުރަން. އަހަރެމެން ދެމީހުންނަކީ އެކަކު އަނެކަކަށް ދަންނަ ދެ މީހުން. އަހަރެމެންގެ އަޚްލާޤާއި، ވިސްނުން ވެސް ވަރަށް ގާތް. އަހަރެންނަށް ހީވަނީ މި ކަމުގައި ކުރިއަށް ދެވިދާނެހެން" އަމީނާ ހިނިތުންވެލަމުން ޖަވާބުދިނެވެ.
"އަމީނާ، ތިޔަ ބަސްތަކުން އަހަރެންނަށް ވަރަށް ބޮޑު ހިތްވަރެއް ލިބިއްޖެ. އަހަރުމެން ދެމީހުން މިކަމާ ދޭތެރޭ އިތުރަށް ވާހަކަދައްކައި، ރަނގަޅަށް ވިސްނުމަށްފަހު ނިންމުމެއް ނިންމަމާ ހިނގާ" އަޝްރަފްގެ މޫނުމަތިން އުފާވެރިކަން ފެންނަން ފެށިއެވެ.
= ނުނިމޭ =
