ދިވެހި ފުޓްބޯޅައިގައި ޢަލީ ނިސްތާާރު މުޙައްމަދަކީ އާ ނަމަކަށް ނުވާނެއެވެ. އޭނާ އަކީ ދިވެހި ޕްރިމިއާލީގަށް ކުޅޭ ކްލަބް ގްރީން ސްޓްރީޓްސްގެ ހެޑްކޯޗެވެ. 1996ވަނަ އަހަރު މެލޭޝިއާގެ ސަންވޭ ކޮލެޖުގައި ތަޢުލީމު ހާސިލްކުރަން އުޅުނު ދުވަސްވަރު ރަގްބީ މެޗެއް ކުޅެގެން ކޮނޑުހުޅު ނެއްޓުނެވެ. އެއިރުވެސް ދިޔައީ މެލޭޝިއާގައި ދިވެހި ދަރިވަރުންގެ ފުޓްބޯޅަ ޓީމުގެ ކަންތައްތައް ރާވަމުންނެވެ.
1996"ގައި މެލޭޝިއާއިން ސްކޫލު ނިންމާފައި ކުޑަމޫސަގެ އިރުޝާދުގެ ދަށުން ހުރާއަށް ކުޅެންގޮސް ސީޒަން ނުފަށަނީސް އަނެއްކާ މެލޭޝިއާއަށް ކިޔަވަންދާން ޖެހިއްޖެ. ދެން އެކޮޅުގައި އުޅެމުން ކޮނޑުހުޅު އޮފަރޭޝަން ކުރީ 2000ވަނަ އަހަރު. ނުކުޅެ ހުރީމަ ހަށިގަނޑަށް ވަރަށް ބަދަލުތައް އައ"
އެހެން ހުއްޓާ 2008ވަނަ އަހަރު ކްލަބް އީގަލްސްގެ ދެވަނަ ޑިވިޝަނުގެ ސުކޮޑްގައި ހިމެނި ކުޅެލަން ފުރުސަތު ލިބުނެވެ. އެހެންނަމަވެސް ކުޅެވުނީ އެންމެ ދެމެޗުގަ ކުޑަ ވަގުތުކޮޅެއްގައެވެ. އޭގެ ފަހުން ތިންވަނަ ޑިވިޝަނުގައި އޮތް ކްލަބް ޕީކޭއާއި ގުޅުނެވެ. އެ ކްލަބުގައި 2 އަހަރު އުޅުނުއިރުވެސް އެއްވެސް މެޗަކުން ފުރުސަތެއް ނުލިބެއެވެ.
އެހިސާބުން ނިސްތާރު ދެން އެޚިޔާލު ދޫކޮށްލިއެވެ. ކުޅޭނެ ފުރުސަތު ނުލިބުނަސް ކޯޗުކޮށްދިނުމަކީ އޭނާ ވަރަށް ބޭނުންވާ ކަމަކަށްވާތީ ކޯޗިންގެ ދާއިރާއަށް ވަންނަން ވަރަށް މަސައްކަތް ކުރިއެވެ. މިއަދު އޭނާއަކީ ރާއްޖޭގެ ފުރަތަމަ ޑިވިޝަނުގައި ހިމެނޭ ކްލަބް ގްރީން ސްޓްރީޓްސްގެ ހެޑްކޯޗެވެ.
ކޯޗިންގެ ދާއިރާއަށް ވަދެވުނުގޮތް ޒީޓައިމްސްއަށް ކިޔައިދެމުން ކޯޗު ނިސްތާރު ބުނީ "އޭ.އެފް.ސީ އަށް ސިޓީ ފޮނުވިން ކޯޗިން ކޯހެއް ހޯދައިދޭށޭ ކިޔާފަ، ދެން އެމީހުން ދިނީ އެފް.އޭ.އެމް ނަމްބަރު، އެފް.އޭ.އެމަށް ގުޅީމަ ދިނީ ޝާޒް ކޯޗު (މުޙައްމަދު ޝާޒްލީ) ނަންބަރު، އޭރަކު ނޭނގޭ ޝާޒްއެއް، ޝާޒްކޯޗު ބުނީ އިޢުލާނު ކުރާނެއޭ، އެޕްލައި ކުރާށޭ، ދެން ފޭސްބުކްއިން ބޮޑުހީނާ (މިހާރުގެ ސްޕޯޓްސް ކޮމިޝަނަރ) ކައިރި ބުނިން. ހަނދާންވަނީ 2011 އޭ އެއީ. ދެން ގުޅުނީ ބޮޑުހީނާމެން ހިންގާ އާލީޓަޗް ފުޓްބޯޅަ އެކަޑަމީ އާ، އެހެން އުޅެމުން ލައިސަންސް ކޯހުގައި ބައިވެރިވެގެން އުޅެނިކޮށް އެދުވަސްވަރު އީގަލްސްގެ ޖެނެރަލް ސެކްރެޓަރީ މުފާބުނީ އީގަލްސް އަށޭ އަންނަން ޖެހޭނީ، އެއީ ކޯޗިން ފެށުނު ހިސާބަކީ"
އޭގެފަހުން ނިސްތާރަށް ފުރުސަތު ލިބުނީ އޭރުގެ އީގަލްސްގެ އަޙްމަދު ނިމާދު(މިހާރު އީގަލްސްގެ އެސިސްޓެންޓް ކޯޗު)ގެ އެސިސްޓެންޓަކަށެވެ. އަދި ހަމައެއާއެކު 21 އަހަރުންދަށުގެ އީގަލްސް ޓީމުގެ ކޯޗު އަޙްމަދު ޝާކިރު(ޝާކިއްޓެ)ގެ އެސިސްޓެންޓްކަން ކުރަން ފުރުސަތު ލިބުނެވެ. އޭގެކުރިން އަރަބިއްޔާ ސްކޫލްގައި 4 އަހަރު ކޯޗުކަން ކުރިއެވެ. އަދި އާލީޓަޗް ފުޓްބޯޅަ އެކެޑަމީގައި 7 އަހަރު އުޅުނެވެ.
"ދެން ސުޒޭން ކޯޗު އެއްދުވަހު ގުޅާފައެހީ 14 އަހަރުން ދަށުގެ ޤައުމީޓީމަށް ސާންތީ (އިހްސާން އަބްދުލްޣަނީ)އަށް އެސިސްޓް ކޮށްދެވިދާނެހޭ. ދެން 2014ގައި ސާންތީގެ އެސިސްޓެންޓަކަށް ހުރީ. ދެން 2015ގައި ޝާޒް ކޯޗު ބުނީ އަންނާށޭ ބީޖީއަށް. އީގަލްސްގައި ހަތަރު އަހަރު އެސިސްޓެންޓަކަށް އޭރު ހުރީ، ދެން ނިމާ ކައިރި އެހީމަ އޭނާ ބުނީ ރަނގަޅު ފުރުސަތެއް ނުލިބޭނެއޭ އަވަހަށް ދާށޭ"
އެއީ ޝާޒް ކޯޗާއި އެކު ނިސްތާރަށް ބީޖީއަށް ދެވުނު ހިސާބެވެ. ޝާޒް ސީޒަން ޕްލޭން އެއްޗެހި ހަދަނީ ވަރަށް ބޮޑަށް ބައިވެރިކޮށްގެން، ދެން 2017ގައި ދެމީހުން އެއްކޮށް ދިޔައީ ވިކްޓްރީއަށް، ވަރަށް ވަރުގަދަ ސްކޮޑެއްހަދާފަ ސީޒަން ނުފަށަނީސް ޝާޒް ދޫކޮށްލާފަ ވިކްޓްރީން ހެޑްކޯޗު ކަމަށް ސުޒޭން ގެނައީ، އެހިސާބުން ދެން ޝާޒް ދިޔައީމަ ނިސްތާރުވެސް ވިކްޓްރީ ދޫކޮށްލީއެވެ. އަނެއްކާވެސް އެނބުރި ދިޔައީ ކުރިންވެސް ކޯޗުކޮށްދިން ކޮނޑޭ އެފް.ސީ އަށެވެ. ޕްރިމިއާ ލީގަށް އެފަހަރު ކޮލިފައިވީ އއ.މާޅޮސް ޓީމެވެ. ދެން ދިޔައީ މާޅޮސް ޓީމުގެ ހެޑްކޯޗު ކަމަށެވެ. އެއީ ނިސްތާރަށް ހެޑްކޯޗުކަން ލިބުނު ފުރަތަމަ ފަސްޓް ޑިވިޝަނުގެ ޓީމެވެ. އޭގެ ފަހުން އޭނާވަނީ ފުރަތަމަ ޑިވިޝަނުގައޮތް ށ. ފޯކައިދޫ އެފްސީގެ ހެޑްކޯޗުކަންވެސް ކޮށްފައެވެ.
އަދި މިސީޒަނުގައި ނިސްތާރުގެ ކޮނޑުގައި އެޅިފައިވަނީ ވަރަށް ގޮންޖެހުންބޮޑު މަސައްކަތެކެވެ. ވަރުގަދަ ސީނިއާ ކުޅުންތެރިންނާއި ތަޖުރިބާކާރު ކުޅުންތެރިންގިނަ ޓީމުތަކާއެކު ގްރީން ސްޓްރީޓުން އަންނަނީ މިސީޒަނުގައި ބައެއް މެޗުތަކުގައި ރަނގަޅު ކުޅުމެއް ދައްކަމުންނެވެ. އެހެންނަމަވެސް އެންމެ ބޭނުންވި ހިސާބަކަށް މިސީޒަނަކު ނުދެވުނެވެ.
ނިސްތާރު ބުނީ އޭނާއަށް ކޯޗިންގެ ދާއިރާގައި އެންމެ ބޮޑަށް އެހީތެރިވެދިނީ މިހާރުގެ ޓީސީ ކޯޗު މުޙައްމަދު ޝާޒްލީ(ޝާޒް ކޯޗު)، ހީނާ ކޯޗް، ސާންތީ، ހަމްދުﷲ، ޝާކިއްޓޭ، ނިމާ، ރެފްރީ އާމިރު ކަމަށެވެ. އަދި ޢާއިލާގެ ސަޕޯޓް ވަރަށްބޮޑަށް ލިބޭކަމަށްބުނެ މަންމައާއި ބައްޕަ އަދި ދޮންބައްޕަގެ ނަން ނިސްތާރު ފާހަގަަކުރިއެވެ. މީގެ އިތުރުން އޭނާގެ ދެ އަންހެން ދަރިންނާއި އަނބިމީހާވެސް ވަރަށް އެހީތެރިވެދޭކަމަށާއި، މިކަމުގައި ކުރިޔަށް ދިއުމުގެ ހިތްވަރަކީ ޢާއިލާ ކަމަށް ބުންޏެވެ.
"2011ގައި ޓާގެޓެއް ކަނޑައެޅިން އޭ ލައިސަންސް ނިންމާނަމޭ 2017ގައި. އެކަމަކު އޭރު ފެއިލްވީ. އަނެއްކާ ބައިވެރިވެގެން 2018ގައި އެކަން ހާސިލުވީ. މިހާރު އެންމެ ބޭނުންވަނީ ގްރީން ސްޓްރީޓްސްގައި މިއޮތީ މުސްތަޤްބަލަށް ތައްޔާކުރާ ޒުވާން ސުކޮޑެއް، މިހާރު އެކުދިންގެ ފުލް ޕޮޓެންޝިއަލް ނުފެނިދާނެ. އެކަމަކު ޓާގެޓަކީ އެކުދިންނަކީ ކުރިމަގުގައި އެންމެ ޓޮޕަށްދާނެ ކުދިންނަށް ހެދުން" ކަމަށް ނިސްތާރު ބުންޏެވެ.
