ނަސީރު އިސްމާޢީލް އަކީ އެއްދުވަސްވަރެއްގައި ދިވެހިރާއްޖޭގެ އެއްވަނަ ދުވުންތެރިޔާއެވެ. މެދުނުކެޑި 13 ވަރަކަށް އަހަރު ޤައުމީ މުބާރާތްތަކުން އެއްވަނަ ހޯދަމުންދިޔަ ކާމިޔާބު ދުވުންތެރިއެކެވެ. އެތުލެޓިކްސް ދާއިރާގައި 30 އަހަރު ހޭދަކުރިއިރު މިހާރު މިއީ ކާމިޔާބު ކޯޗެކެވެ. ކުޅިވަރު ކުޅުމާއި ކުޅިވަރު ކުރިއެރުވުމުގެ ދާއިރާއިން ޤައުމީ އިނާމުގެ އިތުރަށް ޖޭސީއައި މޯލްޑިވްސް އެވޯޑު ވަނީ ނަސީރަށް ލިބިފައެވެ.
ނަސީރު އިސްމާޢީލް
ގއ.ކަނޑުހުޅުދޫއަށް އުފަން ނަސީރު އިސްމާޢީލް ދުވުމުގެތެރެއަށް އެންމެފުރަތަމަ ވަދެވުނީ އަހުމަދިއްޔާ ސްކޫލުގައި ތަޢުލީމް ހާސިލްކުރަމުން ދަނިކޮށެވެ. އުމުރުން 14 އަހަރުގައި އެންމެފުރަތަމަ ފެށީ އިންޓަސްކޫލް މުބާރާތުންނެވެ. އެފަހަރު އެއްވަނަ ހޯދިއިރު، 1991 ވަނަ އަހަރު ސާފް ގޭމްސްގައި ވާދަކޮށް ދިވެހިރާއްޖޭގެ ޤައުމީ ރެކޯޑުވަނީ މުގުރާލާފައެވެ. ހީނާ ކޯޗުކަމުގެ ދަށުން އެންމެފުރަތަމަ ތަމްރީންވާންފެށި ނަސީރު އަށް އެހާހިސާބުން ޤައުމީ ޓީމަށް ތަމްރީން ފުރިހަމަކުރުމުގެ ފުރުސަތު ލިބިގެންދިޔައެވެ.
"ދުއްވާ އެއްޗެހިން ނެއްޓެމުން ގާގަޑުމަތިން ވަރަށް ހާލުގަ އެއިރު ދުވަނީ. އަސްލު އެއިރު ބައިވެރިވާކުދިން އަމިއްލައަށް ވަރަށް މަސައްކަތްކުރޭ. ސަރުކާރުން އެއިރު އެހާބޮޑު އަޅާލުމެއްނޯވޭ. ބައިނަލް އަޤްވާމީ މުބާރާތްތަކުގަ ބައިވެރިވާން ފެށުނީމަ އެނގުނީ ކިހާވަރެއްގެ ކަމެއްކަން މިއީ. ޖަރުމަންއަށްގޮސް ޖަރުމަނު ކޯޗަކާއެކީ ތަމްރީންވާން ފެށީމަ ވިސްނުނީ ރަނގަޅަށް ކޯޗުކަން ކޮށްދިނުމުގެ މުހިއްމުކަން" ތަފާތު ޤައުމުތަކުން ތަމްރީން ފުރިހަމަ ކޮށްފައިވާ ނަސީރު ބުންޏެވެ.
އެންމެބޮޑު ކާމިޔާބެއްގެ ގޮތުގައި ސިފަކުރީ ބައިނަލްއަޤްވާމީ ފެންވަރުގެ ދުވުންތެރިންނާއި ވާދަކޮށް 04ވަނަ ލިބުމެވެ.
- 1994 އަދި 1995 ވަނަ އަހަރު ރާއްޖޭގެ މެރެތަން ރޭހުގެ އެއްވަނަ ހޯދާފައިވޭ.
- 10000 މީޓަރު ދުވުން ފަސްފަހަރު އެއްވަނަ ހޯދާފައިވޭ
- ބައިނަލްއަޤްވާމީ 28 މުބާރާތެއްގައި ވާދަކޮށް 16 ފަހަރެއްގެ މަތިން ޤައުމީ ރެކޯޑު މުގުރާލި
- 1999ވަނަ އަހަރު ސާފް ގޭމްސްގެ 800 މީޓަރު ދުވުމުން 04 ވަނަ ހޯދި.
ކޯޗެއްގެ ގޮތުގައި ހުރިހާވަގުތެއް ހޭދަކުރަންފެށުން.
13 އަހަރުވަންދެން ތަފާތު ކާމިޔާބީތައް ހޯދުމަށްފަހު ރަސްމީކޮށް އެތުލެޓިކްސް އަށް މީހުން ތަމްރީނުކުރުމަށް ކޯޗުކަން ކޮށްދޭން ފެށިއެވެ. " ބޭނުންވަނީ އެހެންމީހުންނާއި ކުޑަކުދިންނަށް ފައިދާހުރި ގޮތަށް ކޯޗުކޮށްދޭން" ދުވުމުގައި އިސްކޮށް އުޅުނުއިރުވެސް ކޯޗުކަން ކޮންމެވެސް ވަރަކަށް ކުރިކަމަށާއި، ޝަމްހާ އަދި ޝިފާނާ މިއީ ވެސް ނަސީރު މިދާއިރާއަށް ނެރެދިން ކާމިޔާބު މީހުންކަމަށް ވަނީ ބުނެފައެވެ. މިވަގުތު 110 މީހުންނަށް ކޯޗުކަން ކޮށްދެމުންދަނީ އަމިއްލަ އެކަޑަމީއެއް ކަމުގައިވާ ނަސީރު ސްޕޯޓްސް އެކަޑަމީގެ ފަރާތުން ހުޅުމާލޭގައެވެ. އަދި ވަރަށް އަވަހަށް މާލޭގައިވެސް ކޯޗުކަން ކޮށްދޭން ފަށާނެ ކަމަށް ވަނީ ބުނެފައެވެ.
ނަސީރު އެކަޑަމީއިން ކޯޗުކޮށްދޭ ހުރިހާ އެންމެންނަށް އިސްމީހެއްގެ ގޮތުގައި ހުންނަނީ ނަސީރުއެވެ. "ވަރަށްކާމިޔާބު މިމަސައްކަތް. ޖޫނިއާ އެންމެވަރުގަދަ އެތުލީޓުގެ އިތުރުން ޓޮޕް ލެވެލްގަ ހިމެނޭ އެތުލީޓުންނަށް ކޯޗުކޮށްދެން. ވަރަށްބޮޑު ކާމިޔާބެއް ޑރ. އައިޝަތު ޖިނާނީ އިބްރާހިމް (އީނު) އަށް ޔޫއޭއީގެ މެރަތަންގެ އަންހެނުންގެ ފަސް ކިލޯމީޓަރު ދުވުމުން އެއްވަނަ ލިބި އެއިވެންޓުގެ ރާއްޖޭގެ ޤައުމީ ރެކޯޑު މުގުރާލުން"
ސައިކޮލޮޖިސްޓެއްގެ ގޮތުގައި ވަޒީފާއަދާކުރާ ޑރ.ޖިނާނީ އަށް މިލިބުނު ކާމިޔާބީއާއި ގުޅޭގޮތުން ނަސީރު އިތުރަށް ބުނީ މިއީ 6 މަސްދުވަހުތެރޭގައި ކޯޗުކޮށްދީގެން ލިބުނު ކާމިޔާބެއް ކަމަށެވެ. ނަސީރު އަމާޒުހިފާފައިހުރީ ވީހާވެސް ގިނަ އެތުލީޓުން ނެރެ ރާއްޖެއަށް ރަންވަނަތަކެއް ހޯދައިދޭނެ އެތުލީޓުންތަކެއް އުފެއްދުމެވެ.
ސްޕްރިންޓް ދުވުންތަކުން ފެށިގެން މެދު އަދި ދިގު ރާސްތާ ދުވުންތަކުގައި ރަނގަޅު ނަތީޖާއެއް ހޯދި ނަސީރު ވަނީ ތަފާތު ވަޒީފާތަކުގައި އުޅޭ މީހުންނަށް ޚާއްސަކޮށްގެން ދުވާ ކުލަބެއް ހިންގާފައެވެ. ދިވެހިރާއްޖޭގައި ކަސްރަތުކުރާ މީހުން އިތުރުވެ ފިޓްނަސް އެއީ ކިހާ މުހިއްމު އެއްޗެއްކަން ވިސްނައިދެވުނު ކަމަށް ނަސީރުވަނީ ބުނެފައެވެ.
"ވަރަށް ކުޑަ އަގެއްގައި ކޯޗު ކޮށްދެނީ. ލިބޭ އާމްދަނީއަށްވުރެ ކަސްރަތެއްގެ ގޮތުގަ ކުދިންނަށް އެހީތެރިވެދިނުން ބޭނުމަކީ" ބެލެނިވެރިންގެ ފަރާތުން ޕޮޒިޓިވް ފީޑްބެކް ލިބެމުން އަންނަކަން ފާހަގަކޮށް ނަސީރު ބުންޏެވެ.
ހިތުގެ މައްސަލަތައް ކުރިމަތިވެ އޮޕަރޭޝަން ކުރުން
ހިތުގެ ސީރިއަސް މައްސަލަތަކަކާއި ކުރިމަތިލާންޖެހި އޮޕަރޭޝަން ކުރީ 2019ވަނަ އަހަރުގައެވެ. ހިތުގެ ހިގުން 4 ސިކުންތައް ހުއްޓޭތީ އެކަން ހައްލުކުރުމުގެ ގޮތުން 'ޑުއަލް ޗެމްބާ ޕޭސްމޭކާ' އެއް ވަނީ ލައްވާފައެވެ. "ހިތުގެ ހިނގުން ހިފަހައްޓައިދޭ ޑިވައިސްއެއް ލެއްވީ. އެއޮޕަރޭޝަނަށްފަހު ކަންފަތުގެ އޮޕަރޭޝަނެއް ވެސް ވާނީ ކޮށްފައި. ހިތުގެ އޮޕަރޭޝަން ކޮށްގެން މާލެއައިތާ 10 ދުވަސްތެރޭގައި އަނެއްކާ މަންމަ ބަލިވެގެން އިންޑިއާއަށް ދާންޖެހުނީ. އެއިރު މަންމަ ނިޔާވުމުން ދެން ދިރިއުޅުމަށް ބޮޑު ބަދަލެއްއައި"
ހަފްތާއަކު އެއްދުވަސް ފިޔަވައި ހުރިހާ ދުވަހަކު ޓުރެކުގައި ގިނަވަގުތު ހޭދަކުރާ ނަސީރު އަށް ވަނީ މި ޖެނުއަރީ ތެރޭގައި އައިސީޔޫގައި ފަރުވާދީފައެވެ. މިފަހަރު ފަރުވާދީފައިވަނީ ހަކުރު މާބޮޑަށް މައްޗަށް ދިއުމާއިގުޅިގެންނެވެ. އެހެންނަމަވެސް ހިތްވަރު ދޫނުކޮށް ދެމިހުރީ ކޯޗުކަން ކޮށްދިނުމުގައެވެ. ދެކުދިންގެ ބައްޕަ ނަސީރު އިތުރަށް ބުނިގޮތުގައި މިހާހިސާބަށް އައުމަށް އެންމެބޮޑު އެހީތެރިކަމެއް ވެދިނީ މަންމަ އަދި ޢާއިލާއިންނެވެ.
ނިންމުން:
އުމުރުން 45 އަހަރުގެ ނަސީރު 30 އަހަރު ދުވަހު އެތުލެޓިކްސް ދާއިރާގައި ހަރަކާތްތެރިވިއިރު މިދާއިރާއިން ކުރިއަށްދާން ބޭނުންވާ މީހުންނަށް ބުނީ އެތުލީޓެއްގެ ގޮތުގައި ޤައުމަށް ކަމެއް ކޮށްދިނުމަށް އަޒުމް ކަޑައަޅައިގެން، ހިތްވަރާއިއެކު ކާމިޔާބު ހޯދުމަށް އަމިއްލައަށް މަސައްކަތްކުރުމަށެވެ.
