އުފާވެރި ބާއްޖަވެރި ދިރިއުޅުމެއް ބޭނުންވާނަމަ ބާއްޖަވެރިކަމުގެ ދެއަސާސު ކަމުގައިވާ އީމާންކަމާއި، ﷲ އަށް ކިޔަމަންތެރިކަން އަދާކުރުމަށް އަވަސްވެގަތުމަށް އެންމެހައި މުސްލިމުންނަށް ނަސޭހަތްތެރިވީ ހުކުރު ޚުތުބާގަ އެވެ.
މިއަދު ކޮންމެ މީހަކުވެސް އުފާވެރި ދިރިއުޅުމެއް ހޯދުމަށް ބުރަ މަސައްކަތްކުރާއިރު ފަރުޟު ފަސްނަމާދު މަތިން ހަނދާން ނުހުންނަ ކަމަށާއި، ނަމާދަށް ރައްކާތެރިނުވެ ކުރާ މަސައްކަތަކުން ބާއްޖަވެރިކަން ލިބޭނީ ކިހިނަކުންތޯ ޚުތުބާގައި ވެއެވެ. "މަތިވެރިކަމާއި ބާއްޖަވެރިކަން ޙާޞިލު ކުރުމަށްޓަކައި ނަމާދަށް ފަރުވާތެރިވަނީ ކިތައް މީހުން؟ ވަޒީފާ އަށް ދިއުމަށް ހެދުނު ހެނދުނާ ތެދުވާއިރު، ފަތިސް ނަމާދު އޭގެ ވަގުތުގައި އަދާކުރުމަށް މުހިއްމުކަން ދެނީ ކިތައް މީހުން؟" ޚުތުބާގައި ފާހަގަކުރިއެވެ.
ހަޤީޤީ ބާއްޖަވެރިކަމަކީ ﷲ އަށް އީމާންވެ، ﷲ އެންގެވި ގޮތް އިޚްތިޔާރުކޮށް، އެކަލާންގެ ނަހީކުރެއްވި ކަންކަމާ ދުރުހެލިވުން ކަމަށާއި، ﷲ އަޅުންގެ ހިތުގައި ލައްވާ ހަމަޖެހުމާއި، އުފާވެރިކަމުގެ ޝުޢޫރު ކަމުގައި ބަޔާން ކޮށްފައިވެއެވެ. އެއީ އެއް ގޮތަކަށްވެސް މާއްދީ ގޮތުން ޙާޞިލު ކުރެވޭނެ އެއްޗެއް ނޫން ކަމުގައި ވެއެވެ.
މުދާވެރިވުމަކީ ހަމައެކަނި ބާއްޖަވެރި ކަމުގައިވަނީނަމަ ޤާރޫނަކީ އެންމެބޮޑު ބާއްޖަވެރިޔާއަށް ވާނެ ނޫން ހެއްޔެވެ؟ ޤާރޫނާއި ގުޅޭގޮތުން ﷲ ވަޙީކުރައްވާފައިވާ ބަސްފުޅުގެ މާނައިގައިވެއެވެ. "ޤާރޫނަކީ މޫސާގެފާނުގެ ޤައުމުގެ މީހުންގެ ތެރެއިންވީ މީހެއް. އޭނާ އެއުރެންގެ މައްޗަށް ބޮޑާވެގަތް. އަދި ތިމަންރަސްކަލާންގެ އޭނާ އަށް މުދާތަކުގެ ޚަޒާނާތައް ދެއްވީމު. އޭނާގެ ޤައުމުގެ މީހުން އޭނާއަށް ބުނި. ކިބުރުވެރިވުމުގެ ގޮތުން އުފާނުކުރޭ" ޚުތުބާގައިވެއެވެ.
ދުނިޔެމަތީގައި ކިތަންމެ ބޮޑު ބާރެއް އަދި މަތިވެރި ޖާހެއް ލިބުނަސް، ﷲ އަށް އީމާން ނުވާނަމަ، އެއީ ހަޤީޤީ ބާއްޖަވެރިކަމެއް ނޫން ކަމަށް ތަކުރާރުކޮށް ފާހަގަ ކޮށްފައިވެއެވެ.
