ކޮވިޑް-19 އިން ރައްކާތެރިވުމަށް ހިންގާ 'ކޮވިޑް-19 ދިފާޢު' ކެމްޕެއިންގެ ދަށުން މިހާތަނަށް ރާއްޖޭގައި ވެކްސިން ޖެހި މީހުންގެ ޢަދަދު 27،367 މައްޗަށް އަރައިފިއެވެ.
ފެބުރުއަރީ އެއްވަނަ ދުވަހުން ފެށިގެން ރާއްޖޭގައި ވެކްސިން ދޭން ފަށާފައިވާއިރު އިއްޔެ އިރުއޮއްސި 6:00 ގެ ނިޔަލަށް ޖުމްލަ 27،367 މީހަކަށް ވެކްސިން ޖަހާފައިވެއެވެ. މީގެތެރެއިން ގްރޭޓަރ މާލޭ ސަރަހައްދުން 22،456 މީހުން ވެކްސިން ޖަހާފައިވާއިރު އަތޮޅުތަކުން 4،911 މީހުން ވަނީ ވެކްސިން ޖަހާފައެވެ. އިއްޔެ ވެކްސިން ޖެހި މީހުންގެ އަދަދުތަކަށް ބަލާއިރު މުޅި ރާއްޖެއިން 1،902 މީހުން ވެކްސިން ޖަހާފައިވެއެވެ. މީގެ ތެރެއިން 1،496 މީހުން ވެކްސިން ޖަހާފައިވަނީ މާލެ ސަރަހައްދުންނެވެ. 406 މީހުން ވެކްސިން ޖަހާފައިވަނީ އަތޮޅުތަކުގައި ގާއިމުކޮށްފައިވާ ވެކްސިނޭޝަން ސެންޓަރުތަކުންނެވެ.
ކޮވިޑް-19 އަށް ހާއްސަ ވެކްސިން ދިނުމަށް މާލެ ސަރަހައްދުގައި ޖުމްލަ 7 ވެކްސިނޭޝަން ސެންޓަރެއް ގާއިމުކޮށްފައިވެއެވެ. އަތޮޅުތެރޭގައި 87 ވެކްސިނޭޝަން ސެންޓަރެއް ޤާއިމުކޮށްފައިވެއެވެ. މާލޭގައި ވެކްސިން ދިނުމަށް ޚާއްސަކޮށްފައިވާ ތަންތަނަކީ ސޯޝަލް ސެންޓަރު އަދި އިސްލާމީ މަރުކަޒެވެ. މިތަންތަނުން ވެކްސިން ދިނުމަށް ހަމަޖެހިފައިވަނީ ހެނދުނު 9:00 އިން 17:00 އަށެވެ. ހުޅުމާލޭ ވެކްސިނޭޝަން ސެންޓަރ (ކުރީގެ ފްލޫ ކުލިނިކް) އިންވެސް މިގަޑީގައި ވެކްސިން ދޭނެ އެވެ. ވިލިމާލޭގައި ވެކްސިން ދިނުމަށް ޚާއްސަކޮށްފައިވަނީ ވިލިމާލޭ ޒުވާނުންގެ މަރުކަޒެވެ. މިތަނުގައި ވެކްސިން ދިނުމުގެ ޚިދުމަތް ދޭނީ ހެނދުނު 9:00 އިން މެންދުރު 13:00 އަށެވެ.
މިއަދު ވެކްސިން ޖެހުމަށް ޚާއްސަކޮށްފައިވަނީ 11 އަހަރާއި 55 އަހަރާއި ދެމެދުގެ އުމުރުފުރައިގެ ތެރެއިން ދިގުމުއްދަތަކަށް ބޭސް ބޭނުން ކުރާ ހައިރިސްކު މީހުންނަށާއި 55 އަހަރުން މަތީގެ މީހުންނަށެވެ. ރާއްޖޭގައި ކޮވިޑް-19 ޖެހިފައިވާ މީހުންގެ ޖުމްލަ އަދަދު އުޅެނީ 17،507 ގައެވެ. ބަލިން ފަސޭހަވެފައިވަނީ ޖުމްލަ 15،142 މީހުންނެވެ.
ކޮވިޑް ބަލީގައި މަރުވެފައިވަނީ 58 މީހުންނެވެ.
ރާއްޖޭގައި ކޮވިޑް-19ގެ ހާލަތު އަންނަނީ އިތުރަށް ގޯސްވަމުންނެވެ. ބަލިޖެހޭ މީހުންގެ އަދަދުތައް އިތުރުވެ އެޑްމިޓް ކުރަންޖެހޭ ފަރާތްތައް ވެސް އިތުރުވެފައިވާތީ ސިއްހީ މާހިރުން އަންނަނީ ހިތާމަކުރަން ޖެހޭ ހާލަތަށް ކަންކަން ދިއުމުގެ ކުރިން އަމަލުތައް ރަނގަޅު ކުރުމަށް އިލްތިމާސް ކުރައްވަމުންނެވެ. ދިވެހިރާއްޖޭގައި އަދި މިހާވަރަށް ކޮވިޑްގެ ހާލަތު ގޯސްވެފައި ނުވާ ކަމަށާއި 3ވަނަ ރާޅާ އެކު ކޮވިޑް -19ގެ އަދަދުތައް މައްޗަށްދާތީ އިތުރަށް ސަމާލުވުމަށް ކަމާބެހޭ ފަރާތްތަކުން ވަނީ އިލްތިމާސް ކޮށްފައެވެ. އަދި ސަރުކާރުން އަންނަނީ ވެކްސިން ޖެހުމަށް ހުރިހާ ފަރާތްތަކަށް އިލްތިމާސް ކުރަމުންނެވެ.
އުމުރުން ދުވަސްވީ މީހުންނާއި ދިގު މުއްދަތަކަށް ބޭސް ބޭނުންކުރާ މީހުންނަށް ކޮވިޑް ވެކްސިން މުހިންމު ކަމަށާއި، އެ ވެކްސިން ޖެހުމަށްފަހު ކޮވިޑް-19 ޖެހުނު ނަމަވެސް ބަލީގައި ބޮޑުވަރުނުވާނެ ކަމުގެ ޔަގީންކަން އޮންނަ ކަމަށް ހެލްތް ޕްރޮޓެކްޝަންސް އެޖެންސީ (އެޗްޕީއޭ) އިން ބުނެއެވެ.
ވެކްސިންޖަހާ ފަރާތްތަކުން ސަމާލުކަން ދޭންޖެހޭ ކަންތައްތަކުގެ ތެރޭގައި ހައިރިސްކު މީހުން ކާ ބޭސްތަކާއި ގުޅޭ މައުލޫމާތު ގެންދަން ޖެހެއެވެ. އަދި ވެކްސިން ޖަހަންދާއިރު ހުންނަންވާނީ ރަނގަޅަށް ކައިގެންނެވެ.
ދިގު މުއްދަތަކަށް ބޭސްފަރުވާ ކުރާ މީހުންގެ ތެރެއިން ވެކްސިން ދެވޭ މީހުންނަކީ:
• ކެންސަރުބަލީގެ މީހުން
• ހަކުރުބަލީގެ މީހުން
• ހިތުގެބަލީގެ މީހުން
• ސްޓްރޯކް ޖެހިފައިވާ މީހުން
• ކިޑްނީ ބަލީގެ ސްޓޭޖް 3 އަދި 4 ގެ ބަލިމީހުން
• ދިގުމުއްދަތަކަށް ފުރަމޭގެ ބައްޔެއް ތަހައްމަލު ކުރަމުންދާ މީހުން
• ތެލެސީމިއާ މޭޖަރ/ސިކްލްސެލް އެމީނިއާ ހުންނަ މީހުން
• އެނދުމަތިވެފައިވާ މީހުންނާއި އެމީހުން ބަލަހައްޓާ މީހުން
• އިސްކޮޅާއި އަޅާ ބަލާއިރު ބަރުދަން މަތި މީހުން (ބީއެމްއައި 40ން މަތީގެ މީހުން)
• ބައްޔެއްގެ ސަބަބުން ނުވަތަ ބޭނުންކުރާ ބޭހެއްގެ ސަބަބުން ދިފާއީ ބާރު ދަށްވެފައިވާ މީހުން
• މީގެ އިތުރުންވެސް، އެއްވެސް ބައްޔަކާއި ގުޅިގެން ދިގު މުއްދަތަކަށް ބޭސް ބޭނުން ކުރާ މީހުން
ރާއްޖޭގައި ކޮވިޑް-19 އިން ރައްކާތެރިވުމަށް ދެވޭ ވެކްސިނަކީ އޮކްސްފޯޑް ޔުނިވަރސިޓީއާއި އެސްޓްރަޒެނިކާއިން ވެކްސިން އުފައްދާފައިވާ ފޯމިއުލާއާއި އެއްގޮތަށް އިންޑިއާގެ ސިރަމް އިންސްޓްޓިއުޓުން އުފައްދާފައިވާ ކޮވިޝީލްޑް ވެކްސިނެވެ.
