ދިވެހި މުދައްރިސެއްގެ ގޮތުގައި ބ.އޭދަފުށީ މުޙައްމަދު ވަޖީހުވަނީ ގިނައަދަދެއްގެ ދަރިވަރުންނަށް ކިޔަވައިދެއްވާ ރަނގަޅު ނަތީޖާއެއް ހޯދުމަށް މުހިންމު ދައުރެއް އަދާކުރައްވާފައެވެ. އީޕީއެސް ސްކޫލުގެ ދިވެހި ޖަމްޢިއްޔާގެ ރައީސެއްގެ އިތުރުން އެސްކޫލުގެ 2004ވަނަ އަހަރުގެ 'އަދަބީ ތަރި' އެއްގެ ގޮތުގައި އަޅުގަނޑު ހޮވިގެންދިޔުމުގެ ފަހަތުގައި ދިވެހި މުދައްރިސުގެ ހައިސިއްޔަތުން ވަޖީހުގެ ދައުރު ވަރަށް ބޮޑެވެ.

މުޙައްމަދު ވަޖީހު

އުފަން ރަށުގައި ގުރޭޑު 5 އަކާއި ހަމައަށް ތަޢުލީމު ޙާސިލުކުރެއްވުމަށްފަހު ވަޑައިގަތީ މާލެއަށެވެ. އީޕީއެސް ސްކޫލުން ގުރޭޑު 5 އިން 10 އަށް ތަޢުލީމު ހާސިލުކުރެއްވިއިރު ވަޖީހު އަކީ ދިވެހި ބަހަށް ވަރަށްމޮޅު ދަރިވަރެކެވެ. އެއިރު އޮންނަގޮތުން ސްކޫލް ނިންމާ ކޮންމެ ދަރިވަރަކު 2 އަހަރު ދުވަހު ސަރުކާރަށް ޚިދުމަތް ކުރަންޖެހޭތީ، ވަޖީހުވެސް ފުރަތަމަ 2 އަހަރު ވަޒީފާ އަދާކުރެއްވީ މައުޙަދުއްދިރާސާތިލް އިސްލާމިއްޔާގަ އެވެ. އެއަށްފަހު އީޕީއެސް ސްކޫލުގެ ދިވެހި މުދައްރިސެއްގެ ގޮތުގައި މަސައްކަތް ކުރައްވަން ފެއްޓެވީ އޭރު އެ ސްކޫލުގެ ޕްރިންސިޕަލް ޙަސަން މާހިރުގެ އެދިވަޑައިގަތުމުގެ މަތިންނެވެ.

Advertisement

" ޙަސަން މާހިރަށް އެނގިވަޑައިގެންފައޮތީ ސްކޫލުގައި އުޅުނުއިރު ދިވެއްސަށް ކުޅަދާނަކަން. އެދުވަސްވަރަކީ އީޕީއެސް ސްކޫލުގައި ދިވެހި ކިޔަވައިދެއްވި މުދައްރިސަކު ބޭސްފަރުވާއަށް ރާއްޖެއިން ބޭރަށް ވަޑައިގެންނެވި ދުވަސްވަރެއް. އެހެންވެ ކްލާސްތައް ނަގައިދޭން ވިދާޅުވީ. ގުރޭޑް 9 އެއްގެ ދަރިވަރުންނަށް ކިޔަވާދިނީ. 1991ވަނަ އަހަރު ސެޕްޓެންބަރު ހިސާބުއެއީ. އެހާހިސާބުން މުދައްރިސްގެ ވަޒީފާވެސް ދެއްވީ" އެއީ ދިވެހި މުދައްރިސެއްގެ ގޮތުގައި ކިޔަވައިދެއްވަން ފެއްޓެވިގޮތެވެ. އޭރު ވަޒީފާގެ ކުރިއެރުން ލިބިގެންދިޔައީ ވަރަށް އަވަހަށެވެ. ޖެހިގެން އައި 1992ވަނަ އަހަރު ހެޑް އޮފް ދިވެހި ޑިޕާޓްމެންޓް ކަން ލިބި ވަޑައިގަތެވެ. އޭގެ ކުރިން އެމަގާމް ގައި ހުންނެވީ ވަޖީހަށް ދިވެހި ކިޔަވައިދެއްވި މުދައްރިސް ޢަބްދުﷲ ޞާދިޤެވެ. އަދި ހަމަ އެއަހަރު ސްކޫލްގެ ސްޕަވައިޒަރު ކަމާއި އަދަބީ އަދި ސަގާފީ ޖަމްޢިއްޔާ ލިޓްރަރީ އެންޑް ކަލްޗަރަލް ސޮސައިޓީގެ ސީނިއަރ ޗެއަރމަން ކަމުގެ މަގާމް ލިބި ވަޑައިގަތެވެ.

ވަޖީހު އިސްވެ ހުންނަވައިގެން އީޕީއެސް ސްކޫލުގައި ކުރިއަށް ގެންދިޔަ އަތޮޅުތަކުގެ ދަރިވަރުންގެ މަހާސިންތާ އަކީ ވަރަށް ފާހަގަކޮށްލެވޭ ހަރަކާތެކެވެ. ތަފާތު ކަންކަމަށް ހޭލުންތެރި ކުރުވުމަށް ކުރިއަށްގެންދެވުނު 14 ބައްދަލުވުމުން 1300 އަށްވުރެ ގިނަ ދަރިވަރުން ތަމްރީން ކުރެވުނެވެ. މިމަހާސިންތާތަކުގެ ސަބަބުން ދަރިވަރުންގެ ހުށަހެޅުމުގެ ފެންވަރު ރަނގަޅުވެ ނަތީޖާ ރަނގަޅުވެގެން ދިޔަކަމަށް ވަޖީހު ގަބޫލު ކުރައްވައެވެ.

އީޕީއެސް ސްކޫލް ނިމުމަކަށް އައިސް 2009ވަނަ އަހަރު ބިލަބޮންގ ހައި އީޕީއެސް އިންޓަނޭޝަނަލް ސްކޫލް އުފެދި އެސްކޫލުގައި ކިޔަވައިދެއްވުމަށް ފުރުސަތު ލިބިވަޑައިގަތީ އީޕީއެސް ސްކޫލުގެ އެންމެ 2 މުދައްރިސުންނަށެވެ. އޭގެ ތެރެއިން އެއްބޭފުޅަކީ ވަޖީހެވެ.

ކިޔަވައިދެއްވުމަށް ހޭދަކުރެއްވި ދިގުމުއްދަތުގައި އެންމެ ދެރަވި ދުވަސް ހިއްސާ ކުރައްވަމުން ވަޖީހު ވިދާޅުވީ "އަޅުގަނޑަށް ފުރުސަތު ލިބި ސްކޫލުގެ ކިޔެވުން ފަށަން ތައްޔާރުވިތަނާ ރައްޔިތުންގެ މަޖިލީހަށް އަޅުގަނޑު ކުރިމަތިލީ. އެއީ 2009ވަނަ އަހަރު. ބިލަބޮންގ ސްކޫލް ޕްރިންސިޕަލް ހަސަން ނާޝިދު އަޅުގަނޑު ގެންގޮސްފައި ވިދާޅުވީ ކޮންމެވެސް އެއްކަމެކޭ ކުރެވޭނީ. ސްކޫލްގައި ހުންނަންޏާ ޖެހޭނީ ނަން އަނބުރާ ނަގާށޭ. އޭރުއޮތީ ނަންވެސް އިޢުލާން ކުރެވި ކެންޕޭންވެސް ފެށިފައި. ވަރަށްބޮޑަށް ދެރަވެ އަސަރުކުރި އެދުވަހު. އެއީ އެތައް ދުވަހެއްވަންދެން ކިޔެވި އަދި ކިޔަވައިދިން ތަން ދޫކޮށްލަން ޖެހުނީމާ. ދެން ވަގުތުން އެތަނުން ނުކުމެގެން ދިޔައީ އަޙްމަދިއްޔާއަށް. އަޙްމަދިއްޔާގެ ޕްރިންސިޕަލް ވިދާޅުވީ މާދަމާއިން ފެށިގެން ލީޑިން ޓީޗަރެއްގެ(އޭރު ސްޕަވައިޒަރ) ވަޒީފާއަށް ނުކުންނާށޭ. އެތަނަށްވުރެ މާ ރަނގަޅުގޮތްތައް ހަމަޖައްސައި ދެއްވާނަމޭ. ދެން އޭގެ އަނެއް ދުވަހު އަޙްމަދިއްޔާގެ ވަޒީފާއަށް ނުކުތީ. ''

އީޕީއެސް ސްކޫލަށް އެއޮންނަ އާދަޔާ ޚިލާފު ލޯބި ސޯޝަލް މީޑިއާއިން ވަރަށް ސާފުކޮށް ފެނެއެވެ. ވަޖީހު އަބަދުވެސް ދެމިހުންނެވީ ފޭސްބުކްގަ ޚާއްސަ ގުރޫޕެއް ހައްދަވައިގެން އީޕީއެސް ސްކޫލާއި ގުޅުންހުރި ތަފާތު މަޢުލޫމާތު ހިއްސާކުރެއްވުމުގައެވެ. އަދި ތަފާތު އަހަރުތަކުގައި ކުރިއަށްގެންދެވުނު ހަރަކާތްތަކުގެ ފޮޓޯތައް ޝެއާ ކުރައްވަމުން ގެންދަވާ ވަޖީހުގެ އެޑިޓަރު ކަމުގައި ގެންދަވަނީ އީޕީއެސް ސްކޫލުގެ ބައެއް އިސްދަރިވަރުންގެ ބައިވެރިވުން ހިމެނޭ ގޮތަށް އީޕީއެސް ގެ ފައުންޑޭޝަނުގެ ފަރާތުން މަޖައްލާއެއް ނެރުއްވަމުންނެވެ. ކޮންމެ 3 މަހުން 1 މަހު ނެރުމަށް ހަމަޖެހިފައިވާ "އީޕީއެސް ހަނދާން" މިމަޖައްލާގެ ފުރަތަމަ ޢަދަދު ނޮވެންބަރުމަހު ނެރުނުއިރު މިހާރު ގެންދަވަނީ 2 ވަނަ ޢަދަދު ނެރުއްވުމުގެ މަސައްކަތް ކުރައްވަމުންނެވެ.

ސްކޫލް ދައުރުގައި އެތައް ނޫހަކާއި މަޖައްލާއެއް ނެރުއްވި ވަޖީހު 1989ވަނަ އަހަރު ޒުވާނުންގެ އަޑު މިނަމުގައި ރަޖިސްޓްރީ ކުރެވިގެން މަޖައްލާއެއް ނެރުއްވިއެވެ. ވަޖީހު އަކީ ކުރިން ރާއްޖޭގެ އެންމެ މަޝްހޫރު 3 ނޫސް ކަމުގައިވާ ހަވީރު، މިއަދު އަދި އާފަތިސް ނޫހަށް ޒުވާނުންގެ ޞަފްޙާއާއި ސްކޫލްކުދިންގެ ޞަފްޙާ ލިޔުއްވި ބޭފުޅެކެވެ. މީގެއިތުރުން ހުކުރުނޫހާއި އަދި ގޮވެލި މަޖައްލާއަށްވެސް ލިޔުއްވިއެވެ.

އަހުމަދިއްޔާ އިންޓަނޭޝަނަލް ސްކޫލާއި ގުޅިވަޑައިގަތުން

އަހުމަދިއްޔާ ސްކޫލްގެ ދިވެހި ޑިޕާޓްމަންޓްގެ ހެޑް އަދި ސީނިއާ ލީޑިންގ ޓީޗަރެއްގެ ގޮތުގައި މަސައްކަތްކުރައްވާ ވަޖީހު އެސްކޫލުގައި ވަޒީފާ އަދާކުރައްވަން ފެއްޓެވީ 2009ވަނަ އަހަރުގައެވެ.

" އަހުމަދިއްޔާގަ ކިޔަވައިދިނުމުގައި ބޮޑަށް ވިސްނަނީ ނަތީޖާ ރަނގަޅުކޮށްދެވޭތޯ. ދިވެހި އިސްލާމުން ވޭތުވެދިޔަ 12 ވަރަކަށް އަހަރު ކޮންމެ އަހަރަކު އެންމެ ރަނގަޅު ނަތީޖާ ހޯދި ސްކޫލަކަށް އަޙްމަދިއްޔާ ވާނެ" އުފަލާއިއެކު ލިބުނު ކާމިޔާބީ ވަޖީހު ހިއްސާކުރެއްވިއެވެ.

ރަނގަޅު ކާމިޔާބެއް ހޯދުމަށް ދަރިވަރުންނަށް ވަޖީހު ދެއްވި ނަސޭހަތަކީ "ރަނގަޅަށް މަސައްކަތްކުރާށޭ. ދުރާލާ މަސައްކަތް ކޮށްފިއްޔާ ކާމިޔާބުވާނޭ. އެދުވަހަކު ދޭ ފިލާވަޅެއް އެދުވަހަކު ދަސްކުރާށޭ. ދިވެހިބަހުން އެގެންޖެހޭ އެއްޗެހި ހުންނާނެ" މިއެވެ.

އަހުމަދިއްޔާ ގެ ގުރޭޑު 10 އަދި 11، 12 އަށް ކިޔަވައިދެއްވާ ވަޖީހުގެ އެޑިޓަރު ކަމުގައި މިހާރު ގެންދަވަނީ އެސްކޫލަށް ޚާއްސަ އޮންލައިން ނޫހެއް ނެރުއްވަމުންނެވެ. "އަޙްމަދިއްޔާ 1982ގެ ނަމުގައި އަހުމަދިއްޔާ ޚަބަރުތައް ޝާއިޢުކުރުމަށް ދުވަހު ނޫހެއް ސްކޫލުގެ 38 ވަނަ އަހަރީ ދުވަހާއި ގުޅިގެން އިފުތިތާޙް ކުރެވުނީ، މިމަހު އެއްވަނަ ދުވަހުން ފެށިގެން އެވެބްސައިޓް އަޕްޑޭޓްވާނެ. ކޮންމެ ދުވަހަކު ޚަބަރުތައް ގެނެސްދެމުން ދަނީ. ސްކޫލުގައި ހިގާ ކަންތައްތަކާއި، ސްކޫލް މުދައްރިސުންގެ ލިޔުންތަކާއި،  ދަރިވަރުންގެ ލިޔުންތަކާއި، ސްކޫލްގެ ނޯޓިސް ބޯޑުވެސް ފެންނަން ހުންނާނެ"

1987ވަނަ އަހަރުން ފެށިގެން ދިގުމުއްދަތަކަށް ގައުމީ އިމްތިހާންތައް މާކު ކުރެއްވުމުގައި މާކަރެއްގެ ގޮތުންނާއި އޮޑިޓަރެއްގެ ގޮތުންނާއި އެގްޒަމިނަރެއްގެ ގޮތުގައި ހަރަކާތްތެރިވި ވަޖީހު ކިޔަވާދެއްވި ކުދިންގެ ނަތީޖާ އެހާ ރަނގަޅުވުމުން ކިޔަވައިދެއްވުމުގައި އިސްކަންދެއްވާ ކަންތައްތައް ބަލާލީމެވެ. "ކިޔަވައިދޭއިރު ކުދިން ޝައުގުވެރިވާކަހަލަ އެއްޗެތި ތައްޔާރުކޮށްގެން ކުދިންނާ ގުޅޭ ކަހަލަ ގޮތަކަށް އަބަދުވެސް ކިޔަވައިދެވޭތޯ ބަލަނީ. ނަތީޖާ ދަށްވާނެހެން ހީވާ ކުދިން ބަލާ އެކުދިންނަށް އިސްކަންދީގެން ތަމްރީން ކުރަން" ވަޖީހު ވިދާޅުވިއެވެ.

ޕާޓްޓައިމަށް މަދްރަސަތުލް އަމީރު އަހުމަދާއި މަޖީދިއްޔާ ސްކޫލްގައިވެސް ކިޔަވައިދެއްވި ވަޖީހުގެ ވަރަށްގިނަ ދަރިވަރުން ތަފާތު އެކި ދާއިރާތަކުގެ ކުރީ ސަފުގައި އުޅޭ މަންޒަރުފެންނާތީ ކުރެވޭ އިހުސާސް އޮޅުންފިލުވާލީމެވެ. " ތަޢުލީމީ ދާއިރާއަށް ބަލާއިރު މަހާސިންތާގައި ތަމްރީންކޮށްދިން ދަރިވަރުން ކަމުގައިވާ ތާހާ ސަލީމް. މުޖާހިދު، ޝަރުމާ، ޒުލައިޚާ ރަފީޢު، ޙަސަން ރަފީޢު، ޝާކިރުމެން ފަދަ ބޭފުޅުން އިސްމަގާމުތަކުގައި އުޅޭތަން ފެނުނީމާ ވަރަށް އުފާވޭ. އެނޫނަސް މިނިވަން މުއައްސަސާތައް ހިންގެވުމުގައިވެސް ގިނަ އަދަދެއްގެ ބޭފުޅުން އެބަތިއްބެވި. މިއީ ވަރަށް އުފާވާކަމެއް."

އަމިއްލަ ދިރިއުޅުއްވުން

މަޝްހޫރު ވާހަކަ ލިޔުންތެރިޔާ ޔަޝްފާ ޢަބުދުލްޣަނީ (ޔަޝް) އާއި ވަޖީހުގެ ކައިވެންޏަށް މިހާރު 17 އަހަރުވަނީ ވެފައެވެ. ދެމަފިރިންގެ 2 ފިރިހެން ކުދިންނާއި އަންހެންކުއްޖަކު ހުރިއިރު ދެމަފިރިންގެ ދިރިއުޅުމުގެ އުފާވެރި ދަތުރުގެ ދުވަސްތައް ސޯޝަލް މީޑިއާއިން ވަރަށްބޮޑަށް ފެނެއެވެ.

" ޗުއްޓީ އެއް ލިބޭއިރަށް ވިސްނަނީ ޢާއިލާއާއި އެކު ވަގުތު ހޭދަކުރުމަށް. ބޮޑު ޗުއްޓީގައި ދަނީ އަންހެނުންގެ ރަށަށް މަކުނުދޫ އަށް. ކުދި ކުދި ޗުއްޓީއަށް އޭދަފުއްޓަށް އަދި އެކި ޤައުމުތަކަށް ދަން. ކިޔަވައިދޭ ދުވަސްވަރު އެހާގިނަ ވަގުތު ޢާއިލާއާއިއެކު ހޭދަނުކުރެވޭތީ ވަރަށް އިސްކަންދެން ޗުއްޓީގައި ޢާއިލާއަށް ވަގުތު ދިނުމަށް. ކުދިންނާއިއެކު މޫދަށް ގޮސް ފީނަން ގޮސް ދަތުރުދިއުމަށް އިސްކަންދެން" އެންމެ ރީތި ތަނަކަށް ދެވުނީ ދުބާއީ ކަން ފާހަގަކުރައްވަމުން ވަޖީހު ވިދާޅުވިއެވެ.

ވަޖީހު އާއި، އީޕީއެސް ސްކޫލުގެ އަދަބީ ހަރަކާތްތަކުން ފާހަގަކުރެވުނު ޔަޝް ކައިވެނިކުރެއްވި އިރު ޔަޝްގެ އުމުރަކީ 18 އަހަރެވެ. ޔަޝް ވަޖީހުއާއި މެދު ދެކެވަޑައިގަންނަވާ ގޮތް ބަލާލުމަކީ މުހިންމު ކަމެއްކަމަށް ދެކިގެން ސުވާލުކުރާއިރަށް ހެމުން ހެމުން ވިދާޅުވީ ވަޖީހުއަކީ ލިބިވަޑައިގެންނެވި ރަންގަޑެއް ކަމަށެވެ.

"ދިރިއުޅުމުގައި ހުރިހާ ކަމެއް ކުރިއަށްގެންދާނީ މަޝްވަރާ ކޮށްގެން ދެމީހުންނަށް ބަހާލައިގެން. ސްކޫލުގަ އެހާ ބިޒީކޮށް އުޅެމުންވެސް ކުދިންގެ ކަންކަމުގައި ވަގުތު ދޭނެ. ޔަޝް ލިޔާ ވާހަކަތަކުގެ ކުށްފިލުވަދީ ފޮތް ތައްޔާރު ކޮށްދޭނެ. އެންމެ އުފާވަނީ ކުޑަ ޗުއްޓީއެއް ލިބުނަސް ކޮންމެވެސް ތަނަކަށް ޢާއިލާއާއި އެކީ ދާތީ. ދެފަރާތުގެ ޢާއިލާއަށް އެހާ ރަނގަޅުވާނެ" ޔަޝްގެ ވާހަކައިންވެސް އުފާވެރިކަން އިހުސާސްވެއެވެ.

އިންޓަވިއު ނިންމަވާލައްވަމުން ޝުކުރު އަދާކުރެއްވިއިރު އެންމެ ފުރަތަމަ ޝުކުރު އަދާކުރެއްވީ ދިރިއުޅުމުގައި އެންމެބޮޑަށް އެހީތެރިވެދޭތީ އަންހެނުން ޔަޝް އަށެވެ. އެއަށްފަހު ވަޖީހު އަށް ދިވެހި ކިޔަވައިދެއްވާ މިދާއިރާއަށް ވަނުމުގެ ޝައުގު އުފެދުމުގައި އެހީތެރިވެދެއްވި ޢަބްދުﷲ ޞާދިޤު (ޞޯދުބެ) އަށް ޚާއްސަ ޝުކުރެއް އަދާކުރެއްވިއެވެ. އަދި އީޕީއެސްގެ ވަޒީފާއަށް ގެންދިޔުމުގައި އެހީތެރިވެދެއްވި އަލްމަރުޙޫމް ޙަސަން މާހިރުގެ ނަން ފާހަގަކުރެއްވާ، އަހުމަދިއްޔާ ސްކޫލުގައި ލިބެމުންދާ ކާމިޔާބީގެ ފަހަތުގައި ހުންނެވި އެސްކޫލުގެ ޕްރިންސިޕަލް މުޙައްމަދު ރަޝީދަށް ވަޖީހު ވަނީ ޝުކުރު އަދާކުރައްވާފައެވެ.