ބަލިމަޑުކަމެއްގައި އުޅޭއިރު އަމިއްލަ ނަފްސާއި، ތިމާގެ އަޚާ ރައްކާތެރިކުރުމަށް މަސައްކަތް ކުރުމަކީ ކޮންމެ ފަރުދެއްގެ ވާޖިބެއް ކަމުގައި ހުކުރު ޚުތުބާގައި ވަނީ ބުނެފައެވެ.
" ކޮންމެ މީހަކުވެސް ނަމާދަށް އަންނައިރު މާސްކު އަޅައިގެން، މުސައްލަ ހިފައިގެން އައުމަށް ހަނދާންކޮށްދެން. މާޟީ ގައި ﷲ ގެ ނަބިއްޔުންނާއި، ރަސޫލުންނަށްވެސް މިފަދަ އެތަކެއް ހިތްދަތި ޙާދިސާތަކާއި ކުރިމަތިވި. އެބޭބޭކަލުން ﷲ ގެ ރަޙްމަތާއި، އޯގާވަންތަކަމުން މާޔޫސްވެވަޑައިގަތުމެއް ނެތި ދުޢާ ދެންނެވުމުގައި ސާބިތުވެތިއްބެވި" ޚުތުބާގައި ފާހަގަކުރިއެވެ.
މިއަދުގެ ޚުތުބާގައި އިތުރަށް ބުނެފައިވަނީ، މިއަދު ހުރިހާ އިންސާނުން ތަޙައްމަލު ކުރަމުންދާ ޙާލަތަކީ، ފަހުގެ ތާރީޙެއްގައި ދުނިޔެ ނުދެކޭވަރުގެ ހިތްދަތިކަމާއި، ބަލިމަޑުކަމާއި، ތަދުމަޑުކަމާއި، ނުތަނަވަސްކަމުގެ ޙާލަތެއްކަމަށެވެ. އަދި މިހާރު ފެތުރެމުންދާ ވަބާގެ ނުރައްކާތެރިކަމުން ސަލާމަތްވުމަށްޓަކައި ﷲ ގެ ޙަޟްރަތުން ރައްކާތެރިކަމަށް އެދޭ ޙާލު، އަޅުކަންކުރުމާއި ބޭނުން ޖެހިފައިވާ މީސްތަކުންނަށް އެހީތެރިކަން ފޯރުކޮށްދީ، ނަސޭހަތާއި އިރުޝާދު ދިނުމުގައި ދެމިތިބުމަށް ވަނީ ގޮވާލާފައެވެ.
ދުނިޔަވީ ޙަޔާތުގައި އަންނަ ކޮންމެ ހިތްދަތި ކަމަކަށް ފަހު އެތައް ފަސޭހަކަމެއް އަންނާނެކަމަށް ﷲ ވަޢުދުވެވޮޑިގެންފައި ވާކަމަށާއި، މިވަޢުދުފުޅުގެ މަތީން ހަނދާންކޮށް ހިތްވަރު އައުކުރުމަށް ވަނީ ޚުތުބާގައި އެދިފައެވެ.
" މާތް ﷲ މުއުމިނުންނާ ކުރިމަތިކުރައްވާ ބަލިމަޑުކަމަކީ، އެބައިމީހުންގެ ކުދި ފާފަތަކަށްވާ ކައްފާރާއެއް"
މާތް ﷲ އަށް ތަޤްވާވެރިވެ ބިރުވެތިވުމަށާއި، އެހީތެރިކަމާއި އިންސާނީ ޚިދުމަތަށް މުޅި ދުނިޔެ އެދި ގޮވަމުންދާ ދަނޑިވަޅެއްގައި ލިބިދެވޭ ކޮންމެ ޚިދުމަތެއް ޝުކުރުވެރި ހިތަކުން ބަލައިގަތުމަށް ވަނީ އެދިފައެވެ.
