ވެރިރަށް މާލެއަށް އުފަން މުޙައްމަދު މަނިކު ވަނީ ވިޜުއަލް އާޓްސްގެ ދާއިރާގައި 38 އަހަރު މަސައްކަތް ކުރައްވާފައެވެ. އަޅުގަނޑާއި މަނިކު އެންމެފުރަތަމަ ދިމާވީ ވީޓީވީގައި ވަޒީފާ އަދާކުރި ދުވަސްވަރުއެވެ. މަނިކު ފާހަގަކުރެވެނީ ވަރަށް ތަފާތު، ރީތި ގޮތްގޮތަށް ވީޑިއޯ ނަންގަވަމުން ގެންދެވި ބޭފުޅެއްގެ ގޮތުގައެވެ. ނޫސްވެރިންގެ ތެރެއިން ގިނަ މީހުން ކިޔައި އުޅޭގޮތުން މަނިކުބެ ކެމެރާ ކުރާގޮތަށް ކެމެރާ ކުރެވޭތޯ އެއިރު މަސައްކަތްކުރި ހަދާން މިހާރުވެސްވެއެވެ.
މުޙައްމަދު މަނިކު
1979ވަނަ އަހަރު އެންމެ ފުރަތަމަ ވަޒީފާ އަދާކުރެއްވީ ޓީވީއެމް ގަ އެވެ. މިދާއިރާއަށް ވަދެވުނުގޮތް ކިޔައިދެއްވަމުން މަނިކު ވިދާޅުވީ " ވަޒީފާގެ ފުރުސަތު އޮތްކަން އެނގުނީ އަޅުގަނޑުގެ ގާތް ރަހުމަތްތެރިއެއް ކަމުގައިވާ މުޙައްމަދު ރަޝީދު (ޕްރޮޑިއުސަރ ރަޝީދު) އަޅުގަނޑު ކައިރީގަ ވަޒީފާގެ ފުރުސަތު އޮތްވާހަކަ ބުނުމުން. ޓީވީއެމް އަށް ވަނީ އޭނަގެ އެދުމުގެ މަތިން. ފުރަތަމަ ވަނީ ޓްރެއިނީ ކެމެރާމަން އަކަށް" މިގޮތަށެވެ.
މަނިކު ފާހަގަކުރެއްވިގޮތުގައި އެއިރު މިދާއިރާގެ ތަޖުރިބާކާރުން ވަރަށް މަދެވެ. ދާއިރާގައި މަސައްކަތްކުރައްވަން ފެއްޓެވުމުން ޝައުގުވެރިކަން އުފެދުނެވެ. އަބަދުވެސް އިސްކަންދެއްވީ ބެލުންތެރިން ޝައުގުވެރިވާފަދަ ގޮތަކަށް ކެމެރާ ކުރެއްވޭތޯއެވެ.
ޓީވީއެމްގައި ވަޒީފާ އަދާކުރެއްވިއިރު އެތަނުން އުފެއްދި ގިނަ ޕްރޮގްރާމްތަކެއްގެ ކެމެރާމަނަކީ މަނިކުއެވެ. ފާހަގަކޮށްލެވޭ އުފެއްދުންތަކުގެ ތެރޭގައި 'ސަޅިބައިސާ' 'މިއުޒިކް ވީޑިއޯ' އަދި 'ރިދަމް އޮފް ދަ ވޭވްސް' ފަދަ އުފެއްދުންތައް ހިމެނެއެވެ. ވަރަށްގިނަ މީހުން ވަނީ މިދާއިރާއިން ތަމްރީން ކޮށްދެއްވާފައެވެ. ލައިޓިންގ ހަދާނެގޮތާއި ކެމެރާ ޕޮޒިޝަންކުރާނެ އޭންގަލްތައް ވަރަށް ރަނގަޅަށް ގެންދެވީ ކިޔައިދެއްވަމުންނެވެ.
" ވީޑިއޯ ނެގުމުގައި އިސްކަންދޭންޖެހޭ ކަންތައްތައް ވަރަށްގިނަ. މިގޮތުން ލައިޓަކީ އެންމެ މުހިއްމު އެއް އެލެމެންޓް. ކެމެރާ ކިތައްމެ މޮޅަސް ރަނގަޅު ލައިޓިންއެއް ކްރިއޭޓް ނުކުރެވެންޏާ މަންޒަރުގެ ރީތިކަން ފުރިހަމައެއް ނުވާނެ" މަނިކު ފާހަގަކުރެއްވިއެވެ.
މަނިކު ކެމެރާކުރެއްވި ފިލްމުތަކުގެ ތެރެއިން އެންމެ މަޝްހޫރު އެއް ފިލްމަކީ 'ދެރިޔާ' އެވެ. އެންބިއަންސް ލައިޓް އިފެކްޓް ބޭނުންކޮށްގެން ކެމެރާކުރެއްވި މިފިލްމު ވެގެންދިޔައީ ވަރަށް ރީތި ޝޮޓްތަކެއް ހިމެނޭ ފިލްމަކަށެވެ.
ޓީވީއެމްގައި 21 އަހަރު ވަޒީފާ އަދާކުރެއްވުމަށްފަހު 2000ވަނަ އަހަރު ވަޒީފާއިން ވަކިވާންޖެހުނުއިރު، މަނިކު ހުންނެވީ އެންމެ ސީނިއަރ ކެމެރާމަންގެ ގޮތުގައެވެ. ވަރަށް ލޯބިން އަދާކުރެއްވި ވަޒީފާ އާއި ކުއްލިގޮތަކަށް ދުރަށް ވަޑައިގަންނަވަންޖެހުން ވެގެންދިޔައީ މަނިކުގެ ހަޔާތަށް ބޮޑު އަސަރެއް ކުރުވިކަމަކަށެވެ.
ސިއްޙީ ޙާލަތަށް ބޮޑު ބަދަލެއް
"މިއަދުގެ ސިއްޙީ ހާލަތަށް ދިއުމަށް މެދުވެރިވުމުގައި 21 އަހަރު ވަންދެން އެންމެ ލޯބިން ކުރަމުންދިޔަ މަސައްކަތުން އެކަހެރިކުރުން އެއީ އެންމެ ބޮޑު ސަބަބު. ތަހައްމަލު ނުކުރެވޭ ވަރުގެ ބޮޑު އަނިޔާއަކަށް މިކަންވި. އެލިބުނު ޝޮކްގަ މިއަދު މިވަނީ ސްޓްރޯކް ޖެހި ހަށިގަނޑުގެ އެއްފަޅި ވާގިނެތިފަ" މަނިކު ވަރަށް އަސަރާއިއެކު ކިޔައިދެއްވިއެވެ.
ބަލިހާލަތު ކޮންމެ ގޮތަކަށް ހުރި ކަމުގައިވިއަސް ހިތްވަރަކަށް ބަދަލެއް ނާދެއެވެ. ޓީވީއެމްއަށް ފަހު މަނިކު ވަނީ އަމިއްލަ ބައެއް ފަރާތްތަކާއެކު މަސައްކަތް ކުރައްވާފައެވެ. މީގެތެރޭގައި ޕްރޮޑިއުސަރ އަދި ޑައިރެކްޓަރ މުޙައްމަދު ނިޔާޒް (ޓެޑްރީ) އާ އެކީގަ ކުރެއްވި މަސައްކަތް ފާހަގަކުރެވެއެވެ. މީގެތެރޭގައި ފީޗަރ ފިލްމާއި، އިޝްތިހާރާއި، ޑޮކިއުމެންޓްރީ ތަކާއި ޕްރޮމޯޝަނަލް ވީޑިއޯތައް ހިމެނެއެވެ. އެއަށްފަހު ވީޓީވީ އުފެއްދުމަށް 2005ވަނަ އަހަރުން ފެށިގެން ކުރި ހުރިހާ މަސައްކަތެއްގައި އިސްދައުރެއްވަނީ އަދާކުރައްވާފައެވެ.
" ވީޓީވީ އުފެދުނީ އަޅުގަނޑު ހިއްސާކުރި ޚިޔާލަކާއި އެކު. ކޮފީއެއްގައި އެކުވެރި ޝަމީމް އާއި އެކު ދެކެވުނު ވާހަކަތަކެއްގައި ދެމީހުން ހިއްސާވާގޮތަށް ވިޔަފާރި އުސޫލުން ކުރިއަށް ގެންދެވޭނެ ވީޑިއޯ ސްޓޫޑިއޯއެއް އުފައްދަން އަޅުގަނޑު ޝަމީމްއަށް ހުށަހެޅިން. ޝަމީމް އަށް އެޚިޔާލު ކަމުގޮސްގެން އެކަމުގައި އެހީތެރިވެދެއްވުމަށް ޤާސިމް އިބްރާހީމް އަރިހުގައި ދެންނެވުމުގެ ނަތީޖާއަކީ ވީޓީވީ އުފެދުން. އެއީ އެކަން ކުރައްވަން ޤާސިމް ވެސް ބޭނުންފުޅުވިގޮތް" މަނިކު ތަފްސީލުދެއްވަމުން ވިދާޅުވިއެވެ.
ޞިއްޙީ ޙާލަތު ހުރިގޮތުން ކެމެރާ ކުރެއްވުމަށް ވީޓީވީ ސްޓޫޑިއޯ އިން ބޭރުގައި ހަރަކާތްތެރިނުވި ކަމުގައިވިއަސް ވީޓީވީގެ ކެމެރާމަނުންގެ ކަންތައްތައް ބަލަހައްޓާ ޝޫޓިންތައް ރާވާ ރަނގަޅު ކުރަންޖެހޭ ކަންތައްތައް ކިޔައިދެއްވުމުގައި މަނިކު ވަނީ އިސްކޮށް އުޅުއްވާފައެވެ.
ލިބުނު ކާމިޔާބީތައް
މަނިކު އަށް ވަނީ ދިވެހި ޤައުމީ ފިލްމުގެ 6 އެވޯޑެއް ލިބިވަޑައިގެންފައެވެ. މީގެތެރޭގައި ފިލްމު އެވޯޑްސް 1995ގައި ޑޮކިއުމެންޓްރީ ބައިން 'ބިއޯންޑް ދަ ޑްރީމްސް' އިން ބެސްޓް ކެމެރާމަންގެ އެވޯޑާއި، ފީޗަރ ފިލްމުގެ ބައިން 'ދެރިޔާ' އަށް ބެސްޓް ސިނަމެޓޮގްރަފީގެ އެވޯޑު ލިބިވަޑައިގަތެވެ. އަދި 2ވަނަ ދިވެހި ޤައުމީ ފިލްމު އެވޯޑްސްގެ ޑޮކިއުމެންޓްރީ ބައިން ބެސްޓް ކެމެރާމަންގެ އެވޯޑާއި، ،3ވަނަ ދިވެހި ޤައުމީ ފިލްމު އެވޯޑްސްގެ ޑޮކިއުމެންޓްރީ ބައިން ބެސްޓް ކެމެރާމަންގެ އެވޯޑާއި، ފީޗަރ ފިލްމުގެ ބައިން ބެސްޓް ސިނަމެޓޮގްރަފީގެ އެވޯޑު ވަނީ ލިބިވަޑައިގެންފައެވެ.
މަނިކުގެ އެންމެ ފާހަގަކުރެވޭ ކާމިޔާބީގެތެރޭގައި 2015ވަނަ އަހަރު ބޭއްވި 6ވަނަ ދިވެހި ޤައުމީ ފިލްމު އެވޯޑުސްގައި 'ލައިފްޓައިމް އެޗީވްމަންޓް އެވޯޑު ލިބިވަޑައިގަތުމުގެ އިތުރަށް، ވިޜުއަލް އާޓްސްގެ ދާއިރާއިން 2020ވަނަ އަހަރު ލިބިވަޑައިގެންނެވި ޤައުމީ އިނާމު ފާހަގަކުރެވެއެވެ.
ގިނަ އެވޯޑުތަކެއް މިދާއިރާއިން ލިބިވަޑައިގަތުމުގެ ސިއްރަކީ ފަރުވާ ބަހައްޓަވައިގެން މަނިކު ކުރެއްވި މަސައްކަތުގެ ނަތީޖާއެވެ. ޞިއްޙީ ޙާލަތު ހުރިގޮތުން މިހާރު މިދާއިރާގައި ހަރަކާތްތެރި ނުވެވުނު ކަމުގައިވިއަސް މަނިކު ވާނީ ކެމެރާކުރެއްވުމުގަ އާއި ކެމެރާމަނުން ތަމްރީން ކުރެއްވުމުގައި ނަމޫނާ ޚިދުމަތްތަކެއް ކުރެއްވި ފާހަގަކުރެވޭ ބޭފުޅަކަށެވެ.
އަމިއްލަ ދިރިއުޅުއްވުން
ދިރިއުޅުމުގައި އެންމެބޮޑު ޝުކުރެއް ހައްޤުވަނީ ލޯބިވާ އަނބިމީހާ ތ.ވިލިފުށީ އިރުވައިގޭ ރުޤިއްޔާ ހަސަން (ތުއްތު ކަނބުލޮ) އާއި 7 ދަރިންނަށް ކަމަށް މަނިކު ފާހަގަކުރެއްވި އެވެ. މަޝްހޫރު ލަވަކިޔުންތެރިޔާ މަރްޔަމް އަޝްފާ އަކީ މަނިކުގެ ކުއްޖެކެވެ.
އަދި ދާއިރާގައި މުޙައްމަދު ނިޔާޒު، އީސާ ޝަރީފު އަދި މުޙައްމަދު ޝަމީމްގެ ނަން ޚާއްސަ ގޮތެއްގައި ފާހަގަކުރައްވާ އެހީތެރިވެދެއްވި އެންމެންނަށް ވަނީ ޝުކުރު އަދާކުރައްވާފައެވެ.
