އަރިއަތޮޅު އުތުރުބުރި ތޮއްޑޫ އޭ ބުނުމުން އެންމެ ފުރަތަމަވެސް ހިތަށްއަރަނީ ކަރައެވެ. ކަރާ ހެއްދުމުގައި ރާއްޖޭގައި ދެވަނައެއް ނެތް ތޮއްޑޫއަކީ އާބާދީގައި ގާތްގަނޑަކަށް 2058 މީހުން ދިރިއުޅޭ ރަށެކެވެ. 172.6 ހެކްޓަރުގެ ބިމެއް އޮންނަ މި ރަށުގައި 65 ހެކްޓަރުގެ ބިން ޚާއްސަ ކޮށްފައިވަނީ ދަނޑުވެރިންގެ ދަނޑުތަކެވެ.
ތޮއްޑޫ އޭ ބުނުމުން ކަރާ އެކަނި ހިތަށް އަރުވައިގެން ވާކަށް ނެތެވެ. ތޮއްޑޫ އަކީ ދަނޑުވެރިކަމުގެ ގިނަ ބާވަތްތަކެއް މާލޭގެ ބާޒަރަށް ފޯރުކޮށްދޭ ރަށެކެވެ. މާލެ އަންނަ އޮޑި ފަހަރުތަކުގައި ބަރާކޮށްގެން އެގެންނަ ކަރާތަކުގެ އިތުރުން އާންމުކޮށް ދަނޑުތަކުގައި ހައްދާ ބާވަތްތަކުގެ ތެރޭގައި ފަޅޯ، ކިއުކަމްބާ، ތޮރާ، ބަރަބޯ، ލެޓިއުސްފަތް، ފުފޫ، ގިއްސަ، މިރުސް، ޗިޗަންޑާ، ކޮޕީފަތް، ފާގަ، ބަށި އަދި ކަންކުންފަތްވެސް ހިމެނެއެވެ. މިއީ މުޅި އަހަރުތެރޭގައިވެސް މާލޭގެ ބާޒާރުން އާންމުކޮށް ލިބެން ހުންނަ ބާވަތްތަކެވެ.
ތޮއްޑޫ ކަރައަކީ މާލޭގެ ބާޒާރުން ލިބޭ ވަރަށް ގިނަ ބަޔަކު ގަންނަ ބާވަތެކެވެ. ރޯދަމަހެއް އައިސްފިނަމަ އެނޫން ކަރައެއް ނުގަންނަން އުޅޭ މީހުންނާވެސް ދިމާވެފައި އެބަހުއްޓެވެ. މިއަހަރުގެ ރޯދަމަސް އަންނަން ގާތްވެފައިވާއިރު މިހާރުން ފެށިގެން ގިނަ ބަޔަކު އުންމީދުކޮށްގެން ތިބޭނީ މިއަހަރުގެ ރޯދަމަހުވެސް ތޮއްޑޫ ކަރާ ތާޒާ ކަމާއެކު ލިބޭނެ ކަމަށެވެ.
ތޮއްޑޫ ކަރާ ދަނޑުތަކުގެ އޭރިއަލް ވިއުގެ ގިނަ ފޮޓޯތަކާއި ވީޑިއޯތައް މީސްމީޑިއާގައި މިދުވަސްވަރު ދައުރުވަމުންދާތީ 'ކަރާ' ގެ ވާހަކަ އަހާލަން މި ފަހަރު ޒީޓައިމްސް އިން މިގުޅާލީ ތޮއްޑޫ ކައުންސިލްގެ ރައީސާ، ޙަދީޖާ ނިއުޝާ އާއި އެވެ. ޒީޓައިމްސްއަށް މައުލޫމާތު ދެއްވަމުން ނިއުޝާ ވިދާޅުވީ އެހެން އަހަރުތަކެކޭ އެއްގޮތަށް މިއަހަރުވެސް ރޯދައަށް ކަރާ ހެއްދުމުގެ މަސައްކަތް 3 މަސް ކުރިން ފަށައިގެން ކުރިއަށްދާ ކަމަށެވެ. "ވަރަށް ބާރަށް ކުރިއަށް އެބަދޭ ރޯދައަށް ކަރާ ފޯރުކޮށްދިނުމުގެ ތައްޔާރީތައް. މި ފަހަރު ރޯދައަށް ކަރާ ހައްދަނީ 23 ހެކްޓަރުގެ ބިމުގައި. އާންމުކޮށް ދަނޑުވެރިކަން ކުރުމަށް 65 ހެކްޓަރުގެ ބިން ދޫކުރެވިފައިވާނީ."
ތޮއްޑޫގެ ދަނޑުވެރިން ރޯދައަށް ކަރާ ހެއްދުމުގައި އަވަދިނެތި އުޅޭއިރު 2019ގެ ފަހުކޮޅު ދުނިޔެއަށް ކުރިމަތިވި ކޮވިޑް-19ގެ އާލަމީ ވަބާގެ ސަބަބުން ތޮއްޑޫގެ ދަނޑުވެރިންނަށް ވަނީ އެކަމުގެ ނޭދެވޭ އަސަރުކޮށްފައެވެ. އަރިއަތޮޅުގެ ލޯކަލް ޓޫރިޒަމްގައިވެސް ފާހަގަކޮށްލެވޭ ތޮއްޑޫއަށް ކޮވިޑްގެ ހިޔަނި އެޅުނު ދިމަދިމާއަށް ބަލާއިރު ދަނޑުވެރިކަމުގެ ބާވަތްތަކުގެ އަގުތައް ވަނީ ވެއްޓިފައެވެ. ކައުންސިލްގެ ރައީސާ ނިއުޝާ ވިދާޅުވީ "މިރަށުގައި ދަނޑުވެރިން ހައްދާ ބާވަތްތަކުގެ ތެރެއިން ކޮވިޑާއި ގުޅިގެން ވަރަށް ގިނަ ބާވަތްތަކުގެ އަގުތައް ދަށަށް ގޮސްފައިމިވަނީ."
މާލޭގެ މާރުކޭޓުގެ ގޮޅިތަކުންވެސް ތޮއްޑޫ ކަރައަށް ޚާއްސަ އިންތިޒާރެއް ކުރެއެވެ. ވިޔަފާރިވެރިންގެ ގޮޅިތަކުގެ ފުރިހަމަކަން ރޯދަމަހެއްގައި ނަމަ ލިބޭނީ ތޮއްޑޫ ކަރާ ހުރެގެން ކަމަށް ބައެއް ވިޔަފާރިިވެރިން ބުނެއެވެ. ދޭސީންނާއި ބިދޭސީންގެ ގޮޅިތައް ލޯކަލް މާރުކޭޓުން ބޭރުވެގެން މުޅި މާލެތެރޭގައި އެއްވެސް ތަރުތީބެއް ނެތި މިދުވަސްކޮޅު މިވަނީ ފުޅާވެފައެވެ. އެހެންނަމަވެސް ގޭދޮށު މާރުކޭޓުން ކަރާ ނުގަނެ ލޯކަލް މާރުކޭޓަށް މި ރޯދަމަހުވެސް ތޮއްޑޫ ކަރާ ގަންނަން ދާނެ ކަމަށް ބައެއް މީހުން ބުނެއެވެ.
ރޯދަމަހު އާންމުކޮށް ކަންމަތީ ފިހާރަތަކަށް ތޮއްޑޫ ކަރާ ގެންނަ ވިޔަފާރިވެރިއަކު ބުނީ ކައިރީގައި ހުންނަ މާރުކޭޓަކުން ހެޔޮ އަގުގައި ކަރާ ލިބެން ހުއްޓަސް ފިހާރައަށް އަންނަ މީހުން ރޯދަމަހެއްގައި ނަމަ ތޮއްޑޫ ކަރާތޯ ސުވާލުކުރާނެ ކަމަށާއި، ކަސްޓަމަރުންގެ ޑިމާންޑް އޮންނަ ވަރަށް ބަލާފައި ރޯދަމަހެއްގައި ކޮންމެ ދުވަހަކުވެސް ލޯކަލް މާރުކޭޓުން ކަރާ ގަންނަން ދާން ޖެހޭ ކަމަށެވެ.
މިއީ ދިވެހިންގެ 'އިފްތާރް މެނޫ' ގައި ކޮންމެހެން ހިމަނާލަން ބޭނުންވާ އައިޓަމެއް ކަމަށް މާލޭގައި ރެސްޓޯރެންޓެއް ހިންގާ ފަރާތަކުން ބުންޏެވެ. ރޯދަ ވީއްލުމަށް ކަރާ ފަންޏަކީ މަސްޓެއް. އަދި ކަރައަކީ ތޮއްޑޫ ކަރައަށް ވެއްޖެނަމަ އެއީ ވަރަށް ބޮޑު އުފަލެއް ކަސްޓަމަރުންނަށް. ތޮއްޑޫ ކަރާ ނުލިބޭ ދުވަހެއް ނަމަ އިންޑިއާ ކަރާ، ކާށިދޫ ކަރާ ނޫނީ އެހެން ރަށެއްގެ ކަރާ ގަންނަން ޖެހޭ." ރެސްޓޯރެންޓް ހިންގާ ފަރާތުން ބުންޏެވެ.
މިދިޔަ ރޯދަމަހަށް ބަލާއިރު އެވްރެޖްކޮށް 400 އެއްހާ ޓަނުގެ ކަރާ ތޮއްޑޫއިން ބޭރުކުރިއެވެ. މި ރޯދަމަހުވެސް ތޮއްޑޫއިން ގިނައަދަދެއްގެ ކަރާ ބޭރުކުރާނެ ކަމަށް ލަފާކުރެވެއެވެ. ކޮވިޑްގެ ތަދުމަޑުކަން ތޮއްޑޫއަށް ކޮންމެވެސް ވަރަކަށް ކުރި ނަމަވެސް ދަނޑުވެރިން އަންނަނީ ދަނޑުތަކުން ލިބޭ ނަފާ އިތުރުކުރުމުގެ ހިތްވަރު އެލުވާ ނުލާ ދަނޑު ގޮވާން ކުރަމުންނެވެ. ކޮވިޑާއި ގުޅިގެން ތަކެތީގެ އަގުތައް އެއްވަރެއްގައި ނުހިފެހެއްޓި ދިރިއުޅުމުގެ އަގުތަކަށް ކުރަންޖެހޭ ހޭދަ އިތުރުވެފައިވާ މި ދަނޑުވަޅުގައި ފާހަގަކޮށްލަންޖެހޭ ކަމަކީ ތޮއްޑޫގެ އާބާދީގެ މެޖޯރިޓީ އަކީ ދަނޑުވެރިކަމުން ލިބޭ އާމްދަނީއަށް ބަރޯސާވާ ޢާއިލާތައް ކަމެވެ.
ޒީޓައިމްސްގެ ކިޔުންތެރިންނަށްވެސް ތޮއްޑޫ ކަރާ ވަރަށް ކަމުދޭ ދޯއެވެ. އެހެންކަމަށްވާނަމަ ތޮއްޑޫ ކަރާގެ ރޯދަމަހަކަށް މި ރޯދަމަސްވެސް ވެދާނެއެވެ. ތޮއްޑޫގެ ދަނޑުތަކަށް ބަލިމަޑުކަމެއް ކުރިމަތިނުވެ ދަނޑުތައް ރީތިކޮށް ހެދިގެން އަންނަނަމަ މިފަހަރުވެސް ރޯދައަށް މާލޭގެ ބާޒަރަށް މަދުނުވާ ވަރަށް ކަރާ ފޯރުކޮށްދިނުމަށް އެ ދަނޑުވެރިން ތިބީ ހުށިޔާރުވެގެންނެވެ. ވަރަށް ފޯރީގައި ދަނޑުވެރިން އަންނަނީ ދަނޑުތަކުގައި ކަރާވެޔޮތައް ޖަހާ ވީއެންމެ އަވަހަށް ވެޔޮތައް ފޯދި ކަރާތައް ހަރުވޭތޯ ބަލަމުންނެވެ. އަދި ތޮއްޑޫގެ ދަނޑުވެރިންގެ މެދުގައި ކަރާ ހެއްދުމަކީ އެކަކު އަނެކަކަށް އެހީތެރިވެ އެކުވެރި މާހައުލެއްގައި ނިކަން ލޯބިން އެރަށު މީހުން ކުރާ ކަމެކެވެ.
