ޒުވާން އުމުރުގައި އިބްރާހީމް ޝުޖާޢު ނުވަތަ އާންމު ނަމުންނަމަ ޝުޖާ އަކީ ގިނަ ކާމިޔާބީތަކެއް ހޯއްދަވާފައިވާ ޒުވާނެކެވެ. ރައްޔިތުންގެ މަޖިލީހުގެ މެންބަރަކަށް ވެވަޑައިގެންނެވީ އުމުރުން އެންމެ 28 އަހަރުގައެވެ. ދިވެހިރާއްޖޭގެ އެންމެބޮޑު ސުޕަމާކެޓްޗެއިން ހިންގާ ރެޑްވޭވްގެ ޖެނެރަލް މެނޭޖަރުގެ މަޤާމްވަނީ އަދާކުރައްވާފައެވެ.
އިބްރާހީމް ޝުޖާއު
ހއ.ބާރަށަށް އުފަން ޝުޖާ އަކީ ސްކޫލް ދުވަސްވަރު ފާހަގަކުރެވުނު ސްކައުޓެކެވެ. 1998ވަނަ އަހަރު އަމީރު އަޙްމަދުގެ ބެސްޓް އޯލްރައުންޑް ސްކައުޓަކަށް ހޮވިވަޑައިގެންފައިވެއެވެ. ބާރަށު މަދަރުސާއާއި އަމީރު އަޙްމަދު ސްކޫލުން ތަޢުލީމު ހާޞިލުކުރެއްވި ޝުޖާ ޖީސީއީއޯލެވެލް ނިންމެވީ އެމްއީއެސް އިންނެވެ.
އޭލެވެލް ހެއްދެވުމަށް ސީއެޗްއެސްއީ އަށް ވަޑައިގެންނެވެން އޮތް ފުރުސަތު ދޫކުރެއްވުމަށްފަހު އިސްކަންދެއްވީ ވަޒީފާއަދާ ކުރެއްވުމަށެވެ. "ބައްޕަ އެކަނި ކުރައްވާ މަސައްކަތުން އަޅުގަނޑުމެންގެ ޢާއިލާގެ ހުރިހާ ޚަރަދެއް ބެލެހެއްޓީ. އެހެންވީމަ ނިންމީ ވަޒީފާ އަށް ދާން. ވަޒީފާއަށް ދަމުން މެނޭޖްމަންޓް ދާއިރާއިން ޑިޕްލޮމާއެއް ފުރިހަމަކުރިން"
ވަޒީފާގެ ދާއިރާގައި ހޯއްދެވި ކުރިއެރުން
2002ވަނަ އަހަރު ސްކޫލް ނިންމެވުމަށްފަހު ޖެހިގެން އައި އަހަރު ރެޑްވޭވް އާއި ގުޅިވަޑައިގެންނެވީ އެކައުންޓް އެސިސްޓެންޓެއްގެ ގޮތުގައެވެ. އެހެންނަމަވެސް މިއަދު ވަނީ އެކުންފުނީގެ އެންމެ އިސްމަޤާމްވެސް އަދާކުރައްވާފައެވެ. މިއީ ޝުޖާ އަށް ލިބިވަޑައިގެންނެވި ފާހަގަކުރެވޭ ކުރިއެރުމެކެވެ.
"ފުރަތަމަ ވަޒީފާއަށް ވަނީ އުމުރުން 18އަހަރުގައި ރެޑްވޭވް އަށް. މިއަދާއި ހަމައަށްވެސް މިހިރީ އެތަނުގައި. މިހާރު ކޮންމެ ދުވަހަކު އޮފީހަށް ނުކުމެ މަސައްކަތްކުރަން ނުޖެހުނު ކަމުގައިވިއަސް ރެޑްވޭވް ހިންގުމުގެ ޒިންމާ އަދާކުރުމުގައި އަދިވެސް އުޅެން. ސިޔާސީ ދާއިރާއަށް ވަގުތު ހޯދުމަށް ރެޑްވޭވްގެ ޖެނެރަލް މެނޭޖަރގެ މަޤާމުން ދުރަށް މިދިޔައީ 2 އަހަރެއްހާ ދުވަސް ކުރިން" 12 އައުޓްލެޓް ހުރި ވިޔަފާރި ކުންފުނީގެ ޖެނެރަލް މެނޭޖަރުގެ މަޤާމް 7 އަހަރެއްހާ ދުވަހު ޝުޖާ ވަނީ އަދާކުރައްވާފައެވެ.
ޝުޖާ ޤަބޫލުކުރައްވާ ގޮތުގައި ރެޑްވޭވްގެ ޓީމަށް އެހާބޮޑު ކުރިއެރުމެއް ހޯދުނީ ވަޒީފާއަށްވުރެ ބޮޑަށް ކުންފުނިދެކެ ލޯބިން ހުރިހާ މުވައްޒަފުން ޓީމެއްގެ ގޮތަށް މަސައްކަތްކުރުމެވެ. "ރެޑްވޭވްގެ ޗެއާމަން އަދި ރައްޔިތުންގެ މަޖިލީހުގެ މައިނޯރިޓީ ލީޑަރު އަޙްމަދު ސަލީމުގެ ހިކުމަތްތެރިކަމާއި ޓީމުގެ އެއްބައިވަންތަކަމުން ކުރިއެރުން ލިބުނީ. އަސްލު ޓީމަށް ހޯދުނު ކާމިޔާބެއް ރެޑްވޭވް އަށް މިލިބުނު ކުރިއެރުމަކީ." ޝުޖާ ވިދާޅުވިއެވެ.
ސިޔާސީ ދާއިރާ
ޝުޖާ ފާހަގަކުރެއްވިގޮތުން އެއީ ކުރިން ސިޔާސީ ދާއިރާއަށް ޝައުގުހުންނަ ބޭފުޅެއް ނޫނެވެ. ކުރިއަށް ވަޑައިގަންނަވަން ބޭނުންފުޅުވީ ވިޔަފާރީގެ ދާއިރާއިންނެވެ. އެހެންނަމަވެސް ރެޑްވޭވްގެ ޗެއާމަން ސަލީމް، މޯލްޑިވްސް ލޭބަރ ޕާޓީ އުފެއްދެވިއިރު ޕާޓީ އުފެއްދުމުގެ މަސައްކަތުގައި އިސްކޮށް ވަނީ މަސައްކަތް ކުރައްވާފައެވެ. އެއަށްފަހު ޝުޖާ ގެ ސިޔާސީ މަސައްކަތް މަޑުމަޑުންދިޔައީ ކުރިއަށެވެ.
" 2009ވަނަ އަހަރު ރައްޔިތުންގެ މަޖިލީހުގެ މެންބަރުކަމަށް ސަލީމް ކުރިމަތިލެއްވީ އޭދަފުށީ ދާއިރާއަށް. އަޅުގަނޑު ހުރީ ކެމްޕެއިން މެނޭޖަރަކަށް. ސަލީމް ނުކުންނެވީ އަމިއްލަ ކެންޑިޑޭޓެއްގެ ގޮތުގައި. އެމްޑީޕީ ކެންޑިޑޭޓަކާ ޑީއާރުޕީގެ ކެންޑިޑޭޓަކާ ވާދަކޮށް ބޮޑުތަފާތަކުން އަޅުގަނޑުމެން ގޮނޑި ކާމިޔާބުކުރީ. އެއީ ލިބުނު ވަރަށްބޮޑު ކުރިއެރުމެއް" ޖޯޝާއި ފޯރީގައި އެއިރުގަ ކެމްޕެއިންގައި މަސައްކަތްކުރެއްވިގޮތް ހިއްސާކުރެއްވިއެވެ.
2012ވަނަ އަހަރު ޕީޕީއެމް އުފެދުމާއެކު އެޕާޓީގެ ޒުވާނުންގެ ގޮފީގެ ކައުންސިލް މެންބަރަކަށް ވާދަކުރައްވާ ކާމިޔާބު ހޯއްދެވި ޝުޖާ ވަނީ ރައްޔިތުންގެ މަޖިލީހުގެ ބާރަށު ދާއިރާގެ ގޮޑި 2014ވަނަ އަހަރު ބޮޑު ތަފާތަކުން ކާމިޔާބު ކުރެއްވިގޮތް ވިދާޅުވެދެއްވާފައެވެ.
" ބާރަށު ދާއިރާއަށް ކުރިމަތިލާން ސަލީމް ވިދާޅުވި 2009ވަނަ އަހަރު. ކެމްޕެއިން އަށް ބޭނުންވާ ހުރިހާ ރިސޯސަސްވެސް ހަމަޖެހުނު. ރައީސް މައުމޫނު ވަޑައިގެންނެވީ ޑީއާރުޕީ ކެންޑިޑޭޓް ކެމްޕެއިން އަށް އޭދަފުއްޓަށް. އެހިސާބުން އަޅުގަނޑު ނިންމީ އެދައުރުގަ ކުރިމަތިނުލާ ސަލީމް އޭދަފުށީ ދާއިރާއަށް ހޮއްވެވުމުގެ މަސައްކަތުގައި ދެމިހުންނަން" އެފަހަރު ސަލީމް އަށް ގޮޑި ކާމިޔާބުވިހިސާބުން ފެއްޓެވީ އޭގެ 5އަހަރު ފަހުން އޮންނަ މަޖިލިސް އިންތިޚާބުގެ ބާރަށު ދާއިރާއަށް ކުރިމަތިލެއްވުމުގެ މަސައްކަތެވެ.
ޕީޕީއެމްގެ ޔަޤީންޓީމްގަ މަސައްކަތް ކުރެއްވި ޝުޖާ އަށް ރައްޔިތުންގެ މަޖިލީހަށް ވަޑައިގަތުމުގެ އުއްމީދުއާވީ، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ބައްދަލްކުރައްވާ ދެއްކެވި ވާހަކަފުޅުންނެވެ.
" ގުޅުއްވާފަ ވިދާޅުވަނީ މިއީ ޔާމީން އޭ. ބައްދަލްކުރައްވަން ބޭނުންފުޅުވެއޭ. ވަރަށް އެކްސައިޓްވި. ރައީސް ޔާމީން މަޖިލިސް ތަޅުމުގަ ދައްކަވާ ވާހަކަފުޅުތައް ބަލަން ވަރަށް ގިނައިން. ބައްދަލުކުރައްވާ ވިދާޅުވި ޝުޖާގެ މަސައްކަތްތައް ވަރަށް ފާހަގަކުރެއްވެއޭ. އެހެންވީމަ ބޭނުންފުޅުވެއޭ ކެމްޕެއިން ޓީމާއިއެކު ބާރަށު ދާއިރާގައި މަސައްކަތްކުރަން. އަދި ބޭނުންފުޅުވޭ 2014ގަ އޮންނަ ރައްޔިތުންގެ މަޖިލީހުގަ ބާރަށު ދާއިރާގެ މެންބަރެއްގެ ގޮތުގަ ހުންނަން." އުފަލާއިއެކު ޝުޖާ ފާހަގަކުރެއްވިއެވެ.
ޕީޕީއެމް އަށް 2013ވަނަ އަހަރު ރިޔާސީ އިންތިޚާބު ކާމިޔާބުވުމަށްފަހު 2014ވަނަ އަހަރު އޮތް މަޖިލިސް އިންތިޚާބުގައި، އެއިރު އެދާއިރާގައި ހުންނެވި އެމްޑީޕީގެ މެންބަރާއި ވާދަކުރައްވާ 600 އެއްހާ ވޯޓުގެ ތަފާތުން ޝުޖާ އަށް ކުރިއެރުން ލިބިވަޑައިގެންނެވި އިރު މަޖިލިސް އިންތިޚާބުން 3ވަނަ އަށް އެންމެގިނަ ވޯޓު ލިބިވަޑައިގެންނެވި ކަމަށް ފާހަގަކުރެއްވިއެވެ.
" އަޅުގަނޑުގެ 5އަހަރުގެ ދައުރުގަ ޢުމްރާނީގޮތުން ދާއިރާއަށް ބޮޑު ކުރިއެރުމެއް ހޯދަދިނިން. 2019ވަނަ އަހަރު އޮތް މަޖިލިސް އިންތިޚާބުން ނާކާމިޔާބުވީ އެންމެ 45 ވަރަކަށް ވޯޓުން. ފަހުވަގުތު ރައީސް އިބްރާހީމް މުޙައްމަދު ޞާލިހް އާއި ރައީސް މުޙައްމަދު ނަޝީދު ވަޑައިގެން ކެމްޕެއިން ކުރެއްވީމަ ވީވަރު އެއީ"
ޕީޕީއެމް އާއިއެކު މަސައްކަތްކުރާ ޕީއެންސީގެ ނައިބު ރައީސެއްގެ ގޮތުގައި ހުންނެވި ޝުޖާ އަކީ ކުރިއަށް އޮތް ލޯކަލް ކައުންސިލް އިންތިޚާބުގެ މާލެ ސިޓީ ކައުންސިލްގެ ހުޅުމާލެ ދާއިރާގެ ޕީޕީއެމްގެ ކެންޑިޑޭޓެކެވެ. 2009ވަނަ އަހަރުން ފެށިގެން ހުޅުމާލޭގައި ދިރިއުޅުއްވާ ޝުޖާ ވަނީ ސިޓީ ކައުންސިލަށް ކުރިމަތިލެއްވި ސަބަބުތައް ވަރަށް ތަފްސީލްކޮށް ވިދާޅުވެދެއްވާފައެވެ. އޭގެތެރެއިން ބައެއް ކަންތައްތައް ހިމަނާލާނަމެވެ.
" ހުޅުމާލެ އަކީ ފެށުނީއްސުރެ ކުންފުންޏެއްގެ އަޅުވެތިކަމުގައި ތާށިވެފައިތިބި ރައްޔިތުންތަކެއް ދިރިއުޅޭ އަވަށެއް. ލާމަރުކަޒީ ބާރު ފުރިހަމައަށް ނުހިގާ. ފުލެޓުތަކުގައި ދިރިއުޅޭ ރައްޔިތުން އަތުން މެއިންޓެނެންސް ފީ އަތުލާއިރު މެއިންޓެނެންސް ނުބެލެހެއްޓޭ. ވެހިކަލްތަކުން ހުޅުމާލެވަނީ ތޮއްޖެހިފަ. ރައީސް ޔާމީންގެ މެނިފެސްޓޯގައިވާ ގޮތަށް މިކަމަށް ހައްލުހޯދަދޭން ބޭނުން. ރައްޔިތުންނަށް އަތްފޯރާފަށަށް ފުލެޓުތަކުގެ ކުލި ގެންނަންޖެހޭ. އަދި ހުޅުމާލޭ ދަފްތަރުގައިޖެހުމަށް މިހާރު އޮތް އުދަގޫ މަރުހަލާ ނައްތާލާ ލުއިފަސޭހަ ނިޒާމެއް ޤާއިމްކުރަންޖެހޭ. ގެސްޓްހައުސްތަކާއި ކުދި އަދި މެދުފަންތީގެ ވިޔަފާރިތަކަށް މިހާރުހުރި ގޮންޖެހުންތައް ނައްތާލުމަށް މަސައްކަތްކުރުމަށް އަޅުގަނޑު މިކުރިމަތިލީ" ޝުޖާ ފާހަގަކުރެއްވިއެވެ.
އަމިއްލަ ދިރިއުޅުއްވުން
ޝުޖާ އާއި މަރްޔަމް ޝިއުނާ ކައިވެންޏަށް މިހާރުވަނީ 12 އަހަރުވެފައެވެ. ސޯޝަލް މީޑިއާގައި ހުންނަ ފޮޓޯތަކުން މިދެމަފިރިންގެ ދެމެދުގަ އޮންނަ ލޯބި ވަރަށްބޮޑަށް ފާހަގަވެއެވެ. ކައިވެންޏަށް އަހަރުފުރުންފަދަ ދުވަސްތައް ތަފާތު ގޮތްގޮތަށް ފާހަގަކުރައްވާ ފޮޓޯތައް ފެނެއެވެ. ދެފިރިހެން ކުދިންނާއި ޢާއިލާއާއިއެކު އުފާވެރި ދިރިއުޅުމެއް ހޭދަކުރައްވަމުންދާ ޝުޖާ ވިދާޅުވީ ދިރިއުޅުމުގައި އަނބިކަބަލުން ދެއްވާ ސަޕޯޓް ވަރަށް ފާހަގަކުރެވޭ ކަމަށެވެ.
"މަންމައާއި ބައްޕަގެ ސަޕޯޓްވެސް ފުރިހަމައަށް ލިބޭ. މިހިސާބަށް ދިއުމަށް ސިޔާސީގޮތުން ލިބުނު އެންމެބޮޑު ކާމިޔާބެއް ލިބުނީ ސަލީމް ދެއްވި އެހީތެރިކަމުން. މިދާއިރާއަށް ނެރުމަށް އަދި އަޅުގަނޑުގެ ހަޔާތް ބަދަލުކުރުމަށް އެހީތެރިވެދެއްވީ ސަލީމް. އެއީ އަޅުގަނޑު ބައްޕައެއް ފަދަ ލޯބިވާ ބޭފުޅެއް" ވަޒީފާއަށް ވެންނެވީއްސުރެ ރެޑްވޭވްގެ ޗެއާމަންގެ ހައިސިއްޔަތުން ސަލީމްވެދެއްވި އެހީތެރިކަމަށް ޝުޖާ ވަނީ ޚާއްސަ ޝުކުރެއް އަދާކުރައްވާފައެވެ.
