އާއިޝަތު މުޙައްމަދު ޞާލިޙް (އައިސްތު) އަކީ ވަރަށް ހިންގުންތެރި، ގޮންޖެހުންތަކާއި ކުރިމަތިލައްވަން ކެރިވަޑައިގަންނަވާ، ތަޢުލީމާއި ތަޖުރިބާ ލިބިވަޑައިގެންފައިވާ ކަނބަލެކެވެ. މަޖީދިއްޔާ ސްކޫލުގެ 93 އަހަރުވީ ދިގު ތާރީޚުގައި ޕްރިންސިޕަލްގެ މަޤާމް އަދާކުރައްވާ ފުރަތަމަ ކަނބަލަކީ އައިސްތު އެވެ. ޝެއިޚް ހުސައިން ޞަލާހުއްދީން އަދި މުޙައްމަދު އަމީންދީދީ ފަދަ ބޭފުޅުން ޕްރިންސިޕަލް ކަން ކުރެއްވި މަޖީދިއްޔާ ސްކޫލުގެ ޕްރިންސިޕަލް އަކަށް އައިސްތު ވުން މިއީ އެކަމަނާއަށް ލިބިވަޑައިގެންނެވި ބޮޑު ފަޚުރެކެވެ.
ޅ.ހިންނަވަރަށް އުފަން އަދި ރައީސް އިބްރާހީމް މުޙައްމަދު ޞާލިޙް ގެ ދައްތަ އައިސްތު ތަޢުލީމު ހާސިލްކުރެއްވުމަށް މާލެ ވަޑައިގަތީ އުމުރުން އެންމެ 7 އަހަރުގައެވެ. ޔޫކޭޖީ އިން ފެށިގެން އޯލެވެލް އާއި ހަމައަށް އަމީނިއްޔާ ސްކޫލުން ތަޢުލީމު ހާސިލްކުރެއްވުމަށްފަހު ޗުއްޓީ އަށް ވަޑައިގަތީ އުފަން ރަށަށެވެ.
" އޭލެވެލް ހެދުމަށްވުރެ އެއިރު ބޭނުންވީ ވަޒީފާއަކަށް ދާން. އެއިރު އެންމެ ކުރާ ހިތްވާކަމަކަށްވީ އެއަރހޮސްޓެސް އަކަށް ވުން. ވަރަށް ޑްރީމް ޖޮބެއް. ރީތި ހެދުމެއް ލާފަ މޭކަޕްކޮށްފަ ދަތުރު ކުރަން އެއިރު ބޭނުންވި. ވަކި ހިސާބަކުން އެއަރޓްރެފިކް ކޮންޓްރޯލަރ އަކަށް ވާން ވެސް ބޭނުންވި. މަޢުލޫމާތުވެސް ހޯދިން" އައިސްތު ވިދާޅުވިއެވެ.
އަދާކުރައްވަން ބޭނުންވި ވަޒީފާގެ ބަދަލުގައި ފުރަތަމަ ވަޑައިގަތީ ސަރުކާރުން ހަމަޖެއްސި އެމްއެސްއެލް (ޝިޕިންގ ލައިން) ވަޒީފާއަށެވެ. އެއިރު އޮންނަގޮތުން ސަރުކާރުން ހަމަޖައްސާ ވަޒީފާއަށް ވަކިމުއްދަތަކަށް ދާންޖެހެއެވެ. އެހެންނަމަވެސް އެމްއެސްއެލްގެ ވަޒީފާގައި މަހެއްހާ ދުވަސް ހޭދަކުރެއްވުމަށްފަހު ވަޑައިގަތީ ޓީޗިންގ ދާއިރާއިން ތަޢުލީމް ހާސިލްކުރެއްވުމަށެވެ.
ތަޢުލީމީ ދާއިރާއަށް ވަޑައިގެންނެވުނު ގޮތް
އައިސްތު އެންމެ ފުރަތަމަ ޕްރައިމަރީ ޓީޗިންގ ކޯހަށް ކުރިމަތިލެއްވި ގޮތް ހިއްސާކުރެއްވިއެވެ. " އޯލެވެލް ނިންމާފަ ރަށުގަ ހުއްޓާ ރައްޓެހިން ގުޅާފަބުނި އެބައޮތޭ ކޯސް އިޢުލާންކޮށްފަ. ދެން އަޅުގަނޑު ބުނިން އަޅުގަނޑު ނަމުގަ ލާން. އެއީ ހަމަ ރައްޓެހިންނާއި އެކީގަ ދާހިތުން. ކޮންމެހެން ޓީޗިންގއަށް ދާކަށްނޫން. އެމީހުންވެސް ކިޔައިފި މާ މުސާރަ ބޮޑުވާނޭ. އެންމެންވެސް އެކީގަ އުޅެވޭނޭ. "
ޓީޗިން ކޯސް ނިންމެވުމަށްފަހު އެންމެފުރަތަމަ ޓީޗަރެއްގެ ގޮތުގައި 1984ވަނަ އަހަރު ވަޒީފާއަށް ވަޑައިގަތީ މަޖީދިއްޔާ ސްކޫލަށެވެ. "ސެކަންޑަރީ ސްކޫލުތަކުގަ ތިބި ޕްރައިމަރީ ޓީޗަރުން، ޕްރައިމަރީ ސްކޫލުތަކަށް ބަދަލުކުރި އިރު އަޅުގަނޑު ބަދަލުކުރީ އިސްކަންދަރު ސްކޫލަށް. އެއިރު އޮތީ ސިންގަޕޫރުން ޕްރައިމަރީ ޓީޗިން ޑިޕްލޮމާ ކޯހެއް ލިބިފަ. އެހެންވެ ވަރަން އަވަހަށް ފުރައިފިން. ކޯސް ނިންމާފަ އައިސް މަސައްކަތްކުރަން ޖެހުނީ ޖަމާލުއްދީންގަ. އެސްކޫލުގަ ޓީޗަރަކުން ފެށިގެން ގޮސް މެނޭޖްމަންޓްގަ މަސައްކަތް ކުރިން" ޖަމާލުއްދީން ސްކޫލްގަ މަސައްކަތްކުރައްވަމުން ވެސް ސިންގަޕޫރުން މެނޭޖްމަންޓް ކޯހެއް ފުރިހަމަކުރެއްވިއެވެ. އަދި ޖަމާލުއްދީންގައި މަސައްކަތްކުރެއްވީ ވަރަށް ޝައުގުވެރިކަމާއިއެކުއެވެ. އެއިރު ތާޖުއްދީން ސްކޫލުން ޑެޕިއުޓީ ޕްރިންސިޕަލެއްގެ މަޤާމް ހުށަހެޅުއްވުމުން ވަޑައިނުގެންނެވީ އެހެންވެއެވެ. އެހެންނަމަވެސް އިމާދުއްދީނަށް ވަޑައިގެންނެވީ މިނިސްޓްރީން އެގޮތަށް އެންގެވުމުން ކޮންމެހެން ވަޑައިގަންނަވަން ޖެހިގެންނެވެ.
"އިމާދުއްދީނަށް ގޮސް ދެން ބޭނުންވި އާ ސްކޫލަކަށްވުމުން ވަރަށްގިނަ ކަންތައްތައް ކުރަން. ގިނަކަންތައްތަކެއް ކުރިން. މިސާލަކަށް އެ ސްކޫލުގެ ގްރީނަރީ ޕްރޮގްރާމަކީ ވެސް އެއީ އަޅުގަނޑާ މެނޭޖްމެންޓްގެ އެހެން ބޭފުޅަކާ ރިސޯޓުތަކުން ސްޕޮންސަރ ހޯދައިގެންނާއި އަތުން ހަރަދުކޮށްގެން ހިންގި ބޮޑު ޕްރޮޖެކްޓެއް. ސްކޫލް އެސްޓެބްލިޝް ކުރުމަށް ސްކޫލް މޮޓޯ އަށް ވިއަސް. ސްކޫލް ހައުސްތަކުގެ ނަންތައް ކަމުގައިވިއަސް އަޅުގަނޑު ބައިވެރިވުން ހިމެނޭގޮތަށް ޓީމަކުން ކުރި މަސައްކަތް އެއީ. ސްކޫލެއްގެ ގޮތަށް ފަށައިގަންނަން ވަރަށް ގިނަ މަސައްކަތްކުރެވިފަ ހުރީ އިމާދުއްދީނަށް"
އިމާދުއްދީންގައި ހުންނެވީ އެސިސްޓެންޓް ޕްރިންސިޕަލެއްގެ މަޤާމުގައެވެ. އެސްކޫލުގައިވެސް އަހަރެއް ނުވަނީސް އެޑިޔުކޭޝަން މިނިސްޓްރީން ބޭނުންވީ އަނެއްކާވެސް އައިސްތު މަޖީދިއްޔާއަށް ގެންދިއުމަށެވެ.
" މިނިސްޓަރ ވާހަކަދެއްކެވި. ކުދިން ބެލެހެއްޓުމުގަ ރަނގަޅު ރެކޯޑެއް އޮތީމަ ވަރަށް ގިނަ ބައެއްގެ ރިކުއެސްޓެކޭ ވިދާޅުވި. އަޅުގަނޑު ދެންނެވިން މަޖީދިއްޔާ ވީމަ ޖަވާބެއް ދޭނީ ޢާއިލާއާއި ވާހަކަ ދައްކާފައޭ.. ޢާއިލާއިން ވެސް އެހާ ބޭނުމެއްނުވޭ މަޖީދިއްޔާއަށް ދާން. އަނެއްކާ މިނިސްޓަރާއި ބައްދަލުކުރަން ގެންދިޔައީ. މިނިސްޓަރ ވިދާޅުވި ތިމަންނައަށް ކޮށްދޭ ކަމެއްގެ ގޮތުގަ ދާށޭ. އެއިރު ހުންނެވީ އިސްމާޢީލް ޝަފީގު މިނިސްޓަރަކަށް. ހުރިހާ ސަޕޯޓެއް ދޭނަމޭ ވިދާޅުވި. އަޅުގަނޑަށް ވުރެ ކުރިން އެހެން ކަނބަލަކު މަޖީދިއްޔާގަ 6 މަހެއްހާ ދުވަހު ހުރެފަ ހުންނަން ބޭނުންނުވެގެން ދިޔައީ. އަޅުގަނޑު ދެންނެވިން އެއީ ވަރަށް ގާތް ރަހުމަތްތެރިއެކޭ. ވަރަށް ވަރުގަދަ ފީޑްބެކް އެބަހުއްޓޭ ލިބިފަ. އަޅުގަނޑު ބިރުގަނޭ. ފެއިލްވެއްޖިއްޔާ ކިހިނެއްހޭ ހަދާނީ. ވަރަށް ރަނގަޅު ރެޕިއުޓޭޝަނެއް މިހާތަނަށް އައިއިރު އެބައޮތޭ ފެއިލް ވެއްޖިއްޔާ އަޅުގަނޑުގެ ކެރިއަރ ދިޔައީ ނޫންހޭ. އެހެންވީމައޭ އެންމެބޮޑަށް ކަންބޮޑުވަނީ. އެވަގުތު ވިދާޅުވި އައިސްތު ފެއިލްއެއް ނުވާނޭ. ތިމަންނަ ދާތަނަކަށް ގޮވައިގެން ދާނަމޭ. ގޮސްދޭށޭ" އައިސްތު ތަފްސީލްކޮށް ވިދާޅުވެދެއްވިއެވެ.
އެޑިޔުކޭޝަން މިނިސްޓަރުގެ އެދިވަޑައިގަތުމަށް އައިސްތު 2 ވަނަ ފަހަރަށް މަޖީދިއްޔާ އާއި ގުޅިވަޑައިގެންނެވީ 2003ވަނަ އަހަރު އެސިސްޓެންޓް ޕްރިންސިޕަލް މަޤާމަށެވެ. ދާދި އަވަހަށް ކުރިމަތިލައްވަން ޖެހިވަޑައިގެންނެވި ޒިންމާބޮޑު މަސައްކަތްތަކަކާއެކު ސީނިއަރ އެސިސޓެންޓް ޕްރިންސިޕަލަކަށް ޕްރޮމޯޓްވިއެވެ.
" މަޖީދިއްޔާ އަށް އައީ ބޮޑު ޗެލެންޖެއް ގޮތަށް ގަބޫލުކޮށްގެން. ދަރިވަރުންގެ ޑިސިޕްލިން އެންމެ ބޮޑު ގޮންޖެހުމަކީ. ހިތަށްއެރި އެއީ ސްކޫލެއްގެތެރެބާއޭ. އަޅުގަނޑު ވިސްނާލިން މިކުދިންގެ ކުރިމަތީގަ ވަރަށް ވަރުގަދަ ވެގެންނޭ ބަދަލެއްގެނެވޭނީ. ބޭނުންހާގޮތަކަށް ކުދިން އުޅުނަކަ ނުދޭނަމޭ. އަޅުގަނޑަކީ ހަރުކަށި މިޒާޖެއްޖެ މީހެއް ނޫނަސް މަޖީދިއްޔާ ކުދިންނާ އޭރު ކުރިމަތިލީ ހަރުކަށި ސިފައެއްގަ. އެއިރު މިތާގަ ހުންނަނީ ބޭރު ޕްރިންސިޕަލެއް. އެބޭފުޅާވެސް ހުރަސް ނުކުރާ ކްލާސްތައް ހުންނާނެ. އެކަން ކުދިންނަށް އެގޭ. އަޅުގަނޑު ފުރަތަމަ ދުވަހުވެސް ދިޔަގޮތަށްގޮސް އެކްލާސް ކުރިމަތިން ހިގިން. އެއިރު އެކުދިން ގޮވި ހަދާންވޭ ކޮން އަންހެނެއްހޭ ފުއްޕާފަ މިދަނީ"
މަޖީދިއްޔާގެ އެއިރު މާޙައުލު އޮތްގޮތުން އައިސްތު މަސައްކަތްކުރެއްވީ ކެރިގެން ކަންކަން ޙައްލުކުރެއްވުމަށެވެ. ދަރިވަރުންގެ އަޚްލާޤު ރަނގަޅުކުރެއްވުމަށެވެ. " އަޅުގަނޑު ގޮސް ކްލާސްތަކަށްވެސް ވަނިން. އެއިރު މަޖީދިއްޔާގެ ޓީޗަރުންވެސް ބުނާނެ ވަރަށް ހިތްވަރުގަދައޭ. ގިނަގިނައިން ކްލާސްތަކަށް ވަދެ އަޅުގަނޑު އައި ބޭނުން ކިޔައިދޭން ފެށީމަ ބަދަލު އަންނަން ފެށި. އެއިރު ވާރޭވެހޭހެން ބިސް ޖަހާ ކްލާހެއްވެސް ހުރި. އެކަން ހުއްޓުވާލިން 2 މަހުން"
މަޖީދިއްޔާގައި ހުންނެވުމަށްފަހު 2006ވަނަ އަހަރު ވަޑައިގަތީ ސްކޮލަރޝިޕެއްގައި މެލޭޝިޔާއަށެވެ. ބިޒްނަސް އެޑްމިނިސްޓްރޭޝަން އިން ޑިގްރީ އަށް ކިޔެވުމަށް ފަހު މާސްޓަރސް ވެސް ހެއްދެވީ އެދާއިރާއިންނެވެ. ކޯސް ނިންމެވުމަށްފަހު ރާއްޖެ ވަޑައިގެންނެވުމުން ފުރަތަމަ ގެންދެވީ އެޑިޔުކޭޝަން މިނިސްޓްރީގެ ވަޒީފާއަށެވެ. އެއިރު މިނިސްޓަރަކަށް ހުންނެވީ ޑރ. މުސްތަފާ ލުތުފީ އެވެ. މާގިނަ ދުވަހެއް ނުވެ 2009ވަނަ އަހަރު ތާޖުއްދީން ސްކޫލުގެ ޕްރިންސިޕަލްގެ މަޤާމަށް ވަޑައިގެންނެވިއެވެ. 8 އަހަރު އެސްކޫލުގައި ހޭދަކުރެއްވިއިރު ރަނގަޅު ބަދަލުތަކެއް ހިންގުމަށްގެނެވި ފެންވަރު ރަނގަޅު ސްކޫލަކަށް ބަދަލުކުރެވުނު ކަމުގެ ހިންހަމަޖެހުން އައިސްތުއަށް އެއިރު ލިބިވަޑައިގަތެވެ.
" އެދުވަސްވަރު އަޅުގަނޑު މަންމަ ބަލިވެގެން ރާއްޖެއިން ބޭރުގަ ހުއްޓާ މިނިސްޓްރީއިން ގުޅުއްވާފަ ވިދާޅުވީ އައިސްތު މަޖީދިއްޔާ އަށް ފޮނުވާށޭ ބޭނުމީ. އަޅުގަނޑު ސުވާލުކުރިން ކީއްވެގެންތޯ އަޅުގަނޑު ޗޫސް ކުރީ، އެޑިޔުކޭޝަންގެ ސީނިއަރ ސްޓާފުންނާއި މަޖީދިއްޔާ ޓީޗަރުން އަދި އެންމެގިނަ މީހުން ބުނި ނަމަކަށް ވީ އައިސްތުގެ ނަމޭ ވިދާޅުވި. އަޅުގަނޑު ރާއްޖެއިން ބޭރުން އައިސް އެއާޕޯޓުގަ ހުއްޓާ މިނިސްޓްރީން ގުޅާފަ ބުނެފި އަނެއް ދުވަހު ތާޖުއްދީން ވަޒީފާއަށް ނުނިކުތުމަށް. ވަރަށް ރުޅިއައި. ސުވާލުކުރިން. ކީއްކުރަންހޭ ތިއުޅެނީ. އަޅުގަނޑު ކޮންކުށެއް ކޮށްގެންހޭ. ކުށެއް އޮވެގެން ނޫނޭ ބުނި. އަޅުގަނޑު ގެންދާކަން އެގިގެން ސްކޫލްގެ ބެލެނިވެރީން މުޒާހަރާ ކުރަނީއޭ މާދަން. އޭރުން ކުދީންނަށް ނޭދެވޭ އަސަރެއް ކުރާނެޔޭ ބުނި. އެހެންވެ އަޅުގަނޑު ނުދަން އެދުވަހު"
އެފަހަރުވެސް އައިސްތު މަޖީދިއްޔާއަށް ވަޑައިގަންނަވަން ބޭނުންނުވެގެން އެވާހަކަ ދެންނެވިއެވެ. އައިސްތުގެ ކަންބޮޑުވުމަކީ ހިންހަމަޖެހޭ ފެންވަރަށް މަޖީދިއްޔާ ނުގެންދެވުމެވެ. މިނިސްޓަރ ޑރ. އައިޝަތު ޝިހާމްގެ އެދިވަޑައިގަތުމަށް ސްޓޭޓް މިނިސްޓަރުގެ އަރިހުގަ އައިސްތު މަޖީދިއްޔާއަށް ވަޑައިގެންނެވިއެވެ.
" އަޅުގަނޑު ޕްރިންސިޕަލް ރޫމަށް ވަންއިރު ވަށައިގެން ހުރީ ފޮޓޯތަކެއް. ފުރަތަމަ ފޮޓޯގަވަނީ ޞަލާހުއްދީން، ދެން ޢަބުދުލްމަޖީދު ރަންނަބަޑޭރިކިލެގެފާނު. ދެން މުޙައްމަދު ޖަމީލު މިހެންގޮސް ޤައުމުގެ ލެޖެންޑްސް މުޅިން. އެތާގަހުރެފަ ބުނިން ދެން އަޅުގަނޑު މިތަނަށް އައިއްސިއްޔާ އަޅުގަނޑުގެ ފޮޓޯ ދޯއޭ މިތަނަށް އަރާނީ. މަޖަލަކަށް ހަދާފަބުނިން ހެވޭ ފެއިލްވާންވިއަސް ފޮޓޯ ތިތަނަށްލާން އަންނާނީއޭ. އެހެން ކިޔާފަ އާއެކޭ ބުނީމަ އަނެއް ދުވަހު ވަޒީފާއަށް މަޖީދިއްޔާއަށް ނުކުތީ"
2016ވަނަ އަހަރު މަޖީދިއްޔާގެ ޕްރިންސިޕަލްގެ މަޤާމަށް ވަޑައިގެންނެވި ގޮތަށް އަދިވެސް ހުންނެވީ އެމަޤާމްގައެވެ. އެހެންނަމަވެސް އައިސްތު ބޭނުންވާ ފެންވަރަށް މަޖީދިއްޔާ އަދިވެސް ނުގެންދެވޭކަމަށް ވިދާޅުވިއެވެ. މަޖީދިއްޔާއަކީ ގޮންޖެހުން ބޮޑު ސްކޫލަކަށްވާތީ ތަޢުލީމީގޮތުންވެސް ކުދިންގެ ނަތީޖާ ހިތްހަމަޖެހޭ ވަރަށް ރަނގަޅޭ ނުދެންނެވޭނެކަމަށް ވިދާޅުވިއެވެ. އައިސްތުގެ ވާހަކައިގައި އޭގެ ސަބަބުވެސް ބަޔާންކުރެއްވިއެވެ.
" މަޖީދިއްޔާއަށް އެއިރު އަންނަނީ އެހެން ސްކޫލުތަކުން ގުރޭޑު 8 އަށް އަންނަ ކުދިން. ގިނަވާނީ ކޮންމެވެސް މައްސަލައެއް ދިމާވެގެން އަންނަކުދިން. ވަރަށް މަދުވާނެ އެކަޑަމިކަލީ ނަތީޖާ ރަނގަޅު ކުދިން. ޑިސިޕްލިން ވެސް ގިނަ ދަރިވަރުންގެ އެހާ ރަނގަޅެއްނޫން. ކުދިން މެނޭޖް ކުރުމަށްވުރެ މުވައްޒަފުން މެނޭޖްކުރަންޖެހުނު. ބައެއް ކަންކަންއޮތީ އެއްވެސް ހަމައެއް ލަމައެއް ނެތި. ސްޓާފުންގެ ގުޅުމެއްނެތި އެންމެން ބައިބައިވެފަ. ހަމައަކަށް އެޅުވުނީ އެއްއަހަރަށްވުރެ ގިނަދުވަހުން".
މަޖީދިއްޔާގެ ދަރިވަރުންގެ ނަތީޖާ ރަނގަޅު ކުރުމަށް މިހާރު ވެސް ގެންދަވަނީ ބުރަކޮށް މަސައްކަތްކުރައްވަމުންނެވެ. މިމަސައްކަތުގައި އެއްބާރުލުން ދެއްވުމަށް ބެލެނިވެރިންގެ އަރިހުން އައިސްތު އެދިވަޑައިގަތީ " ކުދިން ތަރުބިއްޔަތު ކުރާއިރު ސްކޫލާ އޮންނަ ގުޅުން ރަނގަޅުކުރަން. ގިނަގިނައިން ސްކޫލު ކަންތައްތަކުގަ ބައިވެރިވެގެން އެނގޭނީ ސްކޫލުގެ ކަންކަން ވަކިގޮތަކަށް ކުރާ ސަބަބުތަށް އަދި ސްކޫލްގެ ކަންކަން ދާގޮތް. ބެލެނިވެރިން ސްކޫލް ކަންތައްތަކުގަ ބައިވެރިވި ވަރަކަށް ދަރިވަރުން ސްކޫލަށް އޮންނަ ކޮންފިޑެންސް ބޮޑުވެ ދަރިވަރުން ސްކޫލް ދެކެ ލޯބިވާނީ".
އަދި އިންޓަވިއު ނިންމަވާލައްވަމުން އައިސްތު ވަނީ ރަނގަޅު މެސެޖެއް މުޖުތަމަޢަށް ފޯރުކޮށްދެއްވާފައެވެ. މިގޮތުން ކުދިން ދެކެ ލޯބިވާންވާނެ ކަމަށާއި، އެލޯބި އެއީ ކުދިން ހަލާކުކުރަން ގެންގުޅޭ އެއްޗަކަށް ނުހެދުމަށް ވިދާޅުވިއެވެ. ކުދިން ކުރަން ބޭނުންނުވިއަސް ކުރަންޖެހޭ ކަންކަމުގެ މުހިއްމުކަން ވިސްނައިދީގެން އެކަންކަން ކުރުވުމަށް އެދިވަޑައިގެންނެވިއެވެ. އަދި ދަރިން ތަރުބިއްޔަތު ކުރުމުގައި އިންތަކަކާ މިންތަކެއް ވާކަން ހަނދާން ކޮށްދެއްވިއެވެ.
ކިޔުންތެރިންގެ ހިޔާލު
އައިސްތު މެޑަމް އަކީ އަބަދުވެސް ދަރިވަރުންގެ ހިތް ތަކުގެ މަންމައެއް. އެއްވެސް ކުއްޖަކަށް ތަފާތު ކުރުމެއްނުގެންގުޅޭނެ. الله ތަޢާލާ އައިސްތު މެޑަމްގެ މަސައްކަތުގައި ބަރަކަތް ލައްވާށި. އާމީން
ކޮމެންޓްސް ބަންދުކުރެވިފައި