އައްޑޫ ސިޓީއަށް އުފަން އާމިނަތު ސިތުނާ އާއި ޢަލީ ސައީދުގެ ހަމައެކަނި ދަރިފުޅު އާއިޝަތު ޒީވާ ޢަލީ (ޒީވާ) އުފަންވީ ބަނޑަށް 25 ހަފްތާގައެވެ. ދަރިފުޅުގެ އެހާރާއި މިހާރުގެ ފޮޓޯ ސޯޝަލް މީޑިއާއިން ފެނުމުން އިތުރު މަޢުލޫމާތު ހޯދާލުމަށް 'ޒީޓައިމްސް' އިން ކުރި މަސައްކަތުން ސިތުނާ ވަނީ އެމަޢުލޫމާތު ޒީޓައިމްސް އާއި ހިއްސާކޮށްފައެވެ.
އެއީ 2014ވަނަ އަހަރުގެ އޮކްޓޯބަރު މަހުގެ 22ވަނަ ދުވަހުގެ ދަންވަރުގެ ވަގުތެވެ. ސިތުނާ އަށް ހޭލެވުނީ އާދަޔާ ޚިލާފަށް ބަޑުން ފެން ފައިބާހެން ހީވެގެންނެވެ. މަންމަގެ އެހީތެރިކަމާއިއެކު ޑޮކްޓަރަށް ދައްކަން ދިޔުމުން އަނބުރާ ގެއަށް ފޮނުވާލީ ބަނޑަށް 5 މަސް ކަމަށްވާތީ ހާލަތު ގޯސް ނޫންކަމަށް ބުނެއެވެ. އެއިރު ބަޑުގަ އެއްވެސް ވަރަކަށް ނުރިއްސައެވެ. ޢާއިލީ ނަރުހެއްގެ ލަފައާއިއެކު ދެވަނަ ފަހަރަށް ޑޮކްޓަރަށް ދައްކަން ދިޔައީ އައްޑޫގައި ހުރި ކްލިނިކަކަށެވެ.
" ކްލިނިކުން ޑޮކްޓަރު ބެލުމަށްފަހު ބުނި ވިހަން ތައްޔާރުވަމުންދާ ކަމަށް. އިންޖެކްޝަން ޖެހީ ތަދުކުރުވަން. ރިސޯޓެއްގައި ވަޒީފާ އަދާކުރަމުންދިޔަ ފިރިމީހާ އައްޑޫއަށް އައިސް އަޅުގަނޑު ހިތަދޫ ރީޖަނަލް ހޮސްޕިޓަލަށް ގެންދިޔައީ. ވިހެއީ އޮކްޓޯބަރު 25ވަނަ ދުވަހު. ޑޮކްޓަރުން ބުނެފައޮތީ ބޭބީ ދުނިޔޭގަ ހުންނާނެ ކަމުގެ އެއްވެސް އުންމީދެއް ނެތްކަމަށް. ވިހެއުމަށްފަހު އިތުރު ފަރުވާއަށް ގެންދިޔައީ އައިޖީއެމްއެޗް އަށް" އެއިރުގެ ހަނދާންތައް އާކުރަމުން ސިތުނާ ކިޔައިދިނެވެ.
އައިޖީއެމްއެޗްގެ އެންއައިސީޔޫގައި 2 މަސް ދުވަސް ވަންދެން އެޑްމިޓްކޮށްގެން ވަނީ ފަރުވާދީފައެވެ. އަލަތު ދަރިފުޅު އުރާލަން ބޭނުންވެފައިތިބި ދެމަފިރިންނަށް އައިޖީއެމްއެޗް އިން ވެސް ދިނީ ނާއުއްމީދީ ޖަވާބެއް ކަމަށް ސިތުނާ ވަނީ ބުނެފައެވެ. " ބުނި އެއްވެސް ވަރަކަށް އުންމީދު ނުކުރާށޭ މިއީ ދުނިޔޭގަ އޮވެދާނެ ކުއްޖެއް ކަމަށް. ވަރަށް ދެރަވި އެއިރު. 2 މަސް ދުވަހު ފަރުވާދިނީ އޮކްސިޖަން ގުޅައިގެން. 2 ފަހަރެއްގަ އޮކްސިޖަން ނައްޓާލީމަ ބޭބީ އަށް ނޭވާނުލެވި ހާލަތު ގޯސްވި"
އައިޖީއެމްއެޗް އިން އިތުރުފަރުވާއަށް އިންޑިއާގެ ކިމްސް ހޮސްޕިޓަލަށް ކުޑަދަރިފުޅު ފޮނުވާލީ ލޮލުގެ ފެނުމުގައި މައްސަލައެއް އުޅޭ ކަމަށް ފާހަގަކުރެވިގެންނެވެ. " ކިމްސް ހޮސްޕިޓަލުން ބެލީ ފަރުވާދީގެން ރަނގަޅުކުރެވޭތޯ. އެ ހޮސްޕިޓަލަށް ގެންދިޔަތާ 2 ދުވަހުން އޮކްސިޖަންވެސް ނައްޓާލި. ކިމްސް ހޮސްޕިޓަލުގެ އެންއައިސީޔޫގައި 2 މަސް ދުވަހު ފަރުވާދިން ދަރިފުޅަށް. ލޭޒާ ޓްރީޓްމަންޓް ދިން 5 ފަހަރު. އަދި ކޮލެސްޓްރޯލް އާއި ހަކުރު ވަރަށް މަތީގަހުރީ"
ސިތުނާ އާއި ޢާއިލާގެ މެންބަރުން އިންޑިއާގައި އެއްއަހަރު ދުވަހަށް މަޑުކުރީ ދަރިފުޅަށް ބޭނުންވާ ހުރިހާ ފަރުވާއެއް ފުރިހަމަވަންދެނެވެ. 2 ހަފްތާ އިން 2 ހަފްތާއިން ޑޮކްޓަރަށް ދެއްކުމަށް އިންޑިއާ އަށް ދިއުމަށް ދަތިކަމަކަށް ވާނެތީ ފަރުވާ ނިމެންދެން އިންޑިއާގައި މަޑުކުރީއެވެ. ﷲ ގެ އިރާދަފުޅުން ޒީވާ އަށް މިހާރު ވަނީ 6 އަހަރު ފުރިފައެވެ. ވިހޭއިރު ބަރުދަނުގައި އެންމެ 600 ގްރާމް ހުރި ޒީވާގެ ސިއްޚީ ބޮޑު މައްސަލައެއް ފެންނަން ނެތްކަމަށް އުފަލާއިއެކު ސިތުނާވަނީ ފާހަގަކޮށްފައެވެ.
އެއްހަފްތާކުރިން ދުވަސްނުފުރާ ވިހެއި ކުއްޖަކަށް ފަރުވާނުދީ މަރުވަންދެން ދޫކޮށްލިކަމަށްބުނެ ޢާއިލާއަކުން ހިއްސާކުރި މަޢުލޫމާތާއި ފޮޓޯ ފެނުމުން އެމަޢުލޫމާތު ލިބުނު އެންމެންނަށް ބޮޑު ސިހުމެއް ލިބިގެންދިޔައެވެ. މިއީ ދިވެހިރާއްޖެކަހަލަ ސަތޭކަ އިންސައްތަ މުސްލިމް ޤައުމެއްގައި ކަންހިގަންވާނެ ގޮތެއް ނޫންކަމަށް ބުނެ އުފުލި އަޑުން ސޯޝަލް މީޑިއާ ވަނީ ގުގުމާފައެވެ.
" ބަނޑަށް ފަސްމަހުގައި އައިޖީއެމްއެޗް އަށް ދިޔައީ ބަނޑުގައި ރިއްސާތީ. ދެދުވަސްވަންދެން އެޑްމިޓްކޮށްފައި ބޭއްވިއިރު، އަންހެން މީހާ ވިހާފައިވަނީ ހޮސްޕިޓަލުގެ ފާހާނާތެރޭގައި. އެވަރަށް ބަޑަށް ތަދުވިއިރުވެސް ޕޭޝަންޓް އުޅެނީ ވާ ވަރަށްވުރެ މާ އެކްޓް ބޮޑުވެގެން ކަމަށް ނަރުހުންވަނީ ބުނެފަ. ފާހާނާއަށް ދިޔަ ގަޑީގަ އެއްޗެއް އަންނަހެން ހީވެގެން ނަރުހުންނަށް ގޮވުމުން ދެނަރުހުން އައިސް، ވިހެއީ ނަރުހުންގެ އަތްމައްޗަށް. ވިހެއުމަށްފަހު ފޫޅުގައި ދަތިވެސް ނުޖަހާ ކުޑަ ދަރިފުޅު ބޭއްވީ ކުދިންގެ ނެޕީ ބަދަލުކުރާތަނުގަ އެއްވެސް ފަރުވާއެއް ނުދީ. ޢާއިލާއިން މެނޭޖްމަންޓާއި ހޮސްޕިޓަލުގެ ތަފާތު މީހުންނާ ވާހަކަދެއްކުމުންވެސް ދަރިފުޅު ފަހުން ބޭއްވީ ހުދު ފޮތިކޮޅަކަށްލުމަށްފަހު ނާސިންގ ޓްރޮލީއެއްގެ މަތީގައި ޓްރޭއެއްގައި. އެޓްރޭގައި އޮވެ ދަރިފުޅު މަރުވީ" ރާއްޖޭގައި އޮންނަ އުސޫލުން މިމައްސަލައިގައި ޒިންމާ އުފުލާނޭ މީހަކު ނުހުންނާނެ ކަމަށް ބުނެ ސޯޝަލް މީޑިއާގައި ފޮޓޯ އާއި އެކު ޖަހާފައިވާ ތަފްސީލީ ލިޔުމެއްގައި ވެއެވެ.
މިހާދިސާ ހިނގުމާއި ގުޅިގެން އައިޖީއެމްއެޗްއަށް ކުރިމަތިވި ފާޑުކިޔުންތަކާއެކު އެހޮސްޕިޓަލުން ވަނީ ނޫސް ބަޔާނެއްނެރެފައެވެ. އެ ނޫސްބަޔާނުން ފެންމަތިވީ ދުވަސްނުފުރާ ވިހާ މަންމައިންނަށް ކެތްވާފަދަ ވާހަކައެއް ނޫނެވެ.
" ސިއްޙީ ގޮތުން ރިއާޔަތްކުރަންޖެހޭ ކުއްޖާގެ ބަރުދަނާއި އެހެނިހެން ބައެއް ކަންކަމަށް (22 ހަފްތާ ހަމަނުވާ އަދި ބަރުދަނުގައި 500 ގްރާމް ހަމަނުވާ) ރިޢާޔަތްކުރުމަށްފަހު މިއުމުރުގައި ވިހާ ކުއްޖެއްގެ ފުރާނަ ސަލާމަތްކުރުމަށް ފަރުވާ ދިނުމަކީ ހޮސްޕިޓަލްތަކުގައި ކުރާ ކަމެއް ނޫން. މިފަދަ ހާލަތްތަކުގައި ޢަމަލުކުރާގޮތަކީ ވިހާއިރު ކުއްޖާގެ ވިންދު ހުރިނަމަ ވިންދު އެއްކޮށް ދަންދެން ކުއްޖާ ބޭއްވުން. މިމަންޒަރަކީ ޢާއިލާއަށް ތަޙައްމަލްކުރަން ދަތި މަންޒަރެއްކަން ޤަބޫލުކުރަން" އައިޖީއެމްއެޗްގެ ބަޔާނުގައިވެއެވެ.
މިރިޕޯޓު ފެށުނުއިރު ގެނެސްދިން ސިތުނާގެ ވާހަކައިގައިވެސް ވަނީ ދިރިހުންނާނެ ކަމުގެ އުންމީދު ކަނޑާލާފައި އޮތް ދަރިފުޅަށް ފަރުވާދީގެން ރަނގަޅުކުރެވުނު ގޮތް ކިޔައިދީފައެވެ. ބަރުދަން ކިތަންމެ ލުއި ކަމުގައިވިއަސް ފަރުވާ ނުދީ މަރުވާން ދޫކޮށްލާ މަންޒަރު ބެލުމަކީ އަޅުގަނޑުމެން ހިތަށް ކެތްވާވަރުގެ މަންޒަރެއް ނޫނެވެ. ފަހުވަގުތާއި ހަމައަށް ދެވެންއޮތް ފަރުވާއެއް ފުރާނަ ސަލާމަތްކުރުމަށް ދޭށެވެ. މިއީ ދިވެހި އެތައް ދަރިންނެއްގެ އާދޭހެވެ. ސޯޝަލް މީޑިއާގެ ކޮމެންޓްތަކަށް ބަލާލުމުން މިކަން ޔަޤީންވެއެވެ.
