ވެރިރަށް މާލެއަކީ ސިޔާސީ ޕާޓީތައް އުފެދުނީއްސުރެ އެމްޑީޕީގެ މެޖޯރިޓީ އޮންނަތަނެކެވެ. ބޮޑު ތަފާތަކުން މާލެ ސިޓީގެ މޭޔަރުކަމަށް އިދިކޮޅު ޕީޕީއެމްގެ ޑރ.މުޙައްމަދު މުޢިއްޒު އިންތިޚާބުވެވަޑައިގެންނެވުން މިއީ އެމްޑީޕީއަށް ލިބުނު ބޮޑު ނާކާމިޔާބެކެވެ.
ޑރ. މުޢިއްޒު އާއި ވާދަކުރެއްވި އަލްއުސްތާޛު އަނަސް ޢަބްދުއްސައްތާރު ބޮޑު ތަފާތަކުން ބަލިވިއިރު، އަނަސް އަށް ކެމްޕެއިން ކުރެއްވުމަށް އެންމެބޮޑު މަސައްކަތެއް ކުރެއްވީ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އެވެ. އަނަސް އަށް ކެމްޕެއިން ކުރެއްވުމަށް ރައީސް ނަޝީދު އާއި އެމްޑީޕީގެ ބައެއް އިސްބޭފުޅުން ވަނީ މާލޭ ސިޓީގެ ގޭގެއަށް ދޮރުން ދޮރަށް ހިންގަވާފައެވެ.
ވާދަވެރި މި އިންތިޚާބުގައި، 7 އަހަރެއްހާ ދުވަހު ހައުސިންގ މިނިސްޓަރުކަން އަދާކުރެއްވި މުޢިއްޒުވެސް ވަނީ ފޯރިގަދަ ކެމްޕެއިން އެއް ކުރައްވާފައެވެ. މޭޔަރުކަމަށް ހޮވިވަޑައިގަތުމާއި ގުޅިގެން ހޮނިހިރު ދުވަހުގެ ރޭ ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލްވުމުގައި މުޢިއްޒު ވަނީ ވޯޓުދެއްވާ ތާޢީދު ކުރެއްވި ހުރިހާ އެންމެންނަށް ޝުކުރު އަދާކުރައްވާފައެވެ.
" އަޅުގަނޑު ކުރިމަތިލީ މާލޭގައި ހުރި މައްސަލަތައް ހައްލުކުރުމަށް. އަޅުގަނޑަށް އިތުބާރު ކުރީތީ ޝުކުރު ދަންނަވަން. އަޅުގަނޑަށް ކުރި އިތުބާރު އަމާނާތްތެރިކަމާއިއެކު އަދާކޮށްދޭނަން. އަޅުގަނޑުވާނީ ހުރިހާ ރައްޔިތުންނާއި ސަރުކާރާއި އެކީގައި މަސައްކަތްކުރާ މީހަކަށް. މާލޭގެ ރައްޔިތުންނަށް ދިމާވެފައިވާ އެންމެބޮޑު ދައްޗަކީ ގެދޮރުގެ ދަތިކަން. އެންމެފުރަތަމަ ވެސް ފަށާނީ ސަރުކާރާއި އެކު މަޝްވަރާކޮށްގެން ގުޅީފަޅަކީ ގެދޮރުގެ މަންޒިލަކަށް ހެދުމަށް" ޑރ. މުޢިއްޒު ވިދާޅުވިއެވެ.
މުޢިއްޒު އިތުރަށް ވިދާޅުވީ ރައްޔިތުން ނިންމެވީ ތާރީޚީ ނިންމުމެއް ކަމަށާއި، އިރާދަކުރެއްވިއްޔާ ފެނިގެންދާނީ ތަރައްޤީގެ މަޝްރޫޢުތައް ކުރިއަށް ގެންދާ ކައުންސިލެއް ކަމަށެވެ. އަދި ކުރީގެ ރައީސް ޢަބްދުﷲ ޔާމީން އަށް އިންސާފު ލިބެންޖެހޭ ކަމަށް ޤަބޫލުކުރައްވާ ކަމަށް ވިދާޅުވެ އެމަނިކުފާނު ރަމަޟާންމަހު ގެއަށް ބަދަލުކޮށްދެއްވުމަށް ވަނީ އެދިވަޑައިގެންފައެވެ.
ލޯކަލް ކައުންސިލް އިންތިޚާބުން ލިބިވަޑައިގެންނެވި ނާކާމިޔާބީ ޤަބޫލުކުރައްވާ އަނަސް ކުރެއްވި ޓްވީޓެއްގައި ވަނީ ވޯޓު ދެއްވި އެންމެންނަށް ޝުކުރު އަދާކުރައްވާފައެވެ.
" މާލޭގެ ރައްޔިތުންގެ އަޑު އިއްވައިފި. އިންތިޚާބުގެ ނަތީޖާ ޤަބޫލުކޮށް ލިބުނު ކާމިޔާބަށް ޑރ. މުޢިއްޒަށް މަރުހަބާ ދަންނަވަން. އަލުން މާލޭގެ ރައްޔިތުންގެ ތާއީދު ހޯދުމަށް މިނަތީޖާ ނުކުތް ގޮތެއް އެމްޑީޕީއިން ބަލާ މަސައްކަތްކުރަންޖެހޭ" އަނަސް ވިދާޅުވެފައިވެއެވެ.
ވަގުތީ ނަތީޖާ މިވަގުތާއި ހަމައަށް ދައްކާގޮތުން ޑރ.މުޢިއްޒު އަށް ލިބިވަޑައިގެންނެވީ 9305 ވޯޓެވެ. އަދި އަނަސް އަށް ލިބިވަޑިގެންނެވީ 5500 ވޯޓެވެ.
މީގެކުރިން މާލޭ ސިޓީގެ މޭޔަރުކަން ކުރައްވާފައިވަނީ އެމްޑީޕީގެ ބޭފުޅުންނެވެ. ވެރިކަންކުރާ ޕާޓީގެ ގޮތުގައި އެމްޑީޕީ އޮވެ ބޮޑުތަފާތަކުން މާލޭގެ މޭޔަރުކަން ނުލިބުން ގިނަބަޔަކު ސިފަކުރަނީ އެމްޑީޕީ އަށް ސަޕޯޓްކުރާ މީހުން ދުވަހެއް ދުވަހަކަށް މަދުވެ އެމްޑީޕީ އާއި ސަރުކާރަށް ސިޔާސީ ގޮތުން ލިބުނު ފޫނުބެއްދޭވަރުގެ ގެއްލުމެއްގެ ގޮތުގައެވެ. އަދި މިއީ އިދިކޮޅު ޕީޕީއެމް އަށް ލިބުނު ބޮޑު ކާމިޔާބެއްގެ ގޮތުގައި ގިނަބަޔަކު ގަބޫލުކުރެއެވެ.
